ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠥᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠪᠡᠶ᠎ᠡ ᠶᠢᠨ ᠵᠠᠰᠠᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/9/22
     ᠬᠦᠬᠦᠤᠷ᠄ ᠲᠤᠷᠭᠤᠳ ᠬᠦᠮᠦᠰ ᠬᠦᠬᠦᠤᠷ ᠭᠡᠵᠦ᠂ ᠬᠠᠯᠬ᠎ᠠ ᠬᠦᠮᠦᠰ ᠬᠥᠬᠡᠷᠬᠡ ᠭᠡᠳᠡᠭ᠃ ᠪᠤᠯᠤᠷ᠂ ᠨᠤᠭᠤᠭᠠᠨ ᠴᠠᠭᠠᠨ ᠬᠠᠰᠢ᠂ ᠤᠨᠳᠤᠷᠠᠭ᠎ᠠ᠂ ᠮᠠᠨᠤ᠂ ᠱᠠᠭᠠᠵᠠᠩ᠂ ᠬᠤᠪᠠ᠂ ᠰᠢᠯ᠂ ᠮᠤᠳᠤ᠂ ᠡᠪᠡᠷ ᠪᠦᠳᠦᠴᠡ ᠲᠠᠢ᠂ ᠱᠢᠷᠦ᠂ ᠬᠤᠪᠠᠨ ᠲᠠᠭᠯᠠᠭ᠎ᠠ ᠲᠠᠢ ᠬᠦᠬᠦᠤᠷ ᠠᠷᠪᠢᠨ ᠪᠠᠶᠢᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠪᠦᠷ ᠬᠤᠳᠠᠯᠳᠤᠭ᠎ᠠ ᠢᠷᠡᠳᠡᠭ ᠪᠠᠶᠢᠵᠠᠢ᠃ ᠡᠳᠡᠭᠡᠷ ᠠᠴᠠ ᠰᠢᠯ᠂ ᠱᠠᠭᠠᠵᠠᠩ ᠬᠦᠬᠦᠤᠷ ᠢ ᠤᠯᠠᠩᠬᠢ ᠬᠠᠷᠠᠴᠤ ᠠᠷᠠᠳ ᠬᠡᠷᠡᠭᠯᠡᠬᠦ ᠠᠴᠠ       ᠪᠤᠰᠤᠳ ᠢ ᠨᠢ ᠪᠠᠶᠠᠳ ᠨᠤᠶᠠᠳ ᠰᠠᠶᠢᠳ ᠲᠦᠰᠢᠮᠡᠳ ᠬᠡᠷᠡᠭᠯᠡᠵᠦ᠂ ᠯᠠᠮᠠ ᠨᠠᠷ ᠭᠤᠤᠯᠳᠠᠭᠤ ᠡᠪᠡᠷ ᠬᠦᠬᠦᠤᠷ       ︵ᠤᠰᠤᠨ ᠦᠬᠡᠷ ᠤᠨ ᠡᠪᠡᠷ᠂ ᠰᠠᠷᠯᠤᠭ ᠤᠨ ᠡᠪᠡᠷ ᠢᠶᠠᠷ ᠬᠢᠭᠰᠡᠨ︶᠂ ᠬᠤᠪᠠ᠂ ᠮᠤᠳᠤᠨ ᠬᠦᠬᠦᠤᠷ ᠬᠡᠷᠡᠭᠯᠡᠳᠡᠭ᠃ ᠬᠦᠬᠦᠤᠷ ᠢᠶᠠᠨ ᠡᠷᠡᠭᠳᠡᠶᠢᠴᠦᠳ ᠬᠦᠬᠦᠤᠷ ᠤᠨ ᠲᠠᠯᠢᠩ ᠳᠠᠭᠠᠨ᠂ ᠪᠦᠰᠡᠭᠦᠶᠢᠴᠦᠳ ᠬᠡᠳᠡᠪᠴᠢ ᠳᠡᠭᠡᠨ ᠬᠢᠵᠦ ᠬᠡᠵᠢᠶᠡᠳᠡ ᠪᠡᠶᠡᠨ ᠳᠡᠭᠡᠨ ᠠᠪᠴᠤ ᠶᠠᠪᠤᠬᠤ ᠶᠤᠰᠤ ᠲᠠᠢ᠃ ᠬᠦᠬᠦᠤᠷ ᠲᠡᠭᠡᠨ ᠬᠤᠳᠠᠯᠳᠤᠭ᠎ᠠ ᠢᠷᠡᠳᠡᠭ ᠰᠢᠷ᠎ᠠ       ᠲᠠᠮᠠᠬᠢ᠂ ᠠᠽᠤᠤ ᠲᠠᠮᠠᠬᠢ ᠶᠢ ᠦᠪᠡᠷᠰᠡᠳ ᠢᠶᠠᠨ ᠨᠠᠶᠢᠷᠠᠭᠤᠯᠤᠭᠠᠳ ᠬᠢᠵᠦ ᠲᠠᠳᠠᠳᠠᠭ᠂ ᠠᠽᠤᠤ ᠲᠠᠮᠠᠬᠢ ᠭᠡᠵᠦ ᠨᠠᠷᠢᠨ ᠮᠤᠳᠤᠯᠢᠭ ᠵᠦᠢᠯ᠂ ᠲᠡᠭᠦᠨ ᠢᠶᠠᠨ ᠤᠭᠤᠷ ᠨᠦᠳᠦᠭᠦᠷ ᠲᠤ ᠬᠢᠭᠡᠳ ᠨᠦᠳᠦᠵᠦ ᠲᠠᠯᠬᠠᠯᠠᠵᠤ᠂ ᠭᠡᠭᠡᠷ᠎ᠡ       ᠭᠤᠪᠢ ᠶᠢᠨ ᠵᠡᠭᠡᠷᠭᠡᠨ᠎ᠡ ᠲᠡᠭᠦᠵᠦ ᠲᠦᠯᠡᠵᠦ ᠰᠢᠭᠰᠢᠭᠡᠳ ᠲᠠᠯᠬᠠᠯᠠᠭᠰᠠᠨ ᠠᠽᠤᠤ ᠲᠠᠢ ᠪᠠᠨ ᠨᠡᠶᠢᠯᠡᠭᠦᠯᠵᠦ ᠮᠤᠩᠭᠤᠯ ᠠᠷᠢᠬᠢ ᠪᠠᠷ ᠨᠤᠬᠤᠵᠤ ᠨᠠᠶᠢᠷᠠᠭᠤᠯᠳᠠᠭ ᠪᠠᠶᠢᠵᠠᠢ᠃      ᠭᠡᠳᠡ ᠬᠢᠳᠤᠭ᠎ᠠ᠄ ᠭᠡᠳᠡ ᠭᠡᠵᠦ ᠪᠤᠯᠢᠭᠠᠷᠢ᠂ ᠮᠦᠩᠭᠦ᠂ ᠫᠤᠯᠢᠶᠠᠰᠤ᠂ ᠭᠠᠤᠯᠢ ᠪᠤᠶᠤ ᠲᠡᠮᠦᠷ᠂ ᠭᠠᠩ ᠢᠶᠠᠷ ᠪᠦᠷᠢᠯᠳᠦᠳᠡᠭ ᠵᠢᠵᠢᠭ ᠡᠳ᠋ᠯᠡᠯ᠃ ᠡᠬᠡ ᠪᠡᠶ᠎ᠡ ᠶᠢ ᠨᠢ ᠪᠤᠯᠢᠭᠠᠷᠢ ᠪᠠᠷ᠂ ᠦᠨᠴᠦᠭ ᠬᠦᠪᠡᠭᠡ ᠶᠢ ᠨᠢ ᠮᠦᠩᠭᠦ᠂ ᠫᠤᠯᠢᠶᠠᠰᠤ ᠪᠤᠶᠤ ᠭᠠᠤᠯᠢ ᠪᠠᠷ ᠬᠢᠳᠡᠭ᠂ ᠭᠡᠳᠡ ᠬᠢᠳᠤᠭ᠎ᠠ ᠶᠢᠨ ᠬᠤᠢ᠂ ᠬᠢᠳᠤᠭ᠎ᠠ ᠶᠢᠨ ᠳ᠋ᠤᠭ᠂ ᠪᠠᠯ ᠢ ᠠᠳᠠᠯᠢ ᠡᠳ᠋ ︵ᠮᠦᠩᠭᠦ ᠪᠤᠯ ᠪᠦᠷ ᠮᠦᠩᠭᠦ︶᠎ ᠪᠠᠷ ᠬᠢᠬᠦ ᠶᠢ ᠡᠷᠬᠢᠮᠯᠡᠳᠡᠭ ᠪᠠᠶᠢᠵᠠᠢ᠃ ᠬᠤᠶᠠᠷ ᠪᠠᠯ ᠬᠢᠭᠡᠳ ᠬᠡᠳᠡ ᠬᠢᠳᠤᠭ᠎ᠠ ᠶᠢ ᠬᠤᠯᠪᠤᠬᠤ ᠲᠤᠰᠬᠠᠢ ᠤᠭᠤᠰᠤᠷ ᠲᠠᠢ᠂ ᠡᠨᠡᠬᠦ ᠤᠭᠤᠰᠤᠷ ᠨᠢ ᠮᠦᠩᠭᠦ᠂ ᠰᠤᠷ ᠪᠤᠶᠤ ᠭᠦᠷᠦᠮᠡᠯ ᠤᠳᠠᠰᠤᠨ ᠤᠭᠤᠰᠤᠷ ᠪᠦᠳᠦᠴᠡ ᠲᠠᠢ ᠪᠦᠷ ᠪᠠᠶᠢᠳᠠᠭ᠃ ᠭᠡᠳᠡ ᠳᠤ ᠴᠠᠬᠢᠭᠤᠷ ᠴᠢᠯᠠᠭᠤ ᠪᠠ ᠪᠢᠰᠢᠭ ᠢᠶᠠᠨ ᠬᠢᠳᠡᠭ᠂ ᠴᠠᠭᠢᠭᠤᠷ ᠴᠢᠯᠠᠭᠤ ᠪᠠᠨ ᠭᠡᠳᠡ ᠶᠢᠨ ᠭᠠᠩ ᠳᠤ ᠬᠠᠪᠠᠷᠴᠤ ᠴᠤᠬᠢᠭᠰᠠᠭᠠᠷ ᠭᠠᠯ ᠭᠠᠷᠤᠨ᠎ᠠ᠂ ᠲᠡᠷᠡ ᠭᠠᠯ ᠢᠶᠠᠷ ᠲᠤᠤᠷᠠᠢ ᠶᠢᠨ ᠪᠢᠰᠢᠭ ᠢᠶᠠᠨ ᠨᠤᠴᠤᠭᠠᠵᠤ ᠲᠠᠭᠢᠭᠠᠳ ᠨᠤᠴᠤᠭᠠᠭᠰᠠᠨ ᠪᠢᠰᠢᠭ ᠢᠶᠠᠷ ᠢᠶᠠᠨ ᠲᠦᠯᠡᠭᠡ ᠪᠠᠨ ᠠᠰᠠᠭᠠᠨ᠎ᠠ᠃ ᠴᠠᠬᠢᠭᠤᠷ ᠴᠢᠯᠠᠭᠤ᠂ ᠪᠢᠰᠢᠭ ᠲᠠᠢ ᠯᠠ ᠪᠤᠯ ᠬᠦᠳᠡᠭᠡ ᠭᠠᠵᠠᠭ᠎ᠠ ︵ᠭᠠᠳᠠᠭ᠎ᠠ︶ ᠭᠠᠯ ᠦᠭᠡᠢ ᠬᠤᠨᠤᠬᠤ ᠤᠴᠢᠷ ᠦᠭᠡᠢ᠃ ᠤᠨᠴᠠ ᠵᠠᠷᠢᠮ ᠨᠢ ᠮᠦᠩᠭᠦᠨ ᠤ ᠲᠠᠷᠬᠠᠨ ᠢᠶᠠᠷ ᠬᠢᠯᠭᠡᠬᠦ ᠠᠴᠠ ᠤᠯᠠᠩᠬᠢ ᠨᠢ ᠬᠤᠳᠠᠯᠳᠤᠭ᠎ᠠ ᠭᠡᠳᠡ ᠬᠢᠳᠤᠭ᠎ᠠ ᠬᠡᠷᠡᠭᠯᠡᠵᠦ᠂ ᠴᠠᠬᠢᠭᠤᠷ ᠴᠢᠯᠠᠭᠤ ᠪᠠ ᠪᠢᠰᠢᠭ ᠢᠶᠠᠨ ᠬᠠᠷᠢᠨ ᠦᠪᠡᠷᠰᠡᠳ ᠢᠶᠠᠨ ᠪᠡᠯᠡᠳᠳᠡᠭ ᠪᠠᠶᠢᠵᠠᠢ᠂       ᠦᠩᠭᠡᠷᠡᠭᠰᠡᠨ ᠳᠤ ᠡᠷᠡᠭᠳᠡᠶᠢᠴᠦᠳ ᠠᠶᠢᠯ ᠳᠤ ᠤᠷᠤᠬᠤ ᠳ᠋ᠠᠭᠠᠨ‌‍ᠬᠢᠳᠤᠭ᠎ᠠ ᠪᠠᠨ ᠵᠠᠪᠠᠯ ᠪᠠᠭᠤᠯᠭᠠᠵᠤ ᠤᠷᠤᠬᠤ ᠶᠤᠰᠤ ᠎ ᠲᠠᠢ ᠪᠠᠶᠢᠭᠰᠠᠨ᠃      ᠪᠠᠯ᠄ ᠬᠠᠰᠢ᠂ ᠮᠦᠩᠭᠦ᠂ ᠫᠤᠯᠢᠶᠠᠰᠤ᠂ ᠭᠠᠤᠯᠢ ᠪᠤᠶᠤ ᠲᠡᠮᠦᠷ ᠢᠶᠠᠷ ᠬᠢᠭᠰᠡᠨ ᠡᠳ᠋ᠯᠡᠯ᠃ ᠡᠷᠡᠭᠳᠡᠶᠢᠴᠦᠳ ᠪᠦᠰᠡᠭᠦᠶᠢᠴᠦᠳ ᠦᠭᠡᠢ ᠲᠤᠭᠤᠢ ᠪᠡᠯ ︵ᠲᠠᠪᠤᠨ ᠲᠠᠷᠢᠶ᠎ᠠ ᠲᠠᠢ ᠲᠤᠭᠤᠢ ᠪᠡᠯ ᠪᠠᠰᠠ ᠪᠠᠶᠢᠵᠤ᠂ ᠲᠡᠭᠦᠨ ᠢ ᠪᠦᠰᠡᠭᠦᠢ ᠬᠦᠮᠦᠨ ᠵᠡᠭᠦᠳᠡᠭ ᠪᠠᠶᠢᠵᠠᠢ︶᠎ ᠢ ᠶᠡᠭᠡ ᠵᠡᠭᠦᠵᠡᠭᠡᠵᠦ᠂ ᠡᠷᠡᠴᠦᠳ ᠤᠨ ᠵᠠᠷᠢᠮ ᠨᠢ ᠪᠠᠰᠠ ᠰᠠᠷᠠᠨ ᠬᠡᠯᠪᠡᠷᠢᠳᠦ ᠪᠡᠯ᠂ ᠬᠦᠬᠦᠤᠷ ᠬᠡᠯᠪᠡᠷᠢᠳᠦ ᠪᠡᠯ ᠵᠡᠭᠦᠵᠦ᠂ ᠪᠦᠰᠡᠭᠦᠢ ᠶᠢᠨ ᠵᠠᠷᠢᠮ ᠨᠢ ᠪᠠᠰᠠ ᠡᠷᠭᠢᠭᠦᠯᠭᠡᠨ ᠪᠡᠯ ᠵᠡᠭᠦᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠨᠢᠭᠤᠷ ᠲᠠᠯ᠎ᠠ ᠳᠤᠨᠢ ᠪᠦᠷ ᠬᠡ ᠰᠢᠭᠢᠳᠭᠡᠷᠢ ᠲᠠᠢ᠂ ᠵᠠᠷᠢᠮ ᠤᠨ ᠬᠢᠨᠢ ᠰᠡᠮᠵᠢᠨ ᠳᠤᠨᠢ ᠬᠦᠷᠳᠡᠯ᠎ᠡ ᠵᠢᠵᠢᠭ ᠰᠢᠭᠢᠳᠬᠡᠷᠢ ᠲᠠᠢ᠃ ᠤᠯᠠᠩᠬᠢ ᠨᠢ ᠬᠤᠳᠠᠯᠳᠤᠭ᠎ᠠ ᠪᠡᠯ ᠵᠡᠭᠦᠵᠦ᠂ ᠵᠠᠷᠢᠮ ᠨᠢ ᠪᠠᠰᠠ ᠮᠦᠩᠭᠦ᠂ ᠭᠠᠤᠯᠢ ᠪᠠᠨ ᠦᠭᠭᠦᠭᠡᠳ ᠮᠦᠩᠭᠦᠨ ᠤ ᠲᠠᠷᠬᠠᠨ ᠢᠶᠠᠷ ᠬᠢᠯᠭᠡᠳᠡᠭ ᠪᠠᠶᠢᠵᠠᠢ᠃ ᠡᠷᠡᠭᠳᠡᠶᠢᠴᠦᠳ ᠪᠦᠰᠡ ᠪᠠᠨ ᠪᠤᠯᠢᠭᠠᠷᠢ ᠪᠠᠷ ᠬᠢᠭᠰᠡᠨ ᠪᠢᠳᠡᠭᠦᠦ ᠭᠤᠭᠴᠤᠭ᠎ᠠ ᠳᠠᠭᠠᠨ ᠰᠦᠪᠡᠯᠡᠵᠦ᠂ ᠦᠨᠦ ᠭᠤᠭᠴᠤᠭ᠎ᠠ ᠠᠴᠠ ᠪᠠᠨ ᠬᠤᠶᠠᠷ ᠪᠡᠯ ᠢᠶᠠᠨ ᠵᠡᠭᠦᠨ᠎ᠡ᠂ ᠵᠡᠭᠦᠨ ᠲᠠᠰᠢᠶᠠᠨ ᠳᠠᠬᠢ ᠪᠡᠯ ᠠᠴᠠ ᠪᠠᠨ ᠬᠡᠳᠡ᠂ ᠪᠠᠷᠠᠭᠤᠨ ᠲᠠᠰᠢᠶᠠᠨ ᠳᠠᠬᠢ ᠪᠡᠯ ᠠᠴᠠ ᠪᠠᠨ ᠬᠢᠳᠤᠭ᠎ᠠ ᠪᠠᠨ ᠵᠡᠭᠦᠳᠡᠭ᠃ ᠪᠦᠰᠡᠭᠦᠢ ᠬᠦᠮᠦᠨ ᠪᠡᠯ ᠢᠶᠠᠨ ᠬᠤᠷᠮᠤᠢ ᠲᠠᠢ ᠲᠡᠪᠡᠯ᠂ ᠪᠧᠱᠮᠤᠳ ᠪᠤᠶᠤ ᠦᠴᠢ ᠶᠢᠨ ᠬᠤᠶᠠᠷ ᠰᠤᠭᠤᠨ ᠳᠠᠬᠢ ᠲᠡᠪᠢᠴᠡ ᠶᠢᠨ ᠭᠤᠭᠴᠤᠭ᠎ᠠ ᠠᠴᠠ ᠵᠡᠭᠦᠳᠡᠭ ᠪᠦᠭᠡᠳ ᠪᠠᠷᠠᠭᠤᠨ ᠰᠤᠭᠤᠨ ᠳᠠᠬᠢ ᠪᠡᠯ ᠠᠴᠠ ᠬᠡᠳᠡᠪᠴᠢ ᠪᠠᠨ ᠵᠡᠭᠦᠵᠦ᠂ ᠵᠡᠭᠦᠨ ᠰᠤᠭᠤᠨ ᠳᠠᠬᠢ ᠪᠡᠯ ᠠᠴᠠ ᠬᠤᠪᠤᠯᠠ᠂ ᠲᠦᠷᠦᠭᠡ ᠬᠤᠷᠤᠭᠤᠪᠴᠢ ᠪᠠᠨ ᠵᠡᠭᠦᠳᠡᠭ᠂ ᠵᠠᠷᠢᠮ ᠪᠦᠰᠡᠭᠦᠢ       ᠪᠡᠯ ᠠᠴᠠ ᠪᠠᠨ ᠪᠠᠰᠠ ᠤᠯᠠᠨ ᠵᠦᠢᠯ ᠤᠨ ᠠᠯᠴᠢᠭᠤᠷ ᠤᠶᠠᠵᠤ ᠭᠡᠭᠡᠷᠡᠳᠡᠭ ᠪᠠᠶᠢᠵᠠᠢ᠃      ᠭᠠᠩᠰᠠ᠄ ᠭᠠᠩᠰᠠ ᠶᠢ ᠡᠵᠡᠨ᠎ᠡ ᠲᠤᠷᠭᠤᠳ ᠭᠠᠩᠵᠠ ᠭᠡᠳᠡᠭ ᠪᠠᠶᠢᠵᠠᠢ᠂ ᠭᠠᠩᠰᠠ ᠭᠡᠳᠡᠭ ᠪᠤᠯ ᠭᠠᠩᠰᠠᠨ ᠤ ᠲᠤᠯᠤᠭᠠᠢ᠂ ᠭᠠᠩᠰᠠᠨ ᠭᠤᠤᠯ ᠪᠠ ᠰᠤᠷᠤᠭᠤᠯ ᠤᠨ ᠶᠡᠷᠦᠩᠬᠡᠢ ᠨᠡᠷ᠎ᠡ᠃ ᠭᠠᠩᠰᠠᠨ ᠤ ᠲᠤᠯᠤᠭᠠᠢ ᠶᠢᠨ ᠤᠯᠠᠩᠬᠢ ᠨᠢ ᠲᠡᠮᠦᠷ ᠪᠠᠶᠢᠳᠠᠭ᠂ ᠫᠤᠯᠢᠶᠠᠰᠤ᠂ ᠮᠦᠩᠭᠦᠨ ᠤ ᠪᠠᠰᠠ ᠪᠠᠶᠢᠳᠠᠭ᠂ ᠭᠠᠩᠰᠠᠨ ᠤ ᠲᠤᠯᠤᠭᠠᠢ ᠶᠢᠨ ᠲᠡᠪ ᠢ ᠵᠠᠪᠠᠯ ᠬᠠᠳᠠᠭᠤᠯᠢᠭ ᠲᠡᠮᠦᠷ ᠢᠶᠠᠷ ᠬᠢᠳᠡᠭ᠂ ᠮᠦᠩᠭᠦ ᠪᠠᠷ ᠬᠢᠪᠡᠯ ᠲᠡᠰᠳᠡᠭ ᠦᠭᠡᠢ ᠪᠠᠶᠢᠵᠠᠢ᠃ ᠰᠤᠷᠤᠭᠤᠯ ᠨᠢ ᠨᠤᠭᠤᠭᠠᠨ᠂ ᠴᠠᠭᠠᠨ ᠬᠠᠰᠢ᠂ ᠮᠠᠨᠤ᠂ ᠱᠠᠭᠠᠵᠠᠩ᠂ ᠰᠢᠯ᠂ ᠴᠠᠭᠠᠨ ᠭᠠᠤᠯᠢ᠂ ᠬᠤᠪᠠ ᠪᠦᠳᠦᠴᠡ ᠲᠠᠢ ᠪᠦᠷ ᠪᠠᠶᠢᠵᠠᠢ᠂       ᠡᠳᠡᠭᠡᠷ ᠤᠨ ᠲᠤᠳᠤᠷ᠎ᠠ ᠠᠴᠠ ᠬᠠᠰᠢ ᠰᠤᠷᠤᠭᠤᠯ ᠶᠡᠭᠡ ᠡᠳ᠋ᠯᠡᠳᠡᠭ᠃ ᠭᠠᠩᠰᠨ ᠪᠠᠨ ᠤᠯᠠᠩᠬᠢ ᠨᠢ ᠭᠤᠳᠤᠯ ᠤᠨ ᠲᠦᠷᠡᠢ ᠳᠡᠭᠡᠨ ᠰᠢᠷᠭᠤᠭᠤᠯᠵᠤ᠂ ᠤᠨᠴᠠ ᠵᠠᠷᠢᠮ ᠨᠢ ᠪᠦᠰᠡᠨ ᠳᠡᠭᠡᠨ ᠬᠠᠪᠴᠢᠭᠤᠯᠬᠤ ᠪᠤᠶᠤ ᠡᠪᠦᠷᠳᠦᠯᠡᠳᠡᠭ᠃ ᠭᠠᠩᠰᠠᠨ ᠤ ᠲᠤᠯᠤᠭᠠᠢ᠂ ᠭᠤᠤᠯ᠂ ᠰᠤᠷᠤᠭᠤᠯ ᠲᠤᠰ ᠲᠤᠰ ᠲᠠᠭᠠᠨ ᠬᠤᠳᠠᠯᠳᠤᠭ᠎ᠠ ᠢᠷᠡᠵᠦ᠂ ᠦᠪᠡᠷᠰᠡᠳ ᠢᠶᠠᠨ ᠲᠠᠭᠠᠷᠠᠭᠤᠯᠵᠤ ᠤᠭᠯᠠᠵᠤ ᠠᠪᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠭᠤᠤᠯᠳᠠᠭᠤ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠡᠷᠡᠴᠦᠳ ᠲᠠᠳᠠᠵᠤ᠂ ᠨᠡᠯᠢᠶᠡᠳ ᠨᠠᠰᠤᠵᠢᠭᠰᠠᠨ ᠡᠮᠡᠭᠡᠳ ᠠᠴᠠ ᠵᠠᠷᠢᠮ ᠨᠢ ᠪᠠᠰᠠ ᠲᠠᠳᠠᠳᠠᠭ ᠪᠠᠶᠢᠵᠠᠢ᠃ ᠭᠠᠩᠰᠠᠨ ᠳᠠᠭᠠᠨ ᠬᠤᠳᠠᠯᠳᠤᠭ᠎ᠠ ᠢᠷᠡᠳᠡᠭ ᠲᠦᠩᠰᠡᠨ ᠲᠠᠮᠠᠬᠢ ︵ᠲᠠᠷᠤᠢ ᠨᠠᠪᠴᠢᠨ ᠲᠠᠮᠠᠬᠢ︶ ᠬᠢᠵᠦ ᠲᠠᠳᠠᠵᠠᠭᠠᠳᠠᠭ᠂ ᠭᠠᠩᠰᠠ ᠲᠠᠳᠠᠬᠤ ᠳᠤ       ᠮᠦᠩᠭᠦ᠂ ᠫᠤᠯᠢᠶᠠᠰᠤ ᠪᠤᠶᠤ ᠲᠡᠮᠦᠷ ᠢᠶᠠᠷ ᠬᠢᠭᠰᠡᠨ ᠴᠤᠬᠢᠯᠠᠭᠤᠷ᠂ ᠰᠡᠳᠬᠡᠭᠦᠷ ᠬᠡᠷᠡᠭᠯᠡᠳᠡᠭ᠃ ᠴᠤᠬᠢᠯᠠᠭᠤᠷ ᠭᠡᠵᠦ ᠵᠢᠵᠢᠭ ᠬᠤᠨᠳᠠᠭ᠎ᠠ ᠬᠡᠪᠳᠡᠢ ᠶᠠᠭᠤᠮ᠎ᠠ᠂ ᠭᠠᠩᠰᠠᠨ ᠤ ᠲᠤᠯᠤᠭᠠᠢ ᠳᠠᠬᠢ ᠦᠨᠡᠰᠦ ᠶᠢ ᠴᠤᠬᠢᠵᠤ ᠭᠠᠷᠭᠠᠬᠤ ᠦᠢᠯᠡᠳᠦᠯ ᠎ ᠲᠠᠢ᠂ ᠰᠡᠳᠬᠡᠭᠦᠷ ᠭᠡᠵᠦ ᠨᠠᠷᠢᠨ ᠭᠤᠬᠢᠭᠠᠷ ᠶᠠᠭᠤᠮ᠎ᠠ᠂ ᠭᠠᠩᠰᠠᠨ ᠤ ᠲᠤᠯᠤᠭᠠᠢ ᠳᠠᠬᠢ ᠪᠤᠬᠢ ᠮᠠᠯᠳᠠᠨ ᠭᠠᠷᠭᠠᠬᠤ ᠦᠢᠯᠡᠳᠦᠯ ᠦᠵᠡᠭᠦᠯᠦᠨ᠎ᠡ᠃      ᠭᠠᠤ᠄ ᠡᠮᠡᠭᠳᠡᠶᠢᠴᠦᠳ ᠤᠨ ᠬᠦᠵᠦᠭᠦᠨ ᠳᠡᠭᠡᠨ ᠤᠭᠤᠰᠤᠷᠯᠠᠨ ᠵᠡᠭᠦᠳᠡᠭ ᠮᠦᠩᠭᠦᠨ ᠡᠳ᠋ᠯᠡᠯ᠃           ᠬᠤᠷᠯᠤ ᠭᠠᠤ ᠪᠠ ᠪᠤᠷᠬᠠᠳᠤ ᠭᠠᠤ ᠬᠡᠵᠦ ᠪᠠᠶᠢᠳᠠᠭ᠂ ᠪᠤᠷᠬᠠᠳᠤ ᠭᠠᠤ ᠨᠢ ᠬᠠᠪᠳᠠᠭᠠᠶᠢᠳᠠᠭᠤ ᠲᠤᠭᠤᠢ ᠬᠡᠯᠪᠡᠷᠢ ᠲᠠᠢ᠂ ᠲᠤᠳᠤᠷ᠎ᠠ ᠪᠠᠨ ᠬᠦᠨᠳᠡᠢ ᠪᠠᠶᠢᠳᠠᠭ᠂ ᠬᠦᠨᠳᠡᠢ ᠲᠤᠳᠤᠷ᠎ᠠ ᠤᠯᠠᠩᠬᠢ ᠨᠢ ᠪᠤᠷᠬᠠᠨ ᠰᠠᠬᠢᠭᠤᠯᠰᠤᠨ ᠤ ᠴᠠᠭᠠᠰᠤᠨ ᠪᠠᠷ ᠵᠢᠷᠤᠭ ᠬᠢᠳᠡᠭ᠂ ᠠᠮᠢ ᠨᠠᠰᠤ ᠬᠠᠮᠠᠭᠠᠯᠠᠵᠤ ᠭᠠᠢ ᠪᠡᠷᠴᠢᠳ ᠠᠷᠢᠯᠭᠠᠬᠤ ᠦᠢᠯᠡᠳᠦᠯ ᠲᠠᠢ ᠭᠡᠮᠡᠨ ᠦᠵᠡᠳᠡᠭ ᠪᠠᠶᠢᠵᠠᠢ᠃      ᠰᠦᠢᠬᠡ ︵ᠡᠭᠡᠮᠦᠭ︶᠄ ᠰᠦᠢᠬᠡ᠂ ᠡᠭᠡᠮᠦᠭ ᠢ ᠭᠤᠤᠯᠳᠠᠭᠤ ᠮᠦᠩᠭᠦᠨ ᠤ ᠲᠠᠷᠬᠠᠨ ᠳᠤ ᠮᠦᠩᠭᠦ᠂ ᠭᠠᠤᠯᠢ᠂ ᠬᠤᠷᠭᠤᠯᠵᠢ ᠪᠠᠨ ᠦᠭᠭᠦᠭᠡᠳ ᠬᠢᠯᠭᠡᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠤᠯᠠᠩᠬᠢ ᠨᠢ ᠮᠦᠩᠭᠦᠨ ᠤ ᠬᠢ ᠶᠢ ᠵᠡᠭᠦᠳᠡᠭ       ᠪᠠᠶᠢᠵᠠᠢ᠃ ᠡᠮᠡᠭᠳᠡᠶᠢᠴᠦᠳ ᠴᠢᠬᠢ ᠮᠤᠬᠤᠷ ᠪᠠᠶᠢᠯᠭᠠᠬᠤ ᠶᠤᠰᠤ ᠦᠭᠡᠢ᠂ ᠵᠠᠪᠠᠯ ᠰᠦᠢᠬᠡ ᠡᠭᠡᠮᠦᠭ ᠵᠡᠭᠦᠳᠡᠭ᠃ ᠬᠡᠦᠬᠡᠨ ᠬᠡᠦᠬᠡᠰ ᠢ ᠠᠷᠪᠠ ᠬᠦᠷᠦᠭᠰᠡᠭᠡᠷ ᠴᠢᠬᠢ ᠶᠢ ᠨᠢ ᠴᠤᠭᠤᠯᠤᠨ ᠡᠭᠡᠮᠦᠭ ᠵᠡᠭᠦᠯᠭᠡᠨ᠎ᠡ᠃ ᠰᠦᠢᠬᠡ ᠡᠭᠡᠮᠦᠭ ᠲᠤ ᠫᠠᠶᠢᠽᠢ ᠰᠦᠢᠬᠡ᠂ ᠪᠦᠭᠡᠷ᠎ᠡ ᠰᠦᠢᠬᠡ᠂ ᠰᠠᠨᠵᠢᠯᠭ᠎ᠠ ᠰᠦᠢᠬᠡ᠂ ᠭᠠᠷᠠᠬᠠᠨ ᠡᠭᠡᠮᠦᠭ᠂ ᠰᠡᠭᠦᠵᠢᠨ ᠡᠭᠡᠮᠦᠭ᠂ ᠸᠴᠢᠷ ᠡᠭᠡᠮᠦᠭ᠂ ᠬᠤᠷᠯᠤ ᠡᠭᠡᠮᠦᠭ᠂ ᠽᠡᠨᠳᠡ ᠡᠭᠡᠮᠦᠭ᠂ ᠽᠡᠨᠳᠡ ᠬᠤᠷᠯᠤ ᠡᠭᠡᠮᠦᠭ ︵ᠲᠤᠮᠳᠠ ᠪᠠᠨ ᠵᠠᠯᠭᠠᠭᠠᠰᠤ ᠲᠠᠢ︶᠂ ᠮᠦᠩᠭᠦᠨ ᠤᠳᠠᠰᠤᠨ ᠡᠭᠡᠮᠦᠭ ᠵᠡᠷᠭᠡ ᠪᠠᠶᠢᠳᠠᠭ᠂ ᠡᠳᠡᠭᠡᠷ ᠤᠨ ᠲᠤᠳᠤᠷ᠎ᠠ ᠠᠴᠠ ᠽᠠᠨᠳᠠ᠂ ᠽᠠᠨᠳᠠ ᠬᠤᠷᠯᠤ ᠡᠭᠡᠮᠦᠭ᠂ ᠮᠦᠩᠭᠦᠨ ᠤᠳᠠᠰᠤᠨ ᠡᠭᠡᠮᠦᠭ ᠢ ᠨᠡᠯᠢᠶᠠᠳ ᠬᠤᠵᠢᠭᠤ ᠵᠡᠭᠦᠬᠦ ᠪᠤᠯᠵᠠᠢ᠃ ᠫᠠᠶᠢᠽᠢ ᠰᠦᠢᠬᠡ ᠪᠦᠳᠦᠭᠦᠨ ᠪᠠᠭᠠᠴᠠᠷ ᠬᠤᠶᠠᠷ ᠵᠦᠢᠯ ᠶᠤᠮ᠂ ᠪᠦᠰᠡᠭᠦᠶᠢᠴᠦᠳ ᠭᠤᠤᠯᠳᠠᠭᠤ ᠨᠠᠶᠢᠷ ᠨᠠᠭᠠᠳᠤᠮ ᠤᠨ ᠴᠠᠭ ᠲᠤ ᠵᠡᠭᠦᠵᠡᠭᠡᠨ᠎ᠡ᠂ ᠲᠤᠰ ᠰᠦᠢᠬᠡ ᠬᠠᠪᠳᠠᠭᠠᠢ ᠬᠡᠯᠪᠡᠷᠢ ᠲᠠᠢ᠂ ᠵᠠᠷᠢᠮ ᠨᠢ ᠭᠤᠤᠯ ᠲᠤᠮᠳᠠ ᠪᠠᠨ ᠭᠠᠭᠴᠠ ᠪᠦᠳᠦᠭᠦᠨ ᠰᠢᠭᠢᠳᠬᠡᠷᠢ ᠲᠠᠢ᠂     ᠵᠠᠷᠢᠮ ᠨᠢ ᠭᠤᠤᠯ ᠳᠠᠭᠠᠨ ᠪᠦᠳᠦᠭᠦᠨ ᠰᠢᠭᠢᠳᠬᠡᠷᠢ ᠲᠠᠢ ᠪᠠᠷ ᠦᠯᠦ ᠪᠠᠷᠠᠮ ᠡᠷᠭᠢᠨ ᠲᠤᠭᠤᠷᠢᠨ ᠵᠢᠵᠢᠭ ᠰᠢᠭᠢᠳᠬᠡᠭᠡ ᠎ ᠲᠠᠢ᠂ ᠰᠢᠭᠢᠳᠬᠡᠷᠢ ᠨᠢ ᠤᠯᠠᠭᠠᠨ᠂ ᠨᠤᠭᠤᠭᠠᠨ ᠱᠢᠷᠦ ᠤᠭ᠍ᠶᠤ ᠪᠠᠶᠢᠳᠠᠭ ᠪᠠᠶᠢᠵᠠᠢ᠂ ᠫᠠᠶᠢᠽᠢ ᠰᠦᠢᠬᠡ ᠶᠢᠨ ᠬᠠᠪᠳᠠᠭᠠᠢ ᠶᠢᠨ ᠲᠤᠤᠷ᠎ᠠ ᠨᠢ ᠭᠤᠷᠪᠠᠨ ᠮᠦᠩᠭᠦᠨ ᠤᠳᠠᠰᠤᠨ ᠰᠠᠨᠵᠢᠯᠭ᠎ᠠ ᠲᠠᠢ᠂ ᠵᠠᠷᠢᠮ ᠨᠢ ᠪᠠᠰᠠ ᠲᠠᠪᠤᠨ ᠲᠠᠷᠢᠶᠠᠨ ᠰᠠᠨᠵᠢᠯᠭ᠎ᠠ ᠲᠠᠢ᠂ ᠰᠠᠨᠵᠢᠯᠭ᠎ᠠ ᠶᠢᠨ ᠲᠤᠤᠷ᠎ᠠ ᠨᠢ ᠵᠢᠵᠢᠭ ᠪᠦᠨᠵᠢᠭᠢᠨᠡᠭᠦᠷ ᠲᠠᠢ᠂ ᠵᠠᠷᠢᠮ ᠨᠢ ᠪᠠᠰᠠ ᠵᠢᠵᠢᠭ ᠬᠤᠩᠬᠤ ᠎ ᠲᠠᠢ ᠪᠠᠶᠢᠳᠠᠭ ᠪᠠᠶᠢᠵᠠᠢ᠃ ᠬᠠᠪᠳᠠᠭᠠᠢ ᠰᠦᠢᠬᠡ ᠪᠠ ᠰᠠᠨᠵᠢᠯᠭ᠎ᠠ ᠶᠢ ᠬᠤᠯᠪᠤᠬᠤ᠂ ᠰᠠᠨᠵᠢᠯᠭ᠎ᠠ ᠪᠠ ᠪᠦᠨᠵᠢᠭᠢᠨᠡᠭᠦᠷ ᠢ ᠬᠤᠯᠪᠤᠬᠤ ᠰᠡᠭᠦᠵᠢᠨ ᠬᠡᠯᠪᠡᠷᠢ ᠲᠠᠢ ᠭᠠᠷᠠᠬ᠎ᠠ ᠲᠠᠢ᠃ ᠬᠤᠵᠢᠭᠤ ᠪᠤᠯᠵᠤ ᠢᠷᠡᠭᠡᠳ ᠪᠦᠳᠦᠭᠦᠨ ᠪᠦᠭᠡᠳ ᠬᠦᠨᠳᠦ ᠰᠦᠢᠬᠡ ᠡᠭᠡᠮᠦᠭ ᠢ ᠲᠡᠭᠡᠭᠰᠢ ᠲᠠᠳᠠᠵᠤ ᠦᠭᠬᠦ ᠦᠢᠯᠡᠳᠦᠯ ᠦᠵᠡᠭᠦᠯᠬᠦ ᠡᠭᠡᠮᠦᠭ ᠤᠨ ᠲᠠᠳᠠᠭᠤᠷ ᠭᠡᠭᠴᠢ ᠶᠢ ᠬᠡᠷᠡᠭᠯᠡᠳᠡᠭ ᠪᠤᠯᠵᠤ᠂ ᠬᠤᠶᠠᠷ ᠡᠭᠡᠮᠦᠭ ᠢ ᠬᠤᠯᠪᠤᠬᠤ ᠡᠭᠡᠮᠦᠭ ᠤᠨ ᠬᠤᠯᠪᠤᠭ᠎ᠠ ᠶᠢ ᠴᠤ ᠬᠡᠷᠡᠭᠯᠡᠳᠡᠭ ᠪᠤᠯᠵᠠᠢ᠂ ᠡᠭᠡᠮᠦᠭ ᠤᠨ ᠲᠠᠳᠠᠭᠤᠷ ᠪᠤᠯᠤᠨ ᠬᠤᠯᠪᠤᠭ᠎ᠠ ᠶᠢ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠨᠢ ᠮᠦᠩᠭᠦᠨ ᠤᠳᠠᠰᠤ ᠪᠠᠷ᠂ ᠶᠠᠳᠠᠭᠤ ᠨᠢ      ᠪᠦᠰ ᠢᠶᠠᠷ ᠬᠢᠳᠡᠭ ᠪᠠᠶᠢᠵᠠᠢ᠃      ᠪᠦᠯᠡᠵᠡᠭ᠄ ᠪᠦᠯᠡᠵᠡᠭ ᠢ ᠡᠵᠡᠨ᠎ᠡ ᠲᠤᠷᠭᠤᠳ ᠪᠡᠯᠵᠡᠭ ᠪᠤᠶᠤ ᠪᠡᠯᠰᠡᠭ ᠭᠡᠳᠡᠭ ᠪᠠᠶᠢᠭᠰᠠᠨ᠃ ᠠᠯᠳᠠ᠂       ᠬᠠᠰᠢ᠂ ᠮᠦᠩᠭᠦ᠂ ᠭᠠᠤᠯᠢ᠂ ᠵᠡᠰ᠂ ᠬᠤᠪᠠ ᠪᠦᠳᠦᠴᠡ ᠲᠠᠢ᠂ ᠠᠯᠳᠠ᠂ ᠮᠦᠩᠭᠦ᠂ ᠭᠠᠤᠯᠢ ᠪᠠᠷ ᠮᠦᠩᠭᠦᠨ ᠤ ᠲᠠᠷᠬᠠᠳ ᠬᠢᠵᠦ᠂ ᠵᠡᠰ᠂ ᠬᠤᠪᠠ ᠪᠦᠯᠡᠵᠡᠭ ᠬᠤᠳᠠᠯᠳᠤᠭ᠎ᠠ ᠢᠷᠡᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠤᠯᠠᠩᠬᠢ ᠨᠢ ᠮᠦᠩᠭᠦᠨ ᠪᠦᠯᠡᠵᠡᠭ ᠵᠡᠭᠦᠳᠡᠭ ᠪᠠᠶᠢᠵᠠᠢ᠃ ᠪᠦᠯᠡᠵᠡᠭ ᠲᠤ ᠬᠠᠵᠢ ᠲᠠᠢ ᠪᠦᠯᠡᠵᠡᠭ ︵ᠲᠠᠷᠤᠢ ᠬᠤᠤᠰ ᠪᠦᠯᠡᠵᠡᠭ︶᠂ ᠪᠦᠭᠡᠷᠡᠩᠬᠡᠢ ᠪᠦᠯᠡᠵᠡᠭ᠂ ᠸᠴᠢᠷ ᠲᠠᠢ ᠪᠦᠯᠡᠵᠡᠭ᠂ ᠰᠢᠭᠢᠳᠬᠡᠷᠢ ᠲᠠᠢ ᠪᠦᠯᠡᠵᠡᠭ ︵ᠰᠡᠭᠦᠯ ᠳᠤ ᠭᠠᠷᠤᠭᠰᠠᠨ︶ ᠭᠡᠵᠦ ᠪᠠᠶᠢᠵᠠᠢ᠃ ᠡᠳᠡᠭᠡᠷ ᠢᠶᠠᠨ ᠡᠮᠡᠭᠳᠡᠶᠢᠴᠦᠳ ᠰᠠᠶᠢᠨ ᠬᠤᠷᠤᠭᠤ᠂ ᠴᠡᠪᠡᠷᠬᠡᠨ ᠬᠤᠷᠤᠭᠤ ᠭᠡᠮᠡᠨ ᠦᠵᠡᠳᠡᠭ ᠨᠡᠷ᠎ᠡ ᠦᠭᠡᠢ ᠬᠤᠷᠤᠭᠤ   ︵ᠲᠠᠷᠤᠢ ᠢᠳᠠᠮ ᠬᠤᠷᠤᠭᠤ︶᠎ ᠳᠠᠭᠠᠨ ᠵᠡᠭᠦᠵᠡᠭᠡᠵᠦ᠂ ᠵᠡᠭᠦᠬᠦ ᠪᠦᠯᠡᠵᠡᠭ ᠤᠯᠠᠨ ᠪᠤᠯ ᠡᠷᠡᠬᠡᠢ᠂ ᠲᠤᠯᠢᠶᠠᠪᠤᠷ ᠬᠤᠷᠤᠭᠤ ᠪᠠ ᠴᠢᠭᠡᠴᠢ ᠬᠤᠷᠤᠭᠤᠨ ᠳᠠᠭᠠᠨ ᠪᠠᠰᠠ ᠵᠡᠭᠦᠳᠡᠭ᠃ ᠬᠡᠦᠬᠡᠨ ᠬᠡᠦᠬᠡᠰ ᠢ ᠠᠷᠪᠠ ᠬᠦᠷᠦᠭᠰᠡᠭᠡᠷ ᠬᠤᠷᠤᠭᠤᠨ ᠳᠤᠨᠢ ᠪᠦᠯᠡᠵᠡᠭ ᠵᠡᠭᠦᠵᠦ ᠦᠭᠭᠦᠨ᠎ᠡ᠂ ᠡᠮᠡᠭᠳᠡᠶᠢᠴᠦᠳ ᠬᠤᠷᠤᠭᠤ ᠮᠤᠬᠤᠷ ︵ᠲᠤᠮᠳᠠ ᠬᠤᠷᠤᠭᠤ ᠠᠴᠠ ᠪᠤᠰᠤᠳ︶ ᠪᠠᠶᠢᠵᠤ ᠪᠤᠯᠳᠠᠭ ᠦᠭᠡᠢ ᠶᠤᠰᠤ ᠲᠠᠢ᠃ ᠡᠷᠡᠭᠳᠡᠶᠢᠴᠦᠳ ᠤᠨ ᠤᠯᠠᠩᠬᠢ ᠨᠢ ᠪᠦᠯᠡᠵᠡᠭ ᠵᠡᠬᠦᠭᠦ ᠦᠭᠡᠢ᠂ ᠵᠡᠭᠦᠬᠦ‍ ᠨᠢᠭᠡ ᠨᠢ ᠨᠡᠷ᠎ᠡ ᠦᠭᠡᠢ ᠬᠤᠷᠤᠭᠤᠨ ᠳᠠᠭᠠᠨ ᠵᠡᠭᠦᠳᠡᠭ᠃ ᠡᠷᠡᠭᠳᠡᠢ ᠡᠮᠡᠭᠳᠡᠢ ᠭᠡᠯ ᠦᠭᠡᠢ ᠲᠤᠮᠳᠠ ᠬᠤᠷᠤᠭᠤᠨ ᠳᠠᠭᠠᠨ ᠬᠠᠷᠢᠨ ᠵᠡᠭᠦᠬᠦ ᠶᠤᠰᠤ ᠦᠭᠡᠢ᠂ ᠲᠤᠮᠳᠠ ᠬᠤᠷᠤᠭᠤᠨ ᠳᠤ ᠪᠦᠯᠡᠵᠡᠭ ᠵᠡᠭᠦᠪᠡᠯ ᠪᠡᠯᠪᠡᠰᠦᠷᠡᠬᠦ ᠶᠢᠨ ᠲᠡᠮᠳᠡᠭ ᠭᠡᠳᠡᠭ᠃ ᠮᠦᠩᠭᠦᠨ ᠸᠴᠢᠷ ᠲᠠᠢ ᠵᠡᠰ ᠪᠦᠯᠡᠵᠡᠭ ᠭᠦᠮᠪᠦᠮ ᠳᠤ ᠪᠠᠶᠢᠳᠠᠭ ᠪᠦᠭᠡᠳ ᠲᠥᠢᠩᠬᠦᠷ ᠤᠨ ᠪᠠᠩ ᠳᠤ ᠰᠠᠭᠤᠭᠰᠠᠨ ᠬᠦᠮᠦᠨ ᠯᠠ ᠵᠡᠭᠦᠳᠡᠭ ᠪᠠᠶᠢᠵᠠᠢ᠃      ᠪᠠᠭᠤᠪᠴᠢ᠄ ᠠᠯᠳ᠋ᠨ᠂ ᠬᠠᠰᠢ᠂ ᠮᠦᠩᠭᠦ᠂ ᠫᠤᠯᠢᠶᠠᠰᠤ᠂ ᠭᠠᠤᠯᠢ᠂ ᠵᠡᠰ᠂ ᠬᠤᠪᠠ ᠪᠦᠳᠦᠴᠡ ᠲᠠᠢ ᠪᠠᠭᠤᠪᠴᠢ ᠪᠠᠶᠢᠳᠠᠭ᠂ ᠮᠦᠩᠭᠦ᠂ ᠭᠠᠤᠯᠢ᠂ ᠵᠡᠰ ᠢᠶᠠᠷ ᠮᠦᠩᠭᠦᠨ ᠤ ᠲᠠᠷᠬᠠᠳ ᠤᠷᠠᠯᠠᠵᠤ᠂ ᠬᠠᠰᠢ᠂ ᠫᠤᠯᠢᠶᠠᠰᠤ᠂ ᠬᠤᠪᠠ ᠪᠠᠭᠤᠪᠴᠢ ᠬᠤᠳᠠᠯᠳᠤᠭ᠎ᠠ ᠢᠷᠡᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠤᠯᠠᠩᠬᠢ ᠨᠢ ᠮᠦᠩᠭᠦᠨ ᠪᠠᠭᠤᠪᠴᠢ ︵ᠴᠤᠯᠤ᠂ ᠬᠦᠨᠳᠡᠢ ᠬᠤᠶᠠᠷ ᠵᠦᠢᠯ ᠪᠠᠶᠢᠳᠠᠭ︶ ᠵᠡᠭᠦᠳᠡᠭ᠃ ᠬᠤᠪᠠ ᠪᠠᠭᠤᠪᠴᠢ ᠰᠢᠷ᠎ᠠ᠂ ᠤᠯᠠᠭᠠᠨ᠂ ᠨᠤᠭᠤᠭᠠᠨ᠂ ᠴᠤᠬᠤᠷ ᠤᠯᠠᠨ ᠦᠩᠭᠡ ᠲᠠᠢ᠂ ᠰᠢᠭᠢᠳᠬᠡᠷᠢ ᠲᠠᠢ ᠪᠠᠭᠤᠪᠴᠢ ᠪᠠᠶᠢᠳᠠᠭ ᠦᠭᠡᠢ᠃ ᠡᠮᠡᠭᠳᠡᠶᠢᠴᠦᠳ ᠬᠤᠶᠠᠷ ᠭᠠᠷ ᠲᠠᠭᠠᠨ ᠵᠡᠭᠦᠵᠦ ᠡᠰᠡ ᠴᠢᠳᠠᠭᠰᠠᠨ ᠴᠤ ᠨᠢᠭᠡ ᠭᠠᠷ ᠲᠠᠭᠠᠨ ᠵᠠᠪᠠᠯ ᠵᠡᠭᠦᠬᠦ ᠶᠤᠰᠤ ᠲᠠᠢ᠂ ᠡᠷᠡᠭᠳᠡᠶᠢᠴᠦᠳ ᠤᠨ ᠤᠯᠠᠩᠬᠢ ᠨᠢ ᠪᠠᠭᠤᠪᠴᠢ ᠵᠡᠭᠦᠳᠡᠭ ᠦᠭᠡᠢ ᠪᠠᠶᠢᠵᠠᠢ᠃      ᠬᠤᠪᠤᠯᠠ᠄ ᠬᠤᠪᠤᠯᠠ ᠭᠡᠵᠦ ᠲᠡᠭᠡᠳᠦ ᠲᠠᠯ᠎ᠠ ᠨᠢ ᠨᠠᠷᠢᠨ ᠰᠢᠭ᠋᠂ ᠲᠤᠤᠷᠠᠳᠤ ᠲᠠᠯ᠎ᠠ ᠨᠢ ᠦᠷᠭᠡᠨ ᠰᠢᠭ ᠱᠠᠳᠤᠯᠵᠢᠨ ᠬᠡᠯᠪᠡᠷᠢ ᠲᠠᠢ ᠵᠡᠭᠦᠦ ᠬᠢᠬᠦ ᠬᠠᠪᠳᠠᠭᠠᠢ ᠡᠳ᠋ᠯᠡᠯ᠃ ᠪᠦᠰᠡᠭᠦᠶᠢᠴᠦᠳ ᠵᠡᠭᠦᠨ ᠰᠤᠭᠤᠨ ᠳᠠᠬᠢ          ᠪᠠᠯ ᠠᠴᠠ ᠪᠠᠨ ᠵᠡᠭᠦᠨ᠎ᠡ᠂ ᠬᠤᠪᠤᠯᠠ ᠮᠦᠩᠭᠦ ᠪᠤᠶᠤ ᠭᠠᠤᠯᠢ ᠶᠢᠨ ᠪᠦᠳᠦᠴᠡ ᠲᠠᠢ᠂ ᠬᠤᠳᠠᠯᠳᠤᠭ᠎ᠠ ᠢᠷᠡᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠵᠠᠷᠢᠮ ᠨᠢ ᠮᠦᠩᠭᠦ᠂ ᠭᠠᠤᠯᠢ ᠪᠠᠨ ᠦᠭᠴᠦ ᠮᠦᠩᠭᠦᠨ ᠤ ᠲᠠᠷᠬᠠᠨ ᠢᠶᠠᠷ ᠬᠢᠯᠭᠡᠳᠡᠭ ᠴᠤ ᠪᠠᠶᠢᠵᠠᠢ᠃ ᠬᠤᠪᠤᠯᠠ ᠶᠢᠨ ᠨᠢᠭᠤᠷ ᠲᠠᠯ᠎ᠠ ᠨᠢ ᠲᠠᠷᠤᠢ ᠬᠠᠯᠢᠪ ᠤᠨ ᠦᠢᠯᠡᠳᠦᠯ ᠦᠵᠡᠭᠦᠯᠳᠡᠭ᠂ ᠬᠤᠪᠤᠯᠠ ᠶᠢᠨ ᠲᠤᠤᠷᠠᠳᠤ ᠲᠠᠯ᠎ᠠ ᠠᠴᠠ ᠬᠠᠯᠢᠪ ᠢ ᠨᠠᠭᠠᠰᠢ ᠴᠠᠭᠠᠰᠢ ᠲᠦᠯᠬᠢᠵᠦ ᠨᠡᠭᠡᠭᠡᠵᠦ ᠬᠠᠭᠠᠭᠠᠨ᠎ᠠ᠂ ᠬᠤᠪᠤᠯᠠ ᠭᠤᠤᠯ       ᠲᠤᠮᠳᠠ ᠪᠠᠨ ᠮᠦᠩᠭᠦᠨ ᠰᠢᠬᠠᠯᠠᠭᠤᠷ ᠲᠠᠢ᠂ ᠰᠢᠬᠠᠯᠠᠭᠤᠷ ᠤᠨ ᠬᠤᠶᠠᠷ ᠲᠠᠯ᠎ᠠ ᠳᠤ ᠬᠤᠶᠠᠷ ᠰᠡᠨᠵᠢ ᠲᠠᠢ᠂       ᠰᠡᠨᠵᠢ ᠠᠴᠠ ᠨᠢ ᠲᠤᠷᠭᠠᠨ ᠤᠳᠠᠰᠤᠨ ᠰᠠᠴᠤᠭ ᠪᠤᠶᠤ ᠮᠦᠩᠭᠦᠨ ᠤᠳᠠᠰᠤᠨ ᠰᠠᠴᠤᠭ ᠵᠡᠭᠦᠳᠡᠭ᠃ ᠪᠦᠰᠡᠭᠦᠶᠢᠴᠦᠦᠯ ᠠᠵᠤ ᠠᠮᠢᠳᠤᠷᠠᠯ ᠤᠨ ᠪᠠᠶᠢᠳᠠᠯ ᠠᠴᠠ ᠪᠠᠨ ᠪᠤᠯᠵᠤ ᠴᠢᠳᠠᠯ ᠲᠠᠢ ᠨᠢ ᠵᠡᠭᠦᠵᠦ᠂ ᠴᠢᠳᠠᠯ ᠦᠭᠡᠢ ᠨᠢ ᠵᠡᠭᠦᠬᠦ       ᠦᠭᠡᠢ ᠴᠤ ᠬᠡᠰᠡᠨ ᠪᠤᠯᠳᠠᠭ ᠪᠠᠶᠢᠵᠠᠢ᠃      ᠬᠦᠬᠦᠤᠷ ᠤᠨ ᠲᠠᠯᠢᠩ᠄ ᠲᠤᠷᠭᠤᠳ ᠡᠷᠡᠭᠳᠡᠢ ︵ᠭᠡᠷᠯᠡᠭᠰᠡᠨ︶ ᠠᠩᠬᠠᠨ ᠳᠠᠭᠠᠨ ᠪᠠᠷᠤᠭ ᠬᠤᠶᠠᠷ ᠲᠤᠬᠤᠢ ᠬᠢᠷᠢᠳᠡᠢ ᠤᠷᠳᠤ᠂ ᠲᠦᠭᠡ ᠭᠠᠷᠤᠢ ᠦᠷᠭᠡᠨ ᠬᠡᠮᠵᠢᠶ᠎ᠡ ᠲᠠᠢ᠂ ᠨᠢᠭᠤᠷ ᠲᠠᠯ᠎ᠠ ᠳᠤᠨᠢ ᠲᠠᠪᠤᠨ ᠲᠠᠪᠤ ᠶᠢᠨ ᠲᠤᠷᠭᠠᠨ ᠤᠳᠠᠰᠤ ᠪᠠᠷ ᠵᠢᠭᠠᠰᠤᠨ ᠨᠢᠷᠤᠭᠤ᠂ ᠵᠡᠭᠡᠭ ᠨᠢᠷᠤᠭᠤ᠂ ᠰᠤᠮᠤᠨ ᠨᠢᠷᠤᠭᠤ ᠵᠡᠷᠭᠡ ᠨᠢᠷᠤᠭᠤ ᠶᠢ ᠬᠠᠳᠬᠤᠭᠰᠠᠨ ᠨᠢᠷᠤᠭᠤ ᠲᠠᠢ ᠳᠠᠯᠢᠩ ᠪᠠ ᠮᠤᠬᠤᠷ ᠰᠦᠭᠡᠮ ᠬᠢᠷᠢᠳᠡᠢ ᠬᠤᠷᠭᠤᠢ ᠶᠢᠨ ᠪᠤᠯᠤᠩ ᠭᠠᠷᠭᠠᠭᠰᠠᠨ ᠪᠤᠯᠤᠩ ᠲᠠᠢ ᠲᠠᠯᠢᠩ ᠢ ᠶᠡᠬᠡᠳᠡ ᠬᠢᠵᠦ ᠭᠡᠷᠡᠭᠯᠡᠳᠡᠭ ᠪᠠᠶᠢᠵᠠᠢ᠃ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠭᠤᠴᠢ᠂ ᠲᠦᠴᠢᠭᠡᠳ ᠤᠨ ᠪᠤᠯᠵᠤ ᠢᠷᠡᠭᠡᠳ ᠬᠠᠯᠬᠠᠴᠤᠳ ᠤᠨ ᠨᠦᠯᠦᠭᠡ ᠶᠢ ᠶᠡᠬᠡᠳᠡ ᠬᠦᠷᠳᠡᠵᠦ᠂ ᠠᠬᠠᠷ ᠮᠦᠷᠳᠡᠭᠡᠨ ᠨᠠᠷᠢᠨ ᠬᠡᠮᠵᠢᠶ᠎ᠡ ᠲᠠᠢ᠂ ᠦᠨᠴᠦᠭ ᠪᠤᠯᠤᠩ ᠎ ᠳᠤᠨᠢ ᠪᠦᠰ ᠬᠠᠶᠢᠴᠢᠯᠠᠵᠤ ᠭᠢᠭᠰᠡᠨ ᠵᠢᠷᠢᠮ ᠤᠭᠠᠯᠵᠠ᠂ ᠴᠦᠳᠡᠨᠵᠡ ᠶᠢᠨ ᠪᠤᠯᠤᠩ᠂ ᠶᠢᠰᠦᠨ ᠨᠦᠬᠡ ᠨᠠᠭᠠᠵᠤ᠂ ᠲᠡᠭᠡᠭᠦᠷ ᠨᠢ ᠰᠢᠭᠯᠠᠵᠤ᠂ ᠬᠦᠪᠡᠭᠡ ᠶᠢ ᠨᠢ ᠬᠤᠷᠭᠤᠢ ᠪᠤᠶᠤ ᠲᠤᠷᠭ᠎ᠠ ︵ᠡᠬᠡ ᠪᠡᠶ᠎ᠡ ᠶᠢᠨ ᠦᠩᠭᠡ ᠠᠴᠠ ᠦᠭᠡᠷ᠎ᠡ ᠦᠩᠭᠡ︶᠎ ᠪᠠᠷ ᠡᠮᠵᠢᠵᠦ ᠬᠢᠭᠰᠡᠨ ᠬᠠᠯᠵᠠ ᠲᠠᠢ ᠳᠠᠯᠢᠩ ᠪᠠ ᠰᠦᠯᠵᠢᠶ᠎ᠡ ᠲᠠᠢ ᠳᠠᠯᠢᠩ ᠡᠳ᠋ᠯᠡᠬᠦ ᠪᠤᠯᠵᠠᠢ᠂ ᠡᠷᠡᠭᠳᠡᠶᠢᠴᠦᠳ ᠳᠠᠯᠢᠩ ᠤᠨ ᠢᠶᠠᠨ ᠨᠢᠭᠡ ᠦᠵᠦᠭᠦᠷ ᠲᠤ ᠬᠦᠬᠦᠤᠷ ᠢᠶᠠᠨ ᠬᠢᠵᠦ᠂ ᠨᠦᠭᠦᠭᠡ ᠦᠵᠦᠭᠦᠷ ᠲᠤᠨᠢ ᠡᠪᠬᠡᠭᠡᠰᠦ ᠲᠠᠢ ᠬᠢᠳᠤᠭ᠎ᠠ᠂ ᠲᠦᠯᠬᠢᠭᠦᠷ ᠢᠶᠠᠨ ᠬᠢᠭᠡᠳ ᠪᠡᠶ᠎ᠡ ᠶᠢᠨ ᠵᠡᠭᠦᠨ ᠲᠠᠰᠢᠶᠠᠨ ᠳᠤ ᠪᠦᠰᠡᠨ ᠳᠡᠭᠡᠨ ᠬᠠᠪᠴᠢᠭᠤᠯᠳᠠᠭ᠃ ᠡᠮᠡᠭᠳᠡᠶᠢᠴᠦᠳ ᠭᠠᠷ ᠤᠷ᠎ᠠ ᠪᠠᠨ ᠭᠠᠷᠭᠠᠵᠤ᠂ ᠬᠦᠬᠦᠤᠷ ᠤᠨ ᠳᠠᠯᠢᠩ ᠢ ᠤᠷᠠᠯᠠᠨ ᠢᠨᠠᠭ ᠬᠠᠶᠢᠷ᠎ᠠ ᠪᠠᠨ ᠢᠯᠡᠳᠭᠡᠬᠦ ᠪᠡᠯᠡᠭ ᠪᠤᠯᠭᠠᠳᠠᠭ ᠪᠠᠶᠢᠵᠠᠢ᠃      ᠲᠠᠮᠠᠬᠢᠨ ᠲᠦᠩᠭᠦᠷᠴᠡᠭ᠄ ᠬᠦᠬᠦᠤᠷ ᠤᠨ ᠲᠠᠯᠢᠩ ᠢ ᠪᠤᠳᠤᠪᠠᠯ ᠠᠷᠠᠢ ᠪᠠᠭᠠᠴᠠᠷ ᠭᠤᠤᠯ ᠲᠤᠮᠳᠠ ᠪᠠᠨ ᠠᠮᠠᠰᠠᠷ ᠎ ᠲᠠᠢ ᠤᠷᠳᠤ ᠲᠦᠷᠪᠡᠯᠵᠢᠨ ᠰᠠᠪᠠ᠃ ᠲᠤᠳᠤᠷ᠎ᠠ ᠨᠢ ᠲᠦᠩᠰᠡᠨ ᠲᠠᠮᠠᠬᠢ ᠪᠠᠨ ᠬᠢᠭᠡᠳ ᠨᠢᠷᠤᠭᠤᠨ ᠤ ᠪᠠᠨ ᠵᠡᠭᠦᠨ ᠪᠡᠶ᠎ᠡ ᠤᠷᠴᠢᠮ ᠠᠴᠠ ᠪᠦᠰᠡᠨ ᠳᠡᠭᠡᠨ ᠬᠠᠪᠴᠢᠭᠤᠯᠵᠤ ᠵᠡᠭᠦᠨ᠎ᠡ᠂ ᠮᠦᠨ ᠲᠤᠷᠭ᠎ᠠ᠂ ᠴᠢᠰᠴᠠᠤ ᠪᠤᠶᠤ ᠰᠠᠶᠢᠨ       ᠡᠳ᠋ ᠢᠶᠠᠷ ᠭᠠᠳᠠᠷᠯᠠᠨ ᠲᠠᠪᠤᠤ ᠪᠠᠷ ᠲᠤᠳᠤᠷᠯᠠᠵᠤ ᠬᠢᠳᠡᠭ᠂ ᠲᠦᠩᠭᠦᠷᠴᠡᠭ ᠤᠨ ᠲᠡᠭᠡᠳᠦ ᠲᠠᠯ᠎ᠠ ᠶᠢᠨ ᠦᠨᠴᠦᠭ ᠢ ᠬᠤᠶᠠᠷ ᠲᠠᠯ᠎ᠠ ᠠᠴᠠ ᠨᠢ ᠲᠤᠰ ᠪᠦᠷᠢ ᠨᠢᠭᠡ ᠨᠤᠭᠤᠯᠤᠭᠠᠳ ᠬᠤᠮᠢᠨ ᠦᠭᠴᠦ᠂ ᠲᠤᠮᠳᠠ ᠨᠢ ᠤᠭᠤᠰᠤᠷ ᠭᠠᠷᠭᠠᠵᠤ᠂ ᠤᠭᠤᠰᠤᠷ ᠠᠴᠠ ᠨᠢ ᠴᠤᠬᠢᠯᠠᠭᠤᠷ ᠰᠡᠳᠬᠡᠭᠦᠷ ᠢᠶᠠᠨ ᠵᠡᠭᠦᠳᠡᠭ᠃ ᠲᠦᠩᠭᠦᠷᠴᠡᠭ ᠤᠨ ᠨᠢᠭᠤᠷ ᠲᠠᠯ᠎ᠠ ᠶᠢᠨ ᠭᠤᠤᠯ ᠵᠢᠴᠢ ᠬᠦᠪᠡᠭᠡ ᠪᠠᠷ ᠵᠢᠭᠠᠰᠤᠨ ᠨᠢᠷᠤᠭᠤ᠂ ᠬᠤᠨᠢᠨ ᠬᠤᠯᠪᠤᠭ᠎ᠠ᠂ ᠵᠠᠭᠤᠷᠠᠪᠴᠢ ᠶᠢ ᠤᠯᠠᠨ ᠦᠩᠭᠡ ᠶᠢᠨ     ᠤᠳᠠᠰᠤ ᠪᠠᠷ ᠬᠠᠳᠬᠤᠵᠤ ᠭᠤᠶᠤᠯᠠᠳᠠᠭ᠂ ᠵᠠᠷᠢᠮ ᠨᠢ ᠪᠠᠰᠠ ᠲᠤᠷᠭᠠᠨ ᠤᠳᠠᠰᠤ ᠪᠠᠷ ᠰᠠᠴᠤᠭ ᠬᠢᠵᠦ ᠢᠷᠤᠭᠠᠷ ᠎ ᠲᠤᠨᠢ ᠬᠠᠳᠠᠵᠤ ᠦᠭᠳᠡᠭ ᠪᠠᠶᠢᠵᠠᠢ᠃      ᠠᠶᠠᠭᠠᠨ ᠤ ᠬᠠᠪᠳᠠᠭ᠎ᠠ ︵ᠠᠶᠠᠭᠠᠨ ᠤ ᠭᠡᠷ︶᠄ ᠤᠷᠳᠤ ᠲᠦᠷᠪᠡᠯᠵᠢᠨ᠂ ᠭᠤᠤᠯ ᠲᠤᠮᠳᠠ ᠪᠠᠨ ᠠᠮᠠᠰᠠᠷ ᠲᠠᠢ ᠠᠶᠠᠭ᠎ᠠ ᠬᠢᠬᠦ ᠰᠠᠪᠠ᠃ ᠠᠩᠬᠠᠨ ᠳᠠᠭᠠᠨ ᠪᠠᠷᠤᠭ ᠭᠤᠷᠪᠠᠨ ᠲᠤᠬᠤᠢ ᠪᠠᠶᠢᠳᠠᠭ ᠪᠠᠶᠢᠵᠠᠢ᠂ ᠬᠠᠪᠳᠠᠭ᠎ᠠ ᠶᠢᠨ ᠲᠤᠤᠷᠠᠳᠤ ᠬᠦᠪᠡᠭᠡ ᠠᠴᠠ 2~3 ᠬᠤᠷᠤᠭᠤ ᠵᠠᠶᠢᠳᠠᠢ ᠭᠠᠵᠠᠷ ᠲᠤ ᠲᠤᠳᠤᠷ ᠲᠠᠯ᠎ᠠ ᠠᠴᠠ ᠨᠢ ᠲᠠᠯᠳᠠ ᠪᠢᠳᠡᠭᠦᠯᠡᠵᠦ ᠦᠭᠳᠡᠭ ᠪᠦᠭᠡᠳ ᠲᠤᠤᠷᠠᠳᠤ ᠬᠦᠪᠡᠭᠡ ᠶᠢ ᠡᠷᠭᠢᠨ ᠲᠤᠭᠤᠷᠢᠨ ᠵᠠᠳᠠᠭᠠᠢ ᠪᠠᠶᠢᠯᠭᠠᠬᠤ ᠶᠤᠰᠤ ᠲᠠᠢ᠃ ᠠᠶᠠᠭᠠᠨ ᠤ       ᠬᠠᠪᠳᠠᠭ᠎ᠠ ᠶᠢ ᠰᠠᠶᠢᠳ ᠲᠦᠰᠢᠮᠡᠳ᠂ ᠬᠢᠶ᠎ᠠ ᠨᠠᠷ ᠭᠢᠭᠡᠳ ᠲᠠᠪᠬᠤᠷᠭᠠᠳᠠᠨ ᠯᠠᠮᠠ ᠨᠠᠷ ᠬᠡᠷᠡᠭᠯᠡᠳᠡᠭ᠂       ᠨᠢᠷᠤᠭᠤᠨ ᠤ ᠪᠠᠨ ᠪᠠᠷᠠᠭᠤᠨ ᠪᠡᠶ᠎ᠡ ᠤᠷᠴᠢᠮ ᠠᠴᠠ ᠪᠦᠰᠡᠨ ᠳᠡᠭᠡᠨ ᠬᠠᠪᠴᠢᠭᠤᠯᠵᠤ ᠵᠡᠭᠦᠨ᠎ᠡ᠂ ᠡᠬᠡ ᠪᠡᠶ᠎ᠡ ᠶᠢ ᠨᠢ ᠲᠤᠷᠭ᠎ᠠ᠂ ᠴᠢᠰᠴᠠᠤ ᠪᠠᠷ ᠬᠢᠭᠡᠳ ᠨᠢᠭᠤᠷ ᠲᠠᠯ᠎ᠠ ᠪᠠ ᠬᠦᠪᠡᠭᠡ ᠳᠤᠨᠢ ᠠᠩᠬᠠᠨ ᠳᠠᠭᠠᠨ ᠤᠯᠠᠨ ᠦᠩᠭᠡ ᠶᠢᠨ ᠤᠳᠠᠰᠤ ᠪᠠᠷ ᠵᠢᠭᠠᠰᠤᠨ ᠨᠢᠷᠤᠭᠤ᠂ ᠰᠢᠭᠯᠠᠭᠠᠰᠤ᠂ ᠵᠠᠭᠤᠷᠠᠪᠴᠢ ᠪᠤᠶᠤ ᠰᠢᠷᠭᠤᠭᠤᠯᠭ᠎ᠠ ᠬᠠᠳᠬᠤᠵᠤ ᠭᠤᠶᠤᠯᠠᠳᠠᠭ ᠪᠠᠶᠢᠭᠠᠳ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠶᠢᠰᠦᠨ ᠨᠦᠬᠡ᠂ ᠦᠯᠵᠡᠢ ᠤᠳᠠᠰᠤ᠂ ᠴᠦᠳᠡᠨᠵᠡ ᠶᠢᠨ ᠪᠤᠯᠤᠩ ᠭᠠᠷᠭᠠᠳᠠᠭ ᠪᠤᠯᠵᠠᠢ᠃ ᠬᠠᠪᠳᠠᠭ᠎ᠠ ᠶᠢᠨ ᠲᠡᠭᠡᠳᠦ ᠲᠠᠯ᠎ᠠ ᠶᠢ ᠲᠤᠷᠭ᠎ᠠ᠂ ᠬᠤᠷᠭᠤᠢ ᠪᠤᠶᠤ ᠨᠢᠮᠭᠡᠨ ᠪᠦᠰ ᠢᠶᠠᠷ ᠬᠢᠭᠰᠡᠨ       ᠤᠭᠤᠰᠤᠷ ᠢᠶᠠᠷ ᠬᠤᠮᠢᠨ ᠦᠭᠴᠦ᠂ ᠤᠭᠤᠰᠤᠷ ᠤᠨ ᠦᠵᠦᠭᠦᠷ ᠲᠤᠨᠢ ᠵᠢᠵᠢᠭ ᠲᠤᠩ ᠪᠤᠶᠤ ᠶᠠᠩᠴᠢᠶᠠᠨ ᠢᠶᠠᠷ ᠬᠢᠭᠰᠡᠨ ᠲᠡᠭᠡᠭ ᠲᠠᠢ᠂ ᠡᠨᠡᠬᠦ ᠲᠡᠭᠡᠭ ᠨᠢ ᠠᠶᠠᠭᠠᠨ ᠤ ᠬᠠᠪᠳᠠᠭ᠎ᠠ ᠶᠢ ᠪᠦᠰᠡᠨ ᠠᠴᠠ ᠲᠡᠭᠡᠭᠯᠡᠭᠦᠯᠬᠦ ᠦᠢᠯᠡᠳᠦᠯ ᠲᠠᠢ᠃ ᠪᠠᠰᠠ ᠨᠤᠭᠤᠭᠠᠨ ᠴᠠᠭᠠᠨ ᠬᠠᠰᠢ ᠪᠤᠶᠤ ᠮᠦᠩᠭᠦ ᠪᠠᠷ ᠬᠢᠭᠰᠡᠨ ᠰᠢᠬᠠᠯᠠᠭᠤᠷ ᠲᠠᠢ᠂ ᠴᠠᠢ ᠤᠤᠭᠤᠵᠤ ᠬᠤᠭᠤᠯᠠ ᠢᠳᠡᠬᠦ ᠦᠶ᠎ᠡ ᠳᠡᠭᠡᠨ ᠪᠦᠰᠡᠨ ᠠᠴᠠ ᠪᠠᠨ ᠲᠡᠭᠡᠭ ᠢᠶᠠᠨ ᠠᠯᠳᠠᠷᠠᠭᠠᠵᠤ᠂ ᠠᠶᠠᠭᠠᠨ ᠤ ᠬᠠᠪᠳᠠᠭ᠎ᠠ ᠪᠠᠨ ᠡᠮᠦᠨ᠎ᠡ ᠪᠠᠨ ᠠᠪᠴᠢᠷᠠᠭᠠᠳ ᠰᠢᠬᠠᠯᠠᠭᠤᠷ ᠢᠶᠠᠨ ᠲᠡᠭᠡᠭᠰᠢ ᠨᠢ ᠭᠦᠶᠦᠯᠭᠡᠵᠦ ᠠᠶᠠᠭ᠎ᠠ ᠪᠠᠨ ᠭᠠᠷᠭᠠᠵᠤ ᠠᠪᠤᠨ᠎ᠠ᠂ ᠬᠤᠭᠤᠯᠠ ᠢᠳᠡᠵᠦ ᠪᠠᠷᠠᠭᠠᠳ ᠠᠶᠠᠭ᠎ᠠ ᠪᠠᠨ ᠭᠡᠷ ᠲᠤᠨᠢ ᠲᠦᠷᠢᠭᠰᠡᠨ ᠤ ᠲᠠᠷᠠᠭ᠎ᠠ ᠰᠢᠬᠠᠯᠠᠭᠤᠷ ᠢᠶᠠᠨ ᠲᠤᠭᠤᠭᠰᠢ ᠭᠦᠶᠦᠯᠭᠡᠨ ᠠᠶᠠᠭᠠᠨ ᠤ ᠬᠠᠪᠳᠠᠭ᠎ᠠ ᠶᠢᠨ ᠠᠮᠠᠰᠠᠷ ᠢ ᠬᠠᠭᠠᠨ᠎ᠠ᠃ ᠬᠠᠪᠳᠠᠭᠠᠨ ᠳᠠᠭᠠᠨ ᠮᠦᠩᠭᠦᠨ ᠠᠶᠠᠭ᠎ᠠ ᠪᠤᠶᠤ ᠮᠤᠳᠤᠨ ᠠᠶᠠᠭ᠎ᠠ ᠬᠢᠵᠦ ᠶᠠᠪᠤᠳᠠᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠨᠤᠶᠠᠨ ᠬᠠᠳᠤᠨ ᠬᠢᠭᠡᠳ ᠡᠵᠡᠢ ᠯᠠᠮᠠ ᠶᠢᠨ ᠠᠶᠠᠭ᠎ᠠ ᠴᠦᠬᠦᠴᠡ ᠶᠢ ᠬᠢᠬᠦ ᠪᠦᠷᠰᠢᠳ ᠭᠡᠬᠦ ᠰᠠᠪᠠ ᠶᠢ ᠪᠡᠷ᠎ᠡ ᠪᠤᠯᠤᠭᠴᠢ ᠬᠢᠶ᠎ᠠ ᠪᠠ ᠡᠵᠡᠢ ᠯᠠᠮᠠ ᠶᠢᠨ ᠰᠦᠢᠪᠦᠨ‌ᠡᠭᠡᠮᠴᠢᠯᠡᠵᠦ ᠶᠠᠪᠤᠳᠠᠭ ᠪᠠᠶᠢᠵᠠᠢ᠂ ᠯᠠᠮᠠ ᠨᠠᠷ ᠤᠯᠠᠩᠬᠢ ᠳᠠᠭᠠᠨ ᠮᠤᠳᠤᠨ ᠠᠶᠠᠭ᠎ᠠ ᠬᠡᠷᠡᠭᠯᠡᠵᠦ᠂ ᠲᠡᠭᠦᠨ ᠢᠶᠠᠨ ᠡᠪᠦᠷᠳᠦᠯᠡᠵᠦ ᠶᠠᠪᠤᠳᠠᠭ᠂ ᠠᠶᠢᠯ ᠳᠤ ᠤᠴᠢᠵᠤ ᠴᠠᠢ ᠬᠤᠭᠤᠯᠠ ᠢᠳᠡᠬᠦ ᠪᠤᠯᠬᠤ ᠳᠤ ᠠᠶᠢᠯ ᠤᠨ ᠡᠵᠡᠨ ︽ᠠᠯᠢ᠂ ᠲᠠ ᠴᠦᠬᠦᠴᠡ ᠪᠠᠨ︕︾ ᠭᠡᠬᠦ ᠳᠤ ᠡᠪᠦᠷ ᠠᠴᠠ ᠪᠠᠨ ᠠᠶᠠᠭ᠎ᠠ ᠪᠠᠨ ᠭᠠᠷᠭᠠᠵᠤ ᠦᠭᠭᠦᠭᠡᠳ ᠴᠠᠢ ᠬᠤᠭᠤᠯᠠ ᠠᠶᠠᠭᠠᠯᠠᠭᠤᠯᠤᠨ᠎ᠠ᠃
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号