ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠥᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠪᠦᠬᠡ ᠪᠠᠷᠢᠯᠳᠤᠬᠤ ᠶᠤᠰᠤᠨ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/9/22
              ᠲᠤᠷᠭᠤᠳ ᠪᠦᠬᠡ      ᠲᠤᠷᠭᠤᠳ ᠪᠦᠬᠡ ᠶᠢ ᠭᠤᠤᠯᠳᠠᠭᠤ ᠦᠷᠡᠰ ᠨᠠᠶᠢᠷ᠂ ᠵᠡᠷᠭᠡ ᠰᠢᠷᠠᠬᠤ ︵ᠵᠡᠷᠬᠡ ᠲᠡᠪᠰᠢᠬᠦ︶ ᠨᠠᠶᠢᠷ᠂ ᠠᠬᠢ ᠬᠤᠩᠭᠤᠷ ᠤᠨ ᠲᠠᠭᠠᠬᠢ᠂ ᠡᠵᠡᠢ ᠯᠠᠮᠠ ᠶᠢᠨ ᠨᠠᠰᠤᠨ ᠤ ᠪᠠᠶᠠᠷ᠂ ᠰᠢᠳᠦᠭᠡᠨ ᠯᠠᠮᠠ ᠪᠠᠨ ᠰᠢᠷᠡᠭᠡᠨ ᠳᠤ ᠵᠠᠯᠠᠬᠤ       ᠪᠠᠶᠠᠷ᠂ ᠰᠦᠮ᠎ᠡ ᠬᠡᠶᠢᠳ ᠤᠨ ᠪᠠᠶᠠᠷ᠂ ᠴᠠᠭᠠᠨ ᠰᠠᠷ᠎ᠠ ᠶᠢᠨ ᠰᠢᠨ᠎ᠡ ᠶᠢᠨ ᠨᠢᠭᠡᠨ ᠤ ᠨᠤᠶᠠᠨ ᠤ ᠦᠷᠭᠦᠭᠡ ᠶᠢᠨ       ᠴᠠᠭ᠎ᠠ᠂ ᠤᠪᠤᠭᠠᠨ ᠲᠠᠬᠢᠯᠭ᠎ᠠ ᠲᠡᠭᠡᠷ᠎ᠡ ᠪᠠᠷᠢᠯᠳᠤᠵᠤ ᠪᠠᠶᠢᠵᠠᠢ᠂ ᠡᠳᠡᠭᠡᠷ ᠨᠠᠶᠢᠷ ᠲᠠᠬᠢᠯᠭ᠎ᠠ ᠶᠢ ᠬᠤᠰᠢᠭᠤ ᠲᠠᠮᠠᠭᠠᠨ ᠭᠠᠵᠠᠷ ᠠᠴᠠ ᠡᠷᠬᠢᠯᠡᠵᠦ᠂ ᠪᠦᠬᠡ ᠶᠢᠨ ᠪᠦᠬᠦ ᠶᠠᠪᠤᠳᠠᠯ ᠢ ᠪᠦᠬᠡ ᠶᠢᠨ ᠶᠡᠷᠦᠩᠭᠡᠢ ᠲᠠᠭᠠᠭᠠᠮᠠᠯ᠂ ᠲᠠᠷᠤᠢ ᠲᠠᠮᠠᠭᠠᠨ ᠰᠠᠶᠢᠳ ᠠᠴᠠ ᠬᠠᠷᠢᠭᠤᠴᠠᠨ ᠬᠢᠵᠦ᠂ ᠪᠦᠬᠡ ᠶᠢᠨ ᠵᠠᠰᠠᠭᠤᠯᠴᠢᠨ ᠪᠤᠳᠠᠳᠠᠢ ᠠᠵᠢᠯ ᠢ ᠭᠠᠷᠳᠠᠨ ᠭᠦᠢᠴᠡᠳᠭᠡᠨ᠎ᠡ᠂ ᠪᠦᠬᠡ ᠶᠢᠨ ᠶᠡᠷᠦᠩᠭᠡᠢ ᠲᠠᠭᠠᠭᠠᠮᠠᠯ ᠪᠠ ᠵᠠᠰᠠᠭᠤᠯᠴᠢᠨ ᠳᠤ ᠲᠤᠰᠬᠠᠢ ᠬᠤᠪᠴᠠᠰᠤ ᠦᠭᠡᠢ᠂ ᠦᠪᠡᠷᠰᠡᠳ ᠤᠨ       ᠲᠡᠪᠡᠯ ᠢᠶᠠᠨ ᠡᠮᠦᠰᠦᠨ ᠠᠵᠢᠯᠯᠠᠨ᠎ᠠ᠃      ᠨᠠᠶᠢᠷ ᠤᠨ ᠲᠠᠯᠠᠪᠠᠢ ᠶᠢᠨ ᠭᠤᠤᠯ ᠬᠡᠰᠡᠭ ᠲᠤ ᠠᠷᠪᠠᠨ ᠬᠠᠨ᠎ᠠ ᠲᠠᠢ ᠮᠤᠩᠭᠤᠯ ᠭᠡᠷ ᠪᠤᠶᠤ ᠲᠤᠮᠤ ᠴᠠᠴᠠᠷ ᠮᠠᠶᠢᠬᠠᠨ ᠪᠠᠷᠢᠵᠤ᠂ ᠸᠠᠩ ᠨᠤᠶᠠᠳ᠂ ᠲᠠᠮᠠᠭ᠎ᠠ ᠶᠢᠨ ᠲᠦᠰᠢᠮᠡᠳ᠂ ᠰᠦᠮ᠎ᠡ ᠬᠡᠶᠢᠳ ᠤᠨ ᠮᠡᠳᠡᠭᠡᠴᠢᠨ ᠢ ᠰᠠᠭᠤᠯᠭᠠᠨ᠂ ᠲᠡᠭᠦᠨ ᠤ ᠬᠤᠶᠠᠷ ᠲᠠᠯ᠎ᠠ ᠳᠤ ᠲᠤᠰᠪᠤᠷᠢ ᠨᠢᠭᠡ ᠪᠤᠶᠤ ᠬᠤᠶᠠᠷ ᠮᠤᠩᠭᠤᠯ ᠭᠡᠷ ᠪᠠᠷᠢᠵᠤ᠂ ᠪᠦᠬᠡᠴᠦᠳ ᠢ ᠴᠤᠭᠯᠠᠭᠤᠯᠵᠤ ᠬᠤᠪᠴᠠᠰᠤᠯᠠᠬᠤ ᠤᠷᠤᠨ ᠪᠠᠶᠢᠷᠢ ᠪᠤᠯᠭᠠᠳᠠᠭ᠂ ᠲᠡᠭᠡᠬᠦ ᠳᠡᠭᠡᠨ ᠪᠦᠬᠡᠴᠦᠳ ᠢᠶᠠᠨ ᠬᠠᠷ᠎ᠠ ᠶᠢᠨ       ᠲᠠᠯ᠎ᠠ ᠶᠢᠨ ᠪᠦᠬᠡᠴᠢᠨ᠂ ᠰᠢᠷ᠎ᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡᠴᠢᠨ ︵ᠰᠦᠮ᠎ᠡ ᠬᠡᠶᠢᠳ ᠤᠨ ᠯᠠᠮᠠ ᠪᠦᠬᠡᠴᠢᠨ︶ ᠭᠡᠮᠡᠨ ᠬᠤᠶᠠᠷ ᠬᠤᠪᠢᠶᠠᠵᠤ᠂ ᠬᠠᠷ᠎ᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡᠴᠢᠨ ᠢ ᠪᠠᠷᠠᠭᠤᠨ ᠪᠡᠶ᠎ᠡ ᠳᠤ᠂ ᠰᠢᠷ᠎ᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡᠴᠢᠨ ᠢ ᠵᠡᠬᠦᠨ ᠪᠡᠶ᠎ᠡ ᠳᠤ ᠪᠠᠶᠢᠷᠢᠰᠢᠭᠤᠯᠬᠤ ᠶᠤᠰᠤ ᠲᠠᠢ ᠪᠦᠭᠡᠳ ᠬᠠᠷ᠎ᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡᠴᠦᠳ ᠢ ᠪᠠᠰᠠ ᠨᠤᠶᠠᠨ ᠤ ᠲᠠᠯ᠎ᠠ ᠶᠢᠨ ᠪᠦᠬᠡᠴᠦᠳ᠂ ᠰᠢᠷ᠎ᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡᠴᠦᠳ ᠢ ᠯᠠᠮᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡᠴᠦᠳ᠂ ᠵᠠᠮ᠎ᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡᠴᠦᠳ ᠭᠡᠳᠡᠭ ᠪᠠᠶᠢᠵᠠᠢ᠃ ᠯᠠᠮᠠ ᠶᠢᠨ ᠲᠠᠯ᠎ᠠ ᠶᠢᠨ ᠬᠢᠨ ᠬᠤᠷᠠᠯ ᠤᠨ ᠮᠤᠩᠭᠤᠯ       ᠭᠡᠷ ᠢᠶᠠᠨ ᠠᠪᠴᠢᠷᠠᠵᠤ ᠪᠠᠷᠢᠭᠠᠳ ᠪᠦᠬᠡᠴᠢᠨ ᠯᠠᠮᠠ ᠨᠠᠷ ᠢᠶᠠᠨ ᠰᠠᠭᠤᠯᠭᠠᠳᠠᠭ ᠪᠠᠶᠢᠭᠰᠠᠨ ᠶᠤᠮ ᠪᠠᠶᠢᠨ᠎ᠠ᠃      ᠲᠤᠷᠭᠤᠳ ᠪᠦᠬᠡ ᠶᠢ ᠲᠡᠭᠡᠳᠦ ᠪᠡᠶ᠎ᠡ ᠨᠢᠴᠦᠭᠦᠨ᠂ ᠬᠦᠯ ᠨᠢᠴᠦᠭᠦᠨ᠂ ᠱᠤᠳᠠᠭ ᠡᠮᠦᠰᠭᠡᠵᠦ       ᠪᠠᠷᠢᠯᠳᠤᠭᠤᠯᠳᠠᠭ᠂ ᠲᠡᠭᠡᠬᠦ ᠳᠡᠭᠡᠨ ᠱᠤᠳᠠᠭ ᠢ ᠤᠭ ᠲᠠᠭᠠᠨ ᠱᠤᠳᠠᠭ ᠭᠡᠳᠡᠭ ᠦᠭᠡᠢ᠂ ᠪᠦᠬᠡ ᠶᠢᠨ ᠡᠮᠦᠰᠭᠡᠯ ᠭᠡᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠲᠡᠭᠦᠨ ᠢᠶᠠᠨ ᠨᠢᠮᠭᠡᠨ ᠢᠰᠡᠭᠡᠢ ᠶᠢ ᠨᠤᠤᠰᠤᠨ ᠤᠳᠠᠰᠤ ᠪᠠᠷ ᠰᠢᠷᠢᠵᠦ ᠬᠦᠬᠡ ᠪᠦᠰ ᠢᠶᠠᠷ ᠭᠠᠳᠠᠷᠯᠠᠵᠤ ᠬᠢᠳᠡᠭ ᠪᠠᠶᠢᠵᠠᠢ᠂ ᠡᠪᠦᠳᠦᠭ ᠠᠴᠠ ᠲᠡᠭᠡᠭᠦᠷ ᠲᠠᠳᠠᠭᠰᠠᠨ ᠦᠷᠭᠡᠨ ᠬᠦᠯᠬᠦᠭᠡᠷ ᠡᠮᠦᠰᠭᠡᠯ᠂ ᠨᠡᠶᠢᠳᠡ ᠮᠤᠩᠭᠤᠯ ᠬᠡᠯᠡᠨ ᠳᠤ ᠱᠤᠳᠠᠭ ᠭᠡᠳᠡᠭ᠃ ᠵᠠᠬ᠎ᠠ ᠶᠢᠨ ᠬᠡᠰᠡᠭ ᠢ ᠲᠠᠪᠬᠤᠷᠯᠠᠵᠤ ᠤᠶᠤᠬᠤ ᠦᠭᠡᠢ᠂ ᠲᠥᠳᠡᠭᠡ ᠶᠢᠨ ᠤᠷᠤᠨ ᠳᠤ ᠠᠳᠡ ᠲᠡᠨᠳᠡ ᠬᠡᠳᠦ ᠨᠦᠬᠡᠯᠡᠵᠦ ᠨᠦᠬᠡ ᠪᠠᠷ ᠨᠢ ᠰᠢᠷᠢᠨ ᠦᠯᠬᠡ ᠭᠦᠶᠦᠯᠭᠡᠨ ᠡᠮᠦᠨ᠎ᠡ ᠪᠠᠨ ᠠᠪᠴᠢᠷᠠᠵᠤ ᠴᠢᠩᠭ᠎ᠠ ᠵᠠᠩᠭᠢᠳᠤᠨ᠎ᠠ᠃ ᠡᠮᠦᠰᠭᠡᠯ ᠤᠨ ᠵᠠᠬ᠎ᠠ ᠶᠢᠨ ᠠᠷᠤ ᠡᠮᠦᠨ᠎ᠡ ᠲᠠᠯ᠎ᠠ ᠳᠤᠨᠢ ᠲᠤᠰᠪᠤᠷᠢ ᠲᠦᠷᠪᠡᠨ ᠬᠤᠷᠤᠭᠤ ᠪᠠᠭᠳᠠᠬᠤ ᠨᠦᠬᠡ ︵ᠭᠤᠭᠴᠤᠭ᠎ᠠ︶ ᠭᠠᠷᠭᠠᠵᠤ ᠪᠠᠷᠢᠴᠠ ᠪᠤᠯᠭᠠᠨ᠎ᠠ᠂ ᠲᠡᠭᠦᠨ ᠢ ᠪᠦᠬᠡ ᠶᠢᠨ ᠪᠠᠷᠢᠴᠠ ᠭᠡᠳᠡᠭ᠂ ᠪᠠᠷᠢᠴᠠ ᠨᠢ ᠪᠦᠬᠡᠴᠦᠳ ᠤᠨ ᠪᠠᠷᠢᠭ᠎ᠠ ᠠᠪᠬᠤ ᠭᠤᠤᠯ ᠭᠠᠵᠠᠷ ᠤᠴᠢᠷ ᠲᠡᠭᠦᠨ ᠳᠤ ᠪᠤᠯᠢᠭᠠᠷᠢ ᠬᠠᠳᠠᠨ᠂ ᠮᠢᠨᠳᠠᠰᠤᠨ ᠤᠳᠠᠰᠤ᠂ ᠬᠠᠳᠠᠭ ᠮᠡᠳᠦ ᠶᠢᠨ ᠪᠦᠬᠡ ᠶᠠᠭᠤᠮ᠎ᠠ ᠪᠠᠷ ᠤᠶᠤᠵᠤ ᠪᠦᠬᠡᠯᠡᠵᠦ ᠦᠭᠳᠡᠭ᠃ ᠪᠦᠬᠡ ᠶᠢᠨ ᠡᠮᠦᠰᠭᠡᠯ ᠢ ᠲᠠᠮᠠᠭᠠᠨ ᠭᠠᠵᠠᠷ ᠠᠴᠠ ᠨᠢᠭᠡᠳᠦᠯᠳᠡᠢ ᠬᠢᠵᠦ᠂ ᠨᠠᠶᠢᠷ ᠤᠨ ᠴᠠᠭ ᠲᠤ ᠭᠠᠷᠭᠠᠨ ᠪᠦᠬᠡᠴᠦᠳ ᠲᠡᠭᠡᠨ ᠡᠮᠦᠰᠭᠡᠵᠦ ᠪᠤᠰᠤᠳ ᠴᠠᠭ ᠲᠤ ᠬᠠᠳᠠᠭᠠᠯᠠᠵᠤ ᠲᠠᠯᠪᠢᠳᠠᠭ ᠪᠠᠶᠢᠵᠠᠢ᠂ ᠬᠤᠷᠠᠯ ᠰᠦᠮ᠎ᠡ ᠳᠤ ᠪᠠᠰᠠ ᠪᠦᠬᠡ ᠶᠢᠨ ᠡᠮᠦᠰᠭᠡᠯ ᠲᠠᠢ ᠪᠠᠶᠢᠭᠰᠠᠨ ᠭᠡᠵᠦ ᠪᠤᠢ᠃      ᠪᠦᠬᠡ ᠶᠢᠨ ᠲᠠᠯᠠᠪᠠᠢ ᠶᠢ ᠤᠨᠴᠠ ᠠᠩᠬᠠᠷᠤᠨ ᠵᠦᠭᠡᠯᠡᠨ ᠡᠯᠡᠰᠦᠷᠭᠡᠭ ᠭᠠᠵᠠᠷ ᠰᠤᠩᠭᠤᠵᠤ ᠲᠡᠭᠰᠢᠯᠡᠨ ᠴᠡᠪᠡᠷᠯᠡᠨ᠎ᠡ᠃ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠪᠦᠬᠡ ᠶᠢᠨ ᠵᠠᠰᠠᠭᠤᠯᠴᠢᠨ ᠠᠴᠠ ᠲᠤᠰ ᠲᠤᠰ ᠤᠨ ᠮᠤᠩᠭᠤᠯ ᠭᠡᠷ ᠤᠨ       ᠡᠭᠦᠳᠡᠨ ᠳᠤ ᠵᠤᠭᠰᠤᠭᠠᠳ ᠪᠦᠬᠡᠴᠢᠨ ᠤ ᠪᠠᠨ ᠨᠡᠷ᠎ᠡ ᠲᠠᠭᠤᠳᠠᠵᠤ ᠴᠤᠭᠯᠠᠭᠤᠯᠤᠨ᠎ᠠ᠂ ᠠᠯᠢ ᠪᠦᠬᠡᠴᠢᠨ ᠢ ᠠᠯᠢ ᠪᠦᠬᠡᠴᠢᠨ ᠲᠠᠢ ᠲᠤᠯᠭᠠᠵᠤ ᠪᠠᠷᠢᠯᠳᠤᠭᠤᠯᠬᠤ ᠶᠠᠪᠣᠳᠠᠯ ᠢ ᠪᠦᠬᠡ ᠶᠢᠨ ᠶᠡᠷᠦᠩᠭᠡᠢ ᠲᠠᠭᠠᠭᠠᠮᠠᠯ ᠠᠴᠠ ᠬᠠᠮᠢᠶᠠᠷᠴᠤ ᠲᠤᠭᠳᠠᠭᠠᠨ᠎ᠠ᠃ ᠪᠦᠬᠡᠴᠦᠳ ᠤᠨ ᠢᠶᠠᠨ ᠶᠡᠷᠦᠩᠭᠡᠢ ᠪᠠᠶᠢᠳᠠᠯ ᠢ ᠮᠡᠳᠡᠬᠦ ᠪᠤᠯᠬᠤᠷ ᠲᠠᠭᠠᠷᠠᠭᠤᠯᠵᠤ ᠤᠨᠤᠭᠠᠵᠤ ᠪᠠᠷᠢᠯᠳᠤᠭᠤᠯᠤᠨ᠎ᠠ᠂ ᠱᠤ ᠤᠷᠬᠢᠬᠤ ᠪᠤᠶᠤ ᠰᠢᠪᠠᠭ᠎ᠠ ᠰᠤᠭᠤᠯᠬᠤ ᠠᠷᠭ᠎ᠠ ᠬᠡᠷᠡᠭᠯᠡᠬᠦ ᠦᠭᠡᠢ᠃ ᠲᠡᠭᠡᠬᠦ ᠳᠡᠭᠡᠨ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠬᠦᠴᠦ ᠴᠢᠳᠠᠯ ᠤᠪᠰᠤ ᠮᠡᠭᠡ ᠲᠡᠩᠴᠡᠮᠡᠷ ᠭᠡᠰᠡᠨ ᠬᠤᠶᠠᠷ ᠪᠦᠬᠡᠴᠢᠨ ᠢᠶᠠᠨ ᠬᠠᠮᠤᠭ ᠲᠡᠷᠢᠭᠦᠨ ᠳᠤ ᠲᠤᠯᠭᠠᠵᠤ ᠪᠠᠷᠢᠯᠳᠤᠭᠤᠯᠤᠨ᠎ᠠ᠂ ᠲᠤᠰ ᠬᠤᠶᠠᠷ ᠪᠦᠬᠡ ᠤᠳᠠᠳᠠᠯ᠎ᠠ ᠪᠠᠷᠢᠯᠳᠤᠭᠠᠳ ᠬᠡᠨ ᠠᠯᠢᠨ ᠢᠶᠠᠨ ᠲᠡᠶᠢᠯᠬᠦ ᠦᠭᠡᠢ᠂ ᠰᠢᠭᠦᠯᠳᠡ ᠭᠠᠷᠬᠤ ᠦᠭᠡᠢ ᠪᠠᠶᠢᠳᠠᠯ ᠲᠤᠤᠷ᠎ᠠ ᠬᠤᠶᠠᠳᠤᠭᠠᠷ ᠲᠤ ᠲᠠᠯᠪᠢᠬᠤ ᠬᠤᠶᠠᠷ ᠪᠦᠬᠡᠴᠢᠨ ᠢ ᠲᠠᠯᠪᠢᠨ ᠪᠠᠷᠢᠯᠳᠤᠭᠤᠯᠵᠤ᠂ ᠠᠯᠢ ᠲᠠᠯ᠎ᠠ ᠶᠢᠨ ᠪᠦᠬᠡ ᠤᠯᠠᠨ ᠲᠡᠶᠢᠯᠦᠭᠰᠡᠨ ᠪᠤᠯ ᠲᠡᠷᠡ ᠲᠠᠯ᠎ᠠ ᠶᠢ ᠰᠢᠭᠦᠭᠰᠡᠨ ᠢᠶᠠᠷ ᠪᠤᠳᠤᠳᠠᠭ ᠪᠠᠶᠢᠵᠠᠢ᠃ ᠪᠦᠬᠡ ᠶᠢᠨ ᠶᠤᠰᠤᠨ ᠳᠤ ᠨᠢᠭᠡ ᠪᠦᠬᠡ ᠨᠢᠭᠡᠯᠡ ᠤᠳᠠᠭ᠎ᠠ ᠪᠠᠷᠢᠯᠳᠤᠬᠤ ᠡᠷᠬᠡ ᠲᠠᠢ ᠪᠦᠭᠡᠳ       ᠪᠦᠬᠡᠴᠦᠳ ᠢᠶᠠᠨ ᠨᠢᠭᠡ ᠲᠤᠤᠷ᠎ᠠ ᠬᠡᠳᠦ ᠬᠡᠳᠦᠨ ᠬᠤᠤᠰ ᠢᠶᠠᠷ ᠲᠠᠯᠪᠢᠬᠤ ᠪᠢᠰᠢ᠂ ᠤᠯᠠᠩᠬᠢ ᠳᠠᠭᠠᠨ ᠨᠢᠬᠡ ᠬᠤᠤᠰ ᠪᠦᠬᠡ ᠪᠠᠷᠢᠯᠳᠤᠵᠤ ᠪᠠᠷᠠᠭᠰᠠᠨ ᠲᠠᠷᠠᠭᠠᠪᠠᠷ ᠰᠠᠶ᠋ᠢ ᠲᠠᠷᠠᠭᠠᠬᠢ ᠪᠦᠬᠡ ᠶᠢ ᠲᠠᠯᠪᠢᠳᠠᠭ ᠶᠤᠰᠤ ᠲᠠᠢ᠃      ᠪᠦᠬᠡ ᠶᠢᠨ ᠲᠠᠭᠠᠭᠠᠮᠠᠯ ᠠᠴᠠ ︽ᠪᠦᠬᠡ ᠪᠠᠨ ᠲᠠᠯᠪᠢ ᠡ︾ ᠭᠡᠭᠰᠡᠭᠡᠷ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠪᠦᠬᠡ ᠶᠢᠨ ᠵᠠᠰᠠᠭᠤᠯᠴᠢᠨ ᠠᠴᠠ ᠲᠤᠰ ᠲᠤᠰ ᠤᠨ ᠪᠦᠬᠡ ᠪᠠᠨ ᠲᠠᠯᠪᠢᠨ᠎ᠠ᠂ ᠪᠦᠬᠡᠴᠦᠳ ︵ᠮᠠᠯᠠᠭᠠᠢ ᠡᠮᠦᠰᠬᠦ ᠦᠭᠡᠢ︶       ᠲᠠᠮᠢᠷ ᠤᠨ ᠲᠠᠯᠠᠪᠠᠢ ᠳᠤ ᠤᠳᠤᠬᠢ ᠰᠢᠭ᠋ ᠦᠰᠦᠷᠴᠦ ᠲᠡᠪᠢᠵᠦ ᠭᠠᠷᠬᠤ ᠪᠢᠰᠢ᠂ ᠭᠤᠤᠯ ᠭᠡᠷ ᠮᠠᠶᠢᠬᠠᠨ ᠤ       ᠡᠭᠦᠳᠡᠨ ᠳᠤ ᠬᠦᠶᠦᠵᠦ ᠬᠦᠷᠦᠭᠡᠳ ︵ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠪᠦᠬᠡ ᠵᠡᠭᠦᠨ ᠲᠠᠯ᠎ᠠ ᠳᠤ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠪᠦᠬᠡ ᠪᠠᠷᠠᠭᠤᠨ ᠲᠠᠯ᠎ᠠ ᠳᠤ︶ ᠸᠠᠩ ᠨᠤᠶᠠᠨ ᠤ ᠵᠦᠭ ᠬᠠᠨᠳᠤᠵᠤ ᠪᠠᠷᠠᠭᠤᠨ ᠡᠪᠦᠳᠦᠭ ᠢᠶᠠᠨ ᠨᠤᠭᠤᠯᠤᠨ ᠰᠦᠭᠦᠳᠴᠦ᠂ ᠪᠠᠷᠠᠭᠤᠨ ᠭᠠᠷ ᠤᠨ ᠡᠷᠡᠬᠡᠢ ᠬᠤᠷᠤᠭᠤ ᠪᠠᠨ ᠮᠠᠩᠨᠠᠢ ᠳᠠᠭᠠᠨ ᠬᠦᠷᠭᠡᠨ ᠮᠦᠷᠭᠦᠬᠦ ᠶᠤᠰᠤ ᠭᠦᠢᠴᠡᠳᠬᠡᠨ᠎ᠡ          ︵ᠲᠠᠯᠠᠪᠤᠷ ᠠᠴᠠ ᠪᠠᠭᠤᠬᠤ ᠳᠠᠭᠠᠨ ᠴᠤ ᠲᠡᠭᠡᠨ᠎ᠡ︶᠃ ᠲᠡᠭᠦᠨ ᠤ ᠲᠠᠷᠠᠭ᠎ᠠ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠪᠦᠬᠡ ᠶᠢᠨ ᠵᠠᠰᠠᠭᠤᠯᠴᠢᠨ ᠠᠴᠠ ᠪᠦᠬᠡᠴᠢᠨ ᠤ ᠪᠠᠷᠠᠭᠤᠨ ᠡᠪᠦᠳᠦᠭ ᠢ ᠨᠢ ᠰᠦᠭᠦᠳᠭᠡᠨ ᠰᠠᠭᠤᠯᠭᠠᠵᠤ ᠪᠠᠶᠢᠭᠠᠳ             ᠪᠠᠷᠢᠴᠠ ᠠᠴᠠ ᠨᠢ ᠬᠠᠷᠢᠯᠴᠠᠨ ᠪᠠᠷᠢᠭᠤᠯᠵᠤ ᠪᠠᠷᠢᠯᠳᠤᠭᠤᠯᠬᠤ ᠪᠠᠷ ᠪᠡᠯᠡᠳᠬᠡᠨ᠎ᠡ᠃ ᠪᠠᠷᠢᠴᠠ ᠠᠪᠬᠤ ᠳᠤ᠂ ᠨᠢᠭᠡ ᠨᠢ ᠵᠡᠭᠦᠨ ᠭᠠᠷ ᠢᠶᠠᠷ ᠢᠶᠠᠨ ᠨᠦᠭᠦᠭᠡ ᠡᠳᠡᠭᠡᠳ ᠤᠨ ᠱᠤᠳᠠᠭ ᠤᠨ ᠡᠮᠦᠨ᠎ᠡ ᠲᠠᠯ᠎ᠠ ᠶᠢᠨ ᠪᠠᠷᠢᠴᠠ ᠠᠴᠠ ᠪᠠᠷᠢᠵᠤ᠂ ᠪᠠᠷᠠᠭᠤᠨ ᠭᠠᠷ ᠢᠶᠠᠷ ᠢᠶᠠᠨ ᠨᠦᠭᠦᠭᠡ ᠡᠳᠡᠭᠡᠳ ᠤᠨ ᠱᠤᠳᠠᠭ ᠤᠨ ᠠᠷᠤ ᠲᠠᠯ᠎ᠠ ᠶᠢᠨ ᠪᠠᠷᠢᠴᠠ ᠠᠴᠠ ᠪᠠᠷᠢᠵᠤ ᠪᠠᠷᠢᠯᠳᠤᠨ᠎ᠠ᠂ ᠢᠩᠭᠢᠬᠦᠯᠡᠷ ᠶᠠᠭ ᠬᠠᠶᠢᠴᠢᠯᠠᠵᠤ ᠪᠠᠷᠢᠵᠤ ᠪᠠᠶᠢᠬᠤ ᠮᠠᠶ᠋ᠢᠭᠳᠠᠢ ᠪᠤᠯᠬᠤ ᠤᠴᠢᠷ ᠬᠠᠶᠢᠴᠢᠨ       ᠪᠠᠷᠢᠯᠳᠤᠯᠭ᠎ᠠ ᠴᠤ ᠭᠡᠳᠡᠭ᠃ ᠬᠤᠶᠠᠷ ᠡᠳᠡᠭᠡᠳ ᠤᠨ ᠪᠠᠷᠠᠭᠤᠨ ᠭᠠᠷ ᠪᠦᠷ ᠨᠦᠭᠦᠭᠡ ᠡᠳᠡᠬᠡᠳ ᠤᠨ ᠢᠶᠠᠨ ᠪᠠᠷᠠᠭᠤᠨ ᠮᠦᠷᠦ ᠲᠡᠭᠡᠭᠦᠷ ᠵᠦᠷᠢᠵᠦ ᠪᠠᠷᠢᠴᠠ ᠤᠯᠤᠨ᠎ᠠ᠂ ᠪᠠᠷᠢᠴᠠ ᠪᠠᠨ ᠭᠠᠳᠠᠨ᠎ᠠ ᠠᠴᠠ ᠨᠢ ᠡᠮᠬᠦᠭᠦᠯᠵᠦ ᠪᠠᠷᠢᠬᠤ ᠶᠤᠰᠤ     ᠎ ᠲᠠᠢ᠃ ᠬᠤᠶᠠᠷ ᠪᠦᠬᠡᠴᠢᠨ ᠪᠠᠷᠢᠴᠠ ᠪᠠᠨ ᠪᠠᠷᠢᠵᠤ ᠪᠤᠯᠤᠯ᠎ᠠ ᠭᠡᠭᠰᠡᠭᠡᠷ ᠵᠠᠰᠠᠭᠤᠯᠴᠢᠨ ᠠᠴᠠ᠄ ︽ᠵᠠ᠂ ᠤᠳᠤ ᠪᠠᠷᠢᠯᠳᠤᠵᠤ ᠡᠬᠢᠯᠡ︕︾ ᠬᠡᠬᠦ ᠳᠤ ᠪᠦᠬᠡᠴᠢᠨ ᠰᠠᠭᠤᠭ᠎ᠠ ᠪᠠᠷ ᠢᠶᠠᠨ ᠪᠤᠶᠤ ᠪᠤᠰᠴᠤ ᠵᠤᠭᠰᠤᠭᠠᠳ ᠪᠠᠷᠢᠯᠳᠤᠵᠤ ᠡᠬᠢᠯᠡᠨ᠎ᠡ᠂ ᠪᠠᠷᠢᠯᠳᠤᠬᠤ ᠶᠠᠪᠤᠴᠠ ᠳᠤ ᠬᠤᠶᠠᠭᠤᠯᠠ ᠭᠠᠵᠠᠷ ᠤᠨᠠᠵᠤ ᠬᠡᠪᠳᠡᠭᠡ ᠪᠠᠷᠢᠯᠳᠤᠯᠭ᠎ᠠ ᠳᠤ ᠤᠷᠤᠬᠤ ᠠᠴᠠ ᠡᠮᠦᠨ᠎ᠡ ᠪᠠᠷᠢᠴᠠ ᠲᠠᠯᠪᠢᠵᠤ ᠪᠤᠯᠬᠤ ᠦᠭᠡᠢ᠂ ᠲᠠᠯᠪᠢᠪᠠᠯ ᠲᠡᠶᠢᠯᠦᠭᠳᠡᠭᠰᠡᠨ ᠢᠶᠠᠷ ᠪᠤᠳᠤᠨ᠎ᠠ᠃      ᠲᠤᠷᠭᠤᠳ ᠪᠦᠬᠡ ᠶᠢᠨ ᠪᠠᠷᠢᠯᠳᠤᠯᠭ᠎ᠠ ᠨᠢ ᠲᠡᠯᠡᠬᠡᠢ ᠶᠢᠨ ᠡᠷᠳᠡᠨ ᠤ ᠰᠤᠩᠭᠤᠳᠠᠭ ᠪᠦᠬᠡ ᠪᠠ ᠴᠢᠯᠦᠭᠡᠳᠦ ᠪᠦᠬᠡ ᠲᠠᠢ ᠨᠡᠯᠢᠶᠡᠳ ᠲᠦᠰᠳᠡᠢ᠂ ᠲᠠᠯᠤ ᠮᠦᠷᠦ ᠰᠢᠷᠤᠶᠢᠳᠠᠭᠰᠠᠨ ᠡᠰᠡᠬᠦ ᠪᠠᠷ ᠰᠢᠭᠦᠵᠦ ᠰᠢᠭᠦᠭᠳᠡᠬᠦ ᠪᠠᠷᠢᠮᠵᠢᠶ᠎ᠠ     ︵ᠵᠠᠪᠠᠯ ᠬᠤᠶᠠᠷ ᠲᠠᠯᠤ ᠶᠢ ᠵᠡᠷᠭᠡᠪᠡᠷ ᠰᠢᠷᠤᠶᠢᠳᠠᠭᠰᠠᠨ ᠪᠠᠶᠢᠬᠤ ᠬᠡᠷᠡᠭ ᠲᠠᠢ︶ ᠪᠤᠯᠭᠠᠨ᠎ᠠ᠃ ᠪᠦᠬᠡ ᠪᠠᠷᠢᠯᠳᠤᠬᠤ ᠶᠠᠪᠤᠴᠠ ᠳᠤ ᠬᠡᠪᠳᠡᠨ ᠴᠤᠬᠢᠬᠤ ︵ᠪᠠᠰᠠ ᠲᠠᠰᠢᠶᠠᠯᠳᠤᠨ ᠴᠤᠬᠢᠬᠤ︶᠂ ᠠᠴᠢᠬᠤ᠂ ᠲᠡᠭᠡᠭᠡᠳᠡᠬᠦ᠂ ᠭᠤᠬᠠᠳᠠᠬᠤ᠂ ᠨᠤᠮᠤᠳᠠᠬᠤ᠂ ᠰᠢᠯᠢᠳᠡᠬᠦ᠂ ᠡᠷᠭᠦᠬᠦ᠂ ᠬᠦᠷᠪᠡᠭᠦᠯᠬᠦ ᠵᠡᠷᠭᠡ ᠤᠯᠠᠨ ᠵᠦᠢᠯ ᠤᠨ ᠤᠪᠰᠤ ᠮᠡᠭᠡ ᠶᠢ ᠬᠡᠷᠡᠭᠯᠡᠵᠦ ᠪᠤᠯᠳᠠᠭ ᠪᠠᠶᠢᠵᠠᠢ᠂ ᠬᠡᠬᠦ ᠳᠡᠭᠡᠨ ᠬᠠᠪᠰᠤᠷᠬᠤ ᠮᠡᠭᠡ ᠬᠡᠷᠡᠭᠯᠡᠵᠦ ᠪᠤᠯᠳᠠᠭ ᠦᠭᠡᠢ᠂ ᠪᠦᠰᠡᠯᠡᠭᠦᠷ ᠠᠴᠠ ᠲᠤᠷᠤᠭᠰᠢ ᠭᠠᠷ ᠬᠦᠷᠴᠦ ᠪᠤᠯᠬᠤ ᠦᠭᠡᠢ ᠶᠤᠰᠤ ᠲᠠᠢ᠃ ᠲᠤᠬᠤᠶᠢᠯᠠᠳᠠᠬᠤ᠂ ᠠᠷᠠᠰᠤ ᠮᠢᠬ᠎ᠠ ᠠᠴᠠ ᠨᠢ ᠪᠠᠵᠠᠬᠤ᠂ ᠬᠦᠵᠦᠭᠦᠦ ᠲᠤᠯᠤᠭᠠᠢ ᠭᠠᠷ ᠬᠦᠯ ᠢ ᠨᠢ ᠮᠤᠰᠭᠢᠬᠤ᠂ ᠡᠪᠦᠳᠦᠭᠯᠡᠬᠦ᠂ ᠢᠰᠭᠦᠯᠬᠦ᠂ ᠲᠡᠪᠢᠰᠬᠦ ᠵᠡᠷᠭᠡ ᠴᠠᠭᠠᠵᠠᠳᠠᠢ ᠬᠦᠳᠡᠯᠭᠡᠭᠡᠨ ᠢ ᠬᠢᠵᠦ ᠦᠯᠦ ᠪᠤᠯᠬᠤ ᠴᠢᠩᠭ᠎ᠠ ᠲᠦᠷᠢᠮ ᠲᠠᠢ᠃ ᠬᠡᠪᠳᠡᠨ ᠴᠤᠬᠢᠬᠤ ᠭᠡᠵᠦ ᠦᠪᠡᠷ ᠢᠶᠠᠨ ᠬᠡᠪᠳᠡᠩᠭᠦᠳᠡ ᠨᠦᠭᠦᠭᠡ ᠡᠳᠡᠭᠡᠳ ᠢᠶᠠᠨ ᠲᠡᠭᠡᠭᠦᠷ ᠢᠶᠠᠨ ᠭᠠᠷᠭᠠᠵᠤ ᠬᠠᠶᠠᠭᠠᠳ ᠲᠠᠯᠤ ᠮᠦᠷᠦ ᠶᠢ ᠨᠢ ᠰᠢᠷᠤᠶᠢᠳᠠᠬᠤ ᠶᠢ ᠬᠡᠯᠡᠵᠦ᠂ ᠡᠷᠭᠦᠨ ᠲᠠᠷᠤᠬᠤ ᠭᠡᠵᠦ ᠨᠦᠭᠦᠭᠡ ᠡᠳᠡᠭᠡᠳ ᠢᠶᠠᠨ ᠭᠡᠢ ᠡᠷᠭᠢᠭᠦᠯᠵᠦ ᠪᠠᠶᠢᠭᠠᠳ ᠲᠠᠷᠤᠨ ᠤᠨᠠᠭᠠᠵᠤ ᠲᠠᠯᠤ ᠶᠢ ᠨᠢ ᠰᠢᠷᠤᠶᠢᠳᠠᠬᠤ ᠶᠢ︔ ᠲᠡᠭᠡᠭᠡᠳᠡᠨ ᠲᠠᠷᠤᠬᠤ ᠭᠡᠵᠦ ᠤᠷᠢᠳ ᠢᠶᠠᠷ ᠨᠦᠭᠦᠭᠡ ᠡᠳᠡᠭᠡᠳ ᠢᠶᠠᠨ ᠲᠡᠭᠡᠭᠡᠳᠡᠵᠦ᠂ ᠲᠡᠭᠡᠭᠡᠳᠡᠭᠰᠡᠨ ᠬᠦᠴᠦᠨ ᠳᠡᠭᠡᠨ ᠲᠠᠷᠤᠨ ᠤᠨᠠᠭᠠᠵᠤ ᠲᠠᠯᠤ ᠮᠦᠷᠦ ᠶᠢ ᠨᠢ ᠰᠢᠷᠤᠶᠢᠳᠠᠬᠤ ᠶᠢ ᠬᠡᠯᠡᠳᠡᠭ ᠪᠠᠶᠢᠵᠠᠢ᠃ ᠬᠤᠶᠠᠷ ᠲᠠᠯᠤ ᠰᠢᠷᠤᠶᠢᠳᠠᠬᠤ ᠪᠠᠷ ᠪᠦᠬᠡ ᠶᠢᠨ ᠰᠢᠭᠦᠯᠳᠡ ᠪᠤᠯᠭᠠᠳᠠᠭ ᠪᠠᠶᠢᠭᠰᠠᠨ ᠤᠴᠢᠷ ᠠᠴᠠ ᠬᠤᠶᠠᠷ ᠪᠦᠬᠡᠴᠢᠨ ᠠᠯᠢ ᠨᠢᠭᠡ ᠪᠠᠨ ᠲᠡᠶᠢᠮᠦ ᠠᠮᠠᠷᠬᠠᠨ ᠰᠢᠷᠤᠶᠢᠳᠠᠵᠤ ᠡᠰᠡ ᠴᠢᠳᠠᠵᠤ᠂ ᠶᠡᠭᠡ ᠬᠡᠮᠵᠢᠶᠡᠨ ᠤ ᠴᠠᠭ ᠪᠠ ᠬᠦᠴᠦ ᠵᠠᠷᠤᠴᠠᠭᠤᠯᠵᠤ ᠤᠷ᠎ᠠ ᠮᠡᠭᠡ ᠬᠡᠷᠡᠭᠰᠡᠳᠡᠭ ᠪᠠᠶᠢᠵᠠᠢ᠃ ᠪᠦᠬᠡᠴᠦᠳ ᠬᠦᠮᠦᠨ ᠪᠤᠯᠭᠠᠨ ᠨᠢᠭᠡ ᠤᠳᠠᠭ᠎ᠠ ᠪᠠᠷᠢᠯᠳᠤᠭᠠᠳ ᠰᠢᠭᠦᠯᠳᠡ ᠭᠠᠷᠤᠨ᠎ᠠ᠂ ᠰᠢᠭᠦᠯᠳᠡ ᠶᠢᠨ ᠶᠡᠷᠦᠩᠭᠡᠢ ᠳ᠋ᠦᠩ ᠭᠠᠷᠤᠭᠰᠠᠭᠠᠷ ᠪᠦᠬᠡ ᠶᠢᠨ ᠶᠡᠷᠦᠩᠬᠡᠢ ᠲᠠᠭᠠᠭᠠᠮᠠᠯ ᠠᠴᠠ ᠨᠤᠶᠠᠨ ᠤ ᠲᠠᠯ᠎ᠠ ᠶᠢᠨ ᠪᠦᠬᠡᠴᠢᠨ ᠮᠠᠩᠨᠠᠢ ᠶᠢᠨ ᠪᠦᠬᠡ ᠪᠤᠯᠪᠠ ᠭᠡᠬᠦ ᠪᠤᠶᠤ ᠯᠠᠮᠠ ᠶᠢᠨ ᠲᠠᠯ᠎ᠠ ᠶᠢᠨ ᠪᠦᠬᠡ ᠲᠡᠳ᠋ ᠪᠦᠬᠡ ᠪᠤᠯᠪᠠ ᠭᠡᠮᠡᠨ ᠤᠯᠠᠨ ᠳᠤ ᠵᠠᠷᠯᠠᠵᠤ᠂ ᠲᠡᠷᠢᠭᠦᠨ ᠪᠦᠬᠡ ᠶᠢ ᠲᠡᠪᠡᠯ ᠤᠨ ᠲᠤᠷᠭ᠎ᠠ᠂ ᠪᠦᠳᠦᠨ ᠴᠠᠢ       ᠬᠠᠳᠠᠭ ᠢᠶᠠᠷ ᠱᠠᠩᠨᠠᠵᠤ ︵ᠮᠤᠷᠢ ᠪᠠᠷ ᠱᠠᠩᠨᠠᠬᠤ ᠲᠤᠬᠢᠶᠠᠯᠳᠤᠯ ᠴᠤ ᠪᠠᠶᠢᠵᠠᠢ︶᠂ ᠲᠡᠳ᠋ ᠪᠦᠬᠡ ᠶᠢ ᠲᠡᠪᠡᠯ ᠤᠨ ᠴᠢᠰᠴᠠᠤ᠂ ᠲᠠᠯ᠎ᠠ ᠴᠠᠢ ᠬᠠᠳᠠᠭ ᠲᠠᠢ ᠱᠠᠩᠨᠠᠵᠤ᠂ ᠪᠤᠰᠤᠳ ᠪᠦᠬᠡ ᠶᠢ ᠢᠵᠢᠯ ᠶᠠᠭᠤᠮ᠎ᠠ ᠪᠠᠷ ᠱᠠᠩᠨᠠᠨ᠎ᠠ᠂       ᠲᠡᠭᠡᠬᠦ ᠳᠡᠭᠡᠨ ᠬᠠᠷ᠎ᠠ ᠰᠢᠷ᠎ᠠ ᠶᠢᠨ ᠲᠠᠯ᠎ᠠ ᠠᠳᠠᠯᠢᠬᠠᠨ ᠢᠶᠠᠷ ᠲᠠᠪᠬᠤᠷ ᠱᠠᠩ ᠦᠭᠳᠡᠭ ᠪᠠᠶᠢᠵᠠᠢ᠃      ᠠᠷᠪᠠᠨ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠤ ᠡᠴᠦᠰ᠂ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠡᠬᠢ ᠪᠠᠷ ᠨᠡᠯᠢᠶᠡᠳ ᠨᠡᠷᠡᠳᠡᠢ ᠪᠠᠷᠢᠯᠳᠤᠵᠤ ᠪᠠᠶᠢᠭᠰᠠᠨ ᠪᠦᠬᠡᠴᠢᠨ ᠳᠤ ᠠᠮᠠᠨ᠋ᠧᠴᠢᠷ᠂ ᠪᠦᠳᠦᠭᠦᠨ ᠭᠤᠩᠴᠤᠭ᠂ ᠪᠦᠳᠦᠭᠦᠨ ᠭᠤᠩᠭᠤᠷ᠂ ᠵᠠᠮᠰᠦ᠋ᠷᠦᠩ ︵ᠪᠠᠨᠳᠤ ᠶᠢᠨ ᠠᠪᠤ︶᠂ ᠲᠠᠮᠳᠢᠨ ︵ᠭᠤᠩᠴᠤᠭᠯᠤᠳᠤᠢ ᠶᠢᠨ ᠠᠪᠤ︶᠂ ᠨᠠᠮᠰᠠᠷᠠᠢ ︵ᠲᠠᠪᠤᠨᠠᠩ︶᠂ ᠬᠠᠩᠬᠠᠷ ᠲᠤᠷᠵᠢ᠂ ᠲᠥᠵᠢᠩ᠂ ᠲᠡᠯᠢᠭᠳᠦᠷᠵᠢ᠂ ᠲᠦᠮᠡᠨᠪᠤᠷᠤ ᠨᠠᠷ ᠲᠡᠦᠬᠡᠨ ᠲᠡᠩᠰᠡᠨ᠎ᠡ ᠲᠡᠮᠳᠡᠭᠯᠡᠭᠳᠡᠬᠦ ᠶᠤᠰᠤ ᠲᠠᠢ᠃ ᠲᠤᠷᠭᠤᠳ ᠪᠦᠬᠡ ᠶᠢ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠭᠤᠴᠢᠭᠠᠳ ᠤᠨ ᠪᠤᠯᠳᠠᠯ᠎ᠠ ᠪᠠᠷᠢᠯᠳᠤᠵᠤ ᠪᠠᠶᠢᠭᠠᠳ ᠵᠠᠯᠭᠠᠭᠠᠳ ᠬᠠᠯᠬ᠎ᠠ ᠮᠠᠶ᠋ᠢᠭ ᠤᠨ ᠪᠦᠬᠡ ᠪᠠᠷ ᠤᠷᠤᠯᠠᠭᠳᠠᠵᠤ᠂ ᠲᠤᠷᠭᠤᠳ ᠪᠦᠬᠡ ᠶᠠᠪᠤᠭᠠᠨ ᠳᠠᠭᠠᠨ ᠬᠠᠶᠠᠭᠳᠠᠵᠠᠢ᠃
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠤᠨ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号