ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠥᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠢᠳᠡᠭᠡᠨ ᠤᠮᠳᠠᠭᠠᠨ ( ᠬᠤᠶᠠᠷ )
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/20
          ᠴᠠᠭᠠᠨ ᠢᠳᠡᠭᠡᠨ ᠤ ᠲᠦᠷᠦᠯ ᠵᠦᠢᠯ ᠪᠠ ᠪᠣᠯᠪᠠᠰᠤᠷᠠᠭᠤᠯᠬᠤ ᠠᠷᠭ᠎ᠠ ( ᠨᠢᠭᠡ )      ᠰᠦ᠄ ᠰᠦ ᠪᠤᠯ ᠴᠠᠭᠠᠨ ᠢᠳᠡᠭᠡᠨ ᠤᠮᠳᠠᠭᠠᠨ ᠤ ᠡᠬᠢ ᠤᠨᠳᠤᠷᠤᠯ ᠮᠦᠨ᠂ ᠲᠡᠭᠦᠨ ᠢᠶᠠᠷ ᠴᠠᠢ ᠪᠠᠨ ᠰᠦᠯᠡᠵᠦ ᠤᠤᠭᠤᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠤᠯᠠᠨ ᠵᠦᠢᠯ ᠤᠨ ᠴᠠᠭᠠᠨ ᠢᠳᠡᠭᠡᠨ ᠪᠠ ᠤᠮᠳᠠᠭᠠᠨ ᠪᠤᠯᠪᠠᠰᠤᠷᠠᠭᠤᠯᠳᠠᠭ᠃ ᠭᠡᠭᠦᠤ ᠶᠢᠨ ᠰᠦ ᠪᠠᠷ ᠭᠤᠤᠯ ᠴᠡᠭᠡ ᠨᠡᠷᠡᠵᠦ᠂ ᠢᠩᠭᠡᠨ ᠤ ᠰᠦ ᠶᠢ ᠦᠬᠡᠷ᠂ ᠬᠤᠨᠢ᠂ ᠢᠮᠠᠭᠠᠨ ᠤ ᠰᠦ ᠲᠠᠢ ᠨᠡᠶᠢᠯᠡᠭᠦᠯᠵᠦ ᠤᠯᠠᠨ ᠵᠦᠢᠯ ᠤᠨ ᠰᠠᠭᠠᠯᠢ ᠬᠢᠵᠦ ᠪᠤᠯᠳᠠᠭ ᠪᠦᠭᠡᠳ ᠳ᠋ᠠᠩ ᠢᠶᠠᠷ ᠨᠢ ᠪᠠᠰᠠ ᠠᠶᠢᠷᠠᠭ ᠬᠢᠵᠦ ᠠᠷᠢᠬᠢ ᠨᠡᠷᠡᠵᠦ ᠪᠤᠯᠳᠠᠭ᠃      ᠤᠭᠤᠷᠠᠭ᠄ ᠲᠦᠯᠯᠡᠭᠰᠡᠨ ᠮᠠᠯ ᠢ ᠠᠩᠬ᠎ᠠ ᠰᠠᠭᠠᠭᠰᠠᠨ ᠰᠢᠷᠠᠪᠳᠤᠷ ᠦᠩᠭᠡ ᠲᠠᠢ ᠦᠳᠬᠡᠪᠳᠦᠷ ᠰᠦ ᠶᠢ ᠬᠡᠯᠡᠨ᠎ᠡ᠃ ᠤᠭᠤᠷᠠᠭ ᠢ ︽ᠬᠡᠯᠡ ᠦᠭᠡᠢ ᠬᠠᠷ᠎ᠠ ᠤᠭᠤᠷᠠᠭ︾ ᠭᠡᠮᠡᠨ ᠨᠡᠷᠡᠯᠡᠵᠦ᠂ ᠲᠦᠯ ᠳᠤ ᠬᠦᠬᠦᠭᠦᠯᠪᠡᠯ       ᠪᠠᠭᠠᠰᠤ ᠨᠢ ᠬᠠᠳᠠᠵᠤ᠂ ᠴᠢᠨᠠᠭᠰᠢᠯᠠᠪᠠᠯ ᠠᠮᠢ ᠶᠢ ᠨᠢ ᠠᠪᠳᠠᠭ ᠭᠡᠳ ᠪᠠᠷᠤᠭᠳᠠᠢ ᠳᠤ ᠬᠦᠬᠦᠭᠦᠯᠬᠦ ᠦᠭᠡᠢ᠂       ᠤᠭᠤᠷᠠᠭ ᠢ ᠰᠠᠭᠠᠵᠤ ᠠᠪᠤᠭᠰᠠᠨ ᠤ ᠲᠠᠷᠠᠭ᠎ᠠ ᠬᠦᠬᠦᠭᠦᠯᠳᠡᠭ ᠵᠠᠩᠰᠢᠯ ᠲᠠᠢ ᠪᠠᠶᠢᠵᠠᠢ᠃ ᠰᠠᠭᠠᠵᠤ ᠬᠤᠷᠢᠶᠠᠭᠰᠠᠨ ᠤᠭᠤᠷᠠᠭ ᠢ ᠴᠢᠨᠠᠭᠠᠳ ᠰᠢᠭᠤᠳ ᠢᠳᠡᠬᠦ ᠪᠤᠶᠤ ᠪᠠᠷᠤᠭ ᠲᠠᠭᠠᠨ ᠨᠠᠷᠢᠨ ᠪᠤᠳᠠᠭ᠎ᠠ᠂ ᠴᠠᠭᠠᠨ ᠪᠤᠳᠠᠭ᠎ᠠ ᠵᠡᠷᠭᠡ ᠬᠤᠭᠤᠯᠠᠨ ᠳᠤ ᠬᠤᠯᠢᠵᠤ ᠴᠢᠨᠠᠭᠠᠳ ᠢᠳᠡᠳᠡᠭ᠂ ᠤᠭᠤᠷᠠᠭ ᠢ ᠴᠢᠨᠠᠪᠠᠯ ᠥᠤᠷᠮᠡᠭ ᠶᠠᠭᠤᠮ᠎ᠠ ᠪᠤᠯᠴᠢᠬᠠᠳᠠᠭ᠃      ᠵᠦᠭᠡᠭᠡᠢ᠄ ᠲᠦᠭᠦᠬᠡᠢ ᠰᠦ ᠲᠡᠭᠡᠷ᠎ᠡ ᠲᠤᠭᠳᠠᠭᠰᠠᠨ ᠬᠦᠷᠦᠰᠦᠯᠢᠭ ᠢᠳᠡᠭᠡᠨ ᠢ ᠬᠡᠯᠡᠨ᠎ᠡ᠃ ᠰᠠᠭᠠᠯᠢ ᠶᠢᠨ       ᠮᠠᠯ ᠤᠨ ᠲᠤᠳᠤᠷ᠎ᠠ ᠦᠬᠡᠷ ᠤᠨ ᠰᠦ ᠠᠴᠠ ᠵᠦᠭᠡᠭᠡᠢ ᠶᠡᠭᠡ ᠭᠠᠷᠤᠨ᠎ᠠ᠂ ᠵᠦᠭᠡᠭᠡᠢ ᠶᠢ ᠽᠠᠮᠪᠠ᠂ ᠨᠤᠨᠳᠠᠭ ᠱᠥᠬᠦᠷᠡᠮᠡᠭ᠂ ᠰᠢᠬᠢᠷ ᠲᠠᠢ ᠨᠤᠬᠤᠵᠤ ᠢᠳᠡᠨ᠎ᠡ᠃ ᠴᠠᠢ ᠤᠮᠳᠠ ᠳᠤ ᠬᠢᠵᠦ ᠤᠤᠭᠤᠨ᠎ᠠ᠂  ᠪᠤᠽᠠ ᠳᠤ ᠬᠤᠯᠢᠭᠠᠳ ᠱᠥᠬᠦᠷᠡᠮᠡᠭ᠂ ᠬᠤᠷᠤᠳ ᠬᠢᠪᠡᠯ ᠬᠡᠦᠷᠡᠭ ᠵᠦᠭᠡᠯᠡᠨ ᠪᠤᠯᠳᠠᠭ ᠪᠦᠭᠡᠳ ᠨᠠᠮᠤᠷ ᠬᠤᠷᠢᠶᠠᠴᠠ ᠳᠤ ᠬᠢᠵᠦ ᠴᠤ       ᠪᠠᠶᠢᠳᠠᠭ᠃      ᠦᠷᠦᠮ᠎ᠡ᠄ ᠬᠦᠭᠡᠷᠦᠭᠦᠯᠦᠭᠰᠡᠨ ︵ᠪᠤᠴᠠᠯᠭᠠᠭᠰᠠᠨ︶ ᠰᠦ ᠲᠡᠭᠡᠷ᠎ᠡ ᠲᠤᠭᠳᠠᠭᠰᠠᠨ ᠬᠦᠷᠦᠰᠦᠯᠢᠭ ᠢᠳᠡᠭᠡᠨ ᠢ ᠬᠡᠯᠡᠨ᠎ᠡ᠃ ᠰᠠᠭᠠᠭᠰᠠᠨ ᠰᠦ ᠪᠠᠨ ᠲᠤᠭᠤᠭᠠᠨ ᠳᠤ ᠬᠢᠵᠦ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠬᠦᠭᠡᠷᠦᠭᠦᠯᠵᠦ᠂ ᠤᠯᠠᠨ ᠲᠠᠬᠢᠨ ᠰᠠᠮᠤᠷᠪᠠᠯ ᠰᠦᠨ ᠲᠡᠭᠡᠷ᠎ᠡ ᠬᠦᠭᠡᠰᠦᠷᠬᠡᠦ ᠶᠠᠭᠤᠮ᠎ᠠ ᠭᠠᠷᠤᠨ᠎ᠠ᠂ ᠲᠤᠭᠤᠭ᠎ᠠ ᠲᠠᠢ ᠰᠦ ᠪᠠᠨ ᠴᠤᠭ ᠤᠨ ᠭᠠᠯ ᠲᠡᠭᠡᠷ᠎ᠡ ᠤᠳᠠᠭᠠᠨ ᠪᠠᠶᠢᠯᠭᠠᠵᠤ ᠠᠶ᠎ᠠ ᠪᠠᠷ ᠬᠦᠷᠦᠭᠡᠪᠡᠯ ᠰᠦ ᠲᠡᠭᠡᠷ᠎ᠡ ᠵᠤᠵᠠᠭᠠᠨ ᠬᠦᠷᠦᠰᠦᠯᠢᠭ ᠢᠳᠡᠭᠡᠨ ᠲᠤᠭᠳᠠᠨ᠎ᠠ᠂       ᠲᠡᠭᠦᠨ ᠢᠶᠠᠨ ᠦᠷᠦᠮ᠎ᠡ ᠭᠡᠨ᠎ᠡ᠃ ᠦᠷᠦᠮ᠎ᠡ ᠲᠤᠭᠳᠠᠭᠠᠬᠤ ᠳᠤ ᠭᠠᠯ ᠢᠶᠠᠨ ᠲᠤᠬᠢᠷᠠᠭᠤᠯᠬᠤ ᠪᠤᠯ ᠲᠤᠩ ᠴᠢᠬᠤᠯᠠ᠃ ᠭᠠᠯ ᠶᠡᠭᠡᠳᠪᠡᠯ ᠰᠦ ᠲᠦᠯᠡᠭᠳᠡᠵᠦ ᠦᠷᠦᠮ᠎ᠡ ᠰᠢᠷᠠᠯᠠᠨ᠎ᠠ᠃ ᠦᠷᠦᠮ᠎ᠡ ᠪᠠᠨ ᠨᠤᠶᠢᠳᠠᠨ ᠢᠶᠠᠷ ᠴᠠᠢ ᠤᠮᠳᠠ ᠳᠤ ᠬᠢᠵᠦ ᠢᠳᠡᠬᠦ ᠪᠦᠭᠡᠳ ᠬᠠᠪᠳᠠᠭᠠᠢ ᠮᠤᠳᠤ ᠪᠤᠶᠤ ᠬᠠᠶᠢᠰᠤᠨ ︵ᠲᠤᠭᠤᠭ᠎ᠠ︶᠎ ᠤ ᠬᠠᠯᠢᠪ ︵ᠬᠠᠪᠬᠠᠭᠠᠰᠤ︶ ᠲᠡᠭᠡᠷ᠎ᠡ ᠲᠠᠯᠪᠢᠵᠤ ᠬᠠᠳᠠᠭᠠᠭᠠᠳ ᠡᠪᠦᠯ ᠬᠠᠪᠤᠷ ᠤᠨ ᠴᠠᠭ ᠲᠤ ᠴᠠᠢ ᠤᠮᠳᠠ ᠳᠤ ᠲᠡᠪᠳᠦᠭᠡᠨ ᠢᠳᠡᠨ᠎ᠡ᠃ ᠴᠠᠭᠠᠨ ᠰᠠᠷ᠎ᠠ᠂ ᠬᠤᠷᠢᠮ ᠨᠠᠶᠢᠷ ᠵᠡᠷᠭᠡ ᠪᠠᠶᠠᠷ ᠲᠤᠷᠠᠰᠬᠠᠯ ᠳᠤ ᠲᠠᠪᠠᠭ ᠤᠨ ᠦᠩᠭᠡᠴᠡ ᠪᠤᠯᠭᠠᠳᠠᠭ᠃      ᠠᠶᠢᠷᠠᠭ᠄ ᠦᠬᠡᠷ᠂ ᠬᠤᠨᠢ᠂ ᠢᠮᠠᠭᠠᠨ ᠤ ᠲᠦᠭᠦᠬᠡᠢ ᠰᠦ ᠪᠠ ᠬᠦᠭᠡᠷᠦᠭᠦᠯᠦᠭᠰᠡᠨ ᠰᠦ ᠪᠠᠨ ᠰᠤᠮ   ᠪᠤᠶᠤ ᠵᠠᠷᠠᠭ ᠲᠠᠬᠢ ᠠᠶᠢᠷᠠᠭ ᠤᠨ ᠬᠦᠷᠦᠩᠭᠡ ᠲᠠᠢ ᠨᠡᠶᠢᠯᠡᠭᠦᠯᠵᠦ ᠲᠠᠯᠪᠢᠪᠠᠯ ᠢᠰᠥᠬᠡᠳ ᠠᠶᠢᠷᠠᠭ ᠪᠤᠯᠳᠠᠭ᠃ ᠠᠶᠢᠷᠠᠭ ᠢᠶᠠᠨ ᠬᠡᠳᠦᠨ ᠵᠠᠭᠤ ᠪᠦᠯᠢᠵᠦ ᠬᠠᠯᠠᠭᠤᠨ ᠬᠦᠢᠳᠡᠨ ᠢ ᠨᠢ ᠲᠠᠭᠠᠷᠠᠭᠤᠯᠪᠠᠯ ᠠᠶᠢᠷᠠᠭ ᠤᠨ ᠲᠡᠭᠡᠷ᠎ᠡ ᠪᠦᠮᠪᠦᠯᠢᠭ ᠲᠤᠰᠤ ᠲᠤᠭᠳᠠᠨ᠎ᠠ᠂ ᠲᠡᠭᠦᠨ ᠢᠶᠠᠨ ᠴᠠᠭᠠᠨ ᠲᠤᠰᠤ ᠭᠡᠨ᠎ᠡ᠃ ᠡᠭᠦᠨ ᠳᠤ ᠠᠶᠢᠷᠠᠭ ᠤᠨ ᠠᠮᠢ ᠲᠠᠭᠠᠷᠠᠭᠤᠯᠬᠤ ᠪᠤᠯ ᠲᠤᠩ ᠴᠢᠬᠤᠯᠠ᠃ ᠬᠦᠢᠳᠡᠨ ᠬᠠᠯᠠᠭᠤᠨ ᠨᠢ ᠡᠰᠡ ᠲᠠᠭᠠᠷᠠᠪᠠᠯ ᠠᠶᠢᠷᠠᠭ ᠤᠨ ᠠᠮᠢ ᠲᠥᠬᠡᠷᠢᠵᠤ ᠲᠤᠰᠤ ᠰᠠᠶᠢᠨ ᠤᠨᠠᠬᠤ ᠦᠭᠡᠢ ᠮᠦᠷᠳᠡᠭᠡᠨ ᠠᠷᠢᠬᠢ ᠨᠡᠷᠡᠪᠡᠯ ᠠᠷᠢᠬᠢ ᠴᠤ ᠰᠠᠶᠢᠨ ᠭᠠᠷᠬᠤ ᠦᠭᠡᠢ ᠪᠤᠯᠳᠠᠭ ᠭᠡᠳᠡᠭ᠃ ᠠᠶᠢᠷᠠᠭ       ᠬᠦᠢᠳᠡᠨ ᠪᠤᠯ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠤᠰᠤ ᠨᠡᠮᠡᠨ᠎ᠡ᠂ ᠬᠠᠯᠠᠭᠤᠨ ᠪᠤᠯ ᠬᠤᠳᠳᠤᠭ ᠤᠨ ᠬᠦᠢᠳᠡᠨ ᠤᠰᠤ ᠠᠪᠴᠢᠷᠠᠨ ᠨᠡᠮᠡᠨ᠎ᠡ᠂ ᠡᠭᠦᠨ ᠢᠶᠠᠨ ᠠᠶᠢᠷᠠᠭ ᠬᠢᠮᠠᠷᠯᠠᠨ᠎ᠠ ᠭᠡᠨ᠎ᠡ᠂ ᠤᠭ ᠲᠠᠭᠠᠨ ᠠᠶᠢᠷᠠᠭ ᠲᠤ ᠬᠦᠢᠳᠡᠨ ᠪᠤᠶᠤ ᠬᠠᠯᠠᠭᠤᠨ ᠤᠰᠤ ᠰᠢᠭᠤᠳ ᠬᠢᠳᠡᠭ ᠦᠭᠡᠢ᠂ ᠤᠰᠤᠨ ᠳᠠᠭᠠᠨ ᠵᠢᠭᠠᠬᠠᠨ ᠰᠦ ᠲᠤᠰᠤᠭᠠᠭᠠᠳ ᠠᠶᠢᠷᠠᠭ ᠲᠠᠭᠠᠨ ᠬᠢᠳᠡᠭ ᠪᠠᠶᠢᠵᠠᠢ᠂ ᠲᠡᠭᠡᠭᠡᠳ ᠠᠶᠢᠷᠠᠭ ᠬᠢᠮᠠᠷᠯᠠᠨ᠎ᠠ ᠭᠡᠳᠡᠭ ᠦᠭᠡ ᠭᠠᠷᠴᠠᠢ᠃ ᠤᠯᠠᠩᠬᠢ ᠠᠶᠢᠯ ᠠᠶᠢᠷᠠᠭ ᠤᠨ ᠠᠮᠢ ᠲᠥᠬᠡᠷᠢᠬᠦ ᠠᠴᠠ ᠬᠢᠴᠢᠶᠡᠨ ᠭᠠᠳᠠᠨ᠎ᠠ ᠶᠢᠨ ᠬᠦᠮᠦᠨ ᠢ ᠰᠤᠮ ᠤᠷᠤᠭᠤ ᠦᠩᠭᠡᠶᠢᠯᠭᠡᠬᠦ ᠦᠭᠡᠢ᠂ ᠨᠡᠩ ᠭᠠᠷ ᠬᠦᠷᠭᠡᠭᠦᠯᠬᠦ ᠴᠤ ᠦᠭᠡᠢ ᠪᠠᠶᠢᠳᠠᠭ᠂ ᠬᠦᠮᠦᠨ ᠢᠷᠡᠬᠦ ᠪᠠᠷ᠎ᠠ ᠪᠠᠷ ᠠᠶᠢᠷᠠᠭ ᠤᠨ ᠠᠮᠠᠰᠠᠷ ᠢ ᠪᠦᠳᠡᠭᠡᠳᠡᠭ ᠵᠠᠩᠰᠢᠯ ᠲᠠᠢ᠂ ᠠᠶᠢᠷᠠᠭ ᠢᠶᠠᠷ ᠪᠠᠰᠠ ᠠᠷᠠᠰᠤ ᠰᠢᠷᠢ ᠢᠳᠡᠭᠡᠯᠡᠳᠡᠭ᠃      ᠠᠶᠢᠷᠠᠭ ᠤᠨ ᠬᠦᠷᠦᠩᠭᠡ᠄ ᠱᠥᠬᠦᠷᠡᠮᠡᠭ ᠢᠶᠠᠷ ᠢᠰᠭᠡᠬᠦ ᠪᠠ ᠬᠦᠬᠡ ᠲᠠᠷᠢᠶ᠎ᠠ ᠪᠠᠷ ᠢᠰᠭᠡᠬᠦ ᠭᠡᠵᠦ ᠬᠤᠶᠠᠷ ᠵᠦᠢᠯ ᠤᠨ ᠠᠷᠭ᠎ᠠ ᠪᠠᠶᠢᠵᠠᠢ᠃ ᠤᠯᠠᠩᠬᠢ ᠠᠶᠢᠯ ᠤᠷᠢᠳᠤ ᠵᠢᠯ ᠤᠨ ᠦᠯᠡᠳᠡᠭᠰᠡᠨ ᠱᠥᠬᠦᠷᠡᠮᠡᠭ ᠢᠶᠠᠨ ᠨᠦᠳᠦᠵᠦ ᠲᠠᠯᠬᠠᠳᠠᠨ ᠪᠠᠭ᠎ᠠ ᠰᠠᠪᠠ ᠳᠤ ᠬᠢᠵᠦ ᠲᠡᠭᠡᠷ᠎ᠡ ᠠᠴᠠ ᠨᠢ ᠵᠢᠭᠠᠬᠠᠨ ᠬᠠᠯᠠᠭᠤᠨ ᠪᠦᠯᠢᠶᠡᠨ ᠰᠦ ᠬᠢᠵᠦ ᠲᠤᠯᠠᠭᠠᠨ ᠭᠠᠵᠠᠷ ᠪᠢᠳᠡᠭᠦᠯᠡᠵᠦ ᠲᠠᠯᠪᠢᠭᠠᠳ ᠬᠡᠳᠦ ᠬᠤᠨᠤᠪᠠᠯ ᠱᠠᠭᠭᠠᠵᠤ ᠢᠰᠥᠬᠡᠳ ᠠᠶᠢᠷᠠᠭ ᠤᠨ ᠬᠦᠷᠦᠩᠭᠡ ᠪᠤᠯᠳᠠᠭ᠃ ᠪᠠᠰᠠ ᠬᠦᠬᠡ ᠲᠠᠷᠢᠶ᠎ᠠ ᠶᠢ ᠤᠭᠢᠶᠠᠵᠤ ᠴᠡᠪᠡᠷᠯᠡᠨ ᠪᠦᠯᠢᠶᠡᠨ ᠰᠦ ᠲᠠᠢ ᠬᠤᠯᠢᠵᠤ ᠲᠠᠯᠪᠢᠭᠠᠳ ᠢᠰᠭᠡᠵᠦ ᠠᠶᠢᠷᠠᠭ ᠤᠨ ᠬᠦᠷᠦᠩᠭᠡ ᠪᠤᠯᠭᠠᠳᠠᠭ᠃ ᠵᠠᠷᠢᠮ ᠠᠶᠢᠯ ᠨᠢ ᠠᠶᠢᠷᠠᠭᠯᠠᠬᠤ ᠴᠠᠭ ᠲᠤᠯᠤᠭᠠᠳ ᠠᠶᠢᠷᠠᠭ ᠤᠨ ᠬᠦᠷᠦᠩᠭᠡ ᠦᠭᠡᠢ ᠪᠤᠯ ᠰᠠᠭᠠᠬᠠᠯᠳᠠ ᠠᠶᠢᠯ ᠳᠠᠭᠠᠨ ᠬᠦᠷᠴᠦ ᠬᠠᠳᠠᠭ ᠪᠠᠷᠢᠨ ᠠᠶᠢᠷᠠᠭ ᠤᠨ ᠬᠦᠷᠦᠩᠭᠡ ᠵᠠᠯᠠᠳᠠᠭ ᠪᠠᠶᠢᠵᠠᠢ᠃      ᠲᠠᠷᠠᠭ᠄ ᠬᠦᠭᠡᠷᠦᠭᠦᠯᠦᠭᠰᠡᠨ ᠰᠦ ᠪᠦᠯᠢᠶᠡᠰᠦᠭᠰᠡᠨ ᠤ ᠲᠠᠷᠠᠭ᠎ᠠ ᠲᠠᠷᠠᠭ ᠢᠰᠭᠡᠬᠦ ᠰᠠᠪᠠ ᠳᠠᠭᠠᠨ ᠬᠢᠵᠦ       ᠲᠡᠭᠡᠷ᠎ᠡ ᠠᠴᠠ ᠨᠢ ᠵᠤᠬᠢᠬᠤ ᠬᠡᠮᠵᠢᠶᠡᠨ ᠤ ᠠᠶᠢᠷᠠᠭ ︵10 ᠵᠢᠩ ᠰᠦᠨ ᠳᠤ ᠨᠢᠭᠡ ᠵᠢᠩ ᠠᠶᠢᠷᠠᠭ ᠬᠢᠬᠦ︶ ᠬᠢᠵᠦ ᠬᠤᠳᠬᠤᠭᠠᠳ ᠠᠮᠠᠰᠠᠷ ᠢ ᠨᠢ ᠬᠠᠯᠢᠪᠯᠠᠨ᠂ ᠲᠤᠯᠠᠭᠠᠨ ᠭᠠᠵᠠᠷ ᠲᠤ ᠵᠤᠵᠠᠭᠠᠪᠳᠤᠷ ᠶᠠᠭᠤᠮ᠎ᠠ ᠪᠠᠷ ᠴᠤᠭᠯᠠᠨ ᠬᠦᠳᠡᠯᠭᠡᠬᠦ ᠦᠭᠡᠢ ᠲᠠᠯᠪᠢᠨ᠎ᠠ᠃ 2~3 ᠴᠠᠭ ᠪᠤᠯᠬᠤ ᠳᠤ ᠲᠡᠷᠡ ᠨᠢ ᠬᠦᠰᠢᠭᠡᠳ ᠮᠠᠯ ᠤᠨ ᠡᠯᠢᠭᠡᠳᠡᠭᠰᠡᠨ ᠴᠢᠰᠤ ᠰᠢᠭ᠋ ᠪᠤᠯᠳᠠᠭ᠂ ᠲᠡᠭᠦᠨ ᠢᠶᠠᠨ ᠲᠠᠷᠠᠭ ᠭᠡᠳᠡᠭ᠂ ᠲᠠᠷᠠᠭ ᠨᠢ ᠠᠶᠢᠷᠠᠭ ᠢ ᠪᠤᠳᠤᠪᠠᠯ ᠦᠳᠬᠡᠨ ᠪᠤᠯᠳᠠᠭ᠂ ᠰᠢᠭᠤᠳ ᠤᠤᠭᠤᠵᠤ ᠪᠤᠯᠳᠠᠭ ᠪᠦᠭᠡᠳ ᠲᠡᠭᠡᠷ᠎ᠡ ᠠᠴᠠ ᠨᠢ ᠰᠦ ᠨᠡᠮᠡᠨ ᠪᠦᠯᠢᠵᠦ ᠠᠶᠢᠷᠠᠭ ᠪᠤᠯᠭᠠᠵᠤ ᠪᠤᠯᠳᠠᠭ᠃ ᠲᠠᠷᠠᠭ ᠠᠴᠠ ᠲᠤᠰᠤ ᠶᠡᠭᠡ ᠤᠨᠠᠳᠠᠭ ᠭᠡᠳᠡᠭ᠂ ᠲᠠᠷᠠᠭ ᠬᠢᠬᠦ ᠳᠤ ᠰᠦ ᠶᠡᠭᠡ ᠬᠡᠷᠡᠭᠰᠡᠨ᠎ᠡ᠃      ᠪᠢᠰᠢᠯᠠᠭ᠄ ᠪᠢᠰᠢᠯᠠᠭ ᠪᠤᠯ ᠤᠭᠤᠴᠠ ᠶᠢ ᠤᠷᠤᠯᠠᠳᠠᠭ ᠬᠦᠨᠳᠦ ᠲᠠᠢ ᠶᠠᠩᠪᠠᠳᠤ ᠢᠳᠡᠭᠡᠨ ᠪᠤᠯᠤᠨ᠎ᠠ᠃ ᠦᠩᠭᠡᠷᠡᠭᠰᠡᠨ ᠳᠤ ᠬᠤᠷᠢᠮ ᠨᠠᠶᠢᠷ ᠢ ᠴᠠᠭᠠᠨ ᠢᠶᠠᠷ ᠬᠢᠬᠦ ︵ᠤᠯᠠᠭᠠᠨ ᠢᠳᠡᠭᠡᠨ ᠦᠯᠦ ᠭᠠᠷᠭᠠᠬᠤ︶ ᠴᠢᠬᠤᠯᠠ ᠲᠠᠢ ᠦᠶ᠎ᠡ ᠳᠤ ᠪᠢᠰᠢᠯᠠᠭ ᠰᠢᠬᠠᠭᠠᠳ ᠤᠭᠤᠴᠠ ᠶᠢᠨ ᠤᠷᠤᠨ ᠳᠤ ᠬᠦᠨᠳᠦᠳᠦ ᠭᠡᠶᠢᠴᠢ ᠳᠡᠭᠡᠨ ᠲᠠᠯᠪᠢᠳᠠᠭ ᠶᠤᠰᠤ ᠲᠠᠢ ᠪᠠᠶᠢᠭᠰᠠᠨ ᠪᠦᠭᠡᠳ ᠤᠪᠤᠭᠠᠨ ᠲᠠᠬᠢᠯᠭ᠎ᠠ ᠶᠢᠨ ᠴᠤᠩᠭᠢᠷ ᠲᠤ ᠪᠢᠰᠢᠯᠠᠭ ᠶᠡᠭᠡ ᠡᠷᠭᠦᠳᠡᠭ ᠪᠠᠶᠢᠵᠠᠢ᠃ ᠪᠢᠰᠢᠯᠠᠭ ᠢ ᠬᠠᠯᠠᠭᠤᠨ ᠰᠦᠨ ᠳᠤ ᠪᠠᠭ᠎ᠠ ᠠᠶᠢᠷᠠᠭ ᠬᠢᠵᠦ ᠡᠭᠡᠳᠡᠭᠦᠯᠦᠨ ᠲᠠᠪᠤᠤ ᠰᠠᠪᠠᠨ ᠳᠤ ᠶᠡᠭᠦᠯᠡᠭᠡᠳ ᠠᠮᠪᠠᠨ ᠲᠡᠭᠡᠷ᠎ᠡ ᠲᠠᠯᠪᠢᠵᠤ ᠨᠢᠭᠡ ᠭᠠᠷ ᠢᠶᠠᠷ ᠢᠶᠠᠨ ᠰᠠᠪᠠᠨ ᠤ ᠠᠮᠠ ᠶᠢ ᠰᠠᠶᠢᠨ ᠪᠠᠷᠢᠵᠤ᠂ ᠨᠦᠭᠦᠭᠡ ᠭᠠᠷ ᠢᠶᠠᠷ ᠢᠶᠠᠨ ᠰᠢᠨᠠᠭᠠᠨ ᠤ ᠠᠷᠤ ᠲᠤᠬᠤ ᠪᠠᠷ ᠰᠠᠪᠠ ᠲᠠᠢ ᠡᠭᠡᠳᠡᠭᠰᠡᠨ ᠰᠦ ᠶᠢ ᠨᠤᠬᠤᠵᠤ ᠰᠢᠷ᠎ᠠ ᠤᠰᠤ ᠶᠢ ᠨᠢ ᠰᠢᠬᠠᠨ ᠭᠠᠷᠭᠠᠨ᠎ᠠ᠂ ᠢᠩᠬᠢᠵᠦ ᠤᠯᠠᠨ ᠨᠤᠬᠤᠬᠤ ᠳᠤ ᠰᠡᠭᠦᠯᠳᠡᠵᠦ ᠢᠷᠡᠭᠡᠳ ᠰᠢᠷ᠎ᠠ ᠤᠰᠤ ᠨᠢ ᠪᠠᠷᠠᠭᠳᠠᠨ ᠴᠠᠭᠠᠨ ᠰᠦ ᠭᠠᠷᠴᠤ ᠢᠷᠡᠨ᠎ᠡ᠃ ᠲᠡᠬᠡᠭᠦ ᠦᠶ᠎ᠡ ᠳᠤ ᠦᠨᠦ ᠡᠭᠡᠳᠡᠮᠡᠭ ᠢᠶᠠᠨ ᠠᠮᠪᠠᠨ ᠲᠡᠭᠡᠷ᠎ᠡ ᠲᠦᠷᠪᠡᠯᠵᠢᠯᠡᠨ ᠶᠠᠩᠵᠤ ᠤᠷᠤᠭᠤᠯᠤᠨ ᠰᠢᠬᠠᠵᠤ᠂           ᠲᠡᠭᠡᠷ᠎ᠡ ᠠᠴᠠ ᠨᠢ ᠬᠦᠨᠳᠦ ᠶᠠᠭᠤᠮ᠎ᠠ ᠲᠠᠯᠪᠢᠨ᠂ ᠦᠯᠡᠳᠡᠵᠦ ᠬᠤᠴᠤᠷᠤᠭᠰᠠᠨ ᠰᠢᠩᠭᠡᠨ ᠪᠡᠶᠡᠳᠦ ᠶᠢ ᠰᠢᠪᠬᠠᠨ ᠬᠡᠪᠰᠢᠭᠦᠯᠦᠨ᠎ᠡ᠂ ᠪᠠᠷᠤᠭ 3 ᠴᠠᠭ ᠲᠠᠷᠤᠭᠰᠠᠨ ᠤ ᠲᠠᠷᠠᠭ᠎ᠠ ᠪᠢᠰᠢᠯᠠᠭ ᠦᠨᠳᠦᠰᠦᠨ ᠳᠡᠭᠡᠨ ᠪᠡᠶᠡᠯᠡᠭᠳᠡᠵᠦ᠂       ᠰᠠᠪᠠ ᠠᠴᠠ ᠨᠢ ᠭᠠᠷᠭᠠᠨ ᠰᠢᠷ᠎ᠠ ᠲᠤᠰᠤ ᠲᠦᠷᠬᠢᠨ ᠡᠪᠡᠷᠡᠰᠢᠬᠦᠯᠥᠨ᠎ᠡ ︵ᠬᠥᠷᠥᠰᠥᠯᠡᠬᠦᠯᠥᠨ᠎ᠡ᠂ ᠬᠥᠷᠥᠰᠥ ᠲᠠᠢ       ᠪᠤᠯᠭᠠᠨ᠎ᠠ︶᠃ ᠪᠢᠰᠢᠯᠠᠭ ᠢ ᠬᠢᠳᠤᠭ᠎ᠠ ᠪᠠᠷ ᠵᠦᠰᠦᠵᠦ ᠢᠳᠡᠬᠦ ᠪᠦᠭᠡᠳ ᠵᠦᠰᠦᠭᠡᠳ ᠲᠠᠪᠠᠭ ᠤᠨ ᠦᠩᠭᠡᠴᠡ ᠪᠤᠯᠭᠠᠨ ᠲᠠᠯᠪᠢᠨ᠎ᠠ᠃ ᠲᠡᠷᠡ ᠨᠢ ᠬᠦᠨᠳᠦᠳᠦ ᠢᠳᠡᠭᠡᠨ ᠳᠤ ᠲᠤᠭᠠᠴᠠᠭᠳᠠᠬᠤ ᠤᠴᠢᠷ ᠭᠡᠶᠢᠴᠢ ᠳᠡᠭᠡᠨ ᠪᠡᠯᠡᠭ ᠪᠤᠯᠭᠠᠨ ᠪᠠᠷᠢᠵᠤ ᠪᠠᠶᠢᠳᠠᠭ᠂ ᠪᠢᠰᠢᠯᠠᠭ ᠮᠦᠨ ᠲᠠᠷᠠᠭ ᠲᠠᠢ ᠠᠳᠠᠯᠢ ᠰᠦ ᠶᠡᠭᠡ ᠬᠡᠷᠡᠭᠯᠡᠨ᠎ᠡ᠃      ᠰᠠᠭᠠᠯᠢ ᠶᠢᠨ ᠠᠷᠢᠬᠢ᠄ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠶᠢ ᠴᠤᠷᠭᠤ ᠪᠠᠷ ᠨᠡᠷᠡᠬᠦ ᠪᠠ ᠲᠡᠭᠦᠵᠢᠩ ᠢᠶᠠᠷ ᠨᠡᠷᠡᠬᠦ ᠭᠡᠬᠦ ᠬᠤᠶᠠᠷ ᠵᠦᠢᠯ ᠤᠨ ᠠᠷᠭ᠎ᠠ ᠬᠡᠷᠡᠭᠯᠡᠵᠦ ᠢᠷᠡᠵᠡᠢ᠃ ᠴᠤᠷᠭᠤ ᠪᠠᠷ ᠨᠡᠷᠡᠬᠦ᠄ ᠡᠨᠡ ᠨᠢ ᠪᠠᠰᠠ ᠬᠤᠶᠠᠷ ᠶᠠᠩᠵᠤ ᠶᠢᠨ ᠨᠠᠷᠠᠯᠳᠠ ᠲᠠᠢ ᠪᠠᠶᠢᠵᠡᠢ᠃      ᠪᠦᠭᠦᠳᠦᠷ ᠢᠶᠠᠷ ᠨᠡᠷᠡᠬᠦ᠄ ᠪᠦᠭᠦᠳᠦᠷ ᠭᠡᠵᠦ ᠪᠦᠭᠦᠭᠡᠷ ᠮᠤᠳᠤ ᠶᠢ ᠬᠦᠨᠳᠡᠶᠢᠯᠡᠵᠦ ᠬᠢᠭᠰᠡᠨ ᠴᠤᠷᠭᠤ ᠮᠠᠶ᠋ᠢᠭᠳᠠᠢ ᠬᠡᠷᠡᠭᠰᠡᠯ᠂ ᠪᠦᠬᠦᠭᠡᠷ ᠮᠤᠳᠤ ᠪᠠᠷ ᠬᠢᠭᠰᠡᠨ ᠪᠤᠯᠤᠭᠠᠳ ᠪᠦᠭᠦᠳᠦᠷ ᠭᠡᠵᠦ ᠨᠡᠷᠡᠯᠡᠭᠰᠡᠨ ᠪᠤᠯᠤᠯᠳᠠᠢ᠃ ᠲᠡᠭᠦᠨ ᠢ ᠨᠡᠷᠡᠬᠦ ᠠᠷᠭ᠎ᠠ ᠪᠠ ᠶᠠᠪᠤᠴᠠ ᠨᠢ ᠭᠡᠪᠡᠯ᠄ ᠲᠤᠮᠤ ᠰᠢᠷᠠᠮᠤᠨ ᠬᠠᠶᠢᠰᠤ ︵ᠲᠤᠭᠤᠭ᠎ᠠ︶᠎ ᠶᠢ ᠲᠤᠯᠭ᠎ᠠ ᠪᠤᠶᠤ ᠵᠤᠤᠬᠠᠨ ᠲᠡᠭᠡᠷ᠎ᠡ ᠲᠠᠯᠪᠢᠨ ᠲᠤᠰᠤ ᠶᠢ ᠨᠢ ᠠᠪᠤᠭᠰᠠᠨ ᠠᠶᠢᠷᠠᠭ ᠢᠶᠠᠨ ᠬᠢᠭᠡᠳ ᠬᠤᠶᠠᠷ ᠠᠩᠬᠢ ︵ᠲᠠᠯ᠎ᠠ︶ ᠪᠦᠮᠪᠦᠭᠡᠷ ᠰᠢᠭ ᠬᠠᠯᠢᠪ       ︵ᠲᠠᠷᠤᠢ ᠪᠦᠷᠭᠦᠭᠡᠰᠦ᠂ ᠬᠠᠪᠬᠠᠭᠠᠰᠤ︶᠎ ᠢ ᠨᠡᠶᠢᠯᠡᠭᠦᠯᠦᠨ ᠬᠠᠶᠢᠰᠤ ᠲᠡᠭᠡᠷ᠎ᠡ ᠪᠠᠨ ᠲᠠᠯᠪᠢᠵᠤ ᠦᠭᠭᠦᠨ᠎ᠡ᠂ ᠲᠡᠭᠡᠬᠦ ᠎ ᠳᠡᠭᠡᠨ ᠲᠡᠷᠡ ᠪᠦᠷᠬᠦᠭᠡᠰᠦᠨ ᠤ ᠨᠢᠬᠡ ᠲᠠᠯ᠎ᠠ ᠳᠤ ᠨᠢ ᠨᠢᠬᠡᠨ ᠲᠤᠮᠤ ᠰᠢᠭ᠋ ᠲᠥᠷᠪᠡᠯᠵᠢᠨ ᠨᠥᠬᠡ᠂ ᠨᠥᠬᠦᠬᠡ ᠲᠠᠯ᠎ᠠ ᠎ ᠳᠤᠨᠢ ᠨᠢᠬᠡᠨ ᠵᠢᠵᠢᠭ ᠰᠢᠭ ᠲᠥᠷᠪᠡᠯᠵᠢᠨ ᠨᠥᠬᠡ ᠭᠠᠷᠭᠠᠭᠰᠠᠨ ᠪᠠᠶᠢᠳᠠᠭ᠃ ᠲᠤᠮᠤ ᠬᠠᠶᠢᠰᠤᠨ ᠤ ᠬᠠᠵᠠᠭᠤ ᠳᠤᠨᠢ ᠪᠠᠰᠠ ᠨᠢᠭᠡᠨ ᠪᠠᠭ᠎ᠠ ᠰᠢᠭ᠋ ᠬᠠᠶᠢᠰᠤ ᠶᠢ ᠲᠤᠯᠭ᠎ᠠ ᠲᠡᠬᠡᠷ᠎ᠡ ᠲᠠᠯᠪᠢᠵᠤ᠂ ᠲᠡᠬᠦᠨ ᠤ ᠭᠤᠤᠯ ᠳᠤᠨᠢ ᠶᠠᠷᠬ᠎ᠠ ᠭᠡᠳ ᠪᠠᠭᠠᠴᠠᠷ ᠠᠮᠠ ᠲᠠᠢ ᠠᠷᠢᠬᠢ ᠲᠤᠰᠬᠤ ᠸᠠᠭᠠᠷ ᠰᠠᠪᠠ ᠲᠠᠯᠪᠢᠭᠠᠳ ᠶᠠᠷᠬ᠎ᠠ ᠶᠢᠨ ᠪᠥᠬᠡᠷ᠎ᠡ ᠶᠢᠨ ᠴᠢᠨᠡᠬᠡᠨ ᠤᠰᠤ       ᠬᠢᠨ᠎ᠡ᠃ ᠲᠡᠭᠡᠭᠰᠡᠨ ᠤ ᠲᠠᠷᠠᠭ᠎ᠠ ᠦᠨᠦ ᠪᠦᠭᠦᠳᠦᠷ ᠭᠡᠭᠴᠢ ᠠᠶᠢᠷᠠᠭ ᠤᠨ ᠠᠭᠤᠷ ᠲᠠᠮᠵᠢᠭᠤᠯᠬᠤ ᠮᠤᠳᠤ ᠪᠠᠨ ᠬᠤᠶᠠᠷ ᠬᠠᠶᠢᠰᠤᠨ ᠤ ᠲᠡᠭᠡᠷ᠎ᠡ ᠲᠠᠮᠨᠠᠭᠤᠯᠤᠨ ᠲᠠᠯᠪᠢᠭᠠᠳ ᠪᠦᠭᠦᠳᠦᠷ ᠤᠨ ᠨᠢᠭᠡ ᠦᠵᠦᠭᠦᠷ ᠢ ᠪᠦᠷᠬᠦᠭᠡᠰᠦᠨ ᠤ ᠨᠦᠭᠦᠭᠡ ᠲᠤᠮᠤ ᠲᠦᠷᠪᠡᠯᠵᠢᠨ ᠨᠦᠬᠡᠨ ᠳᠤ ᠤᠭᠯᠠᠨ᠂ ᠨᠥᠬᠦᠬᠡ ᠥᠵᠥᠬᠦᠷ ᠢ ᠨᠢ ᠶᠠᠷᠬ᠎ᠠ ᠶᠢᠨ ᠠᠮᠠᠰᠠᠷ ᠲᠤ ᠲᠠᠭᠠᠷᠠᠭᠤᠯᠤᠨ ᠲᠠᠯᠪᠢᠭᠠᠳ᠂ ᠬᠤᠶᠠᠷ ᠲᠤᠭᠤᠭᠠᠨ ᠤ ᠪᠥᠬᠦᠳᠥᠷ ᠤᠨ ᠠᠮᠠ᠂ ᠲᠤᠮᠤ ᠬᠠᠶᠢᠰᠤᠨ ᠤ ᠬᠦᠪᠡᠭᠡ ︵ᠢᠷᠮᠡᠭ︶᠂ ᠪᠦᠷᠬᠦᠭᠡᠰᠦᠨ ᠤ ᠠᠭᠤᠯᠵᠠᠷ ᠵᠡᠷᠭᠡ ᠶᠢ ᠴᠡᠪᠡᠷ ᠲᠠᠪᠤᠤ ᠪᠠᠷ ᠴᠢᠭ᠍ᠵᠢᠵᠤ᠂ ᠬᠤᠮᠤᠤᠯ ᠬᠤᠯᠢᠭᠰᠠᠨ ᠰᠢᠪᠠᠷ ᠢᠶᠠᠷ ᠠᠭᠤᠷ ᠭᠠᠷᠬᠤ ᠦᠭᠡᠢ ᠪᠤᠯᠳᠠᠯ᠎ᠠ ᠰᠢᠪᠠᠵᠤ ᠦᠭᠭᠦᠨ᠎ᠡ᠂ ᠪᠠᠰᠠ ᠲᠤᠮᠤ ᠬᠠᠶᠢᠰᠤᠨ ᠤ ᠪᠦᠷᠬᠦᠭᠡᠰᠦᠨ ᠳᠠᠬᠢ ᠵᠢᠵᠢᠭ ᠲᠦᠷᠪᠡᠯᠵᠢᠨ ᠨᠦᠬᠡ ᠲᠡᠭᠡᠷ᠎ᠡ ᠲᠠᠪᠤᠤ ᠪᠦᠷᠬᠦᠨ ᠰᠢᠪᠠᠷ ᠢᠶᠠᠷ ᠬᠢᠭᠰᠡᠨ ᠱᠤᠨᠪᠤᠭ ︵ᠶᠠᠷᠬ᠎ᠠ ᠶᠢᠨ ᠰᠢᠪᠠᠷ ᠭᠡᠳᠡᠭ︶᠎ ᠢ ᠲᠠᠯᠪᠢᠵᠤ ᠲᠠᠭᠯᠠᠳᠠᠭ᠃ ᠲᠡᠭᠡᠭᠡᠳ ᠭᠠᠯ ᠢᠶᠠᠨ ᠲᠦᠯᠡᠭᠡᠳ ᠲᠤᠮᠤ ᠬᠠᠶᠢᠰᠤ ᠲᠠᠢ ᠠᠶᠢᠷᠠᠭ ᠢ ᠬᠤᠶᠠᠷ ᠴᠠᠭ ᠭᠢᠷᠢᠳᠡᠢ ᠪᠤᠴᠠᠯᠭᠠᠬᠤ ᠳᠤ ᠠᠶᠢᠷᠠᠭ ᠠᠭᠤᠷᠰᠢᠭᠠᠳ ᠪᠦᠭᠦᠳᠦᠷ ᠢᠶᠠᠷ ᠲᠠᠮᠵᠢᠨ ᠠᠷᠢᠬᠢ ᠪᠤᠯᠵᠤ ᠶᠠᠷᠬ᠎ᠠ ᠳᠤ ᠭᠤᠭᠤᠵᠢᠨ ᠤᠷᠤᠨ᠎ᠠ᠃ ᠪᠠᠭ᠎ᠠ ᠬᠠᠶᠢᠰᠥᠨ ᠤ ᠲᠤᠤᠷ᠎ᠠ ᠭᠠᠯ ᠲᠥᠯᠡᠬᠦ ᠦᠭᠡᠢ᠂ ᠲᠡᠬᠡᠪᠡᠴᠥ ᠶᠠᠷᠬ᠎ᠠ ᠳᠤ ᠬᠠᠯᠠᠭᠤᠨ ᠠᠭᠤᠷ ᠤᠷᠤᠬᠤ ᠶᠢ ᠲᠠᠭᠠᠯᠳᠤᠨ ᠲᠤᠭᠤᠭᠠᠨ ᠳᠠᠬᠢ ᠤᠰᠤ ᠪᠥᠯᠢᠶᠡᠰᠬᠦ ᠪᠤᠯᠤᠨ᠎ᠠ᠃ ᠶᠠᠷᠬ᠎ᠠ ᠶᠢ ᠥᠯᠥ ᠬᠥᠳᠡᠯᠬᠡᠨ ᠪᠠᠭ᠎ᠠ ᠰᠢᠨᠠᠭ᠎ᠠ ᠪᠠᠷ ᠵᠤᠬᠢᠰᠳᠠᠢ ᠰᠠᠮᠤᠷᠴᠥ᠂ 2~3 ᠤᠳᠠᠭ᠎ᠠ ᠤᠰᠤ ᠶᠢ ᠨᠢ ᠰᠤᠯᠢᠳᠠᠭ᠂ ᠲᠡᠭᠦᠨ ᠠᠴᠠ ᠭᠡᠳᠦᠷᠡᠭᠦᠯᠪᠡᠯ ᠠᠷᠢᠬᠢ ᠶᠡᠭᠡ ᠭᠠᠷᠬᠤ ᠪᠤᠯᠪᠠᠴᠤ ᠠᠮᠳᠠ ᠪᠠᠷ ᠰᠤᠯᠠ ᠪᠤᠯᠳᠠᠭ᠃ ᠠᠷᠢᠬᠢ ᠰᠠᠶᠢᠨ ᠭᠠᠷᠬᠤ ᠡᠰᠡᠬᠦ ᠨᠢ ᠠᠶᠢᠷᠠᠭ ᠲᠠᠢ ᠬᠤᠯᠪᠤᠭᠳᠠᠬᠤ ᠪᠠᠷ ᠪᠠᠷᠠᠬᠤ ᠦᠭᠡᠢ ᠭᠠᠯ ᠢ ᠶᠠᠭᠠᠬᠢᠵᠤ ᠲᠦᠯᠡᠬᠦ ᠶᠠᠪᠤᠳᠠᠯ ᠲᠠᠢ ᠴᠤ ᠬᠤᠯᠪᠤᠭᠳᠠᠳᠠᠭ ᠶᠤᠮ᠂ ᠭᠠᠯ ᠶᠡᠬᠡᠳᠡᠪᠡᠯ ᠠᠶᠢᠷᠠᠭ ᠲᠡᠪᠡᠷᠡᠭᠡᠳ ᠪᠦᠭᠦᠳᠦᠷ ᠢᠶᠠᠷ ᠲᠠᠮᠵᠢᠵᠤ ᠠᠷᠢᠬᠢ ᠳᠤ ᠤᠷᠤᠬᠤ ᠪᠠᠶᠢᠳᠠᠯ ᠭᠠᠷᠤᠨ᠎ᠠ᠃       ᠡᠶᠢᠮᠦ ᠠᠴᠠ ᠠᠷᠢᠬᠢ ᠶᠢᠨ ᠭᠠᠯ ᠢ ᠲᠤᠬᠢᠷᠠᠭᠤᠯᠵᠤ ᠲᠦᠯᠡᠭᠡᠳ ᠬᠡᠳᠦᠨ ᠣᠳᠠᠭ᠎ᠠ ᠪᠠᠭ᠎ᠠ ᠲᠤᠭᠤᠭᠠᠨ ᠤ ᠤᠰᠤ ᠰᠤᠯᠢᠭᠰᠠᠨ ᠢᠶᠠᠷ ᠠᠷᠢᠬᠢ ᠪᠤᠯᠪᠠᠰᠤᠷᠠᠭᠰᠠᠨ ᠡᠰᠡᠬᠦ ᠶᠢ ᠪᠠᠷᠤᠭᠴᠠᠭᠠᠯᠠᠵᠤ ᠮᠡᠳᠡᠳᠡᠭ ᠪᠠᠶᠢᠵᠠᠢ᠃ ᠨᠡᠷᠡᠵᠦ ᠪᠠᠷᠠᠭᠰᠠᠨ ᠠᠷᠢᠬᠢ ᠪᠠᠨ ᠠᠮᠳᠠᠯᠠᠵᠤ ᠦᠵᠡᠭᠡᠳ ᠬᠡᠷᠪᠡ ᠠᠷᠢᠬᠢᠨ ᠬᠦᠴᠦ ᠰᠤᠯᠠ ᠪᠤᠯ ᠬᠠᠶᠢᠰᠤᠨ ᠳᠠᠬᠢ ᠠᠶᠢᠷᠠᠭ ᠲᠤ ᠪᠤᠴᠠᠭᠠᠵᠤ ᠬᠢᠭᠡᠳ ᠲᠠᠬᠢᠵᠤ ᠨᠡᠷᠡᠨ᠎ᠡ᠂ ᠡᠭᠦᠨ ᠢᠶᠠᠨ ᠬᠠᠷᠢᠭᠤᠯᠵᠤ ᠨᠡᠷᠡᠭᠰᠡᠨ ᠠᠷᠢᠬᠢ ᠭᠡᠳᠡᠭ᠂ ᠡᠶᠢᠮᠦ ᠠᠷᠢᠬᠢ ᠬᠠᠳᠠᠭᠤ ᠪᠦᠭᠡᠳ ᠠᠮᠳᠠ ᠲᠠᠢ ᠪᠠᠶᠢᠳᠠᠭ᠃ ᠬᠦᠴᠦ ᠮᠠᠭᠤᠳᠠᠢ ᠰᠤᠯᠠ ᠠᠷᠢᠬᠢ ᠪᠠᠨ ᠰᠤᠪᠰᠤᠭ ᠠᠷᠢᠬᠢ ᠭᠡᠳᠡᠭ ᠪᠠᠶᠢᠵᠠᠢ᠃      ᠴᠤᠷᠭᠤ ᠪᠠᠷ ᠨᠡᠷᠡᠬᠦ᠄ ᠠᠶᠢᠷᠠᠭ ᠬᠢᠭᠰᠡᠨ ᠲᠤᠮᠤ ᠬᠠᠶᠢᠰᠤᠨ ᠤ ᠲᠡᠭᠡᠷ᠎ᠡ ᠪᠦᠷᠭᠡᠷ ᠢᠶᠠᠨ ᠪᠤᠰᠬᠠᠨ ᠲᠠᠯᠪᠢᠵᠤ ᠪᠥᠷᠬᠡᠷ ᠤᠨ ᠲᠤᠳᠤᠷ᠎ᠠ ᠬᠠᠯᠪᠠᠭ᠎ᠠ ᠭᠡᠬᠦ ᠨᠡᠷ᠎ᠡ ᠲᠠᠢ ᠲᠤᠭᠤᠢ ᠮᠤᠳᠤᠨ ᠰᠠᠪᠠ ︵ᠬᠠᠯᠪᠠᠭ᠎ᠠ ᠳᠤ ᠬᠢᠳᠤᠭ᠎ᠠ ᠪᠠᠷ ᠠᠶᠢᠷᠠᠭ ᠬᠦᠶᠦᠬᠦ ᠰᠤᠪᠠᠭ ᠭᠠᠷᠭᠠᠭᠰᠠᠨ ᠪᠠᠶᠢᠳᠠᠭ︶᠎ ᠶᠢ ᠭᠤᠤᠯ ᠲᠤᠮᠳᠠ ᠨᠢ ᠡᠯᠭᠦᠭᠡᠳ ᠲᠡᠭᠦᠨ ᠤ ᠲᠡᠭᠡᠷ᠎ᠡ᠂ ᠲᠠᠷᠤᠢ ᠪᠦᠷᠭᠡᠷ ᠤᠨ ᠲᠡᠭᠡᠷ᠎ᠡ ᠵᠢᠯᠡᠪᠴᠢ ︵ᠲᠠᠷᠤᠢ ᠲᠤᠭᠤᠭ᠎ᠠ︶᠎ ᠪᠠᠨ ᠨᠡᠷᠡᠵᠦ᠂ ᠲᠤᠳᠤᠷ᠎ᠠ ᠨᠢ ᠬᠦᠢᠳᠡᠨ ᠤᠰᠤ ᠬᠢᠵᠦ ᠲᠠᠯᠪᠢᠳᠠᠭ᠂ ᠪᠦᠷᠭᠡᠷ ᠤᠨ ᠪᠦᠭᠡᠷ᠎ᠡ ᠶᠢᠨ ᠬᠡᠰᠡᠭ ᠲᠤ ᠭᠠᠷᠭᠠᠭᠰᠠᠨ ᠲᠦᠷᠪᠡᠯᠵᠢᠨ ᠨᠦᠬᠡ ᠪᠠᠷ ᠮᠤᠳᠤᠨ ᠴᠤᠷᠭᠤ ᠶᠢᠨ ᠨᠢᠭᠡ ᠦᠵᠦᠭᠦᠷ ᠢ ᠲᠤᠳᠤᠭᠰᠢ ᠤᠷᠤᠭᠤᠯᠤᠨ ᠬᠠᠯᠪᠠᠭ᠎ᠠ ᠲᠠᠢ ᠵᠠᠯᠭᠠᠵᠤ᠂ ᠨᠦᠭᠦᠭᠡ ᠦᠵᠦᠭᠦᠷ ᠲᠤᠨᠢ ᠲᠡᠮᠡᠭᠡᠨ ᠤ ᠵᠤᠭᠳᠤᠷ ᠢᠶᠠᠷ ᠬᠢᠭᠰᠡᠨ ᠤᠳᠠᠰᠤ ᠰᠦᠪᠡᠯᠡᠨ ᠤᠨᠵᠢᠭᠤᠯᠵᠤ ᠲᠤᠤᠷ᠎ᠠ ᠨᠢ ᠠᠷᠢᠬᠢ ᠲᠤᠰᠬᠤ ᠸᠠᠭᠠᠷ       ᠰᠠᠪᠠ ᠪᠠᠨ ᠲᠠᠯᠪᠢᠵᠤ ᠦᠭᠭᠦᠨ᠎ᠡ᠃ ᠠᠶᠢᠷᠠᠭ ᠪᠤᠴᠠᠯᠤᠭᠰᠠᠭᠠᠷ ᠠᠭᠤᠷᠰᠢᠵᠤ ᠠᠭᠤᠷ ᠨᠢ ᠬᠠᠯᠪᠠᠭ᠎ᠠ ᠴᠤᠷᠭᠤ ᠪᠠᠷ ᠲᠠᠮᠵᠢᠭᠠᠳ ᠠᠷᠢᠬᠢ ᠪᠤᠯᠵᠤ ᠠᠷᠢᠬᠢ ᠲᠤᠰᠬᠤ ᠰᠠᠪᠠ ᠳᠤ ᠭᠤᠭᠤᠵᠢᠨ ᠤᠷᠤᠬᠤ ᠪᠤᠯᠤᠨ᠎ᠠ᠃ ᠲᠤᠮᠤ ᠬᠠᠶᠢᠰᠤ ᠪᠤᠯᠤᠨ ᠪᠦᠷᠭᠡᠷ ᠤᠨ ᠠᠭᠤᠯᠵᠠᠷ᠂ ᠵᠢᠯᠡᠪᠴᠢ ᠬᠢᠭᠡᠳ ᠪᠦᠷᠭᠡᠷ ᠤᠨ ᠠᠭᠤᠯᠵᠠᠷ ᠤᠨ ᠬᠡᠰᠡᠭ ᠢ ᠴᠢᠭᠢᠭᠯᠡᠭᠰᠡᠨ       ᠠᠷᠢᠬᠢᠨ ᠤ ᠢᠰᠡᠭᠡᠢ ᠤᠷᠢᠶᠠᠯᠳᠠ ᠪᠤᠶᠤ ᠲᠠᠪᠤᠤ ᠤᠷᠢᠶᠠᠯᠳᠠ ᠪᠠᠷ ᠠᠭᠤᠷ ᠭᠠᠷᠬᠤ ᠦᠭᠡᠢ ᠪᠤᠯᠳᠠᠯ᠎ᠠ ᠤᠷᠢᠶᠠᠵᠤ ᠦᠭᠭᠦᠨ᠎ᠡ᠂ ᠪᠠᠰᠠ ᠪᠦᠷᠭᠡᠷ ᠤᠨ ᠪᠦᠭᠡᠷ᠎ᠡ ᠪᠠ ᠴᠤᠷᠭᠤ ᠶᠢᠨ ᠠᠭᠤᠯᠵᠠᠷ ᠤᠨ ᠬᠡᠰᠡᠭ ᠢ ᠨᠤᠶᠢᠳᠠᠨ ᠲᠠᠪᠤᠤ ᠪᠠᠷ ᠴᠢᠭ᠍ᠵᠢᠵᠤ᠂ ᠲᠡᠭᠡᠷ᠎ᠡ ᠠᠴᠠ ᠨᠢ ᠰᠢᠪᠠᠷ ᠢᠶᠠᠷ ᠰᠢᠪᠠᠨ‌ᠠᠭᠤᠷ ᠭᠠᠳᠠᠭᠰᠢ ᠭᠠᠷᠬᠤ ᠶᠢ ᠰᠡᠷᠭᠡᠶᠢᠯᠡᠨ᠎ᠡ᠃ ᠵᠢᠯᠡᠪᠴᠢ ᠶᠢᠨ ᠤᠰᠤ ᠶᠢ ᠥᠷᠬᠦᠯᠵᠢ ᠰᠠᠮᠤᠷᠴᠥ᠂ ᠪᠥᠯᠢᠶᠡᠰᠥᠬᠡᠳ ᠢᠷᠡᠭᠰᠡᠬᠡᠷ ᠲᠠᠬᠢᠭᠠᠳ ᠰᠤᠯᠢᠳᠠᠭ᠃ ᠲᠡᠬᠦᠨ ᠳᠠᠬᠢ ᠤᠰᠤ ᠶᠢ       ᠬᠥᠯᠥᠴᠡ ᠶᠢᠨ ᠤᠰᠤ ᠬᠡᠳᠡᠭ᠃      ᠲᠡᠭᠦᠵᠢᠩ ᠢᠶᠠᠷ ᠨᠡᠷᠡᠬᠦ᠄ ᠲᠡᠭᠦᠵᠢᠩ ᠢᠶᠠᠷ ᠨᠡᠷᠡᠬᠦ ᠨᠢ ᠴᠤᠷᠭᠤ ᠪᠠᠷ ᠨᠡᠷᠡᠬᠦ ᠲᠠᠢ ᠦᠨᠳᠦᠰᠦᠨ ᠳᠡᠭᠡᠨ       ᠠᠳᠠᠯᠢ᠂ ᠲᠡᠭᠦᠵᠢᠩ ᠢᠶᠠᠨ ᠪᠦᠷᠭᠡᠷ ᠤᠨ ᠲᠤᠳᠤᠷ᠎ᠠ ᠮᠦᠨ ᠬᠠᠯᠪᠠᠭ᠎ᠠ ᠶᠢᠨ ᠤᠷᠤᠨ ᠳᠤ ᠲᠡᠭᠦᠵᠢᠯᠡᠵᠦ ᠲᠠᠯᠪᠢᠨ᠎ᠠ᠃ ᠠᠳᠠᠯᠢ ᠦᠭᠡᠢ ᠭᠠᠵᠠᠷ ᠨᠢ ᠭᠡᠪᠡᠯ ᠴᠤᠷᠭᠤ ᠬᠡᠷᠡᠭᠯᠡᠬᠦ ᠦᠭᠡᠢ᠂ ᠠᠷᠢᠬᠢ ᠰᠢᠭᠤᠳ ᠲᠡᠭᠦᠵᠢᠩ ᠳᠤ ᠤᠷᠤᠨ᠎ᠠ᠂ ᠲᠡᠭᠡᠬᠦ ᠮᠦᠷᠳᠡᠭᠡᠨ ᠲᠡᠭᠦᠵᠢᠩ ᠢᠶᠠᠷ ᠨᠡᠷᠡᠭᠰᠡᠨ ᠠᠷᠢᠬᠢ ᠶᠢ ᠠᠷᠢᠬᠢ ᠨᠡᠷᠡᠬᠦ ᠬᠤᠭᠤᠴᠠᠭᠠᠨ ᠳᠤ ᠠᠮᠰᠠᠵᠤ ᠲᠡᠶᠢᠯᠬᠦ ᠦᠭᠡᠢ᠂ ᠴᠤᠷᠭᠤ ᠪᠠᠷ ᠨᠡᠷᠡᠭᠰᠡᠨ ᠠᠷᠢᠬᠢ ᠶᠢ ᠠᠮᠰᠠᠵᠤ ᠲᠡᠶᠢᠯᠦᠨ᠎ᠡ᠃ ᠴᠤᠷᠭᠤ ᠪᠠᠷ ᠨᠡᠷᠡᠵᠦ ᠪᠠᠶᠢᠭᠰᠠᠨ ᠦᠶ᠎ᠡ ᠶᠢᠨ       ᠪᠦᠷᠭᠡᠷ ᠤᠨ ᠨᠦᠬᠡ ᠶᠢ ᠲᠡᠭᠦᠵᠢᠩ ᠢᠶᠠᠷ ᠨᠡᠷᠡᠬᠦ ᠦᠶ᠎ᠡ ᠳᠤ ᠵᠠᠪᠠᠯ ᠲᠠᠭᠯᠠᠵᠤ ᠪᠢᠳᠡᠭᠦᠯᠡᠬᠦ ᠬᠡᠷᠡᠭ ᠲᠠᠢ᠃ ᠰᠤᠷᠪᠤᠯᠵᠢᠯᠠᠭ᠎ᠠ ᠶᠢ ᠦᠨᠳᠦᠰᠦᠯᠡᠪᠡᠯ᠂ ᠪᠦᠭᠦᠳᠦᠷ᠂ ᠴᠤᠷᠭᠤ ᠪᠠᠷ ᠨᠡᠷᠡᠬᠦ ᠠᠷᠭ᠎ᠠ ︵ᠨᠡᠩ ᠢᠯᠠᠩᠭᠤᠶ᠎ᠠ       ᠪᠦᠭᠦᠳᠦᠷ ᠢᠶᠠᠷ ᠨᠡᠷᠡᠬᠦ︶᠎ ᠶᠢ ᠨᠡᠯᠢᠶᠡᠳ ᠡᠷᠳᠡ ᠬᠡᠷᠡᠭᠯᠡᠵᠦ᠂ ᠲᠡᠭᠦᠵᠢᠩ ᠢᠶᠠᠷ ᠨᠡᠷᠡᠬᠦ ᠠᠷᠭ᠎ᠠ ᠶᠢ ᠬᠤᠵᠢᠭᠤ       ᠦᠶ᠎ᠡ ᠠᠴᠠ ᠡᠬᠢᠯᠡᠨ ᠬᠡᠷᠡᠭᠯᠡᠵᠦ᠂ ᠤᠳᠤ ᠠᠷᠢᠬᠢ ᠨᠡᠷᠡᠵᠦ ᠪᠠᠶᠢᠭ᠎ᠠ ᠴᠦᠬᠡᠨ ᠠᠶᠢᠯ ᠪᠦᠷ ᠲᠡᠭᠦᠵᠢᠩ ᠢᠶᠠᠷ ᠨᠡᠷᠡᠵᠦ ᠪᠤᠢ᠃      ᠨᠠᠰᠤᠳᠠᠨ ᠪᠤᠭᠤᠷᠤᠯᠴᠤᠳ ᠰᠠᠭᠠᠯᠢ ᠶᠢᠨ ᠠᠷᠢᠬᠢ ᠶᠢ ᠴᠢᠩᠬᠢᠰ ᠬᠠᠭᠠᠨ ᠤ ᠨᠡᠭᠦᠳᠡᠯ ᠤᠨ ᠠᠷᠢᠬᠢ ᠭᠡᠵᠦ ᠬᠠᠭᠤᠴᠢᠯᠠᠳᠠᠭ ᠪᠦᠭᠡᠳ ᠠᠷᠢᠬᠢ ᠪᠠᠨ ᠨᠡᠷᠡᠭᠡᠳ ᠪᠠᠷᠠᠪᠠᠯ ᠠᠷᠢᠬᠢᠨ ᠤ ᠬᠦᠯᠦᠴᠡ ᠶᠢᠨ ᠤᠰᠤᠨ ᠢ ᠭᠡᠷ ᠤᠨ ᠭᠠᠳᠠᠭ᠎ᠠ ᠡᠭᠦᠳᠡᠨ ᠤ ᠭᠤᠤᠯ ᠳᠤ ᠲᠦᠷ ᠲᠠᠯᠪᠢᠵᠤ ᠪᠠᠶᠢᠭᠠᠳ ᠭᠡᠷ ᠲᠤ ᠤᠷᠤᠭᠤᠯᠤᠨ᠎ᠠ᠂ ᠡᠭᠦᠨ ᠢᠶᠠᠨ ᠴᠢᠩᠭᠢᠰ ᠤᠨ       ᠬᠦᠯᠦᠭ ᠢ ᠤᠰᠤᠯᠠᠵᠤ ᠪᠠᠶᠢᠭ᠎ᠠ ᠶᠤᠮ ᠭᠡᠮᠡᠨ ᠲᠠᠶᠢᠯᠪᠤᠷᠢᠯᠠᠵᠤ ᠪᠠᠶᠢᠳᠠᠭ᠃      ᠴᠡᠭᠡ᠄ ᠴᠡᠭᠡ ᠶᠢ ᠠᠶᠢᠷᠠᠭ ᠢᠶᠠᠷ ᠬᠦᠷᠦᠩᠭᠡ ᠬᠢᠵᠦ ᠵᠠᠷᠠᠭ ᠪᠤᠶᠤ ᠰᠤᠮ ᠳᠤ ᠠᠭᠤᠳᠠᠯᠯᠠᠨ ᠲᠡᠬᠡᠷ᠎ᠡ ᠠᠴᠠ ᠨᠢ ᠬᠡᠬᠦᠣ ᠶᠢᠨ ᠰᠥ ᠬᠢᠬᠡᠳ ᠪᠦᠯᠢᠭᠦᠷ ᠢᠶᠠᠷ ᠪᠦᠯᠢᠵᠦ ᠡᠰᠭᠡᠵᠦ ᠭᠢᠳᠡᠭ᠃ ᠴᠡᠭᠡ ᠨᠢ ᠬᠤᠷᠢᠮ ᠨᠠᠶᠢᠷ ᠤᠨ ᠲᠤᠳᠠᠭᠳᠠᠵᠤ ᠪᠤᠯᠤᠰᠢ ᠦᠭᠡᠢ ᠬᠦᠨᠳᠦᠳᠦ ᠤᠮᠳᠠᠭᠠᠨ ᠪᠤᠯᠬᠤ ᠪᠠᠷ ᠦᠯᠦ ᠪᠠᠷᠠᠨ ᠤᠯᠠᠨ ᠵᠦᠢᠯ ᠤᠨ ᠡᠪᠡᠳᠴᠢᠨ ᠳᠤ ᠲᠤᠰᠠᠳᠠᠢ ᠡᠮ ᠪᠤᠯᠬᠤ ᠶᠤᠮ᠃
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠠᠷᠠᠳ ᠤᠨ ᠵᠠᠰᠠᠭ ᠤᠨ ᠣᠷᠳᠣᠨ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠡᠵᠡᠨ᠎ᠡ ᠪᠦᠭᠡᠴᠦᠳ ᠤᠨ ᠦᠷᠭᠦᠯᠵᠢ ᠭᠡᠷᠡᠭᠯᠡᠳᠡᠭ ᠪᠦᠭᠡ ᠶᠢᠨ ᠤᠪᠰᠤ ᠮᠡᠷᠭᠡᠵᠢᠯ
ᠡᠵᠡᠨ᠎ᠡ ᠪᠦᠭᠡᠴᠦᠳ ᠤᠨ ᠦᠷᠭᠦᠯᠵᠢ ᠭᠡᠷᠡᠭᠯᠡᠳᠡᠭ ᠪᠦᠭᠡ ᠶᠢᠨ ᠤᠪᠰᠤ ᠮᠡᠷᠭᠡᠵᠢᠯ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号