ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠥᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠲᠣᠷᠭᠤᠳᠴᠣᠳ ᠤᠨ ᠲᠣᠯᠣᠭᠠᠢ ᠶᠢᠨ ᠵᠠᠰᠠᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2021/9/16
     ᠡᠷᠡᠭᠳᠡᠢ ᠶᠢᠨ ᠲᠤᠯᠤᠭᠠᠢ ᠶᠢᠨ ᠵᠠᠰᠠᠯ᠄ ᠴᠢᠯᠦᠭᠡᠯᠡᠬᠦ ᠠᠴᠠ ᠡᠮᠦᠨ᠎ᠡ ᠯᠠᠮᠠ ᠨᠠᠷ ᠦᠰᠦ ᠪᠠᠨ ᠪᠦᠷ ᠬᠤᠰᠤᠭᠤᠯᠵᠤ᠂ ᠨᠠᠰᠤᠳᠠᠢ ᠬᠦᠮᠦᠰ ᠯᠠᠮᠠ ᠶᠢᠨ ᠰᠠᠬᠢᠯ ᠬᠦᠷᠳᠡᠪᠡᠯ ᠪᠠᠰᠠ ᠦᠰᠦ ᠪᠠᠨ ᠬᠤᠰᠤᠭᠤᠯᠳᠠᠭ᠂ ᠨᠤᠶᠠᠳ ᠰᠠᠶᠢᠳ᠂ ᠡᠩ ᠤᠨ ᠡᠷᠡᠴᠦᠦᠯ ᠴᠢᠬᠢᠨ ᠠᠴᠠ ᠡᠮᠦᠨᠡᠬᠢ ᠦᠰᠦ ᠪᠠᠨ ᠬᠤᠰᠤᠭᠤᠯᠵᠤ᠂ ᠦᠯᠡᠳᠡᠭᠰᠡᠨ           ᠦᠰᠦ ᠪᠠᠷ ᠢᠶᠠᠨ ᠭᠠᠭᠴᠠ ᠭᠡᠵᠢᠭᠡ ᠭᠦᠷᠦᠵᠦ᠂ ᠨᠤᠶᠠᠨ ᠬᠠᠷ᠎ᠠ ᠭᠡᠮᠡᠬᠦ ᠲᠤᠷᠭᠠᠨ ᠤᠳᠠᠰᠤ ᠪᠠᠷ ᠦᠰᠦᠨ ᠤ ᠪᠠᠨ ᠦᠵᠦᠭᠦᠷ ᠢ ᠪᠤᠭᠤᠳᠠᠭ᠃ ᠶᠡᠷᠦ ᠨᠢ ᠡᠷᠡᠭᠳᠡᠢ ᠡᠮᠡᠭᠳᠡᠢ ᠬᠦᠭᠰᠢᠨ ᠵᠠᠯᠠᠭᠤ ᠦᠭᠡᠢ ᠪᠦᠷ ᠬᠠᠷ᠎ᠠ ᠶᠠᠭᠤᠮ᠎ᠠ ᠪᠠᠷ       ᠦᠰᠦ ᠪᠠᠨ ᠪᠤᠭᠤᠬᠤ ᠶᠤᠰᠤ ᠲᠠᠢ᠂ ᠤᠯᠠᠭᠠᠨ ᠢᠶᠠᠷ ᠪᠤᠭᠤᠪᠠᠯ ᠦᠰᠦ ᠠᠶᠤᠭᠠᠳ ᠤᠷᠭᠤᠳᠠᠭ ᠦᠭᠡᠢ ᠭᠡᠮᠡᠨ ᠦᠵᠡᠳᠡᠭ᠃ ᠠᠬ᠎ᠠ ᠬᠦᠮᠦᠨ ᠤ ᠦᠰᠦ ᠶᠢ ᠲᠡᠭᠦᠦ ᠬᠦᠮᠦᠨ ᠬᠤᠰᠤᠬᠤ ᠭᠡᠪᠡᠯ ᠲᠤᠩᠭᠤᠷᠠᠭ ᠢ ᠤᠷᠢᠳ ᠢᠶᠠᠷ ᠠᠬ᠎ᠠ ᠬᠦᠮᠦᠨ ᠳᠤ ᠦᠭᠴᠦ ᠲᠡᠭᠦᠨ ᠢᠶᠠᠷ ᠦᠰᠦᠨ ᠳᠡᠭᠡᠨ ᠬᠦᠷᠭᠡᠭᠦᠯᠦᠭᠰᠡᠨ ᠤ ᠲᠠᠷᠠᠭ᠎ᠠ ᠰᠠᠶ᠋ᠢ ᠲᠤᠯᠤᠭᠠᠢ ᠳᠤᠨᠢ ᠭᠠᠷ ᠬᠦᠷᠴᠦ ᠬᠤᠰᠤᠬᠤ ᠶᠤᠰᠤ ᠲᠠᠢ ᠪᠠᠶᠢᠵᠠᠢ᠃ ᠦᠰᠦ ᠠᠪᠴᠤ ᠪᠠᠷᠠᠭᠰᠠᠨ ᠤ ᠲᠠᠷᠠᠭ᠎ᠠ ᠮᠡᠰᠡ ᠪᠠᠷᠢᠵᠤ ᠠᠭᠤᠯᠵᠠᠭᠠᠳ ᠮᠡᠨᠳᠦ ᠰᠠᠯᠤᠭᠰᠠᠨ ᠤ ᠪᠠᠶᠠᠷ ᠭᠡᠵᠦ ᠬᠠᠷᠢᠯᠴᠠᠨ ᠬᠦᠬᠦᠤᠷ ᠰᠤᠯᠢᠯᠴᠠᠳᠠᠭ᠃ ᠪᠦᠰᠡᠳᠡᠢ ᠬᠡᠦᠬᠡᠰ   ︵ᠬᠡᠦᠬᠡᠨ       ᠬᠡᠦᠬᠡᠰ ᠲᠤ ᠴᠤ ᠭᠡᠰᠡᠨ ᠠᠳᠠᠯᠢ︶᠎ ᠲᠤ ᠲᠠᠭᠠᠬᠢ ᠲᠠᠷᠢᠬᠤ ᠠᠴᠠ ᠨᠢ ᠲᠡᠷᠢᠭᠦᠨ ᠦᠰᠦᠨ ᠳᠤᠨᠢ ᠮᠡᠰᠡ ᠬᠦᠷᠭᠡᠳᠡᠭ ᠦᠭᠡᠢ᠂ ᠲᠠᠭᠠᠬᠢ ᠲᠠᠷᠢᠭᠰᠠᠨ ᠤ ᠲᠠᠷᠠᠭ᠎ᠠ ᠰᠤᠨᠵᠢᠭᠤ ᠲᠠᠯᠪᠢᠵᠤ ᠪᠠᠶᠢᠭᠠᠳ 7~8 ᠨᠠᠰᠤ ᠬᠦᠷᠬᠦ ᠳᠤ ᠲᠡᠪᠡᠭ ᠦᠰᠦ ᠲᠠᠯᠪᠢᠵᠤ ᠦᠭᠳᠡᠭ᠃ ᠰᠤᠨᠵᠢᠭᠤ ᠲᠠᠯᠪᠢᠨ᠎ᠠ ᠭᠡᠵᠦ ᠲᠤᠯᠤᠭᠠᠢ ᠶᠢᠨ ᠤᠷᠤᠢ ᠳᠠᠬᠢ ᠦᠰᠦ ᠶᠢ ᠨᠢ ᠦᠯᠡᠳᠡᠭᠡᠵᠦ᠂ ᠪᠤᠰᠤᠳ ᠢ ᠨᠢ ᠪᠦᠷ ᠬᠤᠰᠤᠵᠤ ᠦᠭᠭᠦᠨ᠎ᠡ᠂ ᠲᠠᠷᠠᠭ᠎ᠠ ᠨᠢ ᠦᠨᠦ ᠦᠯᠡᠳᠡᠭᠡᠭᠰᠡᠨ ᠦᠰᠦᠨ ᠤ ᠲᠤᠮᠳᠠᠭᠤᠷ ᠨᠢ ᠪᠠᠰᠠ ᠪᠠᠷᠤᠭ ᠬᠤᠶᠠᠷ ᠬᠤᠷᠤᠭᠤ ᠬᠢᠷᠢᠳᠡᠢ ᠬᠤᠰᠤᠭᠠᠳ ᠦᠯᠡᠳᠡᠭᠰᠨᠨ ᠦᠰᠦ ᠶᠢ ᠨᠢ ᠬᠤᠶᠠᠷ ᠲᠠᠶᠢᠰᠢ ᠰᠦᠯᠵᠢᠵᠦ       ᠦᠭᠬᠦ ᠶᠢ ᠬᠡᠯᠡᠵᠦ ᠪᠠᠶᠢᠭ᠎ᠠ᠃ ᠰᠤᠨᠵᠢᠭᠤ ᠲᠠᠯᠪᠢᠭᠰᠠᠨ ᠬᠡᠦᠬᠡᠳ ᠢ ᠪᠠᠰᠠ ᠮᠢᠨᠤ ᠡᠪᠡᠷᠳᠦ ᠬᠦᠪᠡᠭᠦᠨ᠂ ᠮᠢᠨᠤ ᠡᠪᠡᠷᠳᠦ ᠬᠡᠦᠬᠡᠨ ᠭᠡᠮᠡᠨ ᠡᠩᠬᠦᠷᠡᠶᠢᠯᠡᠨ ᠲᠠᠭᠤᠳᠠᠳᠠᠭ ᠪᠠᠶᠢᠵᠠᠢ᠃ ᠲᠡᠪᠡᠭ ᠲᠠᠯᠪᠢᠨ᠎ᠠ ᠭᠡᠵᠦ ᠴᠢᠬᠢᠨ ᠠᠴᠠ ᠡᠮᠦᠨᠡᠬᠢ ᠦᠰᠦ ᠪᠠ ᠰᠢᠯᠢ ᠶᠢᠨ ᠰᠢᠷ᠎ᠠ ᠦᠰᠦ ᠶᠢ ᠪᠦᠷ ᠬᠤᠰᠤᠵᠤ᠂ ᠦᠯᠡᠳᠡᠭᠰᠡᠨ ᠦᠰᠦ ᠶᠢ ᠨᠢ ᠲᠤᠯᠤᠭᠠᠢ ᠶᠢᠨ ᠤᠷᠤᠢ ᠲᠡᠭᠡᠷ᠎ᠡ ᠨᠢ ᠲᠤᠭᠤᠶᠢᠯᠠᠨ ᠪᠤᠭᠤᠵᠤ ᠦᠭᠭᠦᠭᠰᠡᠨ ᠢ ᠭᠡᠯᠡᠨ᠎ᠡ᠂ ᠲᠡᠪᠡᠭ ᠢ ᠲᠠᠬᠢᠵᠤ ᠲᠠᠭᠠᠷᠢᠬᠤ ᠦᠭᠡᠢ ᠤᠷᠭᠤᠭᠤᠯᠤᠭᠠᠳ ᠴᠢᠨᠠᠭᠰᠢ ᠨᠢ ᠭᠠᠭᠴᠠ ᠭᠡᠵᠢᠭᠡ ᠭᠦᠷᠦᠵᠦ ᠦᠭᠭᠦᠨ᠎ᠡ᠂ ᠭᠡᠵᠢᠭᠡ ᠲᠠᠯᠪᠢᠬᠤ ᠶᠢ ᠲᠦᠷᠦ ᠶᠢᠨ ᠬᠠᠷ᠎ᠠ ᠬᠦᠮᠦᠨ ᠪᠤᠯᠵᠤ ᠪᠠᠶᠢᠬᠤ ᠶᠢᠨ ᠲᠡᠮᠳᠡᠭ ᠭᠡᠨ᠎ᠡ᠃      ᠡᠮᠡᠭᠳᠡᠢ ᠶᠢᠨ ᠲᠤᠯᠤᠭᠠᠢ ᠶᠢᠨ ᠵᠠᠰᠠᠯ᠄ ᠬᠡᠦᠬᠡᠨ ᠬᠡᠦᠬᠡᠰ ᠲᠤ ᠲᠠᠭᠠᠬᠢ ᠲᠠᠷᠢᠬᠤ ᠠᠴᠠ  ᠎ ᠨᠢ ᠡᠮᠦᠨ᠎ᠡ ᠲᠤᠭᠢᠭ ᠲᠠᠯᠪᠢᠵᠤ ᠦᠭᠳᠡᠭ᠂ ᠲᠤᠭᠢᠭ ᠲᠠᠯᠪᠢᠨ᠎ᠠ ᠭᠡᠵᠦ ᠵᠤᠯᠠᠢ ᠶᠢᠨ ᠦᠰᠦ ᠶᠢ ᠡᠪᠬᠡᠵᠦ ᠪᠤᠭᠤᠬᠤ ᠪᠤᠶᠤ ᠭᠦᠷᠦᠵᠦ ᠡᠪᠭᠡᠭᠡᠳ ᠲᠡᠭᠡᠷ᠎ᠡ ᠨᠢ ᠢᠪᠠᠤ᠂ ᠤᠭ᠍ᠶᠤ᠂ ᠱᠢᠷᠦ᠂ ᠮᠦᠩᠭᠦ ᠠᠴᠠ ᠠᠯᠢ ᠨᠢᠭᠡ ᠶᠢ ᠬᠠᠳᠠᠵᠤ ᠦᠭᠬᠦ ᠶᠢ ᠬᠡᠯᠡᠵᠦ ᠪᠠᠶᠢᠭ᠎ᠠ᠃ ᠲᠠᠭᠠᠬᠢ ᠲᠠᠷᠢᠭᠰᠠᠨ ᠠᠴᠠ ᠬᠤᠶᠢᠰᠢ ᠱᠠᠩᠬᠤ ᠲᠠᠯᠪᠢᠳᠠᠯ᠎ᠠ ᠨᠢ ᠮᠦᠨ ᠰᠤᠨᠵᠢᠭᠤ ᠲᠠᠯᠪᠢᠨ᠎ᠠ᠂ ᠬᠡᠦᠬᠡᠨᠴᠦᠳ ᠢ ᠠᠷᠪᠠᠨ ᠭᠤᠷᠪᠠᠳᠠᠢ ᠳᠤᠨᠢ ᠰᠢᠯᠢ ᠶᠢᠨ ᠦᠰᠦ ᠶᠢ ᠨᠢ ᠲᠠᠯᠪᠢᠵᠤ ︵ᠬᠤᠰᠤᠬᠤ ᠦᠭᠡᠢ ᠤᠷᠭᠤᠭᠤᠯᠬᠤ ᠶᠢ︶᠂ ᠠᠷᠪᠠᠨ ᠲᠠᠪᠤ ᠬᠦᠷᠦᠭᠰᠡᠭᠡᠷ ᠱᠠᠩᠬᠤ ᠲᠠᠯᠪᠢᠵᠤ ᠦᠭᠳᠡᠭ᠂ ᠱᠠᠩᠬᠤ ᠲᠠᠯᠪᠢᠬᠤ ᠳᠤ ᠵᠠᠪᠠᠯ ᠢᠪᠡᠭᠡᠯ ᠵᠢᠯ ᠲᠠᠢ ᠬᠦᠮᠦᠨ ᠢᠶᠠᠷ ᠭᠠᠷ ᠬᠦᠷᠭᠡᠭᠦᠯᠳᠡᠭ ᠶᠤᠰᠤ ᠲᠠᠢ ᠪᠠᠶᠢᠭᠰᠠᠨ ᠪᠦᠭᠡᠳ ᠱᠠᠩᠬᠤ ᠲᠠᠯᠪᠢᠬᠤ ᠶᠢ ᠪᠠᠰᠠ ᠰᠡᠪᠡᠭᠡᠷ ᠲᠠᠯᠪᠢᠨ᠎ᠠ ᠭᠡᠳᠡᠭ ᠪᠠᠶᠢᠵᠠᠢ᠂ ᠱᠠᠩᠬᠤ ᠲᠠᠯᠪᠢᠨ᠎ᠠ ᠭᠡᠵᠦ ᠪᠦᠬᠦ ᠦᠰᠦ ᠶᠢ ᠨᠢ ᠴᠢᠬᠢᠨ ᠤ ᠬᠡᠰᠡᠭ ᠢᠶᠠᠷ ᠬᠤᠶᠠᠷ ᠬᠤᠪᠢᠶᠠᠵᠤ᠂ ᠡᠮᠦᠨ᠎ᠡ ᠲᠠᠯ᠎ᠠ ᠶᠢᠨ ᠦᠰᠦ ᠶᠢ ᠲᠠᠬᠢᠭᠠᠳ ᠲᠤᠮᠳᠠᠭᠤᠷ ᠨᠢ ᠬᠤᠶᠠᠷ ᠬᠤᠪᠢᠶᠠᠭᠠᠳ ᠲᠤᠰ ᠲᠤᠰ ᠲᠤᠨᠢ ᠬᠡᠳᠦ ᠰᠦᠯᠵᠢᠵᠦ ᠴᠢᠬᠢᠨ ᠤ ᠠᠷᠤ ᠳᠤᠨᠢ ᠬᠦᠷᠭᠡᠭᠡᠳ ᠠᠷᠤ ᠦᠰᠦ ᠲᠠᠢ ᠨᠢ ᠨᠡᠶᠢᠯᠡᠭᠦᠯᠵᠦ ᠭᠠᠭᠴᠠ ᠭᠡᠵᠢᠭᠡ ᠭᠦᠷᠦᠵᠦ ᠦᠭᠭᠦ ᠶᠢ ᠵᠢᠭᠠᠵᠤ ᠪᠠᠶᠢᠭ᠎ᠠ᠂ ᠲᠡᠭᠡᠬᠦ ᠳᠡᠭᠡᠨ ᠡᠮᠦᠨ᠎ᠡ ᠲᠠᠯ᠎ᠠ ᠶᠢᠨ ᠬᠤᠶᠠᠷ ᠬᠤᠪᠢᠶᠠᠭᠰᠠᠨ ᠦᠰᠦᠨ ᠳᠤᠨᠢ ᠬᠤᠮᠠ ᠶᠢᠨ ᠲᠤᠰᠤ ᠲᠦᠷᠬᠢᠵᠦ ᠬᠤᠭᠤᠷᠤᠨᠳᠤ ᠨᠢ ᠨᠠᠭᠠᠯᠳᠤᠭᠤᠯᠵᠤ᠂ ᠬᠤᠶᠠᠷ ᠲᠡᠰᠢ ᠪᠠᠨ ᠲᠤᠭᠤᠶᠢᠯᠠᠨ ᠰᠠᠮᠨᠠᠵᠤ ᠶᠠᠩᠵᠤ ᠤᠷᠤᠭᠤᠯᠵᠤ ᠴᠢᠨᠠᠭᠰᠢ ᠨᠢ ᠰᠦᠯᠵᠢᠵᠦ ᠦᠭᠳᠡᠭ᠂ ᠡᠨᠡ ᠮᠡᠳᠦ ᠪᠠᠷ ᠱᠠᠩᠬᠤ ᠲᠠᠯᠪᠢᠭᠰᠠᠨ ᠬᠡᠦᠬᠡᠨ ᠢ ᠱᠠᠩᠬᠤᠳᠤ ᠬᠡᠦᠬᠡᠨ ᠭᠡᠳᠡᠭ᠂ ᠠᠷᠠᠳ ᠤᠨ ᠶᠠᠷᠢᠶᠠᠨ ᠳᠤ ︽ᠰᠢᠷᠠᠭᠰᠠᠨ ᠮᠢᠬ᠎ᠠ ᠰᠢᠷ᠎ᠠ ᠲᠠᠷᠤᠨ᠎ᠠ᠂ ᠱᠠᠩᠬᠤᠳᠤ ᠬᠡᠦᠬᠡᠨ ᠲᠤᠷ᠎ᠠ ᠲᠠᠷᠤᠨ᠎ᠠ︾ ᠭᠡᠰᠡᠨ ᠦᠭᠡ ᠪᠠᠶᠢᠳᠠᠭ᠃ ᠬᠡᠦᠬᠡᠨ ᠬᠦᠮᠦᠨ ᠭᠡᠵᠢᠭᠡᠨ ᠤ ᠭᠡ ᠬᠡᠷᠡᠭᠯᠡᠳᠡᠭ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃ ᠭᠡᠵᠢᠭᠡᠨ ᠤ ᠭᠡ ᠭᠡᠵᠦ ᠬᠤᠶᠠᠷ ᠬᠤᠷᠤᠭᠤ ᠦᠷᠭᠡᠨ᠂ ᠪᠠᠷᠤᠭ ᠦᠰᠦᠨ ᠤ ᠤᠷᠳᠤ ᠶᠢᠨ ᠬᠡᠮᠵᠢᠶ᠎ᠡ ᠲᠠᠢ ᠬᠠᠷ᠎ᠠ ᠪᠦᠰ ᠲᠡᠭᠡᠷ᠎ᠡ ᠢᠪᠠᠤ᠂ ᠲᠤᠩ᠂ ᠤᠭ᠍ᠶᠤ᠂ ᠲᠤᠪᠴᠢ ᠵᠡᠷᠭᠡ ᠶᠢ ᠬᠠᠳᠠᠵᠤ᠂ ᠭᠠᠭᠴᠠ ᠭᠡᠵᠢᠭᠡ ᠲᠡᠭᠡᠷ᠎ᠡ ᠪᠠᠨ ᠤᠶᠠᠵᠤ ᠦᠭᠬᠦ ᠶᠢ ᠬᠡᠯᠡᠵᠦ ᠪᠠᠶᠢᠭ᠎ᠠ᠂ ᠭᠡᠵᠢᠭᠡᠨ ᠤ ᠬᠡ ᠶᠢᠨ ᠲᠡᠭᠡᠳᠦ ᠲᠠᠯ᠎ᠠ ᠨᠢ ᠲᠡᠭᠰᠢ᠂ ᠲᠤᠤᠷᠠᠳᠤ ᠲᠠᠯ᠎ᠠ ᠨᠢ ᠭᠤᠷᠪᠠᠯᠵᠢᠨ ᠬᠡᠯᠪᠡᠷᠢ ᠲᠠᠢ᠂ ᠲᠡᠷᠡᠬᠦ ᠭᠤᠷᠪᠠᠯᠵᠢᠨ ᠠᠴᠠ ᠲᠤᠰᠪᠤᠷᠢ ᠨᠢᠭᠡ ᠲᠤᠷᠭᠠᠨ ᠤᠳᠠᠰᠤᠨ ᠰᠠᠴᠤᠭ ᠤᠨᠵᠢᠭᠤᠯᠵᠤ ᠭᠤᠶᠤᠯᠠᠳᠠᠭ ᠪᠠᠶᠢᠵᠠᠢ᠃ ᠲᠡᠭᠡᠳᠦ ᠵᠠᠭᠤᠨ ᠤ ᠬᠤᠷᠢ ᠭᠤᠴᠢᠭᠠᠳ ᠤᠨ ᠪᠤᠯᠵᠤ ᠢᠷᠡᠭᠡᠳ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠨᠢ ᠱᠠᠩᠬᠤ ᠶᠢᠨ ᠲᠠᠷᠤᠭᠤᠯᠭ᠎ᠠ᠂ ᠭᠡᠵᠢᠭᠡᠨ ᠤ ᠰᠢᠬᠠᠯᠠᠭᠤᠷ ︵ᠦᠰᠦᠨ ᠤ ᠬᠤᠢ︶᠂ ᠭᠡᠵᠢᠭᠡᠨ ᠤ ᠬᠠᠳᠠᠯᠭ᠎ᠠ᠂ ᠭᠡᠵᠢᠭᠡᠨ ᠤ ᠲᠡᠭᠡᠭ ᠬᠡᠷᠡᠭᠯᠡᠳᠡᠭ ᠪᠤᠯᠵᠠᠢ᠃ ᠱᠠᠩᠬᠤ ᠶᠢᠨ ᠲᠠᠷᠤᠭᠤᠯᠭ᠎ᠠ ᠭᠡᠵᠦ ᠬᠤᠶᠠᠷ ᠬᠤᠷᠤᠭᠤ ᠦᠷᠭᠡᠨ᠂ ᠤᠷᠳᠤ ᠪᠠᠷ ᠢᠶᠠᠨ ᠲᠤᠯᠤᠭᠠᠢ ᠳᠤ ᠲᠠᠭᠠᠷᠠᠭᠰᠠᠨ ᠶᠠᠭᠤᠮ᠎ᠠ ᠶᠢ ᠪᠦᠰ᠂ ᠲᠤᠷᠭ᠎ᠠ ᠪᠤᠶᠤ ᠲᠤᠤᠵᠠ  ᠎ ᠪᠠᠷ ᠬᠢᠭᠡᠳ ᠵᠤᠯᠠᠢ ᠠᠴᠠ ᠬᠤᠶᠠᠷ ᠲᠠᠶᠢᠰᠢ ᠪᠠᠨ ᠲᠠᠷᠤᠭᠤᠯᠵᠤ ᠠᠷᠤ ᠰᠢᠯᠢ ᠲᠡᠭᠡᠷ᠎ᠡ ᠪᠠᠨ ᠲᠤᠪᠴᠢᠯᠠᠬᠤ ᠪᠤᠶᠤ ᠵᠠᠩᠭᠢᠳᠴᠤ ᠦᠭᠬᠦ ᠶᠢ ᠵᠢᠭᠠᠵᠤ ᠪᠠᠶᠢᠭ᠎ᠠ᠃ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠨᠢ ᠲᠠᠷᠤᠭᠤᠯᠭ᠎ᠠ ᠲᠡᠭᠡᠷ᠎ᠡ ᠪᠠᠨ ᠱᠢᠷᠦ᠂ ᠰᠤᠪᠤᠳ᠂ ᠤᠭ᠍ᠶᠤ ᠵᠡᠷᠭᠡ ᠶᠢ ᠬᠠᠳᠠᠵᠤ ᠭᠤᠶᠤᠯᠠᠳᠠᠭ ᠪᠦᠭᠡᠳ ᠲᠠᠷᠤᠭᠤᠯᠭ᠎ᠠ ᠶᠢ ᠴᠠᠭᠠᠨ᠂ ᠤᠯᠠᠭᠠᠨ᠂ ᠰᠢᠷ᠎ᠠ ᠠᠴᠠ ᠪᠤᠰᠤᠳ ᠦᠩᠭᠡ ᠪᠠᠷ ᠪᠦᠷ ᠬᠢᠵᠦ ᠪᠤᠯᠳᠠᠭ ᠰᠠᠨᠵᠠᠢ᠃ ᠭᠡᠵᠢᠭᠡᠨ ᠤ ᠬᠠᠳᠠᠯᠭ᠎ᠠ ᠶᠢ ᠭᠤᠤᠯᠳᠠᠭᠤ ᠮᠦᠩᠭᠦᠨ ᠶᠤᠸᠠᠮᠪᠤᠤ᠂ ᠶᠠᠩᠴᠢᠶᠠᠨ ᠢᠶᠠᠷ ᠬᠢᠭᠡᠳ ᠭᠡᠵᠢᠭᠡᠨ ᠤ ᠪᠠᠨ ᠲᠡᠭᠡᠷ᠎ᠡ᠂ ᠲᠤᠮᠳᠠ᠂ ᠲᠤᠤᠷ᠎ᠠ ᠪᠤᠶᠤ ᠵᠦᠪᠬᠡᠨ ᠭᠤᠤᠯ ᠲᠤᠮᠳᠠ ᠨᠢ ᠵᠡᠭᠦᠵᠦ ᠦᠭᠳᠡᠭ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃ ᠵᠠᠷᠢᠮ ᠨᠢ ᠮᠦᠩᠭᠦᠨ ᠪᠦᠳᠦᠴᠡ ᠲᠠᠢ᠂ ᠱᠢᠷᠦ ᠰᠤᠪᠤᠳ ᠤᠨ ᠰᠢᠭᠢᠳᠬᠡᠷᠢ ᠲᠠᠢ ᠦᠰᠦᠨ ᠤ ᠬᠤᠢ ᠶᠢ ᠭᠡᠵᠢᠭᠡᠨ ᠤ ᠪᠠᠨ ᠦᠵᠦᠭᠦᠷ ᠲᠤ ᠬᠡᠷᠡᠭᠯᠡᠵᠦ᠂ ᠵᠠᠷᠢᠮ ᠨᠢ ᠭᠡᠵᠢᠭᠡ ᠪᠠᠨ ᠨᠠᠭᠠᠰᠢ ᠴᠠᠭᠠᠰᠢ ᠬᠦᠳᠡᠯᠭᠡᠬᠦ ᠦᠭᠡᠢ ᠲᠤᠭᠳᠠᠭᠠᠬᠤ ᠶᠢᠨ ᠲᠦᠯᠦᠭᠡ ᠦᠰᠦᠨ ᠤ ᠪᠠᠨ ᠦᠵᠦᠭᠦᠷ ᠲᠤ ᠮᠦᠩᠭᠦᠨ ᠲᠡᠬᠡᠭ ᠭᠢᠵᠦ᠂ ᠪᠥᠰᠡᠨ ᠳᠡᠭᠡᠨ ᠤᠷᠤᠭᠤᠯᠤᠨ ᠲᠡᠭᠡᠭᠯᠡᠭᠦᠯᠳᠡᠭ ᠪᠠᠶᠢᠵᠠᠢ᠃ᠱᠠᠩᠬᠤᠳᠤ ᠬᠡᠦᠬᠡᠨᠴᠦᠳ ᠠᠷᠪᠠᠨ ᠨᠠᠢᠮᠠ ᠬᠦᠷᠦᠭᠰᠡᠭᠡᠷ ᠠᠶᠢᠯ ᠳᠤ ᠮᠤᠷᠳᠠᠵᠤ ᠠᠪᠠᠭᠠᠢ ᠪᠤᠯᠤᠨ᠎ᠠ᠂ ᠲᠡᠭᠡᠭᠰᠡᠭᠡᠷ ᠠᠮᠢᠨ ᠦᠰᠦ ᠶᠢ ᠨᠢ ᠬᠤᠶᠠᠷ ᠲᠠᠶᠢᠰᠢ  ᠬᠤᠪᠢᠶᠠᠨ᠂ ᠨᠢᠭᠡ ᠲᠠᠯ᠎ᠠ ᠳᠤᠨᠢ ᠲᠤᠰᠪᠦᠷᠢ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠵᠦ ᠬᠤᠶᠠᠷ ᠭᠡᠵᠢᠭᠡ ᠰᠦᠯᠵᠢᠵᠦ ᠦᠭᠳᠡᠭ᠃      ᠰᠢᠷᠭᠤᠭᠤᠯ ᠬᠢᠬᠦ ᠶᠠᠪᠤᠴᠠ᠄ ᠰᠢᠷᠭᠤᠭᠤᠯ ᠬᠢᠬᠦ ᠤᠷᠳᠤ ᠦᠰᠦ ᠪᠡᠯᠡᠳᠦᠨ᠎ᠡ᠂ ᠡᠨᠡᠬᠦ ᠦᠰᠦ ᠶᠢ       ᠤᠯᠠᠩᠬᠢ ᠳᠠᠭᠠᠨ ᠦᠪᠡᠷᠰᠡᠳ ᠤᠨ ᠲᠠᠭᠠᠬᠢᠷᠠᠭᠰᠠᠨ ᠦᠰᠦᠨ ᠤ ᠰᠠᠪ ᠢᠶᠠᠷ ᠬᠢᠳᠡᠭ᠃ ᠰᠢᠷᠭᠤᠭᠤᠯ ᠦᠰᠦ ᠶᠢ       ᠬᠤᠭᠤᠷᠤᠨᠳᠤ ᠨᠢ ᠨᠠᠭᠠᠬᠤ ᠨᠠᠭᠠᠯᠳᠤᠭᠤᠷ ᠪᠡᠯᠡᠳᠦᠨ᠎ᠡ᠂ ᠲᠡᠭᠦᠨ ᠢᠶᠠᠨ ᠦᠰᠦᠨ ᠤ ᠲᠦᠷᠬᠢᠴᠡ ᠭᠡᠳᠡᠭ᠂ ᠲᠤᠰ ᠨᠠᠭᠠᠯᠳᠤᠭᠤᠷ ᠢ ᠬᠤᠮᠠ ᠶᠢ ᠲᠡᠪᠳᠦᠭᠡᠵᠦ ᠪᠦᠳᠦᠭᠦᠯᠢᠭ ᠰᠢᠷᠬᠡᠭ ᠲᠠᠢ ᠪᠦᠰ ᠰᠠᠪᠠ ᠳᠤ ᠬᠢᠭᠡᠳ ᠲᠡᠭᠡᠷ᠎ᠡ ᠠᠴᠠ ᠨᠢ ᠪᠠᠭ᠎ᠠ ᠤᠰᠤ ᠬᠢᠵᠦ ᠤᠯᠠᠨ ᠲᠠᠬᠢᠨ ᠨᠤᠬᠤᠵᠤ ᠰᠢᠬᠠᠨ᠎ᠠ ︵ᠤᠯᠠᠨ ᠤᠳᠠᠭ᠎ᠠ ᠤᠰᠤ ᠬᠢᠵᠦ ᠰᠢᠬᠠᠳᠠᠭ︶᠂ ᠲᠡᠭᠡᠭᠰᠡᠭᠡᠷ ᠨᠢᠭᠡ ᠵᠦᠢᠯ ᠤᠨ ᠬᠦᠭᠡᠰᠦᠷᠡᠭᠰᠡᠨ ᠴᠠᠪᠠᠤ ᠰᠢᠭ᠋ ᠶᠠᠭᠤᠮ᠎ᠠ ᠭᠠᠷᠤᠨ᠎ᠠ᠂ ᠲᠡᠭᠦᠨ ᠢᠶᠠᠨ ᠰᠢᠷᠭᠤᠭᠤᠯ ᠦᠰᠦᠨ ᠳᠤ ᠲᠦᠷᠬᠢᠵᠦ ᠰᠡᠪᠡᠷᠡᠭᠡᠵᠦ ᠬᠠᠳᠠᠭᠠᠨ᠎ᠠ᠂ ᠲᠡᠭᠡᠬᠦ ᠳᠡᠭᠡᠨ ᠭᠡᠳᠦᠷᠡᠳᠡᠯ᠎ᠡ ᠶᠡᠭᠡ ᠬᠠᠳᠠᠭᠠᠵᠤ ᠪᠤᠯᠬᠤ ᠦᠭᠡᠢ᠂ ᠲᠡᠭᠡᠪᠡᠯ ᠬᠠᠳᠠᠭᠤᠷᠠᠭᠠᠳ ᠦᠰᠦᠨ ᠤ ᠦᠵᠦᠭᠦᠷ ᠤᠨ ᠬᠡᠰᠡᠭ ᠢ ᠠᠮᠢᠨ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠵᠦ ᠰᠦᠯᠵᠢᠵᠦ ᠲᠡᠶᠢᠯᠬᠦ ᠦᠭᠡᠢ ᠪᠤᠯᠤᠨ᠎ᠠ᠃ ᠠᠳᠡ ᠲᠤᠳᠤᠷᠬᠠᠶᠢᠯᠠᠬᠤ ᠴᠢᠬᠤᠯᠠ ᠲᠠᠢ ᠵᠦᠢᠯ ᠭᠡᠪᠡᠯ ᠦᠰᠦᠨ ᠤ ᠰᠡᠪ ᠢ ᠨᠡᠶᠢᠯᠡᠭᠦᠯᠦᠨ ᠰᠠᠮᠨᠠᠭᠠᠳ ᠬᠦᠷᠦᠵᠦ ᠦᠭᠭᠦ ᠪᠢᠰᠢ᠂ ᠬᠠᠷᠢᠨ ᠵᠠᠳᠠᠭᠠᠢ ᠦᠰᠦᠨ ᠳᠤ ᠨᠠᠭᠠᠯᠳᠤᠭᠤᠷ ᠲᠦᠷᠬᠢᠭᠡᠳ ᠬᠤᠭᠤᠷᠤᠨᠳᠤ ᠨᠢ ᠨᠠᠭᠠᠯᠳᠤᠭᠤᠯᠵᠤ ᠦᠭᠭᠦᠨ᠎ᠡ᠃ ᠨᠠᠭᠠᠯᠳᠤᠭᠤᠷ ᠢᠶᠠᠨ ᠪᠠᠷᠤᠭ ᠰᠢᠷᠭᠡᠭ ᠦᠰᠦ ᠪᠤᠯᠭᠠᠨ ᠳᠤ ᠲᠦᠷᠬᠢᠵᠦ ᠦᠭᠬᠦ ᠬᠡᠷᠡᠭᠳᠡᠢ᠂ ᠦᠭᠡᠢ ᠪᠤᠯ ᠬᠠᠳᠠᠭᠰᠠᠨ ᠤ ᠲᠠᠷᠠᠭ᠎ᠠ ᠬᠦᠪᠰᠦᠶᠢᠵᠦ ᠪᠤᠰᠤᠭᠠᠳ ᠦᠰᠦᠨ ᠤ ᠰᠡᠪ ᠲᠠᠷᠤᠭᠳᠠᠬᠤ ᠦᠭᠡᠢ ᠪᠤᠯᠳᠠᠭ᠃ ᠱᠤᠷᠭᠤᠣᠯ ᠢ ᠨᠢᠭᠡ ᠲᠠᠯ᠎ᠠ ᠳᠤᠨᠢ ᠭᠤᠷᠪᠠ᠂ ᠨᠡᠶᠢᠳᠡ ᠵᠢᠷᠭᠤᠭ᠎ᠠ ᠪᠡᠯᠡᠳᠦᠨ᠎ᠡ᠂ ᠨᠢᠭᠡ ᠲᠠᠯ᠎ᠠ ᠶᠢᠨ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠨᠢ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ᠂ ᠲᠤᠮᠳᠠ ᠰᠢᠷᠭᠤᠭᠤᠯ᠂ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠭᠡᠬᠦ ᠨᠡᠷ᠎ᠡ ᠲᠠᠢ᠂ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠤᠨ ᠶᠠᠩᠵᠤ ᠬᠡᠯᠪᠡᠷᠢ ᠨᠢ ᠤᠭ ᠲᠠᠭᠠᠨ ᠭᠤᠯᠳᠤᠶᠢᠭᠰᠠᠨ᠂ ᠵᠤᠵᠠᠭᠠᠯᠢᠭ᠂ ᠲᠡᠮᠡᠢ ᠲᠤᠭᠤᠢ ᠪᠤᠰᠤ ᠲᠡᠶᠢᠮᠦ ᠶᠠᠩᠵᠤ ᠲᠠᠢ ᠪᠠᠶᠢᠭᠠᠳ ᠲᠡᠭᠡᠳᠦ ᠵᠠᠭᠤᠨ ᠤ ᠭᠤᠴᠢ᠂ ᠲᠦᠴᠢᠭᠡᠳ ᠤᠨ ᠪᠤᠯᠵᠤ ᠢᠷᠡᠭᠡᠳ ᠲᠤᠮᠳᠠ ᠰᠢᠷᠭᠤᠭᠤᠯ ᠢ ᠦᠷᠭᠡᠨ ᠬᠠᠪᠳᠠᠭᠠᠢ ᠬᠢᠬᠦ ᠪᠤᠯᠤᠭᠰᠠᠨ ᠪᠦᠭᠡᠳ ᠦᠪᠡᠷᠰᠡᠳ ᠤᠨ ᠲᠤᠷᠠᠰᠢᠯ ᠪᠠ ᠪᠡᠶ᠎ᠡ ᠶᠢᠨ ᠲᠦᠯᠦᠪ ᠲᠡᠭᠡᠨ ᠵᠤᠬᠢᠴᠠᠭᠤᠯᠤᠨ ᠪᠦᠳᠦᠭᠦᠨ ᠪᠠᠭ᠎ᠠ ᠰᠢᠭ᠋ ᠠᠳᠠᠯᠢ ᠪᠤᠰᠤ ᠬᠢᠳᠡᠭ ᠪᠤᠯᠵᠠᠢ᠃ ᠲᠤᠮᠳᠠ ᠰᠢᠷᠭᠤᠭᠤᠯ ᠢ ᠵᠠᠰᠠᠬᠤ ᠳᠤ ᠵᠤᠬᠢᠬᠤ ᠬᠡᠮᠵᠢᠶᠡᠨ ᠤ ᠮᠡᠷᠭᠡᠵᠢᠯ ᠬᠡᠷᠡᠭᠰᠡᠨ᠎ᠡ᠂ ᠰᠢᠷᠭᠤᠭᠤᠯ ᠪᠤᠯᠭᠠᠨ ᠤ ᠲᠡᠭᠡᠳᠦ ᠦᠵᠦᠭᠦᠷ ᠲᠤ ᠮᠦᠨ ᠦᠰᠦᠨ ᠤ ᠰᠡᠪ ᠢᠶᠠᠷ ᠪᠠᠷᠤᠭ ᠰᠦᠭᠡᠮ ᠬᠢᠷᠢᠳᠡᠢ ᠨᠠᠷᠢᠨ ᠰᠢᠯᠪᠢ ᠰᠦᠯᠵᠢᠵᠦ       ᠬᠢᠨ᠎ᠡ᠂ ᠲᠤᠰ ᠰᠢᠯᠪᠢ ᠶᠢ ᠬᠠᠮᠤᠭ ᠲᠡᠷᠢᠭᠦᠨ ᠬᠢᠭᠡᠳ ᠴᠢᠨᠠᠭᠰᠢ ᠨᠢ ᠬᠡᠰᠡᠭ ᠬᠡᠰᠡᠭ ᠢᠶᠠᠷ ᠦᠰᠦ ᠨᠡᠮᠡᠵᠦ       ᠤᠳᠠᠰᠤ ᠪᠠᠷ ᠴᠢᠩᠭ᠎ᠠ ᠤᠷᠢᠶᠠᠨ ᠤᠶᠤᠵᠤ ᠰᠢᠷᠭᠤᠭᠤᠯ ᠦᠰᠦ ᠬᠢᠳᠡᠭ᠃      ᠰᠢᠷᠭᠤᠭᠤᠯ ᠦᠰᠦ ᠬᠦᠷᠦᠬᠦ ᠶᠠᠪᠤᠴᠠ᠄ ᠬᠠᠮᠤᠭ ᠲᠡᠷᠢᠭᠦᠨ ᠳᠤ ᠲᠤᠯᠤᠭᠠᠢ ᠶᠢᠨ ᠦᠰᠦ ᠶᠢ ᠵᠠᠭᠠᠳᠠᠰᠤᠯᠠᠨ ᠬᠤᠶᠠᠷ ᠲᠠᠶᠢᠰᠢ ᠲᠡᠭᠰᠢ ᠬᠤᠪᠢᠶᠠᠵᠤ᠂ ᠵᠠᠭᠠᠳᠠᠰᠤᠨ ᠤ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠬᠡᠰᠡᠭ ᠦᠰᠦ ᠦᠯᠡᠳᠡᠭᠡᠨ ᠲᠡᠭᠦᠨ ᠢᠶᠠᠨ ᠭᠤᠷᠪᠠ ᠠᠩᠭᠢᠯᠠᠨ᠂ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠦᠰᠦ ᠪᠦᠷᠬᠦᠵᠦ ᠦᠭᠭᠦ ᠬᠠᠯᠢᠪ ᠦᠰᠦ ᠪᠤᠯᠭᠠᠨ᠎ᠠ᠂ ᠲᠠᠷᠠᠭ᠎ᠠ ᠨᠢ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠦᠰᠦ ᠵᠡᠭᠦᠬᠦ ᠲᠤᠰ ᠲᠤᠰ ᠤᠨ ᠴᠡᠭ ᠲᠤᠭᠳᠠᠭᠠᠨ ᠲᠤᠰ ᠲᠤᠰ ᠲᠤᠨᠢ ᠬᠡᠰᠡᠭ ᠠᠮᠢᠨ ᠦᠰᠦ ᠦᠯᠡᠳᠡᠭᠡᠨ᠎ᠡ᠃ ᠲᠡᠭᠡᠭᠡᠳ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠤᠨ ᠰᠢᠯᠪᠢ ᠶᠢ ᠦᠨᠦ ᠦᠯᠡᠳᠡᠭᠡᠭᠰᠡᠨ ᠬᠡᠰᠡᠭ ᠠᠮᠢᠨ ᠦᠰᠦ ᠎ ᠲᠠᠢ ᠨᠡᠶᠢᠯᠡᠭᠦᠯᠦᠨ ᠰᠦᠯᠵᠢᠵᠦ ᠲᠤᠰ ᠰᠢᠷᠭᠤᠭᠤᠯ ᠢ ᠵᠡᠭᠦᠵᠦ ᠲᠤᠭᠳᠠᠭᠠᠨ᠎ᠠ᠃ ᠡᠨᠡ ᠮᠡᠳᠦ ᠪᠠᠷ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ ᠪᠠ ᠲᠤᠮᠳᠠ ᠰᠢᠷᠭᠤᠭᠤᠯ ᠢ ᠲᠤᠭᠳᠠᠭᠠᠨ᠎ᠠ᠂ ᠡᠭᠦᠨ ᠳᠤ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠤᠨ ᠲᠤᠰ ᠲᠤᠰ ᠤᠨ ᠴᠡᠭ ᠲᠤᠭᠳᠠᠭᠠᠬᠤ ᠪᠤᠯ ᠬᠠᠮᠤᠭ ᠴᠢᠬᠤᠯᠠ᠃ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ ᠪᠠ ᠲᠤᠮᠳᠠ ᠰᠢᠷᠭᠤᠭᠤᠯ ᠢ ᠤᠶᠢᠷᠠᠯᠴᠠᠭ᠎ᠠ ᠪᠠᠶᠢᠷᠢᠯᠠᠭᠤᠯᠤᠨ᠎ᠠ᠃ ᠵᠤᠯᠠᠢ ᠶᠢᠨ ᠬᠡᠰᠡᠭ ᠠᠮᠢᠨ ᠦᠰᠦ ᠶᠢ ᠲᠤᠭᠤᠶᠢᠯᠠᠨ ᠵᠠᠰᠠᠵᠤ ᠨᠠᠭᠠᠯᠳᠤᠭᠤᠷ ᠲᠦᠷᠬᠢᠭᠡᠳ ᠴᠢᠬᠢᠨ ᠤ ᠬᠤᠶᠢᠭᠤᠷ ᠤᠷᠤᠭᠤᠯᠤᠨ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠲᠠᠢ ᠨᠡᠶᠢᠯᠡᠭᠦᠯᠵᠦ ᠭᠦᠷᠦᠨ᠎ᠡ᠃ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠦᠰᠦ ᠶᠢ ᠠᠮᠢᠨ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠦᠨ ᠰᠦᠯᠵᠢᠬᠦ ᠠᠷᠭ᠎ᠠ᠄ ᠬᠠᠮᠤᠭ ᠲᠡᠷᠢᠭᠦᠨ ᠳᠤ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠢ ᠲᠡᠷᠡ ᠬᠠᠪᠢ ᠳᠤᠨᠢ ᠦᠯᠡᠳᠡᠭᠡᠭᠰᠡᠨ ᠬᠠᠯᠢᠪ ᠦᠰᠦ ᠪᠠᠷ ᠪᠦᠷᠬᠦᠵᠦ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ ︵ᠬᠠᠯᠢᠪ       ᠦᠰᠦ ᠲᠠᠢ ᠨᠢ ᠬᠠᠮᠳᠤ︶᠎ ᠲᠠᠢ ᠰᠤᠯᠢᠪᠴᠠᠭᠤᠯᠤᠨ ᠲᠠᠷᠤᠨ᠎ᠠ᠂ ᠲᠠᠷᠤᠢ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ ᠢᠶᠠᠷ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠢ ᠲᠠᠷᠤᠵᠤ᠂ ᠵᠠᠪᠰᠠᠷ ᠲᠤᠨᠢ ᠲᠤᠮᠳᠠ ᠰᠢᠷᠭᠤᠭᠤᠯ ᠢ ᠲᠠᠯᠪᠢᠵᠤ ᠬᠠᠯᠢᠪ ᠦᠰᠦ ᠪᠠᠷ ᠪᠦᠷᠬᠦᠵᠦ᠂ ᠲᠤᠮᠳᠠ ᠰᠢᠷᠭᠤᠭᠤᠯ ᠢ ᠠᠷᠤᠭᠰᠢ ᠤᠨᠠᠬᠤ ᠪᠠᠷ ᠦᠭᠡᠢ ᠲᠤᠭᠳᠠᠪᠤᠷᠢᠳᠠᠢ ᠪᠤᠯᠭᠠᠵᠤ ᠦᠭᠭᠦᠨ᠎ᠡ᠃ ᠲᠡᠭᠡᠭᠡᠳ ᠴᠢᠨᠠᠭᠰᠢ ᠪᠠᠨ ᠬᠡᠳᠦ ᠰᠦᠯᠵᠢᠭᠡᠳ ᠦᠰᠦᠨ ᠤ ᠦᠵᠦᠭᠦᠷ ᠢ ᠲᠤᠷᠭᠠᠨ ᠬᠠᠷ᠎ᠠ ᠤᠳᠠᠰᠤ ᠪᠠᠷ ᠪᠤᠭᠤᠵᠤ᠂       ᠦᠰᠦᠨ ᠤ ᠭᠡᠷ ᠲᠤ ᠲᠦᠷᠢᠬᠦ ᠳᠤ ᠪᠡᠯᠡᠭᠡᠨ ᠪᠤᠯᠭᠠᠨ᠎ᠠ᠃ ᠰᠢᠯᠢ ᠶᠢᠨ ᠲᠠᠭᠵᠠᠨ  ᠎ ᠳᠤ᠂ ᠲᠠᠷᠤᠢ ᠵᠠᠭᠠᠳᠠᠰᠤᠨ ᠤ ᠬᠤᠶᠠᠷ ᠲᠠᠯ᠎ᠠ ᠳᠤ ᠲᠤᠰ ᠪᠦᠷᠢ ᠵᠢᠭᠠᠬᠠᠨ ᠦᠰᠦ ᠠᠪᠴᠤ᠂ ᠠᠰ ᠠᠰ ᠲᠤᠨᠢ ᠰᠦᠯᠵᠢᠭᠡᠳ ᠬᠠᠮᠤᠭ ᠰᠡᠭᠦᠯ ᠳᠤ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠪᠠ ᠲᠡᠭᠦᠨ ᠤ ᠬᠠᠯᠢᠪ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠦᠨ ᠬᠠᠮᠳᠤᠷᠠᠭᠤᠯᠤᠨ ᠰᠦᠯᠵᠢᠨ᠎ᠡ᠂ ᠡᠨᠡᠬᠦ ᠦᠰᠦ ᠶᠢ ᠬᠤᠯᠠᠭᠠᠢ ᠬᠦᠷᠦᠭᠡ ᠭᠡᠳᠡᠭ ᠪᠠᠶᠢᠵᠠᠢ᠃      ᠦᠰᠦ ᠪᠠᠨ ᠭᠦᠷᠦᠵᠦ ᠪᠠᠷᠠᠭᠠᠳ ᠭᠠᠳᠠᠭᠤᠷ ᠨᠢ ᠦᠰᠦᠨ‌‍ᠤ ᠪᠤᠳᠤᠭ ᠲᠦᠷᠬᠢᠵᠦ ᠦᠭᠳᠡᠭ᠂ ᠡᠨᠡᠬᠦ ᠪᠤᠳᠤᠭ ᠢ ᠨᠠᠷᠢᠨ ᠪᠤᠳᠠᠭ᠎ᠠ ︵ᠲᠤᠷᠭᠤᠳ ᠤᠯᠤᠰ ᠬᠤᠨᠤᠭ ᠪᠤᠳᠠᠭ᠎ᠠ ᠭᠡᠳᠡᠭ︶᠎ ᠶᠢ ᠬᠠᠶᠢᠰᠤᠨ ᠳᠤ ᠬᠢᠵᠦ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠬᠡᠰᠡᠭ ᠬᠠᠭᠤᠷᠤᠭᠠᠳ᠂ ᠲᠡᠭᠡᠷ᠎ᠡ ᠠᠴᠠ ᠨᠢ ᠵᠢᠭᠠᠬᠠᠨ ᠴᠠᠢ ᠪᠤᠶᠤ ᠤᠰᠤ ᠬᠢᠵᠦ ᠪᠤᠴᠠᠯᠭᠠᠨ᠎ᠠ᠂ ᠭᠡᠰᠡᠭ ᠪᠤᠴᠠᠯᠭᠠᠭᠠᠳ ᠪᠤᠳᠠᠭ᠎ᠠ ᠪᠠᠨ ᠱᠥᠬᠦᠵᠤ ᠠᠪᠤᠭᠠᠳ ᠦᠯᠡᠳᠡᠭᠰᠡᠨ ᠰᠢᠩᠭᠡᠨ ᠢ ᠪᠤᠴᠠᠯᠭᠠᠭᠠᠳ ᠪᠠᠶᠢᠨ᠎ᠠ᠂ ᠰᠢᠷ᠎ᠠ ᠬᠦᠭᠡᠰᠦ ᠶᠢ ᠨᠢ ᠠᠪᠴᠤ ᠬᠠᠶᠠᠭᠠᠳ ᠪᠠᠶᠢᠨ᠎ᠠ᠂ ᠲᠡᠭᠡᠵᠦ ᠪᠠᠶᠢᠳᠠᠯ᠎ᠠ ᠬᠠᠪ ᠬᠠᠷ᠎ᠠ ᠭᠢᠯᠠᠯᠵᠠᠭᠰᠠᠨ ᠶᠠᠭᠤᠮ᠎ᠠ ᠦᠳᠬᠡᠷᠡᠭᠡᠳ ᠢᠷᠡᠨ᠎ᠡ᠂ ᠡᠭᠦᠨ ᠢᠶᠠᠨ ᠴᠡᠪᠡᠷᠬᠡᠨ ᠰᠠᠪᠠᠨ ᠳᠤ ᠠᠭᠤᠳᠠᠯᠤᠭᠠᠳ ᠬᠡᠰᠡᠭ ᠬᠦᠷᠦᠭᠡᠵᠦ ᠦᠰᠦᠨ ᠳᠡᠭᠡᠨ ᠲᠦᠷᠬᠢᠨ᠎ᠡ᠂       ᠦᠰᠦᠨ ᠳᠤ ᠦᠩᠭᠡ ᠤᠷᠤᠭᠤᠯᠬᠤ ᠪᠠ ᠦᠰᠦ ᠬᠠᠷᠠᠯᠠᠭᠤᠯᠬᠤ ᠦᠢᠯᠡᠳᠦᠯ ᠲᠠᠢ᠃ ᠪᠤᠳᠠᠭ᠎ᠠ ᠪᠠᠨ ᠢᠯᠡᠭᠦᠦ ᠬᠠᠭᠤᠷᠠᠪᠠᠯ ᠦᠰᠦᠨ ᠤ ᠪᠤᠳᠤᠭ ᠬᠦᠷᠡᠩ ᠪᠤᠯᠵᠤ᠂ ᠲᠤᠳᠠᠭᠤ ᠬᠠᠭᠤᠷᠠᠪᠠᠯ ᠰᠢᠷ᠎ᠠ ᠪᠤᠯᠵᠤ᠂ ᠶᠠᠪ ᠴᠠᠪ ᠲᠠᠭᠠᠷᠠᠭᠤᠯᠪᠠᠯ ᠬᠠᠪ ᠬᠠᠷ᠎ᠠ ᠦᠩᠭᠡ ᠲᠠᠢ ᠪᠤᠯᠳᠠᠭ ᠪᠠᠶᠢᠵᠠᠢ᠃ ᠲᠤᠯᠤᠭᠠᠢ ᠪᠠᠨ ᠤᠬᠢᠶᠠᠬᠤ ᠦᠶ᠎ᠡ ᠳᠤ ᠰᠢᠷᠭᠤᠭᠤᠯ ᠦᠰᠦ ᠪᠠᠨ ᠠᠪᠴᠤ ᠦᠩᠭᠢᠵᠦ ᠤᠰᠤᠨ ᠳᠤ ᠤᠭᠢᠶᠠᠭᠠᠳ ᠲᠠᠬᠢᠵᠤ ᠨᠠᠭᠠᠵᠤ ᠵᠡᠭᠦᠨ᠎ᠡ᠃ ᠰᠦᠨᠢ           ᠤᠨᠳᠠᠬᠤ ᠳᠠᠭᠠᠨ ᠴᠤ ᠠᠪᠴᠤ ᠪᠤᠯᠬᠤ ᠦᠭᠡᠢ᠂ ᠶᠡᠷᠦ ᠨᠢ ᠪᠦᠰᠡᠭᠦᠢ ᠬᠦᠮᠦᠨ ᠶᠠᠮᠠᠷ ᠴᠤ ᠴᠠᠭ ᠲᠤ ᠭᠡᠳ ᠮᠠᠯᠠᠭᠠᠢ᠂ ᠰᠢᠷᠭᠤᠭᠤᠯ ᠢᠶᠠᠨ ᠠᠪᠴᠤ ᠪᠤᠯᠬᠤ ᠦᠭᠡᠢ᠂ ᠠᠪᠤᠪᠠᠯ ᠬᠦᠮᠦᠨ ᠳᠤ ᠮᠠᠭᠤ ᠬᠡᠯᠡᠭᠳᠡᠨ᠎ᠡ᠃ ᠰᠢᠷᠭᠤᠭᠤᠯ ᠦᠰᠦ ᠪᠠᠨ ᠤᠯᠠᠩᠬᠢ ᠪᠦᠰᠡᠭᠦᠶᠢᠴᠦᠳ ᠦᠪᠡᠷᠰᠡᠳ ᠢᠶᠠᠨ ᠭᠦᠷᠦᠭᠡᠳ ᠵᠡᠭᠦᠵᠦ᠂ ᠲᠤᠩ ᠡᠰᠡ ᠴᠢᠳᠠᠬᠤ ᠨᠢ ᠬᠦᠮᠦᠨ ᠢᠶᠠᠷ ᠭᠦᠷᠦᠭᠦᠯᠳᠡᠭ᠃ ᠴᠢᠯᠦᠭᠡᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠪᠦᠰᠡᠭᠦᠶᠢᠴᠦᠳ ᠠᠯᠬᠤᠮ ᠠᠯᠬᠤᠮ ᠢᠶᠠᠷ ᠰᠢᠷᠭᠤᠭᠤᠯ ᠦᠰᠦ       ᠵᠡᠭᠦᠬᠦ ᠪᠠᠨ ᠪᠤᠯᠢᠭᠠᠳ ᠠᠮᠢᠨ ᠦᠰᠦ ᠪᠠᠨ ᠬᠤᠶᠠᠷ ᠬᠤᠪᠢᠶᠠᠨ ᠰᠦᠯᠵᠢᠵᠦ ᠦᠰᠦᠨ ᠤ ᠭᠡᠷ ᠲᠡᠭᠡᠨ ᠬᠢᠬᠦ ᠪᠤᠯᠤᠭᠰᠠᠨ ᠪᠦᠭᠡᠳ ᠲᠡᠭᠦᠨ ᠢᠶᠠᠨ ᠰᠢᠢᠮᠡᠭ ᠦᠰᠦ ᠭᠡᠳᠡᠭ᠃      ᠦᠰᠦᠨ ᠤ ᠭᠡᠷ᠄ ᠬᠠᠷ᠎ᠠ ᠲᠤᠷᠭ᠎ᠠ᠂ ᠬᠠᠷ᠎ᠠ ᠬᠢᠯᠢᠩ ᠪᠤᠶᠤ ᠬᠠᠷ᠎ᠠ ᠪᠦᠰ ᠢᠶᠠᠷ ᠬᠢᠭᠰᠡᠨ ᠨᠠᠷᠢᠬᠠᠨ ᠤᠷᠳᠤ ᠲᠤᠭᠳᠤᠢ᠃ ᠲᠤᠭᠳᠤᠢ ᠶᠢᠨ ᠠᠮᠠᠰᠠᠷ ᠨᠢ ᠭᠤᠷᠪᠠᠯᠵᠢᠨ ᠬᠡᠯᠪᠡᠷᠢ ᠲᠠᠢ᠂ ᠠᠮᠠᠰᠠᠷ ᠤᠨ ᠬᠤᠶᠠᠷ ᠲᠠᠯ᠎ᠠ ᠶᠢᠨ       ᠬᠦᠪᠡᠭᠡ ᠪᠠᠷ ᠨᠢ ᠨᠤᠭᠤᠭᠠᠨ ᠤᠳᠠᠰᠤ ᠪᠠᠷ ᠴᠠᠯᠮ᠎ᠠ ᠪᠤᠶᠤ ᠵᠡᠭᠡᠭ ᠪᠠᠷᠢᠵᠤ᠂ ᠬᠠᠵᠠᠭᠤ ᠪᠠᠷ ᠨᠢ ᠮᠦᠨ ᠨᠤᠭᠤᠭᠠᠨ ᠤᠳᠠᠰᠤ ᠪᠠᠷ ᠦᠷᠭᠦᠯᠵᠢ ᠰᠢᠭᠯᠠᠵᠤ ᠦᠭᠳᠡᠭ᠃ ᠵᠠᠷᠢᠮ ᠨᠢ ᠴᠠᠯᠮ᠎ᠠ ᠪᠤᠶᠤ ᠵᠡᠭᠡᠭ ᠤᠨ ᠤᠷᠤᠨ ᠳᠤ ᠰᠤᠮᠤᠨ ᠨᠢᠷᠤᠭᠤ ᠬᠠᠳᠬᠤᠵᠤ᠂ ᠦᠷᠭᠦᠯᠵᠢ ᠰᠢᠭᠯᠠᠭᠠᠰᠤ ᠶᠢᠨ ᠲᠤᠳᠤᠭᠤᠷ ᠵᠠᠭᠤᠷᠠᠪᠴᠢᠯᠠᠵᠤ᠂ ᠵᠠᠷᠢᠮ ᠨᠢ ᠵᠠᠭᠤᠷᠠᠪᠴᠢ ᠶᠢᠨ ᠤᠷᠤᠨ ᠳᠤ ᠬᠤᠨᠢᠨ ᠬᠤᠯᠪᠤᠭ᠎ᠠ ᠬᠠᠳᠬᠤᠵᠤ ᠦᠭᠳᠡᠭ᠃ ᠦᠰᠦᠨ ᠤ ᠭᠡᠷ ᠲᠤ ᠨᠢᠭᠤᠷ ᠲᠠᠯ᠎ᠠ ᠪᠠ ᠲᠤᠳᠤᠷ ᠲᠠᠯ᠎ᠠ ᠭᠡᠵᠦ ᠪᠠᠶᠢᠳᠠᠭ᠃ ᠲᠤᠳᠤᠷ ᠲᠠᠯ᠎ᠠ ᠶᠢᠨ ᠠᠮᠠᠰᠠᠷ ᠲᠤᠨᠢ ᠤᠳᠠᠰᠤ ᠪᠠᠷ ᠤᠭᠤᠰᠤᠷ ᠬᠢᠨ᠎ᠡ᠂ ᠦᠰᠦ ᠪᠠᠨ ᠦᠰᠦᠨ ᠤ ᠭᠡᠷ ᠲᠤ ᠬᠢᠭᠰᠡᠨ ᠤ ᠲᠠᠷᠠᠭ᠎ᠠ ᠨᠢᠭᠤᠷ ᠲᠠᠯ᠎ᠠ ᠶᠢᠨ ᠠᠮᠠᠰᠠᠷ ᠲᠠᠬᠢ ᠤᠭᠤᠰᠤᠷ ᠢ ᠦᠰᠦᠨ ᠤ ᠵᠠᠪᠰᠠᠷ ᠢᠶᠠᠷ ᠲᠤᠳᠤᠷ ᠲᠠᠯ᠎ᠠ ᠳᠤᠨᠢ ︵ᠴᠠᠭᠠᠳᠤ ᠲᠠᠯ᠎ᠠ︶ ᠭᠠᠷᠭᠠᠵᠤ᠂ ᠲᠤᠳᠤᠷ ᠲᠠᠯ᠎ᠠ ᠳᠤ ᠪᠠᠶᠢᠭ᠎ᠠ ᠲᠤᠪᠴᠢ ᠳᠤ ᠤᠷᠤᠭᠤᠯᠵᠤ ᠲᠤᠭᠳᠠᠭᠠᠨ᠎ᠠ᠃ ᠦᠰᠦᠨ ᠤ ᠭᠡᠷ ᠤᠨ ᠲᠤᠤᠷᠠᠳᠤ ᠲᠠᠯ᠎ᠠ ᠲᠡᠭᠰᠢ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠳᠠᠭ᠂ ᠲᠡᠭᠦᠨ ᠢ ᠨᠤᠭᠤᠭᠠᠨ ᠤᠳᠠᠰᠤ ᠪᠠᠷ ᠵᠠᠷᠢᠮ ᠨᠢ ᠭᠤᠷᠪᠠ᠂ ᠲᠠᠪᠤ ᠪᠤᠶᠤ ᠲᠤᠯᠤᠭ᠎ᠠ ᠪᠠᠷ ᠰᠤᠶᠤᠭ᠎ᠠ ᠭᠠᠷᠭᠠᠵᠤ ᠬᠠᠳᠬᠤᠵᠤ ᠭᠤᠶᠤᠯᠠᠨ᠎ᠠ᠂ ᠮᠦᠨ ᠦᠰᠦᠨ ᠤ ᠭᠡᠷ ᠤᠨ ᠲᠤᠤᠷᠠᠳᠤ ᠬᠦᠪᠡᠭᠡ ᠶᠢ ᠪᠢᠳᠡᠭᠦᠯᠡᠵᠦ ᠤᠶᠤᠬᠤ ᠦᠭᠡᠢ ᠵᠠᠳᠠᠭᠠᠢ ᠪᠠᠷ ᠢᠶᠠᠨ ᠪᠠᠶᠢᠬᠤ ᠪᠦᠭᠡᠳ ᠤᠯᠠᠩᠬᠢ ᠨᠢ ᠡᠪᠦᠳᠦᠭ ᠲᠤ ᠲᠤᠯᠤᠭᠰᠠᠨ ᠤᠷᠳᠤ ᠦᠰᠦᠨ ᠤ ᠭᠡᠷ ᠵᠡᠭᠦᠳᠡᠭ ᠪᠠᠶᠢᠵᠠᠢ᠃ ᠪᠦᠰᠡ ᠪᠦᠰᠡᠯᠡᠵᠦ ᠪᠠᠶᠢᠭ᠎ᠠ ᠦᠶ᠎ᠡ ᠳᠤ ᠦᠰᠦᠨ ᠤ ᠭᠡᠷ ᠢᠶᠠᠨ ᠪᠦᠰᠡᠨ ᠤ ᠲᠤᠤᠭᠤᠷ ᠲᠠᠷᠤᠭᠤᠯᠤᠨ ᠵᠡᠭᠦᠳᠡᠭ ᠶᠤᠰᠤ ᠲᠠᠢ᠃      ᠦᠰᠦᠨ ᠤ ᠭᠡᠷ ᠤᠨ ᠬᠠᠳᠠᠯᠭ᠎ᠠ᠄ ᠦᠰᠦᠨ ᠤ ᠭᠡᠷ ᠤᠨ ᠠᠮᠠᠨ ᠤ ᠭᠤᠷᠪᠠᠯᠵᠢᠨ ᠬᠡᠰᠡᠭ ᠲᠤ ᠬᠠᠳᠠᠬᠤ ᠲᠡᠮᠦᠷᠯᠢᠭ ᠤᠨ ᠵᠦᠢᠯ᠃ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠨᠢ ᠠᠯᠳᠠ᠂ ᠮᠦᠩᠭᠦ ᠪᠠᠷ ᠬᠢᠭᠰᠡᠨ ᠵᠢᠪᠠᠳᠤ ᠶᠢᠨ ᠲᠤᠯᠤᠭᠠᠢ ᠬᠠᠳᠠᠵᠤ᠂ ᠴᠢᠯᠦᠭᠡᠯᠡᠬᠦ ᠠᠴᠠ ᠡᠮᠦᠨᠡᠭᠡᠨ ᠪᠤᠯᠵᠤ ᠢᠷᠡᠭᠡᠳ ᠲᠡᠭᠡᠷ᠎ᠡ ᠪᠠᠨ ᠱᠢᠷᠦ᠂ ᠰᠤᠪᠤᠳ᠂ ᠲᠤᠪᠴᠢᠨ ᠰᠢᠭᠢᠳᠬᠡᠷᠢ ᠲᠠᠢ ᠪᠤᠶᠤ ᠦᠯᠵᠡᠢ ᠤᠳᠠᠰᠤᠨ ᠬᠡ ᠲᠠᠢ ᠭᠤᠷᠪᠠᠯᠵᠢᠨ ᠮᠦᠩᠭᠦᠨ ᠬᠠᠳᠠᠯᠭ᠎ᠠ ᠶᠢ ᠨᠡᠶᠢᠳᠡᠮ ᠬᠠᠳᠠᠬᠤ ᠪᠤᠯᠵᠠᠢ᠃      ᠠᠶᠢᠯ ᠳᠤ ᠮᠤᠷᠳᠠᠬᠤ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠪᠤᠯᠪᠠᠴᠤ ᠮᠤᠷᠳᠠᠭ᠎ᠠ ᠦᠭᠡᠢ ᠡᠮᠡᠭᠳᠡᠢ ᠶᠢᠨ ᠦᠰᠦ ᠶᠢ ᠨᠢ ᠬᠤᠶᠠᠷ ᠬᠤᠪᠢᠶᠠᠵᠤ ᠭᠦᠷᠦᠵᠦ ᠦᠭᠳᠡᠭ ᠪᠠᠶᠢᠭᠰᠠᠨ ᠪᠦᠭᠡᠳ ᠤᠯᠤᠰ ᠤᠳ ᠶᠠᠮᠠᠷ ᠶᠠᠮᠠᠷ ᠠᠶᠢᠯ ᠤᠨ ᠬᠤᠶᠠᠷ ᠦᠰᠦᠳᠦ ᠭᠡᠮᠡᠨ ᠬᠤᠴᠢᠯᠠᠵᠤ᠂ ᠪᠠᠰᠠ ᠶᠠᠩᠪᠠ ᠪᠠᠨ ᠤᠯᠤᠭ᠎ᠠ ᠦᠭᠡᠢ ᠡᠮᠡᠭᠳᠡᠢ ᠭᠡᠳᠡᠭ ᠪᠠᠶᠢᠵᠠᠢ᠂ ᠡᠶᠢᠮᠦ       ᠡᠮᠡᠭᠳᠡᠢ ᠳᠤ ᠰᠢᠷᠭᠤᠭᠤᠯ ᠦᠰᠦ ᠪᠠ ᠦᠰᠦᠨ ᠤ ᠭᠡᠷ ᠵᠡᠭᠦᠯᠭᠡᠳᠡᠭ ᠦᠭᠡᠢ ᠶᠤᠰᠤ ᠲᠠᠢ ᠪᠠᠶᠢᠭᠠᠳ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠡᠬᠢ ᠪᠤᠯᠵᠤ ᠢᠷᠡᠭᠡᠳ ᠪᠦᠷ ᠵᠡᠭᠦᠳᠡᠭ ᠪᠤᠯᠤᠭᠰᠠᠨ ᠭᠡᠮᠡᠨ ᠨᠠᠰᠤᠳᠠᠳ ᠮᠡᠳᠡᠭᠡᠯᠡᠵᠦ ᠪᠠᠶᠢᠭᠰᠠᠨ᠃
 
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠡᠵᠡᠨ᠎ᠡ ᠪᠦᠭᠡᠴᠦᠳ ᠤᠨ ᠦᠷᠭᠦᠯᠵᠢ ᠭᠡᠷᠡᠭᠯᠡᠳᠡᠭ ᠪᠦᠭᠡ ᠶᠢᠨ ᠤᠪᠰᠤ ᠮᠡᠷᠭᠡᠵᠢᠯ
ᠡᠵᠡᠨ᠎ᠡ ᠪᠦᠭᠡᠴᠦᠳ ᠤᠨ ᠦᠷᠭᠦᠯᠵᠢ ᠭᠡᠷᠡᠭᠯᠡᠳᠡᠭ ᠪᠦᠭᠡ ᠶᠢᠨ ᠤᠪᠰᠤ ᠮᠡᠷᠭᠡᠵᠢᠯ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号