ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠥᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠢᠳᠡᠭᠡᠨ ᠤᠮᠳᠠᠭᠠᠨ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/10/9
                   ᠤᠯᠠᠭᠠᠨ ᠢᠳᠡᠭᠡᠨ      ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠰᠢᠭᠦᠰᠦ ᠲᠠᠯᠪᠢᠬᠤ ᠶᠤᠰᠤᠨ ᠳᠤ ᠵᠤᠮ᠎ᠠ ᠪᠦᠬᠦᠯᠢ ᠰᠢᠭᠦᠰᠦ᠂ ᠵᠠᠳᠠᠭᠠᠢ ᠰᠢᠭᠦᠰᠦ ᠲᠠᠯᠪᠢᠬᠤ ᠵᠡᠷᠭᠡ ᠶᠤᠰᠤᠨ ᠪᠠᠶᠢᠵᠤ᠂ ᠰᠢᠭᠦᠰᠦ ᠲᠠᠯᠪᠢᠭᠴᠢ ᠦᠪᠡᠷᠰᠡᠳ ᠤᠨ ᠬᠦᠰᠡᠯ ᠬᠡᠷᠡᠭᠴᠡᠭᠡ ᠪᠠᠨ ᠦᠨᠳᠦᠰᠦᠯᠡᠨ ᠠᠳᠠᠯᠢ ᠪᠤᠰᠤ ᠪᠠᠷ ᠲᠠᠯᠪᠢᠵᠤ᠂ ᠰᠢᠳᠦᠭᠡᠨ ᠢ ᠬᠦᠨᠳᠦᠯᠡᠵᠦ ᠭᠡᠶᠢᠴᠢ ᠪᠠᠨ ᠲᠤᠭᠤᠵᠤ ᠶᠤᠰᠤ ᠶᠠᠪᠤᠳᠠᠯ ᠢᠶᠠᠨ ᠭᠦᠢᠴᠡᠳᠬᠡᠳᠡᠭ ᠪᠠᠶᠢᠵᠠᠢ᠃      ᠵᠤᠮ᠎ᠠ ᠵᠤᠭᠤᠬᠤ᠄ ᠵᠤᠮ᠎ᠠ ᠪᠤᠯ ᠮᠤᠩᠭᠤᠯ ᠶᠤᠰᠤᠨ ᠤ ᠶᠡᠭᠡ ᠲᠠᠶᠢᠯᠠᠯᠭ᠎ᠠ ᠳᠤ ᠬᠠᠮᠤᠭ ᠤᠨ ᠬᠦᠨᠳᠦᠳᠡᠢ ᠲᠠᠶᠢᠯᠠᠯᠭ᠎ᠠ ᠳᠤ ᠲᠤᠭᠠᠴᠠᠭᠳᠠᠬᠤ ᠢᠳᠡᠭᠡᠨ ᠪᠤᠯᠬᠤ ᠪᠦᠭᠡᠳ ᠡᠵᠡᠨ᠎ᠡ ᠳᠤ ᠭᠤᠤᠯᠳᠠᠭᠤ ᠪᠤᠷᠬᠠᠨ ᠰᠢᠳᠦᠭᠡᠨ ᠳᠤ ᠲᠠᠯᠪᠢᠨ᠂ ᠬᠤᠯᠠ ᠭᠠᠵᠠᠷ ᠤᠨ ᠸᠠᠩ ᠨᠤᠶᠠᠳ ᠤᠨ ᠵᠢᠯ ᠴᠠᠭ᠎ᠠ ᠶᠢᠨ ᠠᠮᠤᠷ ᠠᠮᠤᠭᠤᠯᠠᠩ ᠠᠶᠢᠯᠠᠳᠬᠠᠬᠤ ᠳᠤ ᠬᠦᠨᠳᠦ ᠶᠢᠨ ᠪᠡᠯᠡᠭ ᠪᠤᠯᠭᠠᠨ ᠬᠦᠷᠭᠡᠳᠡᠭ ᠪᠠᠶᠢᠵᠠᠢ᠃ ᠵᠤᠮ᠎ᠠ ᠭᠡᠵᠦ ᠢᠷᠭᠡ ︵ᠬᠤᠨᠢ︶᠎ ᠶᠢ ᠦᠷᠦᠴᠡᠯᠡᠨ ᠨᠢᠳᠦᠯᠵᠦ ᠭᠡᠳᠡᠰᠦ ᠲᠤᠳᠤᠷ ᠢ ᠨᠢ ᠠᠭᠤᠳᠠᠯᠯᠠᠨ ᠭᠠᠷᠭᠠᠵᠤ᠂ ᠤᠰᠤ ᠪᠠᠷ ᠴᠢᠰᠤ ᠰᠢᠭᠦᠰᠦ ᠶᠢ ᠨᠢ ᠤᠭᠢᠶᠠᠨ ᠴᠡᠪᠡᠷᠯᠡᠭᠡᠳ ᠭᠡᠳᠡᠰᠦ ᠶᠢ ᠪᠤᠴᠠᠭᠠᠨ ᠤᠶᠤᠵᠤ ᠪᠤᠴᠠᠯᠤᠭᠰᠠᠨ ᠤᠰᠤ ᠲᠠᠢ ᠲᠤᠮᠤ ᠲᠤᠭᠤᠭᠠᠨ ᠳᠤ ᠬᠢᠵᠦ ᠵᠤᠮᠠᠯᠠᠨ᠂ ᠦᠰᠦ ᠨᠤᠤᠰᠤ ᠶᠢ ᠨᠢ ᠲᠤᠰᠬᠠᠢ ᠪᠡᠯᠡᠳᠦᠭᠰᠡᠨ ᠮᠤᠳᠤᠨ ᠰᠢᠨᠠᠭ᠎ᠠ ᠪᠠᠷ ᠬᠤᠰᠤᠵᠤ ᠠᠪᠤᠨ ᠲᠤᠭᠤᠭᠠᠨ ᠠᠴᠠ ᠭᠠᠷᠭᠠᠨ ᠵᠤᠭᠰᠤᠭ᠎ᠠ ᠬᠤᠨᠢ ᠶᠢᠨ ᠶᠠᠩᠵᠤ ᠪᠠᠷ ᠡᠪᠯᠡᠨ ᠲᠠᠯᠪᠢᠬᠤ ᠪᠤᠶᠤ ᠲᠤᠮᠤ ᠴᠠᠷ᠎ᠠ ᠳᠤ ᠬᠡᠪᠳᠡᠭᠦᠯᠦᠨ ᠲᠠᠯᠪᠢᠬᠤ ᠶᠢ ᠬᠡᠯᠡᠨ᠎ᠡ᠃ ᠬᠠᠯᠠᠭᠤᠨ ᠤᠰᠤ ᠪᠠᠷ ᠵᠤᠮᠠᠯᠠᠵᠤ ᠨᠤᠤᠰᠤ ᠶᠢ ᠨᠢ ᠠᠪᠳᠠᠭ ᠪᠤᠯᠬᠤᠷ ᠵᠤᠮ᠎ᠠ ᠬᠤᠨᠢ ᠪᠤᠶᠤ ᠵᠤᠮ᠎ᠠ ᠭᠡᠮᠡᠨ ᠨᠡᠷᠡᠯᠡᠭᠰᠡᠨ ᠪᠤᠯᠤᠯᠳᠠᠢ᠃ ᠰᠦᠮ᠎ᠡ ᠭᠡᠶᠢᠳ ᠤᠨ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠪᠤᠷᠬᠠᠨ ᠰᠠᠬᠢᠭᠤᠰᠤ ᠶᠢᠨ ᠴᠤᠩᠭᠢᠷ ᠲᠤ ᠲᠡᠭᠡᠳᠦ ᠶᠢᠨ ᠢᠳᠡᠭᠡᠨ ᠪᠤᠯᠭᠠᠨ᠂ ᠵᠤᠮᠠᠯᠠᠭᠰᠠᠨ ᠬᠤᠨᠢᠨ ᠲᠤᠯᠤᠭᠠᠢ ᠶᠢᠨ ᠭᠠᠳᠠᠷ ᠡᠪᠡᠷ ᠢ ᠠᠪᠴᠤ᠂ ᠴᠢᠬᠢ ᠬᠠᠮᠠᠷ ᠡᠪᠡᠷ ᠮᠠᠩᠨᠠᠢ ᠶᠢ ᠰᠢᠷ᠎ᠠ ᠲᠤᠰᠤ ᠪᠤᠶᠤ ᠴᠠᠭᠠᠨ ᠲᠤᠰᠤ ᠪᠠᠷ ᠴᠢᠮᠡᠨ᠂ ᠲᠠᠪᠤᠨ ᠦᠩᠭᠡ ᠶᠢᠨ ᠭᠭᠢᠪ ᠢ       ᠬᠦᠵᠦᠭᠦᠨ ᠳᠤᠨᠢ ᠤᠶᠠᠵᠤ᠂ ᠡᠪᠡᠷ ᠲᠡᠭᠡᠷ᠎ᠡ ᠨᠢ ᠪᠠᠰᠠ ᠨᠢᠬᠡ ᠬᠠᠳᠠᠭ ᠲᠤᠬᠤᠭᠠᠳ᠂ ᠶᠡᠭᠡ ︵ᠴᠤᠭᠴᠢᠨ︶       ᠲᠤᠭᠠᠩ ᠤᠨ ᠲᠤᠮᠤ ᠪᠤᠷᠬᠠᠳ ᠤᠨ ᠡᠮᠦᠨ᠎ᠡ ᠤᠯᠠᠭᠠᠨ ᠢᠰᠡᠭᠡᠢ ᠲᠡᠪᠢᠰᠦᠨ ᠲᠡᠭᠡᠷ᠎ᠡ ᠨᠢ ᠵᠤᠮ᠎ᠠ ᠬᠤᠨᠢ ᠪᠠᠨ ᠡᠪᠯᠡᠨ ᠵᠤᠭᠰᠤᠭᠠᠬᠤ ᠪᠦᠭᠡᠳ ᠬᠤᠷᠠᠯ ᠤᠨ ᠤᠩᠰᠢᠯᠭ᠎ᠠ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠦᠶ᠎ᠡ ᠮᠦᠴᠢ ᠪᠠᠷ ᠨᠢ ᠰᠠᠯᠭᠠᠨ ᠴᠢᠨᠠᠵᠤ ᠪᠦᠬᠦ ᠯᠠᠮᠠ ᠳᠠᠭᠠᠨ ᠬᠤᠪᠢᠶᠠᠨ ᠦᠭᠴᠦ ᠠᠮᠰᠠᠭᠤᠯᠳᠠᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃      ᠪᠦᠬᠦᠯᠢ ᠰᠢᠭᠦᠰᠦ ᠲᠠᠯᠪᠢᠬᠤ᠄ ᠪᠦᠬᠦᠯᠢ ᠰᠢᠭᠦᠰᠦ ᠭᠡᠳᠡᠭ ᠪᠤᠯ ᠤᠭᠤᠴᠠᠨ ᠤ ᠢᠪᠡᠯᠭᠡ ᠳᠤ ᠬᠠ       ᠭᠤᠶ᠎ᠠ ︵ᠭᠤᠶ᠎ᠠ ᠶᠢᠨ ᠮᠢᠬᠠᠨ ᠤ ᠶᠡᠬᠡᠩᠬᠢ ᠨᠢ ᠤᠭᠤᠴᠠ ᠳᠤ ᠶᠠᠪᠤᠳᠠᠭ︶᠎ ᠶᠢ ᠮᠥᠴᠢᠯᠡᠬᠦ ᠦᠭᠡᠢ ᠪᠦᠳᠦᠨ       ᠶᠤᠰᠤ ᠪᠠᠷ ᠨᠢ ᠲᠠᠯᠪᠢᠭᠠᠳ ᠲᠡᠭᠡᠷ᠎ᠡ ᠨᠢ ᠤᠭᠤᠴᠠ ᠪᠠᠨ ᠬᠦᠮᠦᠷᠢᠵᠦ ᠲᠠᠯᠪᠢᠬᠤ ᠶᠢ ᠬᠡᠯᠡᠨ᠎ᠡ᠃ ᠲᠡᠭᠦᠨ ᠢ ᠭᠤᠤᠯᠳᠠᠭᠤ ᠰᠦᠮ᠎ᠡ ᠬᠡᠶᠢᠳ ᠤᠨ ᠠᠯᠳᠠᠨ ᠲᠠᠯᠠᠯᠭ᠎ᠠ᠂ ᠵᠢᠯ ᠴᠠᠭ᠎ᠠ ᠶᠢᠨ ᠴᠤᠩᠭᠢᠷ ᠲᠤ ᠵᠤᠷᠢᠭᠤᠯᠵᠤ ᠡᠷᠭᠦᠬᠦ ᠶᠢᠨ ᠬᠠᠮᠳᠤ ᠬᠤᠪᠢ ᠠᠶᠢᠯ ᠤᠨ ᠨᠠᠮᠤᠷ ᠤᠨ ᠲᠠᠯᠠᠯᠭ᠎ᠠ ᠳᠤ ᠪᠤᠷᠬᠠᠨ ᠰᠢᠳᠦᠭᠡᠨ᠂ ᠯᠠᠮᠠ ᠭᠡᠭᠡᠨ ᠳᠤ ᠵᠤᠷᠢᠭᠤᠯᠤᠨ ᠪᠠᠰᠠ ᠲᠠᠯᠪᠢᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠵᠤᠮᠠᠯᠠᠵᠤ ᠴᠢᠨᠠᠭᠰᠠᠨ ᠪᠤᠶᠤ ᠬᠤᠶᠢᠬᠠᠯᠠᠵᠤ ᠴᠢᠨᠠᠭᠰᠠᠨ ᠲᠤᠯᠤᠭᠠᠢ ︵ᠪᠦᠬᠦᠯᠢ ᠲᠤᠯᠤᠭᠠᠢ︶᠎ ᠲᠠᠢ ᠨᠢ ᠲᠠᠯᠪᠢᠨ᠎ᠠ᠃ ᠲᠡᠭᠡᠬᠦ ᠳᠡᠭᠡᠨ ᠲᠦᠷᠦ ᠶᠢᠨ ᠲᠦᠭᠡᠯ ᠲᠥᠬᠦᠷᠢᠭ᠂ ᠪᠤᠷᠬᠠᠨ ᠤ ᠲᠦᠭᠡᠯ ᠭᠤᠷᠪᠠᠯᠵᠢᠨ ᠭᠡᠳᠡᠭ ᠢᠶᠠᠷ ᠲᠦᠷᠦ ᠵᠠᠰᠠᠭ ᠤᠨ ᠨᠤᠶᠠᠳ ᠲᠦᠰᠢᠮᠡᠳ ᠲᠤ ᠵᠤᠷᠢᠭᠤᠯᠵᠤ ᠲᠠᠯᠪᠢᠭᠰᠠᠨ ᠲᠤᠯᠤᠭᠠᠢ ᠶᠢᠨ ᠮᠠᠩᠨᠠᠢ ᠳᠤ ᠲᠤᠭᠤᠢ ᠲᠡᠮᠳᠡᠭ ᠭᠠᠷᠭᠠᠵᠤ᠂ ᠪᠤᠷᠬᠠᠨ ᠱᠠᠵᠢᠨ ᠳᠤ ᠵᠤᠷᠢᠭᠤᠯᠤᠨ ᠲᠠᠯᠪᠢᠭᠰᠠᠨ ᠲᠤᠯᠤᠭᠠᠢ ᠶᠢᠨ       ᠮᠠᠩᠨᠠᠢ ᠳᠤ ᠭᠤᠷᠪᠠᠯᠵᠢᠨ ᠲᠡᠮᠳᠡᠭ ᠭᠠᠷᠭᠠᠨ ᠦᠬᠡᠬᠦ ᠲᠤᠰᠤ ᠪᠠᠷ ᠴᠢᠮᠡᠭᠯᠡᠨ ᠮᠢᠯᠢᠶᠠᠵᠤ ᠲᠠᠯᠪᠢᠳᠠᠭ ᠶᠤᠰᠤ ᠲᠠᠢ᠂ ᠡᠭᠦᠨ ᠢᠶᠠᠨ ᠲᠤᠯᠤᠭᠠᠢ ᠴᠢᠮᠡᠬᠦ ᠪᠠ ᠮᠢᠯᠢᠶᠠᠬᠤ ᠭᠡᠨ᠎ᠡ᠃ ᠬᠠᠷᠢᠨ ᠪᠦᠳᠦᠨ ᠰᠢᠭᠦᠰᠦ ᠶᠢ ᠭᠦᠢᠴᠡᠳ ᠪᠤᠯᠭᠤᠬᠤ ᠪᠤᠰᠤ ᠦᠩᠭᠡ ᠶᠢ ᠨᠢ ᠲᠦᠩᠭᠡᠵᠢ ᠬᠤᠪᠢᠷᠠᠭᠠᠭᠠᠳ ᠲᠠᠯᠪᠢᠬᠤ  ︵ᠪᠤᠷᠬᠠᠨ ᠰᠢᠳᠦᠭᠡᠨ᠂ ᠯᠠᠮᠠ ᠭᠡᠭᠡᠨ ᠳᠤ ᠵᠤᠷᠢᠭᠤᠯᠤᠨ ᠲᠠᠯᠪᠢᠭᠰᠠᠨ ᠵᠠᠳᠠᠭᠠᠢ ᠰᠢᠭᠦᠰᠦ ᠴᠤ ᠭᠡᠰᠡᠨ ᠠᠳᠠᠯᠢ︶ ᠪᠦᠭᠡᠳ ᠬᠤᠷᠠᠯ ᠨᠤᠮ ᠲᠠᠭᠤᠰᠤᠭᠰᠠᠨ ᠤ ᠲᠠᠷᠠᠭ᠎ᠠ ᠮᠦᠴᠢᠯᠡᠨ ᠰᠠᠯᠭᠠᠵᠤ ᠴᠢᠨᠠᠨ ᠲᠠᠬᠢᠨᠳᠠ ᠲᠠᠪᠠᠭᠯᠠᠵᠤ ︵ᠲᠠᠷᠤᠢ ᠵᠠᠳᠠᠭᠠᠢ ᠰᠢᠭᠦᠰᠦ ᠪᠤᠯᠭᠠᠨ︶ ᠯᠠᠮᠠ ᠭᠡᠭᠡᠨ ᠳᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠵᠤ᠂ ᠰᠢᠭᠦᠰᠦ ᠬᠦᠨᠳᠡᠬᠦ ᠬᠦᠮᠦᠨ ᠠᠴᠠ ᠤᠭᠤᠴᠠ ᠵᠦᠰᠦᠬᠦ ᠶᠤᠰᠤ ︵ᠵᠠᠳᠠᠭᠠᠢ ᠰᠢᠭᠦᠰᠦᠨ ᠤ ᠵᠦᠰᠦᠯᠳᠡ ᠲᠠᠢ ᠠᠳᠠᠯᠢ︶ ᠭᠦᠢᠴᠡᠳᠬᠡᠨ᠂ ᠰᠡᠭᠦᠯ ᠢ ᠨᠢ ᠪᠦᠬᠦᠨ ᠢ ᠪᠤᠶᠤ ᠬᠠᠭᠠᠰ ᠢ ᠤᠭᠳᠤᠯᠤᠨ ᠠᠪᠴᠤ ᠬᠤᠶᠠᠷ ᠦᠨᠳᠦᠷ ᠬᠠᠪᠢᠰᠥ ︵ᠬᠠᠪᠢᠷᠭ᠎ᠠ︶᠎ ᠲᠠᠢ ᠬᠠᠮᠳᠤ ᠰᠠᠬᠢᠭᠤᠰᠤ ᠰᠢᠳᠦᠭᠡᠨ ᠳᠤ ᠲᠠᠪᠠᠭᠯᠠᠨ ᠲᠠᠯᠪᠢᠵᠤ᠂ ᠪᠤᠰᠤᠳ ᠮᠢᠬ᠎ᠠ ᠶᠢ ᠴᠤᠩᠭᠢᠷ ᠤᠨ ᠤᠨᠳᠤᠤ ᠢᠳᠡᠭᠡᠨ ᠲᠠᠢ ᠬᠠᠮᠳᠤ ᠬᠤᠪᠢᠶᠠᠯᠴᠠᠨ ᠢᠳᠡᠵᠡᠭᠡᠨ᠎ᠡ᠃      ᠪᠦᠬᠦᠯᠢ ᠪᠠ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠳᠤ ᠲᠠᠯᠪᠢᠬᠤ ᠤᠭᠤᠴᠠ ᠶᠢᠨ ᠬᠡᠰᠡᠭ ᠲᠤ ᠰᠦᠪᠡᠭᠡ ᠶᠢᠨ ᠵᠢᠷᠭᠤᠭᠠᠨ ᠬᠠᠪᠢᠰᠤ ︵ᠨᠢᠭᠡ ᠲᠠᠯ᠎ᠠ ᠳᠤᠨᠢ ᠭᠤᠷᠪᠠ︶᠎ ᠶᠢᠨ ᠬᠡᠰᠡᠭ᠂ ᠦᠭᠡᠷ᠎ᠡ ᠪᠠᠷ ᠬᠡᠯᠡᠪᠡᠯ ᠬᠠᠷ᠎ᠠ ᠨᠢᠷᠤᠭᠤᠨ ᠠᠴᠠ ᠰᠡᠭᠦᠯ ᠬᠦᠷᠳᠡᠯᠡᠬᠢ ᠬᠡᠰᠡᠭ ︵ᠰᠡᠭᠦᠯ ᠪᠠᠭᠳᠠᠨ᠎ᠠ︶ ᠪᠦᠷ ᠪᠠᠭᠳᠠᠬᠤ ᠪᠦᠭᠡᠳ ᠪᠦᠬᠦᠯᠢ ᠵᠠᠳᠠᠭᠠᠢ ᠰᠢᠭᠦᠰᠦ ᠶᠢ ᠠᠩᠬᠠᠨ ᠎ ᠳᠠᠭᠠᠨ ᠵᠤᠭᠤᠴᠠ  ᠵᠤᠭᠤᠨ᠎ᠠ ᠭᠡᠵᠦ ᠪᠠᠶᠢᠭᠠᠳ ᠤᠳᠤ ᠤᠯᠠᠩᠬᠢ ᠨᠢ ᠤᠭᠤᠴᠠ ᠵᠤᠭᠤᠨ᠎ᠠ ᠭᠡᠳᠡᠭ ᠪᠤᠯᠵᠠᠢ᠃      ᠵᠠᠳᠠᠭᠠᠢ ᠰᠢᠭᠦᠰᠦ ᠲᠠᠯᠪᠢᠬᠤ᠄ ᠵᠠᠳᠠᠭᠠᠢ ᠰᠢᠭᠦᠰᠦ ᠭᠡᠵᠦ ᠤᠭᠤᠴᠠᠨ ᠤ ᠢᠪᠡᠯᠭᠡ ᠳᠤ ᠬᠠ ᠭᠤᠶ᠎ᠠ ᠶᠢ ᠦᠶ᠎ᠡ ᠮᠦᠴᠢ ᠪᠠᠷ ᠨᠢ ᠰᠠᠯᠭᠠᠵᠤ ᠲᠠᠯᠪᠢᠭᠠᠳ ᠲᠡᠭᠡᠷ᠎ᠡ ᠠᠴᠠ ᠨᠢ ᠤᠭᠤᠴᠠ ᠪᠠᠨ ᠬᠦᠮᠦᠷᠢᠵᠦ ᠲᠠᠯᠪᠢᠬᠤ ᠶᠢ ᠬᠡᠯᠡᠨ᠎ᠡ᠃ ᠪᠠᠰᠠ ᠡᠩ ᠤᠨ ᠤᠭᠤᠴᠠ᠂ ᠶᠡᠷᠦ ᠶᠢᠨ ᠤᠭᠤᠴᠠ ᠭᠡᠳᠡᠭ᠃ ᠡᠭᠦᠨ ᠢ ᠭᠤᠤᠯᠳᠠᠭᠤ ᠬᠤᠷᠢᠮ ᠬᠤᠢ᠂ ᠵᠢᠰᠢᠶ᠎ᠡ ᠲᠠᠯᠠᠯᠭ᠎ᠠ᠂ ᠤᠪᠤᠭᠠᠨ ᠲᠠᠬᠢᠯᠭ᠎ᠠ᠂ ᠦᠷᠡᠰ ᠨᠠᠶᠢᠷ᠂ ᠵᠢᠯ ᠴᠠᠭ᠎ᠠ᠂ ᠨᠤᠶᠠᠳ ᠬᠡᠬᠡᠳ ᠤᠨ ᠪᠠᠶᠠᠷ᠂ ᠬᠤᠳᠠ       ᠤᠷᠤᠭ ᠤᠨ ᠵᠤᠯᠭᠠᠯᠳᠠ ᠵᠡᠷᠭᠡ ᠪᠠᠶᠠᠷ ᠨᠠᠶᠢᠷ ᠶᠤᠰᠤ ᠶᠠᠪᠤᠳᠠᠯ ᠳᠤ ᠵᠤᠷᠢᠭᠤᠯᠤᠨ ᠲᠠᠯᠪᠢᠬᠤ ᠪᠦᠭᠡᠳ ᠪᠦᠬᠦᠯᠢ ᠰᠢᠭᠦᠰᠦ ᠶᠢ ᠪᠤᠳᠤᠪᠠᠯ ᠬᠡᠷᠡᠭᠯᠡᠭᠳᠡᠬᠦ ᠬᠡᠪᠴᠢᠶ᠎ᠡ ᠪᠠᠷ ᠦᠷᠭᠡᠨ ᠪᠠᠶᠢᠳᠠᠭ ᠪᠠᠶᠢᠵᠠᠢ᠃ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠳᠤ ᠬᠤᠨᠢᠨ ᠲᠤᠯᠤᠭᠠᠢ ᠲᠠᠭᠠᠭᠤᠯᠵᠤ ᠲᠠᠯᠪᠢᠬᠤ ᠪᠠ ᠦᠯᠦ ᠲᠠᠯᠪᠢᠬᠤ ᠬᠤᠶᠠᠷ ᠶᠠᠩᠵᠤ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃ ᠵᠠᠳᠠᠭᠠᠢ ᠰᠢᠭᠦᠰᠦ ᠲᠠᠪᠠᠭᠯᠠᠬᠤ ᠳᠠᠭᠠᠨ ᠬᠦᠵᠦᠭᠦᠦ ᠠᠴᠠ ᠪᠤᠰᠤ ᠮᠢᠬ᠎ᠠ ︵ᠵᠠᠷᠢᠮ ᠨᠢ ᠰᠡᠭᠦᠵᠢ ᠲᠠᠯᠪᠢᠳᠠᠭ ᠦᠭᠡᠢ ᠭᠡᠵᠦ ᠪᠤᠢ᠂ ᠭᠡᠶ᠎ᠡ ᠴᠦᠬᠡᠨ︶᠎ ᠶᠢ ᠪᠦᠷ ᠲᠠᠯᠪᠢᠬᠤ ᠮᠦᠷᠳᠡᠭᠡᠨ ᠪᠦᠳᠦᠨ ᠰᠡᠭᠡᠷ ᠢ ᠤᠭᠤᠴᠠᠨ ᠤ ᠲᠤᠯᠤᠭᠠᠢ ᠲᠠᠯ᠎ᠠ ᠳᠤ ᠲᠡᠪᠢᠰᠭᠡᠷ ᠪᠤᠯᠭᠠᠨ ᠬᠦᠨᠳᠡᠯᠡᠨ ᠲᠠᠯᠪᠢᠵᠤ ︵ᠰᠡᠭᠡᠷ ᠤᠨ ᠰᠢᠯᠢ ᠶᠢ ᠲᠤᠳᠤᠭᠰᠢ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠨ᠎ᠠ︶᠂ ᠪᠤᠰᠤᠳ       ᠮᠢᠬ᠎ᠠ ᠶᠢ ᠮᠠᠯ ᠤᠨ ᠠᠮᠢᠳᠤ ᠪᠠᠶᠢᠬᠤ ᠶᠠᠩᠵᠤ ᠪᠠᠷ ᠪᠠᠶᠢᠷᠢᠰᠢᠭᠤᠯᠤᠨ ᠲᠠᠯᠪᠢᠨ᠎ᠠ᠃ ᠶᠡᠷᠦᠩᠭᠡᠢ ᠳᠡᠭᠡᠨ ᠮᠦᠴᠢ ᠪᠤᠯᠭᠠᠨ ᠤ ᠨᠠᠷᠢᠨ ᠲᠠᠯ᠎ᠠ ᠶᠢ ᠨᠢᠭᠡ ᠵᠦᠭ ᠲᠤ ᠬᠠᠨᠳᠤᠭᠤᠯᠤᠨ ᠲᠡᠰ ᠲᠠᠷᠠᠭ᠎ᠠ ᠲᠠᠢ ᠲᠠᠯᠪᠢᠳᠠᠭ ᠪᠥᠬᠡᠳ ᠲᠡᠷᠡ ᠲᠠᠯ᠎ᠠ ᠶᠢ ᠭᠡᠶᠢᠴᠢ ᠲᠠᠯ᠎ᠠ ᠬᠠᠨᠳᠤᠭᠤᠯᠬᠤ ᠶᠤᠰᠤ ᠲᠠᠢ᠃ ᠡᠶᠢᠮᠦᠷᠬᠦ ᠤᠭᠤᠴᠠᠨ ᠤ ᠲᠡᠪᠢᠰᠭᠡᠷ ᠮᠢᠬ᠎ᠠ ᠶᠢ       ᠤᠭᠤᠴᠠᠨ ᠤ ᠢᠪᠡᠯᠭᠡ ᠶᠢᠨ ᠮᠢᠬ᠎ᠠ ᠭᠡᠳᠡᠭ᠃ ᠢᠪᠡᠯᠭᠡ ᠶᠢᠨ ᠮᠢᠬ᠎ᠠ ᠶᠢ ᠲᠠᠪᠠᠭ ᠲᠦᠭᠦᠷᠭᠡᠵᠦ ᠲᠠᠯᠪᠢᠬᠤ         ᠶᠤᠰᠤ ᠲᠠᠢ᠂ ᠦᠭᠡᠢ ᠪᠤᠯ ᠤᠭᠤᠴᠠ ᠬᠦᠨᠳᠡᠶᠢᠷᠡᠵᠦ ᠬᠦᠨᠳᠦ ᠪᠠᠨ ᠠᠯᠳᠠᠨ᠎ᠠ ᠭᠡᠳᠡᠭ᠃ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠤ ᠢᠪᠡᠯᠭᠡ ᠶᠢᠨ ᠮᠢᠬ᠎ᠠ ᠳᠤ ᠵᠠᠪᠠᠯ ᠬᠤᠶᠠᠷ ᠬᠠ ᠬᠤᠶᠠᠷ ᠭᠤᠶ᠎ᠠ ᠲᠠᠯᠪᠢᠬᠤ ᠠᠯᠪᠠ ᠦᠭᠡᠢ᠂ ᠭᠡᠶᠢᠴᠢ ᠶᠢᠨ ᠤᠯᠠᠨ ᠴᠦᠬᠡᠨ ᠢ ᠦᠨᠳᠦᠰᠦᠯᠡᠵᠦ ᠬᠤᠶᠠᠷ ᠬᠠ ᠨᠢᠭᠡ ᠭᠤᠶ᠎ᠠ᠂ ᠨᠢᠭᠡ ᠬᠠ ᠨᠢᠭᠡ ᠭᠤᠶ᠎ᠠ ᠭᠡᠬᠦ ᠮᠡᠳᠦ ᠪᠠᠷ ᠵᠤᠬᠢᠴᠠᠭᠤᠯᠤᠨ ᠲᠠᠯᠪᠢᠳᠠᠭ ᠪᠠᠶᠢᠵᠠᠢ᠃ ᠢᠪᠡᠯᠭᠡ ᠶᠢᠨ ᠮᠢᠬ᠎ᠠ ᠳᠤ ᠪᠤᠭᠤᠨᠢ ᠬᠠᠪᠢᠰᠤ ᠲᠠᠯᠪᠢᠬᠤ ᠦᠭᠡᠢ᠂ ᠡᠪᠴᠢᠭᠦᠨ ᠤ ᠪᠦᠳᠦᠷᠬᠡᠢ᠂ ᠲᠠᠯᠤ ᠶᠢᠨ ᠮᠦᠭᠡᠷᠰᠦ᠂ ᠲᠤᠮᠳᠠ ᠴᠢᠮᠦᠭᠡᠨ ᠤ ᠬᠤᠯᠠᠭᠠᠢ ᠪᠤᠯᠴᠢᠩ᠂ ᠱᠠᠭ᠎ᠠ ᠴᠢᠮᠦᠭᠡᠨ ︵ᠲᠤᠰ ᠴᠢᠮᠦᠭᠡᠨ ᠤ ᠭᠠᠳᠠᠷ ᠬᠠᠯᠢᠰᠤ ᠶᠢ ᠱᠠᠭᠠᠯᠵᠤ ᠲᠠᠯᠪᠢᠬᠤ ᠶᠤᠰᠤ ᠲᠠᠢ ᠪᠠᠶᠢᠵᠠᠢ︶᠎ ᠤ ᠬᠠᠷ᠎ᠠ ᠪᠤᠷᠪᠢ ᠵᠡᠷᠭᠡ ᠶᠢ ᠠᠪᠴᠤ ᠲᠠᠯᠪᠢᠬᠤ ᠶᠤᠰᠤ ᠲᠠᠢ ᠪᠦᠭᠡᠳ ᠵᠠᠯᠠᠭ᠎ᠠ ᠴᠢᠮᠦᠭᠡ   ︵ᠤᠯᠠᠩᠬᠢ ᠪᠠᠶᠢᠳᠠᠯ ᠲᠤᠤᠷ᠎ᠠ ᠲᠠᠯᠪᠢᠳᠠᠭ ᠦᠭᠡᠢ ᠪᠠᠶᠢᠭᠰᠠᠨ         ᠭᠡᠳᠡᠭ︶᠎ ᠶᠢᠨ ᠦᠪᠦᠷ ᠲᠠᠯ᠎ᠠ ᠶᠢᠨ ᠪᠤᠯᠴᠢᠩ ᠢ ᠵᠠᠪᠠᠯ ᠭᠤᠷᠪᠠ ᠤᠭᠳᠤᠯᠵᠤ᠂ ᠠᠷᠤ ᠲᠠᠯ᠎ᠠ ᠶᠢᠨ ᠭᠡᠵᠢᠭᠡ ᠮᠢᠬ᠎ᠠ ᠶᠢ ᠠᠪᠴᠤ ᠲᠠᠯᠪᠢᠬᠤ ᠴᠡᠭᠡᠷ ᠶᠤᠰᠤ ᠲᠠᠢ ᠪᠠᠶᠢᠭᠰᠠᠨ᠂ ᠡᠶᠢᠮᠦ ᠶᠤᠰᠤ ᠶᠢ ᠲᠠᠯᠤ ᠪᠠ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠲᠠᠪᠠᠭ ᠮᠢᠬ᠎ᠠ ᠳᠤ ᠴᠤ ᠭᠡᠰᠡᠨ ᠠᠳᠠᠯᠢ ᠵᠢᠷᠤᠮᠯᠠᠨ᠎ᠠ᠃ ᠤᠭᠤᠴᠠ ᠲᠠᠯᠪᠢᠬᠤ ᠲᠤᠭᠳᠠᠭᠰᠠᠨ ᠶᠤᠰᠤ ᠵᠢᠷᠤᠮ ᠢ ᠵᠦᠷᠢᠴᠡᠵᠦ ᠪᠤᠷᠤᠭᠤ ᠲᠠᠯᠪᠢᠭᠰᠠᠨ ᠪᠤᠯ ᠦᠩᠭᠡᠷᠡᠭᠰᠡᠨ ᠳᠤ ᠬᠤᠷᠢᠮ ᠨᠠᠶᠢᠷ᠂ ᠲᠠᠭᠠᠬᠢ᠂ ᠵᠢᠰᠢᠶ᠎ᠡ ᠲᠠᠬᠢᠬᠤ       ᠵᠡᠷᠭᠡ ᠳᠤ ᠠᠭᠰᠤᠮ ᠲᠠᠯᠪᠢᠬᠤ᠂ ᠬᠡᠷᠡᠭᠦᠯ ᠴᠤᠤᠭᠢᠶᠠᠨ ᠪᠤᠯᠬᠤ᠂ ᠤᠭᠤᠴᠠ ᠰᠢᠭᠦᠰᠦᠨ ᠤ ᠲᠠᠪᠠᠭ ᠢᠳᠡᠭᠡ ᠬᠦᠮᠦᠷᠢᠬᠦ ᠶᠠᠷᠰᠢᠭ ᠲᠦᠪᠡᠭ ᠲᠠᠢ ᠤᠴᠢᠷ ᠭᠠᠷᠳᠠᠭ ᠪᠠᠶᠢᠵᠠᠢ᠃      ᠢᠪᠡᠯᠭᠡ ᠶᠢᠨ ᠮᠢᠬ᠎ᠠ ᠶᠢ ᠰᠠᠶᠢᠳᠤᠷ ᠪᠠᠶᠢᠷᠢᠰᠢᠭᠤᠯᠤᠭᠰᠠᠨ ᠤ ᠲᠠᠷᠠᠭ᠎ᠠ ᠤᠭᠤᠴᠠ ᠶᠢ ᠲᠡᠭᠡᠷ᠎ᠡ ᠠᠴᠠ ᠨᠢ ᠪᠦᠷᠬᠦᠵᠦ ᠦᠭᠭᠦᠨ᠎ᠡ᠂ ᠲᠡᠭᠡᠬᠦ ᠳᠡᠭᠡᠨ ᠤᠭᠤᠴᠠ ᠶᠢ ᠰᠡᠭᠦᠯ ᠲᠠᠢ ᠨᠢ ᠪᠦᠭᠦᠳᠡ ᠶᠢ ᠬᠠᠯᠢᠮᠯᠠᠵᠤ ᠲᠠᠯᠪᠢᠨ᠎ᠠ᠃ ᠤᠭᠤᠴᠠ ᠰᠡᠭᠦᠯ ᠬᠠᠯᠢᠮᠯᠠᠨ᠎ᠠ ᠭᠡᠵᠦ ᠤᠭᠤᠴᠠ ᠭᠢᠭᠡᠳ ᠰᠡᠭᠦᠯ ᠤᠨ ᠬᠡᠰᠡᠭ ᠤᠨ ᠭᠠᠳᠠᠷ ᠬᠦᠷᠦᠰᠦ ᠶᠢ ᠪᠦᠬᠦᠨ ᠢ ᠱᠠᠭᠠᠯᠵᠤ ᠠᠪᠬᠤ ᠶᠢ ᠬᠡᠯᠡᠨ᠎ᠡ᠃ ᠬᠠᠯᠢᠮᠯᠠᠬᠤ ᠳᠠᠭᠠᠨ ᠤᠭᠤᠴᠠ ᠰᠡᠭᠦᠯ ᠤᠨ ᠪᠤᠰᠤᠳ ᠮᠢᠬ᠎ᠠ ᠦᠬᠡᠭᠦ ᠶᠢ ᠤᠭᠳᠤᠯᠵᠤ ᠬᠡᠮᠳᠦᠭᠡᠬᠦ ᠠᠴᠠ ᠶᠡᠬᠡᠳᠡ ᠬᠢᠴᠢᠶᠡᠨ᠎ᠡ᠃ ᠲᠤᠰ ᠦᠢᠯᠡ ᠶᠢ ᠪᠦᠬᠦᠯᠢ ᠰᠢᠭᠦᠰᠦᠨ ᠳᠤ ᠴᠤ ᠮᠦᠨ ᠭᠦᠢᠴᠡᠳᠬᠡᠨ᠎ᠡ᠃ ᠶᠠᠭᠤᠨ ᠳᠤ ᠤᠭᠤᠴᠠ ᠰᠡᠭᠦᠯ ᠬᠠᠯᠢᠮᠯᠠᠬᠤ ᠪᠤᠯᠤᠭᠰᠠᠨ ᠲᠤᠬᠠᠢ ᠨᠠᠰᠤᠳᠠᠢ ᠪᠤᠭᠤᠷᠤᠯ ᠤᠳ ᠤᠨ ᠤᠯᠠᠩᠬᠢ ᠨᠢ ᠰᠠᠬᠢᠭᠤᠰᠤ ᠪᠤᠶᠤ ᠭᠡᠶᠢᠴᠢ ᠪᠠᠨ ᠤᠯᠠᠮ ᠬᠦᠨᠳᠦᠯᠡᠵᠦ ᠪᠠᠶᠢᠬᠤ ᠤᠬᠠᠭ᠎ᠠ ᠲᠠᠢ ᠬᠡᠮᠡᠨ ᠬᠠᠭᠤᠴᠢᠯᠠᠵᠤ ᠪᠠᠶᠢᠭᠰᠠᠨ᠃ ᠬᠠᠯᠢᠮᠯᠠᠭᠰᠠᠨ ᠤᠭᠤᠴᠠ ᠶᠢᠨ ᠲᠡᠭᠡᠷ᠎ᠡ ᠪᠦᠬᠦᠯᠢ ᠲᠤᠯᠤᠭᠠᠢ ᠪᠤᠶᠤ ᠵᠠᠷᠢᠮ ᠨᠢ ᠳᠠᠯᠤ ᠲᠦᠷᠪᠡᠨ ᠦᠨᠳᠦᠷ ᠲᠠᠯᠪᠢᠨ ᠭᠡᠶᠢᠴᠢ ᠶᠢᠨ ᠭᠡᠷ ᠪᠤᠶᠤ ᠪᠤᠷᠬᠠᠨ ᠰᠠᠬᠢᠭᠤᠰᠤᠨ ᠤ ᠲᠤᠭᠠᠩ ᠳᠤ ᠤᠷᠤᠭᠤᠯᠤᠨ᠂ ᠲᠤᠮᠤ       ᠰᠢᠷᠡᠭᠡᠨ ᠳᠤ ᠰᠢᠭᠦᠰᠦᠨ ᠤ ᠲᠤᠯᠤᠭᠠᠢ ᠲᠠᠯ᠎ᠠ ᠶᠢ ᠭᠤᠤᠯ ᠭᠡᠶᠢᠴᠢ ᠡᠰᠡᠭᠦᠯ᠎ᠡ ᠰᠢᠳᠦᠭᠡᠨ ᠳᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠨ᠎ᠠ᠂ ᠸᠠᠩ ᠨᠤᠶᠠᠨ᠂ ᠭᠡᠭᠡᠨ ᠬᠤᠪᠢᠯᠭᠠᠳ᠂ ᠰᠦᠮ᠎ᠡ ᠬᠡᠶᠢᠳ ᠤᠨ ᠴᠤᠩᠬᠢᠷ ᠲᠤ ᠵᠤᠷᠢᠭᠤᠯᠤᠨ       ᠲᠠᠯᠪᠢᠭᠰᠠᠨ ᠪᠤᠯ ᠤᠭᠤᠴᠠ ᠤᠷᠤᠯᠳᠤᠬᠤ ᠬᠦᠮᠦᠨ ᠵᠠᠪᠠᠯ ᠠᠮᠠ ᠪᠠᠨ ᠶᠠᠭᠤᠮ᠎ᠠ ᠪᠠᠷ ᠲᠠᠷᠤᠵᠤ ᠤᠷᠤᠭᠤᠯᠬᠤ ᠶᠤᠰᠤ ᠎ ᠲᠠᠢ ᠪᠠᠶᠢᠭᠰᠠᠨ ᠭᠡᠳᠡᠭ᠃ ᠪᠤᠷᠬᠠᠨ ᠰᠢᠳᠦᠭᠡᠨ᠂ ᠭᠡᠭᠡᠨ ᠬᠤᠪᠢᠯᠭᠠᠳ᠂ ᠤᠪᠤᠭᠠᠨ ᠲᠠᠬᠢᠯᠭ᠎ᠠ ᠠᠴᠠ ᠪᠤᠰᠤᠳ ᠨᠠᠶᠢᠷ ᠨᠠᠭᠠᠳᠤᠮ ᠳᠤ ᠪᠤᠯ ᠤᠭᠤᠴᠠ ᠪᠠᠨ ᠭᠤᠤᠯ ᠭᠡᠶᠢᠴᠢ ᠳᠤ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠭᠠᠳ ᠭᠡᠷ ᠤᠨ ᠡᠵᠡᠨ ᠭᠡᠶᠢᠴᠢ ᠤᠯᠠᠨ ᠳᠠᠭᠠᠨ ᠲᠠᠷᠠᠭ᠂ ᠠᠷᠢᠬᠢ ᠪᠠᠨ ᠴᠠᠴᠤᠵᠤ ᠡᠬᠢᠯᠡᠨ᠎ᠡ᠃ ᠭᠤᠤᠯ ᠭᠡᠶᠢᠴᠢ ᠬᠦᠮᠦᠨ ᠲᠠᠪᠠᠭ ᠲᠤ ᠭᠠᠷ ᠢᠶᠠᠨ ᠬᠦᠷᠭᠡᠬᠦ᠂ ᠰᠦᠪᠡᠭᠡ ᠶᠢᠨ ᠬᠠᠪᠢᠰᠤᠨ ᠤ ᠬᠡᠰᠡᠭ ᠠᠴᠠ ᠵᠠᠭᠠᠯ ᠮᠢᠬ᠎ᠠ ᠠᠪᠴᠤ ᠲᠠᠪᠠᠭ ᠲᠤ ᠲᠠᠯᠪᠢᠬᠤ ︵ᠲᠠᠪᠠᠭ ᠤᠨ ᠪᠠᠷᠠᠭᠤᠨ ᠲᠠᠯ᠎ᠠ ᠪᠠᠷ︶᠂ ᠰᠡᠭᠦᠯ ᠤᠨ ᠭᠤᠤᠯ ᠠᠴᠠ ᠵᠢᠭᠠᠬᠠᠨ ᠲᠤᠭᠤᠶᠢᠯᠠᠨ ᠠᠪᠴᠤ ᠤᠭᠤᠴᠠ ᠪᠤᠶᠤ ᠲᠤᠯᠤᠭᠠᠢ ᠲᠡᠭᠡᠷ᠎ᠡ ᠲᠠᠯᠪᠢᠬᠤ ᠵᠡᠷᠭᠡ ᠠᠴᠠ ᠠᠯᠢ ᠨᠢᠭᠡ ᠶᠢ ᠰᠤᠩᠭᠤᠨ ᠤᠭᠤᠴᠠᠨ ᠳᠤ ᠭᠠᠷ ᠬᠦᠷᠬᠦ ᠶᠤᠰᠤ ᠭᠦᠢᠴᠡᠳᠬᠡᠨ᠎ᠡ᠃ ᠲᠡᠭᠡᠬᠦ ᠳᠤ ᠤᠭᠤᠴᠠ ᠵᠥᠰᠥᠭᠴᠢ ᠶᠠᠭᠤᠨ ᠤ ᠡᠮᠦᠨ᠎ᠡ ᠰᠢᠭᠦᠰᠦᠨ ᠤ ᠪᠠᠷᠠᠭᠤᠨ ᠲᠠᠯ᠎ᠠ ︵ᠵᠦᠪ ᠲᠠᠯ᠎ᠠ︶᠎ ᠠᠴᠠ ᠡᠬᠢᠯᠡᠨ ᠵᠦᠰᠦᠬᠦ ᠪᠦᠭᠡᠳ ᠰᠦᠪᠡᠭᠡ ᠶᠢᠨ ᠭᠤᠷᠪᠠᠨ ᠬᠠᠪᠢᠰᠤ ᠲᠠᠢ ᠨᠢ ᠬᠠᠮᠳᠤ ᠳᠤᠨᠢ ᠨᠡᠪᠳᠡ ᠵᠦᠰᠦᠵᠦ       ᠰᠡᠭᠦᠯ ᠤᠨ ᠲᠡᠭᠡᠭᠡᠨ ᠬᠡᠰᠡᠭ ᠢᠶᠠᠷ ᠭᠤᠶ᠎ᠠ ᠲᠠᠭᠠᠭᠤᠯᠤᠨ ᠵᠦᠰᠦᠵᠦ ᠠᠪᠤᠭᠠᠳ ᠮᠦᠨ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ ᠲᠦᠷ ᠲᠠᠯᠪᠢᠵᠤ ᠦᠭᠭᠦᠨ᠎ᠡ᠂ ᠵᠡᠭᠦᠨ ᠲᠠᠯ᠎ᠠ ᠶᠢ ᠮᠦᠨ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢ ᠵᠦᠰᠦᠭᠰᠡᠨ ᠲᠠᠢ ᠠᠳᠠᠯᠢ ᠰᠦᠪᠡᠭᠡ ᠶᠢᠨ ᠭᠤᠷᠪᠠᠨ ᠬᠠᠪᠢᠰᠤ ᠠᠴᠠ ᠡᠬᠢᠯᠡᠨ ᠵᠦᠰᠦᠭᠡᠳ᠂ ᠤᠭᠤᠴᠠᠨ ᠲᠡᠭᠡᠭᠦᠷ ᠵᠡᠭᠦᠨ ᠲᠠᠯ᠎ᠠ ᠠᠴᠠ ᠵᠦᠰᠦᠭᠰᠡᠨ ᠮᠢᠬ᠎ᠠ ᠶᠢ ᠲᠤᠤᠭᠤᠷ ᠨᠢ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠠᠴᠠ ᠵᠦᠰᠦᠭᠰᠡᠨ ᠮᠢᠬ᠎ᠠ ᠶᠢ ᠲᠡᠭᠡᠭᠦᠷ ᠨᠢ ᠵᠦᠷᠢᠭᠦᠯᠦᠨ ᠲᠠᠯᠪᠢᠵᠤ ᠦᠭᠭᠦᠨ᠎ᠡ᠃ ᠰᠦᠪᠡᠭᠡ ᠶᠢᠨ ᠵᠢᠷᠭᠤᠭᠠᠨ ᠬᠠᠪᠢᠷᠭ᠎ᠠ ᠶᠢ ᠲᠠᠪᠠᠭᠯᠠᠬᠤ ᠠᠴᠠ ᠡᠮᠦᠨᠡᠬᠡᠨ ᠬᠡᠨ ᠳᠤ ᠴᠤ ᠮᠡᠳᠡᠭᠳᠡᠯ ᠦᠭᠡᠢ ᠪᠠᠷ ᠨᠢᠷᠤᠭᠤᠨ ᠤ ᠶᠠᠰᠤᠨ ᠠᠴᠠ ᠡᠪᠳᠡᠶᠢᠬᠡᠨ ᠮᠤᠯᠳᠤᠯᠵᠤ ᠪᠡᠯᠡᠳᠦᠭᠰᠡᠨ ᠪᠠᠶᠢᠳᠠᠭ᠃ ᠲᠠᠷᠠᠭ᠎ᠠ ᠨᠢ ᠤᠭᠤᠴᠠᠨ ᠤ ᠤᠭᠤᠷᠠᠭ ᠰᠡᠭᠦᠯ ᠢ ᠤᠭᠳᠤᠯᠤᠨ ᠠᠪᠴᠤ ᠲᠤᠯᠤᠭᠠᠢ ᠲᠠᠢ ᠬᠠᠮᠳᠤ ᠭᠡᠷ ᠤᠨ ᠡᠵᠡᠨ ᠳᠤ ︽ᠪᠤᠷᠬᠠᠨ ᠳᠠᠭᠠᠨ ᠲᠡᠭᠡᠵᠢ ᠪᠠᠷᠢᠭᠳᠤᠨ︕︾ ᠭᠡᠪᠡᠯ ᠭᠡᠷ ᠤᠨ ᠡᠵᠡᠨ ᠲᠤᠰᠴᠤ ᠠᠪᠤᠭᠠᠳ ᠪᠤᠷᠬᠠᠨ ᠤ ᠪᠠᠨ ᠡᠮᠦᠨ᠎ᠡ ᠲᠠᠯᠪᠢᠳᠠᠭ᠃ ᠭᠤᠤᠯ ᠭᠡᠶᠢᠴᠢ ᠰᠡᠭᠦᠯ ᠳᠤ ᠭᠠᠷ ᠬᠦᠷᠦᠭᠡ ᠦᠭᠡᠢ ᠦᠶ᠎ᠡ ᠳᠤ ᠤᠭᠤᠴᠠ ᠵᠦᠰᠦᠭᠴᠢ ᠰᠡᠭᠦᠯ ᠤᠨ ᠭᠤᠤᠯ ᠲᠤᠮᠳᠠ ᠠᠴᠠ ᠵᠢᠭᠠᠬᠠᠨ ᠲᠤᠭᠤᠶᠢᠯᠠᠨ ᠠᠪᠴᠤ ᠤᠭᠤᠴᠠᠨ ᠤ ᠡᠬᠢᠨ ᠳᠤ ᠪᠤᠶᠤ ᠭᠤᠤᠯ ᠲᠤᠮᠳᠠ ᠲᠠᠯᠪᠢᠵᠤ ᠦᠭᠭᠦᠨ᠎ᠡ᠃ ᠠᠳᠡ ᠬᠦᠷᠬᠦ ᠳᠤ ᠤᠭᠤᠴᠠ ᠵᠦᠰᠦᠬᠦ ᠶᠤᠰᠤ ᠲᠠᠭᠤᠰᠴᠤ ᠤᠭᠤᠴᠠ ᠬᠦᠨᠳᠡᠭᠴᠢ ᠠᠴᠠ ᠰᠢᠭᠦᠰᠦᠨ ᠲᠡᠭᠡᠷ᠎ᠡ ᠰᠦ ᠲᠠᠢ ᠴᠠᠢ ᠪᠤᠶᠤ ᠬᠠᠷ᠎ᠠ ᠴᠠᠢ ᠲᠤᠰᠤᠭᠠᠭᠠᠳ᠄ ︽ᠵᠠ︕ ᠲᠠᠶᠠᠭᠠᠷ ᠰᠢᠭᠦᠰᠦᠨ ᠠᠴᠠ ᠵᠤᠭᠤᠭᠯᠠᠵᠤ ᠬᠠᠶᠢᠷᠠᠯᠠ︕︾ ᠭᠡᠮᠡᠨ ᠶᠠᠩ ᠤᠨ ᠦᠭᠡ ᠬᠡᠯᠡᠭᠡᠳ ᠭᠠᠷᠴᠤ ᠶᠠᠪᠤᠨ᠎ᠠ᠃ ᠭᠡᠷ ᠲᠠᠬᠢ ᠶᠤᠰᠤ ᠮᠡᠳᠡᠬᠦ ᠬᠦᠮᠦᠨ ᠠᠴᠠ ᠵᠦᠰᠦᠭᠰᠡᠨ       ᠰᠦᠪᠡᠭᠡ ᠶᠢᠨ ᠮᠢᠬ᠎ᠠ ᠶᠢ ᠪᠠᠰᠠ ᠭᠤᠷᠪᠠ ᠭᠤᠷᠪᠠ ᠵᠦᠰᠦᠭᠡᠳ ᠵᠢᠵᠢᠭᠯᠡᠨ ᠤᠭᠳᠤᠯᠵᠤ ᠲᠠᠪᠠᠭ ᠲᠤ ᠲᠠᠯᠪᠢᠬᠤ ᠳᠤ ᠭᠤᠤᠯ ᠭᠡᠶᠢᠴᠢ᠂ ᠨᠠᠰᠤᠳᠠᠢ ᠬᠦᠮᠦᠨ ᠠᠴᠠ ᠵᠤᠭᠤᠭᠯᠠᠵᠤ ᠡᠬᠢᠯᠡᠨ᠎ᠡ᠂ ᠲᠡᠭᠡᠬᠦ ᠲᠠᠢ ᠵᠡᠷᠭᠡ ᠪᠤᠰᠤᠳ ᠭᠡᠶᠢᠴᠢ ᠴᠤ ᠡᠷᠡᠭᠡ ᠵᠢᠷᠤᠭ᠎ᠠ ᠦᠭᠡᠢ ᠰᠦᠪᠡᠭᠡ ᠶᠢᠨ ᠮᠢᠬ᠎ᠠ ᠪᠤᠶᠤ ᠪᠤᠰᠤᠳ ᠢᠪᠡᠯᠭᠡ ᠶᠢᠨ ᠮᠢᠬ᠎ᠠ ᠠᠴᠠ ᠠᠪᠴᠤ ᠢᠳᠡᠵᠡᠭᠡᠨ᠎ᠡ᠃ ᠶᠡᠷᠦ ᠳᠡᠭᠡᠨ ᠤᠭᠤᠴᠠ ᠶᠢ ᠬᠤᠶᠢᠮᠤᠷ ᠲᠠᠬᠢ ᠭᠤᠤᠯ ᠭᠤᠤᠯ ᠭᠡᠶᠢᠴᠢ ᠳᠤ ᠲᠠᠯᠪᠢᠨ᠂ ᠪᠤᠰᠤᠳ ᠵᠤᠴᠢᠳ ᠲᠤ ᠳᠠᠯᠤ ᠲᠦᠷᠪᠡᠨ ᠦᠨᠳᠦᠷ ᠪᠤᠶᠤ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠲᠠᠪᠠᠭ ᠮᠢᠬ᠎ᠠ ᠬᠡᠳᠦ ᠬᠡᠳᠦ ᠶᠢ ᠲᠠᠯᠪᠢᠵᠤ᠂ ᠬᠦᠨᠳᠦᠳᠦ ᠤᠯᠠᠨ ᠢᠶᠠᠨ ᠵᠤᠴᠢᠯᠠᠳᠠᠭ᠃ ᠬᠠᠷᠢᠨ ᠰᠡᠭᠦᠯ ᠵᠦᠰᠦᠵᠦ ᠭᠡᠶᠢᠴᠢ ᠳᠡᠭᠡᠨ ᠰᠤᠷᠤᠭᠤᠯᠬᠤ ᠵᠠᠩᠰᠢᠯ ᠦᠭᠡᠢ ᠪᠠᠶᠢᠭᠰᠠᠨ᠃ ᠬᠢᠳᠤᠭ᠎ᠠ ᠲᠤᠩᠭᠤᠷᠠᠭ ᠢᠶᠠᠷ ᠮᠢᠬ᠎ᠠ ᠢᠳᠡᠬᠦ ᠶᠢ ᠡᠷᠬᠢᠮᠯᠡᠬᠦ ᠪᠦᠭᠡᠳ ᠠᠪᠤᠭᠰᠠᠨ ᠮᠢᠬ᠎ᠠ ᠪᠠᠨ ᠭᠦᠢᠴᠡᠳ ᠢᠳᠡᠵᠦ ᠶᠠᠰᠤ ᠶᠢ ᠨᠢ ᠰᠠᠶᠢᠬᠠᠨ ᠮᠦᠯᠵᠢᠵᠦ ᠲᠠᠯᠪᠢᠬᠤ ᠶᠤᠰᠤ ᠲᠠᠢ᠂ ᠠᠳᠡ ᠲᠡᠨᠳᠡ ᠠᠴᠠ ᠰᠡᠭᠯᠡᠵᠦ ᠲᠤᠳᠠᠭᠤ ᠲᠤᠷᠭᠤᠨ ᠢᠳᠡᠬᠦ ᠶᠢ ᠴᠡᠭᠡᠷᠯᠡᠨ᠎ᠡ᠂ ᠲᠠᠪᠠᠭ ᠲᠠᠢ ᠮᠢᠬ᠎ᠠ ᠶᠢ ᠪᠠᠷᠠᠳᠠᠯ᠎ᠠ ᠢᠳᠡᠬᠦ ᠶᠢ ᠴᠡᠭᠡᠷᠯᠡᠨ᠎ᠡ᠂ ᠬᠡᠷᠪᠡ ᠲᠠᠭᠤᠰᠳᠠᠯ᠎ᠠ ᠢᠳᠡᠪᠡᠯ ᠦᠯᠦᠩ ᠬᠤᠪᠳᠤᠭ ᠲᠤ ᠲᠤᠭᠠᠴᠠᠭᠳᠠᠵᠤ ᠬᠤᠴᠢᠯᠠᠭᠳᠠᠬᠤ ᠶᠤᠮ᠃      ᠳᠠᠯᠤ ᠨᠢ ᠮᠢᠬᠠᠨ ᠲᠤᠳᠤᠷ᠎ᠠ ᠬᠠᠮᠤᠭ ᠤᠨ ᠬᠦᠨᠳᠦᠳᠡᠢ ᠮᠢᠬ᠎ᠠ ᠪᠤᠯᠬᠤᠷ ᠲᠦᠷᠦᠯ ᠤᠨ ᠲᠤᠳᠤᠷ᠎ᠠ ᠠᠴᠠ ᠨᠠᠭᠠᠴᠤ᠂ ᠤᠯᠠᠨ ᠤ ᠲᠤᠳᠤᠷᠠᠬᠢ ᠬᠠᠮᠤᠭ ᠤᠨ ᠠᠬᠠᠮᠠᠳ ᠬᠦᠮᠦᠨ ᠳᠠᠯᠤ ᠳᠤ ᠭᠠᠷ ᠬᠦᠷᠳᠡᠭ ᠪᠢᠯᠡ᠂ ᠵᠢᠭᠡ ᠬᠦᠮᠦᠨ ᠨᠠᠭᠠᠴᠤ ᠶᠢᠨ ᠢᠶᠠᠨ ᠬᠠᠵᠠᠭᠤ ᠳᠤ ᠳᠠᠯᠤ ᠪᠠᠷᠢᠵᠤ ᠪᠤᠯᠬᠤ ᠦᠭᠡᠢ᠃ ᠳᠠᠯᠤ ᠶᠢ ᠠᠪᠤᠭᠰᠠᠨ ᠬᠦᠮᠦᠨ ᠡᠷᠬᠡᠪᠰᠢ ᠰᠠᠶᠢᠬᠠᠨ ᠵᠦᠰᠦᠵᠦ ᠬᠦᠮᠦᠨ ᠪᠤᠯᠭᠠᠨ ᠳᠤ ᠳᠠᠯᠤ ᠶᠢᠨ ᠬᠠᠭᠤᠳᠠᠰᠤ ᠮᠢᠬ᠎ᠠ ᠭᠡᠵᠦ ᠬᠤᠪᠢᠶᠠᠨ ᠦᠭᠳᠡᠭ᠂ ᠳᠠᠯᠤ ᠶᠢᠨ ᠬᠠᠭᠤᠳᠠᠰᠤ ᠶᠢ ᠲᠤᠰᠴᠥ ᠠᠪᠤᠭᠰᠠᠨ ᠬᠦᠮᠦᠨ ᠨᠢ᠄ ︽ᠲᠠᠭ᠎ᠠ ᠨᠢ ᠲᠠᠯᠠ ᠬᠦᠷᠴᠦ ᠲᠡᠩᠳᠡ ᠪᠠᠨ ᠵᠢᠷᠤᠭ᠎ᠠ ᠪᠤᠯᠳᠤᠭᠠᠢ︕ ᠨᠠᠰᠤ ᠨᠢ ᠨᠠᠶᠠ ᠭᠠᠷᠤᠭᠠᠳ ᠨᠠᠰᠤ ᠪᠠᠷ ᠢᠶᠠᠨ ᠵᠢᠷᠭᠠᠬᠤ ᠪᠤᠯᠳᠤᠭᠠᠢ︕︾᠂ ︽ᠤᠷᠳᠤ ᠨᠠᠰᠤᠳᠠᠢ ᠤᠳᠠᠭᠠᠨ ᠵᠢᠷᠭᠠᠵᠤ᠂ ᠮᠦᠩᠭᠡ ᠨᠠᠰᠤᠳᠠᠢ ᠮᠦᠩᠭᠦᠨ ᠲᠦᠷᠦᠭᠡ ᠲᠠᠢ ᠶᠠᠪᠤᠭᠠᠷᠠᠢ︕︾ ᠭᠡᠮᠡᠨ ᠠᠮᠠᠨ ᠢᠷᠦᠭᠡᠯ ᠲᠠᠯᠪᠢᠳᠠᠭ᠃ ᠳᠠᠯᠤ ᠬᠤᠪᠢᠶᠠᠭᠰᠠᠨ ᠬᠦᠮᠦᠨ ᠳᠠᠯᠤ ᠶᠢ ᠰᠠᠶᠢᠬᠠᠨ ᠭᠡᠭᠴᠢ ᠴᠠᠶᠢᠯᠭᠠᠨ ᠮᠦᠯᠵᠢᠭᠰᠡᠨ ᠤ ᠲᠠᠷᠠᠭ᠎ᠠ ᠨᠢᠭᠡ ᠬᠠᠳᠠᠭ ᠨᠢᠭᠡ ᠬᠤᠨᠳᠠᠭ᠎ᠠ ᠠᠷᠢᠬᠢ ᠲᠠᠢ ᠳᠠᠯᠤ ᠶᠢ ᠬᠠᠮᠳᠤ ᠳᠤᠨᠢ ᠪᠠᠷᠢᠵᠤ ︵ᠠᠷᠢᠬᠢ ᠶᠢ ᠳᠠᠯᠤ ᠲᠡᠭᠡᠷ᠎ᠡ ᠲᠠᠯᠪᠢᠭᠠᠳ︶ ᠤᠯᠠᠨ ᠤ ᠲᠤᠳᠤᠷ᠎ᠠ ᠠᠴᠠ ᠨᠢᠭᠡ ᠢᠷᠦᠭᠡᠯᠴᠢ ᠬᠦᠮᠦᠨ ᠢ ︽ᠳᠠᠯᠤ ᠢᠷᠦᠭᠡᠵᠦ ᠬᠠᠶᠢᠷᠠᠯᠠ︕︾ ᠭᠡᠵᠦ ᠬᠦᠰᠡᠨ ᠭᠤᠶᠤᠳᠠᠭ᠃ ᠢᠩᠬᠢᠬᠦ ᠳᠤ ᠲᠡᠷᠡ ᠬᠦᠮᠦᠨ ᠬᠠᠳᠠᠭ ᠲᠠᠢ ᠠᠷᠢᠬᠢ ᠪᠠ ᠳᠠᠯᠤ ᠶᠢ ᠲᠤᠰᠴᠤ ᠠᠪᠤᠭᠠᠳ ᠠᠷᠢᠬᠢ ᠶᠢ ᠤᠤᠭᠤᠬᠤ ᠪᠤᠶᠤ ᠠᠮᠰᠠᠭᠠᠳ᠄︽ᠤᠸ᠋ᠮ ᠰᠠᠶᠢᠨ ᠠᠮᠤᠭᠤᠯᠠᠩ ᠪᠤᠯᠳᠤᠭᠠᠢ︕ᠡᠰᠢᠳᠥ ᠲᠡᠭᠷᠢ ᠠᠴᠠ ᠡᠵᠡᠨ ᠲᠠᠢᠡᠵᠡᠨ ᠪᠤᠭᠳᠠ ᠠᠴᠠ ᠵᠠᠷᠯᠢᠭ ᠲᠠᠢᠬᠠᠪᠤᠳᠤ ᠬᠠᠰᠠᠷ ᠰᠥᠪᠡᠬᠡᠳᠡᠢᠬᠤᠶᠠᠷ ᠮᠡᠷᠬᠡᠨ ᠲᠥᠰᠢᠮᠡᠯ ᠤᠨ ᠵᠤᠬᠢᠶᠠᠯ᠄ᠬᠠᠭᠤᠳᠠᠮ ᠤᠨ ᠮᠢᠬ᠎ᠠ ᠶᠢ ᠲᠠᠨᠢᠬᠤᠷᠠᠭᠰᠨ ᠪᠥᠬᠦᠨ ᠠᠮᠰᠠᠵᠤᠬᠤᠪᠠᠨ ᠴᠠᠭᠠᠨ ᠶᠠᠰᠤ ᠶᠢ ᠲᠠᠨᠢᠬᠤᠶᠠᠷ ᠭᠠᠷ ᠲᠠᠭᠠᠨ ᠰᠢᠨᠵᠢᠨ ᠢᠷᠥᠬᠡᠪᠡᠰᠥ᠄ᠲᠠᠯᠤᠨ ᠳᠠᠭᠠᠨ ᠪᠠᠶᠢᠬᠤ ᠳᠤᠬᠠᠭᠤᠳᠠᠮ ᠲᠥᠬᠦᠷᠡᠩ ᠮᠢᠬ᠎ᠠ ᠲᠠᠢᠲᠠᠨ ᠳᠠᠭᠠᠨ ᠪᠠᠷᠢᠬᠤ ᠳᠤ ᠬᠤᠷᠤᠭᠤ ᠵᠤᠵᠠᠭᠠᠨ ᠥᠬᠡᠬᠦ ᠲᠠᠢᠬᠠ ᠳᠠᠭᠠᠨ ᠪᠠᠶᠢᠬᠤ ᠳᠤᠬᠠᠪᠳᠠᠭᠠᠢ ᠵᠥᠬᠡᠯᠡᠨ ᠮᠢᠬ᠎ᠠ ᠲᠠᠢᠲᠠᠨ ᠳᠠᠭᠠᠨ ᠪᠠᠷᠢᠬᠤ ᠳᠤᠠᠯᠠᠭ᠎ᠠ ᠲᠥᠬᠦᠷᠡᠩ ᠥᠬᠡᠬᠦ ᠲᠠᠢᠲᠤᠭᠤᠭ᠎ᠠ ᠲᠠᠯ᠎ᠠ ᠠᠴᠠ ᠨᠢ ᠰᠢᠨᠵᠢᠬᠦ ᠳᠤᠲᠤᠷᠭ᠎ᠠ ᠲᠤᠷᠳᠤᠮ ᠢᠶᠠᠷ ᠪᠠᠶᠠᠨ ᠰᠢᠨᠵᠢ ᠲᠠᠢᠲᠤᠭᠤᠷᠢᠭᠤᠯᠵᠤ ᠡᠷᠬᠢᠬᠦᠯᠵᠤ ᠰᠢᠨᠵᠢᠬᠦ ᠳᠤᠲᠥᠷᠥᠯ ᠰᠠᠳᠤᠨ ᠢᠶᠠᠷ ᠢᠶᠠᠨ ᠵᠢᠷᠭᠠᠵᠤ ᠶᠠᠪᠤᠬᠤ ᠰᠢᠨᠵᠢ ᠲᠠᠢ᠃ᠬᠠᠮᠠᠷ ᠤᠨ ᠶᠠᠰᠤ ᠶᠢ ᠨᠢ ᠰᠢᠨᠵᠢᠪᠠᠯᠬᠠᠨ ᠠᠭᠤᠯᠠ ᠰᠢᠭ᠋ ᠰᠥᠷᠯᠢᠭᠬᠠᠵᠠᠭᠤ ᠲᠠᠯ᠎ᠠ ᠠᠴᠠ ᠨᠢ ᠰᠢᠨᠵᠢᠪᠠᠯᠬᠠᠳᠤᠨ ᠭᠤᠤᠯ ᠤᠷᠤᠰᠴᠥ ᠪᠠᠶᠢᠬᠤ ᠰᠢᠭ᠋ᠬᠤᠷᠮᠤᠢ ᠲᠠᠯ᠎ᠠ ᠠᠴᠠ ᠨᠢ ᠰᠢᠨᠵᠢᠬᠦ ᠳᠤᠬᠤᠳᠠ ᠲᠠᠢ ᠮᠠᠯ ᠨᠢ ᠲᠥᠮᠡ ᠬᠥᠷᠥᠮᠤᠢ᠃ᠬᠠᠪᠳᠠᠭᠠᠢ ᠲᠠᠯ᠎ᠠ ᠠᠴᠠ ᠨᠢ ᠰᠢᠨᠵᠢᠬᠦ ᠳᠤᠬᠠᠭᠠᠨᠳᠤ ᠲᠥᠷᠥ ᠮᠠᠨᠳᠤᠨ ᠬᠥᠭᠵᠢᠮᠤᠢ᠃ᠡᠯ᠎ᠡ ᠲᠠᠯ᠎ᠠ ᠠᠴᠠ ᠨᠢ ᠥᠵᠡᠬᠦ ᠳᠤᠡᠳ᠋ ᠬᠥᠷᠥᠩᠬᠡ ᠪᠠᠷ ᠪᠠᠶᠠᠵᠢᠮᠤᠢ᠃ᠢᠷᠮᠡᠭ ᠲᠠᠯ᠎ᠠ ᠠᠴᠠ ᠨᠢ ᠥᠵᠡᠬᠦ ᠳᠤᠡᠵᠡᠨ ᠬᠥᠮᠤᠨ ᠨᠢ ᠵᠠᠭᠤᠨ ᠨᠠᠰᠤᠯᠠᠮᠤᠢ᠃ᠲᠠᠯᠤ ᠶᠢ ᠲᠠᠭᠠᠳᠬᠠᠭᠰᠠᠨ ᠬᠥᠮᠤᠨᠲᠠᠯᠠ ᠠᠴᠠ ᠵᠠᠭᠤᠨ ᠨᠠᠰᠤᠯᠠᠵᠤᠲᠠᠭᠠᠳᠬᠠᠭᠰᠠᠨ ᠬᠥᠰᠡᠯ ᠪᠥᠬᠦᠨᠲᠠᠪᠳᠠᠯ ᠦᠭᠡᠢ ᠪᠡᠶᠡᠯᠡᠭᠳᠡᠮᠤᠢ᠃︾ ᠬᠡᠮᠡᠨ ᠢᠷᠥᠬᠡᠵᠤ ᠪᠠᠷᠠᠭᠠᠳ ᠬᠠᠳᠠᠭ ᠢ ᠠᠪᠴᠤ ᠡᠪᠦᠷᠳᠦᠯᠡᠬᠦ ᠪᠤᠶᠤ       ᠬᠠᠳᠠᠭ ᠢᠶᠠᠷ ᠳᠠᠯᠤ ᠶᠢ ᠪᠤᠭᠤᠭᠠᠳ ᠤᠨᠢᠨ ᠳᠤ ᠬᠠᠪᠴᠢᠭᠤᠯᠵᠤ ᠲᠠᠯᠪᠢᠳᠠᠭ ᠪᠠᠶᠢᠵᠠᠢ᠃      ᠭᠡᠶᠢᠴᠢᠳ ᠰᠢᠭᠦᠰᠦ ᠶᠢ ᠵᠤᠭᠤᠭᠯᠠᠵᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ᠂ ᠲᠠᠷᠤᠢ ᠱᠦᠯᠦ ᠲᠠᠢ ᠬᠤᠭᠤᠯᠠ ᠤᠷᠤᠭᠤᠯᠬᠤ ᠠᠴᠠ ᠡᠮᠦᠨᠡᠬᠡᠨ ᠭᠡᠶᠢᠴᠢ ᠶᠢᠨ ᠠᠬ᠎ᠠ ᠪᠤᠯᠬᠤ ᠬᠦᠮᠦᠨ ᠠᠴᠠ ᠨᠢᠭᠡ ᠨᠢ ᠪᠤᠰᠴᠤ ᠰᠢᠭᠦᠰᠦ ᠶᠢ ᠵᠠᠰᠠᠵᠤ ᠡᠪᠯᠡᠭᠦᠯᠦᠨ ᠲᠠᠯᠪᠢᠭᠠᠳ ᠲᠠᠪᠠᠭ ᠲᠠᠢ ᠰᠢᠭᠦᠰᠦ ᠶᠢ ᠠᠪᠴᠤ ᠵᠦᠪ ᠭᠤᠷᠪᠠ ᠡᠷᠭᠢᠭᠦᠯᠦᠭᠡᠳ ᠭᠡᠷ ᠤᠨ ᠡᠵᠡᠨ ᠳᠤ ᠭᠠᠷᠳᠠᠭᠤᠯᠤᠨ᠎ᠠ᠃ ᠨᠤᠶᠠᠨ ᠭᠡᠭᠡᠨ ᠰᠠᠭᠠᠳᠠᠭᠰᠠᠨ ᠦᠶ᠎ᠡ ᠳᠤ ᠰᠢᠭᠦᠰᠦ ᠲᠤᠰᠤᠭᠴᠢ ᠲᠠᠪᠠᠭ ᠲᠠᠢ ᠤᠭᠤᠴᠠ ᠠᠪᠤᠭᠠᠳ ᠭᠡᠷ ᠠᠴᠠ ᠤᠬᠤᠷᠢᠨ ᠭᠠᠷᠴᠤ ᠶᠠᠪᠤᠬᠤ ᠶᠤᠰᠤ ᠲᠠᠢ ᠪᠠᠶᠢᠭᠰᠠᠨ᠃ ᠵᠠᠷᠢᠮ ᠭᠡᠷ ᠤᠨ ᠡᠵᠡᠨ ᠪᠤᠶᠤ ᠭᠡᠷ ᠤᠨ ᠪᠤᠰᠤᠳ ᠬᠦᠮᠦᠨ ᠤᠭᠤᠴᠠ ᠶᠢ ᠲᠤᠰᠤᠨ ᠠᠪᠴᠤ ᠭᠠᠯ ᠤᠨ ᠲᠡᠭᠡᠭᠦᠷ ᠪᠠᠰᠠ ᠵᠦᠪ ᠭᠤᠷᠪᠠ ᠡᠷᠭᠢᠭᠦᠯᠦᠭᠡᠳ ᠲᠠᠭ ᠲᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠵᠤ ᠴᠤ ᠪᠠᠶᠢᠳᠠᠭ᠂ ᠡᠭᠦᠨ ᠢ ᠰᠢᠭᠦᠰᠦ ᠲᠡᠪᠰᠢᠭᠦᠯᠬᠦ ᠶᠤᠰᠤ ᠭᠡᠳᠡᠭ᠃      ᠵᠤᠮ᠎ᠠ᠂ ᠪᠦᠬᠦᠯᠢ ᠵᠠᠳᠠᠭᠠᠢ ᠰᠢᠭᠦᠰᠦᠨ ᠠᠴᠠ ᠭᠠᠳᠠᠨ᠎ᠠ ᠳᠠᠯᠤ ᠲᠦᠷᠪᠡᠨ ᠦᠨᠳᠦᠷ ᠪᠠ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠰᠢᠭᠦᠰᠦ ᠮᠢᠬ᠎ᠠ ᠶᠢ ᠴᠤ ᠬᠤᠷᠢᠮ ᠨᠠᠶᠢᠷ᠂ ᠵᠢᠯ ᠴᠠᠭ᠎ᠠ᠂ ᠵᠢᠰᠢᠶ᠎ᠡ ᠲᠠᠯᠠᠯᠭ᠎ᠠ᠂ ᠲᠦᠷᠦᠯ       ᠰᠠᠳᠤᠨ ᠤ ᠵᠤᠯᠭᠠᠯᠳᠠ ᠵᠡᠷᠭᠡ ᠳᠤ ᠨᠡᠶᠢᠳᠡᠮ ᠬᠡᠷᠡᠭᠯᠡᠵᠦ ᠪᠠᠶᠢᠭᠰᠠᠨ ᠮᠦᠷᠳᠡᠭᠡᠨ ᠨᠡᠯᠢᠶᠡᠳ ᠬᠦᠨᠳᠦᠳᠡᠢ       ᠬᠤᠭᠤᠯᠠᠨ ᠳᠤ ᠲᠤᠭᠠᠴᠠᠭᠳᠠᠳᠠᠭ᠃ ︽ᠲᠠᠯᠤ︾᠎ ᠶᠢ ᠦᠪᠡᠷ ᠤᠨ ᠡᠪᠦᠭᠡ ᠡᠯᠦᠨᠴᠡ᠂ ᠨᠠᠰᠤᠳᠠᠢ ᠡᠪᠦᠭᠡᠳ ᠵᠡᠷᠭᠡ ᠬᠦᠮᠦᠰ ᠢ ᠬᠦᠨᠳᠦᠳᠬᠡᠨ ᠲᠠᠪᠠᠭ ᠮᠢᠬ᠎ᠠ ᠶᠢ ᠨᠢ ᠠᠬᠠᠯᠠᠭᠤᠯᠤᠨ ᠲᠠᠯᠪᠢᠳᠠᠭ᠂ ︽ᠡᠪᠴᠢᠭᠦᠦ︾᠎ ᠶᠢ ᠭᠤᠤᠯᠳᠠᠭᠤ ᠠᠬᠠᠮᠠᠳ ᠨᠠᠰᠤᠨ ᠤ ᠡᠮᠡᠭᠳᠡᠢ᠂ ᠦᠪᠡᠷ ᠤᠨ ᠰᠠᠳᠤᠨ ᠲᠦᠷᠦᠯ ᠤᠨ ᠬᠡᠦᠬᠡᠨ ᠪᠠᠷᠢᠶᠠᠳ ᠲᠤ ᠮᠦᠨ ᠲᠠᠪᠠᠭ ᠮᠢᠬ᠎ᠠ ᠠᠬᠠᠯᠠᠭᠤᠯᠤᠨ ᠲᠠᠯᠪᠢᠳᠠᠭ᠃ ᠲᠡᠷᠡ ᠨᠢ ᠤᠭᠤᠴᠠ ᠲᠠᠢ ᠮᠦᠷᠦ ᠵᠡᠷᠭᠡᠴᠡᠬᠦ ᠬᠦᠨᠳᠦ ᠶᠢᠨ ᠬᠤᠭᠤᠯᠠ ᠪᠤᠯᠬᠤ ᠶᠤᠮ᠃ ᠵᠢᠱᠢᠶᠡᠯᠡᠵᠦ ᠬᠡᠯᠡᠬᠦ ᠳᠤ ᠨᠢᠭᠡ ᠤᠳᠠᠭᠠᠨ ᠤ ᠨᠠᠶᠢᠷ ᠲᠤ ᠸᠠᠩ ᠨᠤᠶᠠᠨ ᠬᠠᠳᠤᠨ ᠲᠠᠢ ᠪᠠᠨ ᠵᠠᠯᠠᠷᠠᠵᠤ       ᠰᠠᠭᠠᠳᠠᠭᠰᠠᠨ ᠪᠤᠯ ᠨᠤᠶᠠᠨ ᠳᠤ ᠤᠭᠤᠴᠠ ᠵᠤᠭᠤᠵᠤ᠂ ᠬᠠᠳᠤᠨ ᠳᠤ ᠲᠤᠰᠬᠠᠢ ᠲᠠᠪᠠᠭ ᠲᠤ ᠡᠪᠴᠢᠭᠦᠦ ᠠᠬ᠎ᠠ ᠲᠠᠢ ᠰᠢᠭᠦᠰᠦ ᠭᠠᠷᠭᠠᠨ ᠬᠦᠨᠳᠦᠯᠡᠨ ᠲᠠᠶᠢᠯᠠᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠨᠤᠶᠠᠨ ᠬᠠᠳᠤᠨ ᠰᠠᠭᠠᠳᠠᠭᠰᠠᠨ ᠦᠭᠡᠢ ᠡᠩ ᠤᠨ ᠠᠶᠢᠯ ᠤᠨ ᠬᠤᠷᠢᠮ ᠲᠠᠯᠠᠯᠭ᠎ᠠ ᠳᠤ ᠴᠤ ᠡᠮᠡᠭᠳᠡᠶᠢᠴᠦᠳ ᠢ ᠭᠡᠷ ᠤᠨ ᠵᠡᠭᠦᠨ ᠲᠠᠯ᠎ᠠ ᠪᠠᠷ ᠭᠤᠤᠯᠴᠠᠭᠤ ᠰᠠᠭᠤᠯᠭᠠᠨ᠂ ᠡᠮᠦᠨ᠎ᠡ ᠨᠢ ᠡᠪᠴᠢᠭᠦᠦ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠲᠠᠪᠠᠭ ᠮᠢᠬ᠎ᠠ ᠲᠠᠯᠪᠢᠨ ᠬᠦᠨᠳᠦᠳᠡᠢ ᠪᠠᠷ ᠵᠤᠴᠢᠯᠠᠨ ᠲᠠᠶᠢᠯᠳᠠᠭ ᠪᠠᠶᠢᠭᠰᠠᠨ ᠶᠤᠮ᠃ ᠡᠪᠴᠢᠭᠦᠦ ᠶᠢ ᠪᠤᠰᠤᠳ ᠮᠢᠬ᠎ᠠ ᠲᠠᠢ ᠬᠠᠮᠳᠤ ᠪᠦᠳᠦᠨ ᠢᠶᠠᠷ ᠨᠢ ᠴᠢᠨᠠᠵᠤ ᠡᠪᠴᠢᠭᠦᠨ ᠤ ᠬᠤᠩᠬᠤᠷ ᠲᠠᠯ᠎ᠠ ᠶᠢ ᠲᠡᠭᠡᠭᠰᠢ ᠬᠠᠷᠠᠭᠤᠯᠤᠨ ᠲᠠᠪᠠᠭᠯᠠᠭᠠᠳ ᠭᠡᠷ ᠲᠤ ᠤᠷᠤᠭᠤᠯᠤᠨ ᠭᠤᠤᠯ ᠭᠡᠶᠢᠴᠢ ᠳᠡᠭᠡᠨ ᠬᠠᠨᠳᠤᠭᠤᠯᠤᠨ ᠲᠠᠯᠪᠢᠬᠤ ᠳᠤ ᠲᠡᠷᠡᠬᠦ ᠭᠤᠤᠯ ᠬᠦᠮᠦᠨ ᠨᠢᠭᠡ ᠪᠤᠯ ᠦᠪᠡᠷ ᠢᠶᠠᠨ ᠡᠪᠴᠢᠭᠦᠦ ᠵᠦᠰᠦᠬᠦ ᠶᠤᠰᠤ ᠭᠦᠢᠴᠡᠳᠬᠡᠨ᠂ ᠨᠢᠭᠡ ᠪᠤᠯ ᠦᠪᠡᠷ ᠢᠶᠠᠨ ᠲᠠᠪᠠᠭ ᠲᠤ ᠭᠠᠷ ᠢᠶᠠᠨ ᠬᠦᠷᠭᠡᠭᠡᠳ ᠤᠨᠳᠤᠤ ᠡᠮᠡᠭᠳᠡᠢ ᠳᠤ ᠨᠠᠶᠢᠳᠠᠨ ᠲᠤᠰ ᠦᠢᠯᠡ ᠶᠢ ᠭᠦᠢᠴᠡᠳᠬᠡᠯᠭᠡᠳᠡᠭ᠃ ᠡᠪᠴᠢᠭᠦᠦ ᠵᠦᠰᠦᠬᠦ ᠬᠦᠮᠦᠨ ᠡᠪᠴᠢᠭᠦᠨ ᠤ ᠬᠦᠳᠦᠭᠦᠷ ᠲᠠᠯ᠎ᠠ ᠶᠢ ᠲᠡᠭᠡᠭᠰᠢ ᠬᠠᠷᠠᠭᠤᠯᠤᠨ ᠪᠠᠷᠢᠵᠤ ᠤᠷᠢᠤᠨ ᠢᠶᠠᠷ ᠡᠪᠴᠢᠭᠦᠨ ᠤ ᠬᠠᠨᠴᠢᠷ ᠮᠢᠬ᠎ᠠ ᠶᠢ ᠤᠭᠳᠤᠯᠤᠨ ᠠᠪᠴᠤ ᠲᠠᠪᠠᠭ ᠲᠤ ᠲᠠᠯᠪᠢᠭᠠᠳ᠂ ᠲᠠᠷᠠᠭ᠎ᠠ ᠨᠢ ᠡᠪᠴᠢᠭᠦᠨ ᠤ ᠬᠡᠷᠰᠡᠩ ᠤᠨ ᠬᠡᠰᠡᠭ ᠢ ᠭᠤᠷᠪᠠ ᠬᠤᠪᠢᠶᠠᠨ ᠵᠥᠰᠥᠬᠡᠳ ᠡᠪᠴᠢᠭᠦᠨ ᠤ ᠬᠤᠩᠬᠤᠷ ᠲᠠᠯ᠎ᠠ ᠳᠤ ᠤᠷᠳᠤ ᠪᠠᠷ ᠨᠢ ᠲᠠᠯᠪᠢᠵᠤ ᠲᠡᠭᠡᠷ᠎ᠡ ᠠᠴᠠ ᠨᠢ ᠬᠠᠨᠴᠢᠷ ᠤᠨ ᠮᠢᠬ᠎ᠠ ᠶᠢ ᠵᠦᠷᠢᠭᠦᠯᠦᠨ ᠲᠠᠯᠪᠢᠭᠠᠳ ᠡᠪᠴᠢᠭᠦᠦ ᠵᠦᠰᠦᠬᠦ ᠠᠵᠢᠯ ᠢ ᠲᠠᠭᠤᠰᠬᠠᠨ᠎ᠠ᠃ ᠡᠨᠡ ᠦᠶ᠎ᠡ ᠳᠤ ᠭᠤᠤᠯ ᠭᠡᠶᠢᠴᠢ       ᠡᠪᠴᠢᠭᠦᠨ ᠤ ᠮᠢᠬ᠎ᠠ ᠠᠴᠠ ᠠᠪᠴᠤ ᠠᠮᠰᠠᠬᠤ ᠪᠤᠶᠤ ᠢᠳᠡᠬᠦ ᠶᠢᠨ ᠲᠠᠭᠠᠤ ᠪᠤᠰᠤᠳ ᠡᠵᠡᠭᠳᠡᠢ ᠳᠤ ᠴᠤ ᠬᠤᠪᠢᠶᠠᠨ ᠦᠭᠴᠦ       ᠬᠠᠮᠳᠤ ᠪᠠᠷ ᠬᠤᠭᠤᠯᠠᠯᠠᠨ᠎ᠠ᠃ ᠤᠭ ᠲᠠᠭᠠᠨ ᠮᠠᠯ ᠠᠯᠠᠵᠤ ᠲᠦᠭᠦᠭᠡᠷᠡᠬᠦ ᠳᠡᠭᠡᠨ ᠡᠪᠴᠢᠭᠦᠨ ᠤ ᠭᠡᠷᠰᠡᠩ ᠤᠨ       ᠭᠡᠰᠡᠭ ᠢ ᠠᠷᠠᠰᠤ ᠲᠠᠢ ᠨᠢ ᠦᠯᠡᠳᠡᠭᠡᠨ ᠠᠪᠴᠤ ᠠᠷᠤ ᠳᠤᠨᠢ ᠨᠤᠤᠰᠤ ᠶᠢ ᠨᠢ ᠬᠠᠶᠢᠴᠢᠯᠠᠨ ᠬᠤᠶᠢᠬᠠᠯᠠᠨ ᠴᠢᠨᠠᠳᠠᠭ ᠲᠠᠳᠬᠠᠯ ᠲᠠᠢ ᠪᠠᠶᠢᠭᠠᠳ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠨᠠᠶᠠᠭᠠᠳ ᠤᠨ ᠠᠴᠠ ᠬᠤᠶᠢᠰᠢ ᠤᠯᠠᠩᠬᠢ ᠨᠢ ᠠᠷᠠᠰᠤ ᠶᠢ ᠨᠢ ᠬᠠᠭᠤᠯᠵᠤ ᠢᠳᠡᠬᠦ ᠪᠤᠯᠤᠭᠰᠠᠨ᠃      ᠡᠵᠡᠨ᠎ᠡ ᠲᠤᠷᠭᠤᠳ ᠠᠩᠬᠠᠨ ᠳᠠᠭᠠᠨ ᠲᠡᠪᠭᠡᠨ ᠤᠭᠤᠴᠠ ᠭᠡᠭᠴᠢ ᠶᠢ ᠮᠡᠳᠡᠳᠡᠭ ᠦᠭᠡᠢ ᠪᠠᠶᠢᠭᠰᠠᠨ᠂ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠬᠤᠷᠢ ᠭᠤᠴᠢᠭᠠᠳ ᠤᠨ ᠳᠤ ᠮᠤᠩᠭᠤᠯ ᠤᠯᠤᠰ ᠤᠨ ᠭᠤᠪᠢ ᠨᠤᠳᠤᠭ ᠠᠴᠠ ᠨᠡᠭᠦᠳᠡᠯᠯᠡᠨ ᠢᠷᠡᠭᠰᠡᠨ ᠬᠠᠯᠬ᠎ᠠ ᠨᠠᠷ ᠲᠡᠪᠬᠡᠨ ᠤᠭᠤᠴᠠ ᠲᠠᠯᠪᠢᠳᠠᠭ ᠪᠠᠶᠢᠭᠰᠠᠨ ᠭᠡᠮᠡᠨ ᠨᠤᠳᠤᠭ ᠤᠨ ᠪᠤᠭᠤᠷᠤᠯ ᠤᠳ ᠮᠢᠨᠢ ᠬᠦᠦᠨᠢᠳᠡᠵᠦ ᠪᠠᠶᠢᠭ᠎ᠠ᠃ ᠲᠡᠪᠬᠡᠨ ᠤᠭᠤᠴᠠ ᠭᠡᠵᠦ ᠤᠭᠤᠴᠠᠨ ᠤ ᠰᠦᠪᠡᠭᠡ ᠶᠢᠨ ᠭᠤᠷᠪᠠᠨ ᠬᠠᠪᠢᠰᠤ ᠶᠢᠨ ᠬᠡᠰᠡᠭ ᠢ ᠡᠪᠳᠡᠨ ᠰᠠᠯᠭᠠᠵᠤ ᠠᠪᠤᠭᠠᠳ ᠦᠯᠡᠳᠡᠭᠰᠡᠨ ᠬᠡᠰᠡᠭ ᠢ ᠰᠡᠭᠦᠯ ᠲᠠᠢ ᠨᠢ ᠲᠠᠯᠪᠢᠬᠤ ᠶᠢ ᠬᠡᠯᠡᠳᠡᠭ ᠪᠠᠶᠢᠵᠠᠢ᠃       ᠡᠭᠦᠨ ᠢᠶᠠᠨ ᠪᠠᠰᠠ ᠬᠠᠭᠠᠰ ᠤᠭᠤᠴᠠ᠂ ᠲᠠᠯ᠎ᠠ ᠤᠭᠤᠴᠠ᠂ ᠰᠦᠭᠡᠮ ᠤᠭᠤᠴᠠ ᠭᠡᠳᠡᠭ ᠪᠠᠶᠢᠵᠠᠢ᠃ ᠡᠶᠢᠮᠦᠷᠬᠦ ᠤᠭᠤᠴᠠ ᠶᠢ 1958 ᠤᠨ ᠪᠤᠯᠳᠠᠯ᠎ᠠ ᠨᠠᠶᠢᠷ ᠨᠠᠭᠠᠳᠤᠮ ᠳᠤ ᠲᠡᠮᠡᠢ ᠬᠡᠷᠡᠭᠯᠡᠵᠦ ᠦᠭᠡᠢ ᠪᠠᠶᠢᠭᠠᠳ ᠲᠡᠭᠡᠳᠦ       ᠵᠠᠭᠤᠨ ᠤ ᠨᠠᠶᠠᠭᠠᠳ ᠤᠨ ᠠᠴᠠ ᠬᠠᠶᠠ ᠵᠠᠷᠢᠮ ᠠᠶᠢᠯ ᠨᠠᠮᠤᠷ ᠤᠨ ᠲᠠᠯᠠᠯᠭ᠎ᠠ ︵ᠵᠢᠰᠢᠶ᠎ᠡ︶᠂ ᠬᠡᠦᠬᠡᠳ ᠤᠨ ᠲᠠᠭᠠᠬᠢ ᠵᠡᠷᠭᠡ ᠳᠤ ᠲᠠᠯᠪᠢᠳᠠᠭ ᠪᠤᠯᠤᠭᠰᠠᠨ ᠭᠡᠰᠡᠨ ᠮᠡᠳᠡᠭᠡ ᠪᠤᠢ᠃      ᠰᠢᠷᠠᠭᠰᠠᠨ ᠪᠦᠬᠦᠯᠢ ᠬᠤᠨᠢ᠄ ᠪᠦᠬᠦᠯᠢ ᠰᠢᠷᠠᠭᠰᠠᠨ ᠬᠤᠨᠢ ᠶᠢ ᠴᠢᠯᠦᠭᠡᠯᠡᠬᠦ ᠠᠴᠠ ᠡᠮᠦᠨ᠎ᠡ ᠡᠵᠡᠨ᠎ᠡ ᠳᠤ ᠶᠡᠷᠦ ᠲᠠᠯᠪᠢᠵᠤ ᠦᠭᠡᠢ ᠪᠠᠶᠢᠭᠰᠠᠨ ᠭᠡᠳᠡᠭ ᠪᠦᠭᠡᠳ ᠯᠾᠠᠸᠠᠩᠵᠠᠪ ᠨᠤᠶᠠᠨ ᠲᠡᠭᠡᠳᠦ ᠵᠠᠭᠤᠨ ᠤ ᠲᠠᠪᠢᠭᠠᠳ ᠤᠨ ᠳᠤ ᠵᠠᠷᠯᠢᠭ ᠪᠠᠭᠤᠯᠭᠠᠨ ᠲᠡᠭᠦᠨ ᠤ ᠲᠤᠭᠤᠭᠠᠴᠢ ᠪᠤᠯᠵᠤ ᠪᠠᠶᠢᠭᠰᠠᠨ ᠵᠤᠳᠪᠠ ᠭᠡᠳᠡᠭ ᠬᠦᠮᠦᠨ ᠢ ᠠᠯᠠᠱᠠ ᠬᠤᠱᠤᠳ ᠲᠤ ᠲᠤᠮᠢᠯᠠᠨ ᠲᠠᠯᠠᠵᠠᠶᠠᠭ᠎ᠠ ᠨᠤᠶᠠᠨ ᠤ ᠭᠠᠯᠴᠢ ᠳᠤ ᠱᠠᠪᠢ ᠤᠷᠤᠭᠤᠯᠤᠨ ᠰᠢᠷᠠᠭᠰᠠᠨ ᠬᠤᠨᠢ ᠲᠠᠯᠪᠢᠬᠤ ᠮᠡᠷᠭᠡᠵᠢᠯ ᠰᠤᠷᠭᠠᠭᠰᠠᠨ ᠭᠡᠳᠡᠭ᠃ ᠵᠢᠷᠠ ᠲᠠᠯᠠᠭᠠᠳ‌ᠤᠨ ᠳᠤ ᠦᠪᠦᠷ ᠮᠤᠩᠭᠤᠯ ᠤᠨ ᠦᠪᠡᠷᠳᠡᠭᠡᠨ ᠵᠠᠰᠠᠬᠤ ᠤᠷᠤᠨ ᠤ ᠤᠳᠤᠷᠢᠳᠤᠯᠭ᠎ᠠ ᠠᠵᠢᠯ ᠪᠠᠶᠢᠴᠠᠭᠠᠨ ᠡᠵᠡᠨ᠎ᠡ ᠬᠤᠰᠢᠭᠤᠨ ᠳᠤ ᠢᠷᠡᠭᠰᠡᠨ ᠳᠤ ᠡᠪᠦᠭᠡᠨ ᠵᠤᠳᠪᠠ ᠶᠢ ᠵᠠᠯᠠᠵᠤ ᠪᠦᠬᠦᠯᠢ ᠬᠤᠨᠢ ᠰᠢᠷᠠᠭᠤᠯᠵᠤ ᠲᠠᠯᠪᠢᠭᠰᠠᠨ ᠭᠡᠵᠦ ᠪᠠᠶᠢᠭ᠎ᠠ᠃ ᠰᠢᠷᠠᠭᠰᠠᠨ ᠬᠤᠨᠢ ᠳᠤ ᠭᠤᠤᠯ ᠭᠡᠶᠢᠴᠢ ᠭᠠᠷ ᠬᠦᠷᠴᠦ ᠶᠤᠰᠤ ᠬᠢᠬᠦ ᠳᠡᠭᠡᠨ ᠤᠷᠢᠳ ᠢᠶᠠᠷ  ᠮᠠᠩᠨᠠᠢ ᠲᠡᠭᠡᠷ᠎ᠡ ᠨᠢ ᠬᠢᠳᠤᠭ᠎ᠠ ᠪᠠᠷ ᠰᠠᠷᠠᠭᠠᠯᠵᠢᠨ ᠲᠡᠮᠳᠡᠭ ᠭᠠᠷᠭᠠᠨ᠂ ᠲᠠᠷᠠᠭ᠎ᠠ ᠨᠢ ᠤᠭᠤᠴᠠᠨ ᠤ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠲᠤᠰ ᠪᠦᠷᠢ ᠨᠢᠭᠡ ᠲᠦᠭᠡ ᠭᠠᠷᠤᠢ ᠵᠢᠷᠤᠵᠤ ᠦᠭᠬᠦ ᠶᠤᠰᠤ ᠲᠠᠢ᠃      ᠡᠳᠦᠭᠡ ᠪᠤᠯᠬᠤ ᠳᠤ ᠵᠤᠮ᠎ᠠ ᠬᠤᠨᠢ ᠶᠢ ᠰᠦᠮ᠎ᠡ ᠬᠡᠶᠢᠳ ᠲᠤ ᠴᠤ ᠭᠡᠰᠡᠨ ᠲᠠᠯᠪᠢᠬᠤ ᠪᠠᠨ ᠪᠤᠯᠢᠭᠰᠠᠨ᠂ ᠪᠦᠬᠦᠯᠢ ᠰᠢᠷᠠᠭᠰᠠᠨ ᠬᠤᠨᠢ ᠶᠢ ᠨᠠᠮ ᠵᠠᠰᠠᠭ ᠤᠨ ᠲᠠᠶᠢᠯᠠᠯᠭ᠎ᠠ ᠳᠤ ᠶᠡᠬᠡᠳᠡ ᠬᠡᠷᠡᠭᠯᠡᠵᠦ᠂ ᠵᠠᠳᠠᠭᠠᠢ ᠰᠢᠭᠦᠰᠦ — ᠤᠭᠤᠴᠠ ᠬᠢᠭᠡᠳ ︽ᠳᠠᠯᠤ︾᠂ ︽ᠡᠪᠴᠢᠭᠦᠦ︾᠎ ᠪᠠᠷ ᠠᠬᠠᠯᠠᠭᠤᠯᠤᠭᠰᠠᠨ ᠰᠢᠭᠦᠰᠦ ᠶᠢ ᠬᠤᠰᠢᠭᠤ ᠲᠡᠰ ᠤᠨ ᠵᠤᠴᠢᠯᠠᠭ᠎ᠠ ᠠᠴᠠ ᠭᠠᠳᠠᠨ᠎ᠠ ᠰᠦᠮ᠎ᠡ ᠬᠡᠶᠢᠳ᠂ ᠠᠯᠪᠠᠨ ᠪᠠᠶᠢᠭᠤᠯᠭ᠎ᠠ᠂ ᠬᠤᠪᠢ ᠠᠶᠢᠯ ᠤᠨ ᠴᠠᠢ           ᠲᠠᠶᠢᠯᠠᠯᠭ᠎ᠠ ᠳᠤ ᠴᠤ ᠦᠷᠭᠡᠨ ᠢᠶᠠᠷ ᠬᠡᠷᠡᠭᠯᠡᠵᠦ  ᠪᠠᠶᠢᠭ᠎ᠠ᠃ ᠬᠡᠭᠦ ᠳᠡᠭᠡᠨ ᠰᠢᠷᠠᠭᠰᠠᠨ ᠬᠤᠨᠢ ᠪᠠ ᠰᠢᠭᠦᠰᠦ ᠵᠦᠰᠦᠬᠦ ᠤᠯᠠᠮᠵᠢᠯᠠᠯᠳᠤ ᠰᠠᠶᠢᠬᠠᠨ ᠶᠤᠰᠤ ᠶᠢ ᠬᠦᠨᠳᠦᠳᠦ ᠤᠳᠤᠷᠢᠳᠤᠯᠭ᠎ᠠ᠂ ᠭᠡᠶᠢᠴᠢ ᠳᠡᠭᠡᠨ ᠵᠦᠪ ᠲᠠᠭᠠᠭᠤᠯᠤᠨ ᠶᠤᠰᠤ ᠭᠦᠢᠴᠡᠳᠬᠡᠬᠦ ᠲᠠᠯ᠎ᠠ ᠪᠠᠷ ᠲᠤᠩ ᠬᠥᠷᠥᠯᠴᠡᠬᠦ ᠦᠭᠡᠢ᠂ ᠬᠢᠳᠤᠭ᠎ᠠ ᠪᠠᠷᠢᠭᠤᠯᠤᠨ ᠬᠠᠮᠢᠭ᠎ᠠ ᠠᠴᠠ ᠴᠤ ᠬᠠᠮᠢᠶ᠎ᠠ ᠦᠭᠡᠢ ᠬᠦᠳᠡᠯᠭᠡᠵᠦ ᠬᠦᠨᠳᠡᠭᠦᠯᠵᠦ ᠪᠤᠢ᠃ ᠡᠭᠦᠨ ᠤ ᠤᠯᠠᠮ ᠠᠴᠠ ᠨᠢᠭᠡ ᠲᠠᠯ᠎ᠠ ᠪᠠᠷ ᠮᠤᠷᠢᠯᠠᠵᠤ ᠰᠠᠭᠠᠳᠠᠭᠰᠠᠨ ᠭᠡᠶᠢᠴᠢᠳ‌ᠵᠤᠴᠢᠳ ᠲᠠᠭᠠᠨ ᠥᠨᠳᠥᠰᠥᠳᠡᠨ ᠤᠭᠰᠠᠭᠠᠳᠠᠨ ᠤ ᠪᠠᠨ ᠶᠡᠭᠡ ᠲᠠᠶᠢᠯᠠᠯᠭ᠎ᠠ ᠶᠢᠨ ᠵᠢᠩᠬᠢᠨᠢ ᠶᠤᠰᠤ       ᠶᠠᠪᠤᠳᠠᠯ ᠢ ᠮᠡᠳᠡᠬᠦᠯᠬᠦ ᠵᠤᠷᠢᠯᠭ᠎ᠠ ᠳᠠᠭᠠᠨ ᠬᠦᠷᠴᠦ ᠡᠰᠡ ᠴᠢᠳᠠᠨ᠂ ᠨᠦᠭᠦᠭᠡ ᠲᠠᠯ᠎ᠠ ᠪᠠᠷ ᠬᠦᠨᠳᠦᠳᠦ       ᠲᠠᠶᠢᠯᠠᠯᠭ᠎ᠠ ᠶᠢᠨ ᠡᠷᠬᠢᠮ ᠶᠤᠰᠤ ᠶᠢ ᠴᠢᠨᠠᠭᠰᠢᠳᠠ ᠦᠪᠯᠡᠨ ᠵᠠᠯᠭᠠᠮᠵᠢᠯᠠᠵᠤ ᠰᠤᠳᠤᠯᠤᠨ ᠰᠢᠨᠵᠢᠯᠡᠬᠦ ᠳᠤ ᠪᠤᠳᠤᠯᠢᠶᠠᠨ ᠎ ᠲᠠᠢ ᠵᠦᠢᠯᠡᠰ ᠢ ᠠᠪᠴᠢᠷᠠᠵᠤ ᠪᠤᠢ᠃ ᠮᠤᠩᠭᠤᠯᠴᠤᠳ ᠪᠤᠯ ᠮᠠᠯ ᠤᠨ ᠪᠦᠬᠦᠯᠢ ᠶᠠᠰᠤ ᠶᠢ ᠦᠶᠡᠴᠢᠯᠡᠨ ᠰᠠᠯᠭᠠᠳᠠᠭ ᠤᠨᠴᠨᠭᠠᠢ ᠵᠠᠩᠰᠢᠯ ᠤᠨ ᠤᠯᠠᠮᠵᠢᠯᠠᠯ ᠲᠠᠢ ᠪᠢᠯᠡ᠃ ᠭᠡᠳᠡᠯ᠎ᠡ ᠤᠳᠤ ᠪᠤᠯᠬᠤ ᠳᠤ ᠵᠠᠯᠠᠭᠤᠴᠤᠳ ᠨᠢ ᠦᠶᠡᠴᠢᠯᠡᠬᠦ ᠶᠢ ᠴᠢᠳᠠᠬᠤ ᠦᠭᠡᠢ ᠪᠤᠶᠤ ᠰᠤᠷᠬᠤ ᠴᠤ ᠦᠭᠡᠢ ᠪᠤᠯᠵᠤ ᠬᠦᠮᠦᠨ ᠬᠦᠯᠦᠰᠦᠯᠡᠵᠦ ᠮᠠᠯ ᠭᠠᠷᠭᠠᠭᠤᠯᠳᠠᠭ ᠴᠤ ᠪᠤᠯᠤᠯ᠎ᠠ᠂ ᠴᠢᠨᠠᠭᠰᠢᠯᠠᠨ ᠮᠢᠬᠠᠨ ᠤ ᠮᠠᠶᠢᠮᠠᠶᠢᠴᠤᠳ ᠮᠠᠯ ᠠᠯᠠᠬᠤ᠂ ᠮᠦᠴᠢᠯᠡᠬᠦ ᠲᠠᠯ᠎ᠠ ᠪᠠᠷ ᠤᠯᠠᠮᠵᠢᠯᠠᠯᠳᠤ ᠵᠠᠩᠰᠢᠯ ᠢ ᠦᠯᠦ ᠬᠠᠶᠢᠬᠤᠷᠤᠨ᠂ ᠬᠤᠭᠤᠯᠠᠢ ᠶᠢ ᠨᠢ ᠭᠡᠷᠴᠢᠨ᠂ ᠠᠮᠢᠨ ᠴᠢᠰᠤ ᠶᠢ ᠨᠢ ᠲᠠᠯᠪᠢᠨ᠂ ᠶᠠᠰᠤ ᠶᠢ ᠨᠢ ᠴᠠᠪᠴᠢᠨ᠂       ᠮᠢᠬᠠᠨ ᠳᠤᠨᠢ ᠭᠡᠢ ᠴᠤᠬᠢᠨ ᠬᠤᠳᠠᠯᠳᠤᠵᠤ ᠪᠤᠢ᠃ ᠵᠤᠴᠢᠯᠠᠭ᠎ᠠ ᠲᠠᠶᠢᠯᠠᠯᠭ᠎ᠠ ᠳᠤ ᠭᠠᠷᠭᠠᠵᠤ ᠪᠤᠯᠬᠤ᠂ ᠦᠯᠦ ᠪᠤᠯᠬᠤ ᠮᠢᠬ᠎ᠠ ᠶᠢ ᠡᠰᠡ ᠬᠠᠮᠢᠶᠠᠷᠤᠨ ᠲᠠᠪᠠᠭᠯᠠᠨ ᠲᠠᠯᠪᠢᠬᠤ᠂ ᠮᠢᠬ᠎ᠠ ᠰᠡᠭᠯᠡᠵᠦ ᠢᠳᠡᠬᠦ᠂ ᠲᠤᠳᠠᠭᠤ ᠮᠦᠯᠵᠢᠬᠦ ᠵᠡᠷᠭᠡ ᠡᠮᠬᠢ ᠵᠠᠮᠪᠠᠷᠠᠭ᠎ᠠ ᠪᠠᠨ ᠠᠯᠳᠠᠭᠰᠠᠨ ᠦᠵᠡᠭᠳᠡᠯ ᠤᠳ ᠵᠦᠩᠳᠡᠭᠡᠨ ᠬᠠᠷᠠᠭᠳᠠᠵᠤ ᠪᠠᠶᠢᠭ᠎ᠠ᠃ ᠡᠳᠡᠭᠡᠷ ᠢ ᠲᠠᠷᠤᠢ ᠲᠦᠷᠭᠡᠨ ᠵᠠᠰᠠᠨ ᠵᠠᠯᠠᠷᠠᠭᠤᠯᠵᠤ ᠲᠦᠷᠢᠮᠵᠢᠭᠦᠯᠦᠨ ᠵᠢᠷᠤᠮᠵᠢᠭᠤᠯᠬᠤ ᠠᠵᠢᠯ ᠤᠳᠤᠬᠠᠨ ᠳᠤ ᠲᠤᠯᠭᠠᠮ᠎ᠠ ᠱᠠᠭᠠᠷᠳᠠᠭᠳᠠᠵᠤ ᠪᠠᠶᠢᠭ᠎ᠠ ᠶᠤᠮ᠃ ᠲᠤᠬᠠᠶᠢᠯᠠᠪᠠᠯ᠂ ᠮᠤᠩᠭᠤᠯ ᠶᠤᠰᠤ ᠵᠠᠩᠰᠢᠯ ᠤᠨ ᠮᠡᠳᠡᠯᠭᠡ ᠤᠬᠠᠭᠠᠨ ᠤ ᠬᠦᠮᠦᠵᠢᠯ ᠬᠢᠵᠦ᠂ ᠥᠵᠡᠬᠦᠯᠥᠯᠬᠡ ᠤᠷᠤᠯᠳᠤᠭᠠᠨ ᠬᠢᠬᠦ᠂ ᠱᠠᠩᠨᠠᠬᠤ ᠵᠡᠷᠭᠡ ᠠᠷᠭ᠎ᠠ ᠬᠡᠮᠵᠢᠶ᠎ᠡ ᠠᠪᠴᠤ ᠪᠤᠯᠤᠨ᠎ᠠ᠃
 
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号