ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠡᠰᠡᠭ ᠭᠠᠵᠠᠷ ᠤᠨ ᠨᠡᠷᠡᠰ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/5/11
      ᠭᠤᠷᠤᠨᠠᠢ — ᠲᠥᠪᠡᠳ ᠦᠭᠡ᠃ ᠣᠯᠠᠨ ︵ᠶᠢᠰᠦᠨ︶ ᠲᠣᠬᠤᠢ ᠪᠤᠯᠤᠩ ᠲᠠᠢ ᠭᠠᠵᠠᠷ ᠢ ᠬᠡᠯᠡᠨ᠎ᠡ᠃ ᠡᠭᠦᠨ ᠠᠴᠠ ᠥᠭᠡᠷ᠎ᠡ ᠪᠠᠰᠠ ᠬᠤᠶᠠᠷ ᠵᠦᠢᠯ ᠤᠨ ᠶᠠᠷᠢᠶ᠎ᠠ ᠪᠠᠶᠢᠪᠠ᠃ ᠭᠤᠷ᠎ᠠ ᠵᠦᠷ ᠤᠨ ᠭᠤᠷ᠎ᠠ ᠪᠠᠶᠢᠭᠰᠠᠨ ᠠᠴᠠ ᠨᠡᠷ᠎ᠡ ᠣᠯᠪᠠ ᠭᠡᠵᠦ ᠪᠤᠢ᠃ ᠭᠡᠲᠡᠯ᠎ᠡ ᠭᠤᠷ᠎ᠠ ᠵᠦᠷ ᠭᠡᠳᠡᠭ ᠠᠮᠢᠲᠠᠨ ᠪᠣᠯ ᠡᠯᠡᠰᠦᠨ ᠳᠤ ᠠᠮᠢᠳᠤᠷᠠᠳᠠᠭ ᠪᠢᠰᠢ ᠭᠡᠳᠡᠭ ᠢ ᠬᠡᠨ ᠴᠤ ᠮᠡᠳᠡᠬᠦ ᠪᠣᠯᠬᠤᠷ ᠬᠡᠯᠡᠯᠭᠡᠨ ᠦᠭᠡᠢ ᠵᠥᠪ ᠲᠠᠶᠢᠯᠪᠤᠷᠢ ᠪᠢᠰᠢ ᠭᠡᠳᠡᠭ ᠨᠢ ᠲᠣᠳᠣᠷᠬᠠᠢ᠃ ᠪᠠᠰᠠ ᠭᠤᠷᠭᠤᠤᠯ ᠭᠡᠰᠡᠨ ᠦᠭᠡᠨ ᠠᠴᠠ ᠢᠷᠡᠪᠡ ᠭᠡᠵᠦ ᠪᠤᠢ᠃ ᠡᠨᠡ ᠨᠢ ᠮᠥᠨ ᠴᠤ ᠳᠠᠮᠵᠢᠭ ᠶᠠᠷᠢᠶ᠎ᠠ ᠲᠡᠳᠦᠢ ᠶᠤᠮ᠃ ᠲᠡᠭᠡᠪᠡᠯ ᠶᠣᠰᠣᠲᠠᠢ ᠭᠠᠵᠠᠷ ᠤᠨ ᠪᠠᠶᠢᠴᠠ ᠠᠴᠠ ᠦᠵᠡᠪᠡᠯ ᠡᠨᠡ ᠬᠦ ᠭᠦᠨ ᠨᠠᠮᠤᠭ ᠭᠠᠵᠠᠷ ᠲᠤ ᠪᠤᠯᠤᠩ ᠲᠣᠬᠤᠢ ᠣᠯᠠᠨ ᠪᠤᠢ᠃ ᠲᠣᠭᠠᠯᠠᠪᠠᠯ᠄ ᠡᠦ ᠲᠣᠬᠤᠢ ᠶᠢᠨ ᠪᠤᠯᠤᠩ᠂ ᠨᠠᠶᠢᠰᠠᠷ ᠣᠪᠣᠭ᠎ᠠ ᠶᠢᠨ ᠪᠤᠯᠤᠩ᠂ ᠤᠯᠠᠭᠠᠨᠨᠠᠭᠤᠷ ᠤᠨ ᠪᠤᠯᠤᠩ᠂ ᠴᠢᠪᠠᠭᠠᠨᠴᠠ ᠶᠢᠨ ᠪᠤᠯᠤᠩ ᠭᠡᠬᠦ ᠮᠡᠲᠦ᠃      ᠭᠤᠶᠢᠽᠠ — ᠭᠥᠷᠥᠭᠡᠰᠦ ︵ᠵᠡᠭᠡᠷᠳᠡ︶ ᠭᠡᠰᠡᠨ ᠲᠥᠪᠡᠳ ᠦᠭᠡ᠃ ᠡᠭᠦᠨ ᠢ ᠬᠠᠶᠢᠰᠤ ︵ᠲᠣᠭᠤᠭ᠎ᠠ︶ ᠪᠤᠶᠤ ᠲᠠᠬᠢᠷ ᠬᠡᠮᠡᠨ ᠲᠠᠶᠢᠯᠪᠤᠷᠢᠯᠠᠵᠤ ᠪᠠᠶᠢᠭᠰᠠᠨ ᠨᠢ ᠲᠠᠭᠠᠷᠠᠬᠤ ᠦᠭᠡᠢ᠃ ᠲᠡᠦᠬᠡᠨ ᠳᠤ ᠭᠤᠶᠢᠽᠠ ᠳᠤ ᠠᠮᠢᠲᠠᠨ ᠠᠷᠢᠶᠠᠲᠠᠨ ᠵᠡᠭᠡᠷ᠎ᠡ ᠭᠥᠷᠥᠭᠡᠰᠦ ᠮᠠᠰᠢ ᠡᠯᠪᠡᠭ ᠪᠠᠶᠢᠵᠠᠢ᠃ ᠲᠣᠭᠤᠭ᠎ᠠ ᠪᠠᠨ ᠤᠷᠢᠳᠠᠪᠠᠷ ᠨᠡᠷᠡᠴᠢᠬᠡᠭᠡᠳ ᠭᠠᠷᠴᠤ ᠣᠳᠣᠭᠠᠳ ᠭᠥᠷᠥᠭᠡᠰᠦ ᠠᠯᠠᠵᠤ ᠠᠪᠴᠢᠷᠠᠨ᠂ ᠪᠡᠯᠡᠬᠡᠨ ᠴᠢᠨᠠᠵᠤ ᠢᠳᠡᠳᠡᠭ ᠪᠠᠶᠢᠭᠰᠠᠨ ᠭᠡᠵᠡᠭᠡᠳᠡᠭ᠃      ᠠᠨᠳᠤᠤ — ᠣᠳᠣᠨ ᠲᠣᠭᠤᠷᠢᠭ ᠭᠡᠰᠡᠨ ᠤᠳᠬ᠎ᠠ ᠲᠠᠢ ᠲᠥᠪᠡᠳ ᠦᠭᠡ ᠮᠥᠨ᠃ ᠯᠠᠮᠠ ᠶᠢᠨ ᠱᠠᠰᠢᠨ ᠳᠤ ᠲᠥᠪᠡᠳ ᠣᠷᠣᠨ ᠢ ᠠᠨᠳᠤᠤ ᠠᠷᠪᠠᠨ ᠭᠤᠷᠪᠠᠨ ᠣᠷᠣᠨ ᠬᠡᠮᠡᠨ ᠬᠤᠪᠢᠶᠠᠳᠠᠭ ᠪᠠᠶᠢᠵᠠᠢ᠃ ᠡᠭᠦᠨ ᠢ ᠤᠷᠢᠳᠤ ᠳᠠᠭᠠᠨ ᠠᠨᠳᠠᠭᠤ ᠠᠳᠡᠭᠦᠦ ᠶᠢᠨ ᠠᠨᠳᠤᠭᠤ ᠪᠠᠷ ᠲᠠᠶᠢᠯᠪᠤᠷᠢᠯᠠᠵᠤ ᠪᠠᠶᠢᠵᠠᠢ᠃ ᠡᠵᠡᠨ᠎ᠡ ᠳᠤ ᠡᠨᠡ ᠨᠡᠷ᠎ᠡ ᠶᠢ ᠬᠡᠷᠡᠭᠯᠡᠭᠰᠡᠨ ᠤᠴᠢᠷ ᠨᠢ ᠨᠣᠶᠠᠳ ᠪᠠᠶᠠᠳ ᠬᠥᠬᠡᠨᠠᠭᠤᠷ ᠤᠨ ᠠᠨᠳᠤᠤ ᠭᠠᠵᠠᠷ ᠠᠴᠠ ᠠᠳᠤᠭᠤ ᠦᠬᠡᠷ ᠬᠤᠳᠠᠯᠳᠤᠵᠤ ᠠᠪᠴᠢᠷᠠᠭᠠᠳ᠂ ᠠᠳᠡᠬᠢ ᠰᠠᠶᠢᠬᠠᠨ ᠪᠡᠯᠴᠢᠭᠡᠷ ᠲᠤ ᠲᠠᠯᠪᠢᠳᠠᠭ ᠢᠶᠠᠷ ᠢᠶᠠᠨ ᠡᠨᠡ ᠨᠡᠷ᠎ᠡ ᠲᠣᠭᠲᠠᠵᠠᠢ᠃ ᠥᠩᠭᠡᠷᠡᠭᠰᠡᠨ ᠳᠤ ᠲᠤᠰ ᠬᠤᠰᠢᠭᠤᠨ ᠳᠤ ᠠᠨᠳᠤᠤ ᠨᠡᠷ᠎ᠡ ᠲᠠᠢ᠂ ᠵᠢᠰᠦᠮ ᠢᠶᠠᠷ ᠢᠶᠠᠨ ᠢᠯᠭᠠᠪᠤᠷᠢᠯᠠᠵᠤ ᠨᠡᠷᠡᠶᠢᠳᠳᠡᠭ ᠦᠬᠡᠷ ᠠᠳᠤᠭᠤ ᠪᠢᠰᠢᠭᠦᠢ ᠣᠯᠠᠨ ᠪᠠᠶᠢᠭᠰᠠᠨ ᠪᠢᠯᠡ᠃      ᠡᠵᠡᠨ᠎ᠡ ᠭᠤᠣᠯ— ᠡᠷᠲᠡᠨ ᠤ ᠲᠡᠦᠬᠡᠨ ᠳᠤ ᠷᠦᠸᠧ ᠱᠦᠢ ᠬᠡᠮᠡᠨ ᠲᠡᠮᠳᠡᠭᠯᠡᠵᠦ ᠪᠤᠢ᠃ ᠳᠤᠮᠳᠠᠳᠤ ᠤᠯᠤᠰ ᠤᠨ ᠶᠡᠭᠡ ᠢᠦᠢ ᠬᠠᠭᠠᠨ ᠤ ᠤᠰᠤ ᠵᠠᠰᠠᠭᠰᠠᠨ ᠳᠣᠮᠤᠭ ᠳᠣᠲᠣᠷ᠎ᠠ ᠷᠦᠸᠧ ᠱᠦᠢ ᠶᠢ ᠳᠤᠷᠠᠳᠤᠭᠰᠠᠨ ᠪᠥᠭᠡᠳ ᠠᠯᠢ ᠡᠷᠲᠡᠨ ᠤ ᠴᠦᠨ ᠴᠢᠦ ᠶᠢᠨ ᠦᠶ᠎ᠡ ᠳᠠᠬᠢ ᠷᠦᠸᠧ ᠱᠦᠢ ᠶᠢᠨ ᠲᠤᠬᠠᠢ ᠲᠡᠮᠳᠡᠭᠯᠡᠯ ᠳᠤ᠄ ᠷᠦᠸᠧ ᠱᠦᠢ ᠬᠡᠮᠡᠭᠴᠢ ᠪᠠᠷᠠᠭᠤᠨ ᠠᠴᠠ ᠤᠷᠤᠰᠴᠤ᠂ ᠾᠧ ᠯᠢ ᠪᠠᠷ ᠳᠠᠭᠠᠷᠢᠭᠠᠳ ᠦᠯᠡᠳᠡᠭᠡ ︵ᠦᠯᠡᠳᠡᠭᠰᠡᠨ︶᠎ ᠨᠢ ᠨᠤᠷ᠎ᠠ ᠡᠯᠡᠰᠦᠨ ᠳᠤ ᠣᠷᠣᠵᠠᠢ ᠭᠡᠵᠦ ᠪᠤᠢ᠃ ᠡᠵᠡᠨ᠎ᠡ ᠭᠤᠣᠯ ᠢ ᠪᠠᠰᠠ ᠬᠠᠷ᠎ᠠ ᠭᠤᠣᠯ ᠭᠡᠵᠦ ᠬᠡᠯᠡᠳᠡᠭ᠃ ᠬᠤᠶᠢᠲᠤ ᠰᠠᠯᠠᠭ᠎ᠠ ᠶᠢ ᠨᠢ ︵᠎ ᠶᠢᠨ ᠲᠠ ᠰᠢᠶᠠᠨ ᠤ ᠬᠢᠵᠠᠭᠠᠷ ᠲᠤ︶ ᠷᠦᠸᠧ ᠱᠦᠢ ᠭᠡᠳᠡᠭ᠃ ᠮᠠᠨ ᠤ ᠬᠤᠰᠢᠭᠤᠨ ᠤ ᠬᠢᠵᠠᠭᠠᠷ ᠳᠣᠲᠣᠷ᠎ᠠ ᠨᠡᠶᠢᠯᠡᠩᠭᠢ ᠳᠤᠨᠢ ᠡᠵᠡᠨ᠎ᠡ ᠭᠤᠣᠯ ᠭᠡᠳᠡᠭ ᠪᠢᠯᠡ᠃ ᠡᠨᠡ ᠭᠤᠣᠯ ᠴᠠᠰᠤᠲᠤ ᠴᠠᠭᠠᠨ ᠠᠭᠤᠯᠠᠨ ᠠᠴᠠ ᠡᠬᠢ ᠠᠪᠴᠤ᠂ ᠭᠤᠤᠲ᠋ᠠᠢ ᠶᠢᠨ ᠬᠠᠳᠠᠨ ᠬᠠᠪᠴᠢᠯ ︵ᠵᠧᠩ ᠢ ᠰᠢᠶᠠ︶᠎ ᠢ ᠭᠠᠲᠤᠯᠵᠤ᠂ ᠪᠠᠶᠠᠨᠪᠣᠭᠳᠠ ᠬᠦᠷᠦᠭᠡᠳ ᠬᠤᠶᠠᠷ ᠰᠠᠯᠳᠠᠭ᠃ ᠬᠤᠶᠢᠲᠤ ᠰᠠᠯᠠᠭ᠎ᠠ ᠶᠢ ᠨᠢ ᠮᠥᠷᠡᠨ ᠭᠤᠣᠯ ᠭᠡᠳᠡᠭ ᠪᠥᠭᠡᠳ ᠭᠠᠰᠢᠭᠤᠨ ᠨᠠᠭᠤᠷ ᠲᠤ ᠴᠢᠳᠬᠤᠨ᠎ᠠ᠃ ᠡᠮᠦᠨᠡᠲᠦ ᠰᠠᠯᠠᠭ᠎ᠠ ᠶᠢ ᠨᠢ ᠡᠮᠦᠨ᠎ᠡ ᠭᠤᠣᠯ ᠭᠡᠳᠡᠭ ᠪᠥᠭᠡᠳ ᠰᠤᠪᠨᠠᠭᠤᠷ ᠲᠤ ᠴᠢᠳᠬᠤᠨ᠎ᠠ᠃ ᠡᠨᠡ ᠪᠣᠯ ᠤᠯᠠᠷᠢᠯ ᠤᠨ ᠴᠢᠨᠠᠷᠲᠠᠢ ᠭᠤᠣᠯ ᠮᠥᠨ᠃ ᠪᠦᠬᠦ ᠤᠷᠲᠤ ᠨᠢ ᠭᠤᠷᠪᠠᠨ ᠵᠠᠭᠤᠨ ᠺᠢᠯᠣᠮᠧᠲᠷ ᠪᠤᠢ᠂ ᠬᠤᠶᠠᠷ ᠵᠠᠭᠤᠨ ᠮᠧᠲᠷ       ᠥᠷᠭᠡᠨ᠂ ᠲᠡᠭᠰᠢᠳᠬᠡᠭᠡᠳ ᠨᠢᠭᠡ ᠮᠧᠲᠷ ᠬᠠᠭᠠᠰ ᠭᠦᠨ᠃ ᠵᠢᠯ ᠤᠨ ᠤᠷᠤᠰᠬᠠᠯ ᠤᠨ ᠬᠡᠮᠵᠢᠶ᠎ᠡ ᠨᠢ ᠳᠥᠷᠪᠡ ᠠᠴᠠ ᠲᠠᠪᠤᠨ ᠳ᠋ᠦᠩᠰᠢᠭᠤᠷ ᠬᠦᠪ ᠮᠧᠲᠷ ᠪᠠᠶᠢᠳᠠᠭ᠃ ᠡᠵᠡᠨ᠎ᠡ ᠶᠢᠨ ᠬᠢᠵᠠᠭᠠᠷ ᠲᠤ ᠣᠷᠣᠭᠰᠠᠨ ᠤ ᠰᠡᠭᠦᠯᠡᠷ ᠶᠡᠭᠡ ᠪᠠᠭ᠎ᠠ ᠠᠷᠪᠠ ᠶᠢᠰᠦᠨ ᠰᠠᠯᠠᠭ᠎ᠠ ︵ᠬᠤᠷᠢᠨ ᠶᠢᠰᠦᠨ ᠰᠠᠯᠠᠭ᠎ᠠ—— ᠳᠠᠬᠢᠨ ᠬᠡᠪᠯᠡᠭᠦᠯᠦᠭᠴᠢ ᠠᠴᠠ︶ ᠪᠣᠯᠵᠤ ᠭᠠᠰᠢᠭᠤᠨ ᠨᠠᠭᠤᠷ᠂ ᠰᠤᠪᠨᠠᠭᠤᠷ᠂ ᠵᠢᠩᠰᠡᠲᠦ ᠶᠢᠨ ᠨᠠᠭᠤᠷ ︵ᠡᠷᠢᠶᠡᠨ ᠴᠣᠨᠵᠢ ᠶᠢᠨ ᠨᠠᠭᠤᠷ—— ᠳᠠᠬᠢᠨ ᠬᠡᠪᠯᠡᠭᠦᠯᠦᠭᠴᠢ ᠠᠴᠠ ︶ ᠮᠡᠲᠦ ᠭᠤᠷᠪᠠᠨ ᠳᠣᠲᠣᠭᠠᠳᠤ ᠨᠠᠭᠤᠷ ᠲᠤ ᠴᠢᠳᠬᠤᠯᠠᠨ᠎ᠠ᠃      ᠡᠵᠡᠨ᠎ᠡ ᠭᠤᠣᠯ ᠳᠠᠭᠠᠤ ᠣᠷᠣᠨ ᠳᠤ ᠣᠢ ᠮᠣᠳᠣ ᠵᠤᠵᠠᠭᠠᠨ᠂ ᠡᠪᠡᠰᠦ ᠪᠡᠯᠴᠢᠭᠡᠷ ᠰᠢᠮᠡᠯᠢᠭ᠂ ᠠᠳᠤᠭᠤ ᠮᠠᠯ ᠤᠨ ᠲᠠᠩᠰᠤᠭ ᠰᠠᠶᠢᠬᠠᠨ ᠪᠡᠯᠴᠢᠭᠡᠷ ᠲᠠᠢ ᠲᠤᠯᠠ ᠡᠷᠲᠡ ᠡᠳᠦᠭᠡ ᠶᠢᠨ ᠬᠥᠮᠦᠰ ᠤᠨ ᠳᠤᠷ᠎ᠠ ᠰᠣᠨᠢᠷᠬᠠᠯ ᠢ ᠲᠠᠲᠠᠭᠰᠠᠭᠠᠷ ᠢᠷᠡᠪᠡ᠃ ᠲᠠᠩ ᠤᠯᠤᠰ ᠤᠨ ᠠᠯᠳᠠᠷᠲᠤ ᠰᠢᠯᠦᠭᠴᠢᠨ ᠸᠠᠩ ᠸᠧᠢ᠄       ︽ᠵᠢᠦᠢ ᠶᠠᠨ ᠬᠤᠲᠠᠨ ᠤ ᠭᠠᠳᠠᠨ᠎ᠠ ᠲᠡᠭᠷᠢᠯᠢᠭ ᠬᠥᠷᠥᠰᠥᠨ ︵ᠭᠥᠷᠥᠭᠡᠰᠦ︶᠎ ᠢ ᠠᠩᠨᠠᠶ᠎ᠠ       ᠴᠠᠭᠠᠨ ᠡᠪᠡᠰᠦᠨ ᠲᠡᠭᠷᠢ ᠳᠤᠷ ᠵᠠᠯᠭᠠᠯᠳᠤᠷᠤᠨ ᠲᠦᠢᠮᠡᠷ ᠤᠨ ᠭᠠᠯ ᠮᠠᠨᠳᠤᠮᠤᠢ᠃       ᠦᠳᠡᠰᠢ ᠶᠢᠨ ᠦᠶ᠎ᠡ ᠡᠭᠦᠯᠡ ᠬᠤᠷᠠᠵᠤ ᠰᠥᠨᠢᠵᠢᠨ ᠠᠭᠲᠠ ᠪᠠᠷ ᠰᠤᠩᠭᠠᠬᠤᠶ᠎ᠠ       ᠡᠯᠪᠡᠭ ᠨᠠᠭᠤᠷ ᠤᠨ ᠲᠠᠯ᠎ᠠ ᠨᠤᠲᠤᠭ ᠲᠤᠷ ᠳᠠᠬᠢᠨ ᠨᠠᠮᠨᠠᠬᠤ ᠪᠠᠭ᠋ᠠᠲᠠᠢ᠃︾ᠬᠡᠮᠡᠨ ᠰᠢᠯᠦᠭᠯᠡᠭᠰᠡᠨ ᠨᠢ ᠲᠤᠬᠠᠢ ᠶᠢᠨ ᠦᠶ᠎ᠡ ᠳᠠᠬᠢ ᠡᠵᠡᠨ᠎ᠡ ᠭᠤᠣᠯ ᠤᠨ ᠥᠩᠭᠡ ᠦᠵᠡᠮᠵᠢ ᠶᠢ ᠠᠮᠢᠳᠤᠯᠢᠭ ᠳᠦᠷᠰᠦᠯᠡᠭᠰᠡᠨ ᠪᠠᠶᠢᠨ᠎ᠠ᠃ ᠬᠤᠶᠢᠲᠤ ᠭᠤᠣᠯ ᠳᠠᠭᠠᠤ ᠣᠷᠣᠨ ᠳᠤ ᠵᠢᠭᠳᠡ ᠮᠣᠳᠣ ᠨᠡᠶᠢᠳᠡᠮ ᠤᠷᠭᠤᠵᠤ ᠪᠤᠢ ᠪᠥᠭᠡᠳ ᠪᠦᠬᠦ ᠣᠷᠣᠨ ᠤ ᠴᠤᠷ ᠤᠨ ᠭᠠᠭᠴᠠ ᠪᠠᠶᠢᠭᠠᠯᠢ ᠶᠢᠨ ᠵᠢᠭᠳᠡ ᠶᠢᠨ ᠲᠠᠯᠠᠪᠠᠢ ᠪᠣᠯᠣᠨ᠎ᠠ᠃ ᠬᠠᠪᠤᠷ ᠪᠣᠯᠬᠤ ᠳᠤ ᠰᠢᠷᠠᠩᠭᠤᠢ ᠴᠠᠭᠠᠨ ᠵᠢᠭᠳᠡᠨ ᠴᠡᠴᠡᠭ ᠬᠠ ᠶᠠ ᠦᠭᠡᠢ ᠳᠡᠯᠭᠡᠷᠡᠨ᠂ ᠤᠷᠢᠬᠠᠨ ᠰᠠᠯᠬᠢᠨ᠎ᠠ ︽ᠠᠷᠪᠠᠨ ᠭᠠᠵᠠᠷ ᠤᠨ ᠠᠯᠤᠰ ᠠᠴᠠ ᠠᠩᠬᠢᠯᠤᠮ᠎ᠠ ᠦᠨᠦᠷ ᠬᠠᠩᠬᠤᠯᠳᠠᠭ︾ ᠭᠡᠰᠡᠨ ᠰᠠᠶᠢᠬᠠᠨ ᠮᠠᠭᠲᠠᠭᠠᠯ ᠲᠠᠢ ᠪᠢᠯᠡ᠃ ᠵᠢᠭᠳᠡ ᠮᠣᠳᠣ ᠪᠣᠯ ᠭᠠᠩ ᠬᠠᠭᠰᠠᠷᠠᠭᠠᠨ ᠳᠤ ᠲᠡᠰᠪᠦᠷᠢᠲᠡᠢ᠂ ᠠᠮᠢᠯᠠᠬᠤ ᠬᠦᠴᠦ ᠰᠠᠶᠢᠲᠠᠢ ᠮᠣᠳᠣᠨ ᠤ ᠲᠥᠷᠥᠯ ᠳᠤ ᠪᠠᠭᠲᠠᠨ᠎ᠠ᠃ ᠡ᠊ᠨᠳᠡ ᠠᠴᠠ ᠵᠢᠯ ᠪᠦᠷᠢ ᠲᠦᠭ ᠲᠦᠮᠡᠨ ᠵᠢᠭᠳᠡᠨ ᠦᠷ᠎ᠡ ᠲᠡᠭᠦᠵᠦ᠂ ᠡᠬᠡ ᠣᠷᠣᠨ ᠤ ᠣᠶᠢᠵᠢᠭᠤᠯᠤᠯᠲᠠ ᠳᠤ ᠲᠤᠰᠠᠯᠠᠵᠤ ᠪᠠᠶᠢᠳᠠᠭ᠃ ᠵᠢᠭᠳᠡ ᠮᠣᠳᠣ ᠪᠠᠰᠠ ᠶᠠᠰᠤᠯᠢᠭ ᠬᠠᠲᠠᠭᠤ᠂ ᠭᠤᠴᠣ ᠡᠷᠢᠶ᠎ᠡ ᠲᠠᠢ ᠪᠥᠭᠡᠳ ᠠᠪᠳᠠᠷ᠎ᠠ ᠰᠠᠪᠠ ᠭᠡᠷ ᠤᠨ ᠬᠡᠷᠡᠭᠰᠡᠯ ᠬᠢᠬᠦ ᠳᠤ ᠣᠯᠳᠠᠰᠢ ᠦᠭᠡᠢ ᠬᠤᠪᠣᠷ ᠨᠠᠨᠳᠢᠨ ᠶᠠᠭᠤᠮ᠎ᠠ ᠪᠣᠯᠬᠤᠷ ᠬᠤᠰᠢᠭᠤᠨ ᠤ ᠳᠣᠲᠣᠨ᠎ᠠ ᠭᠠᠳᠠᠨ᠎ᠠ ᠠᠯᠳᠠᠷᠰᠢᠪᠠ᠃       ᠭᠠᠰᠢᠭᠤᠨ ᠨᠠᠭᠤᠷ—— ᠵᠢᠦᠢ ᠶᠠᠨ ᠬᠠᠢ       ᠣᠳᠣ ᠡᠵᠡᠨ᠎ᠡ ᠶᠢᠨ ᠬᠢᠯᠢ ᠳᠣᠲᠣᠷ᠎ᠠ ᠡᠷᠲᠡᠨ ᠤ ᠠᠴᠠ ᠪᠠᠨ ᠠᠪᠤᠭᠠᠳ ᠠᠯᠳᠠᠷ ᠲᠠᠢ ᠬᠤᠶᠠᠷ ᠨᠠᠭᠤᠷ ᠪᠤᠢ᠃ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠬᠢ ᠨᠢ ᠭᠠᠰᠢᠭᠤᠨ ᠨᠠᠭᠤᠷ ︵ᠪᠠᠰᠠ ᠵᠢᠦᠢ ᠶᠠᠨ ᠬᠠᠢ ᠪᠤᠶᠤ ᠰᠢ ᠬᠠᠢ ᠽᠢ︶ ᠭᠡᠳᠡᠭ᠂ ᠵᠡᠭᠦᠨ ᠲᠠᠯ᠎ᠠ ᠶᠢᠨ ᠬᠢ ᠨᠢ ᠰᠤᠪᠨᠠᠭᠤᠷ ︵ᠳ᠋ᠦᠩ ᠬᠠᠢ ᠽᠢ︶ ᠭᠡᠳᠡᠭ ᠪᠢᠯᠡ᠃ ᠡᠷᠳᠡᠮᠲᠡᠳ ᠤᠨ ᠲᠣᠳᠣᠯᠠᠭᠰᠠᠨ ᠢᠶᠠᠷ ᠡᠨᠡ ᠬᠤᠶᠠᠷ ᠨᠠᠭᠤᠷ ᠡᠷᠲᠡ ᠦᠶ᠎ᠡ ᠳᠡᠭᠡᠨ ᠨᠢᠭᠡᠯᠡ ᠴᠣᠭᠴᠠ ᠪᠠᠶᠢᠭᠠᠳ᠂ ᠶᠡᠷᠦᠩᠬᠡᠶᠢᠯᠡᠭᠡᠳ ᠵᠢᠦᠢ ᠶᠠᠨ ᠽᠧᠢ ᠪᠤᠶᠤ ᠵᠢᠦᠢ ᠶᠠᠨ ᠬᠠᠢ ᠭᠡᠵᠦ ᠨᠡᠷᠡᠶᠢᠳᠴᠦ ᠢᠷᠡᠪᠡ᠃ ᠮᠠᠰᠢ ᠡᠷᠲᠡᠨ ᠤ ᠴᠦᠨ ᠴᠢᠦ ᠶᠢᠨ ᠦᠶ᠎ᠡ ᠶᠢᠨ ᠪᠢᠴᠢᠭ ᠰᠤᠳᠤᠷ ᠲᠤ ᠯᠢᠦ ᠱᠠ ᠬᠡᠮᠡᠨ ᠵᠢᠦᠢ ᠶᠠᠨ ᠢ ᠵᠢᠭᠠᠵᠤ ᠪᠠᠶᠢᠭᠰᠠᠨ ᠪᠣᠯᠤᠯᠲᠠᠢ᠃ ᠬᠠᠨ ᠤᠯᠤᠰ ᠤᠨ ᠰᠧ ᠮᠠ ᠪᠢᠶᠣᠣ ᠶᠢᠨ ᠪᠢᠴᠢᠭᠰᠡᠨ ᠬᠠᠨ ᠤ ᠪᠢᠴᠢᠭ ᠲᠤ᠂ ᠵᠢᠦᠢ ᠶᠠᠨ ᠤ ᠭᠠᠵᠠᠷ ᠲᠤ ᠵᠢᠦᠢ ᠶᠠᠨ ᠽᠧ ᠪᠤᠢ᠂ ᠡᠷᠲᠡᠨ ᠳᠡᠭᠡᠨ ᠯᠢᠦ ᠱᠠ ᠭᠡᠵᠦ ᠬᠡᠯᠡᠳᠡᠭ ᠪᠠᠶᠢᠪᠠ ᠭᠡᠵᠡᠢ᠃ ︽ᠰᠦᠢ ᠵᠢᠩ ᠵᠦ︾ ᠪᠢᠴᠢᠭ ᠲᠤ ᠯᠢᠦ ᠱᠠ ᠬᠡᠮᠡᠬᠦ ᠭᠠᠵᠠᠷ ᠪᠣᠯ ᠵᠠᠩ ᠶᠧ ᠶᠢᠨ ᠵᠢᠦᠢ ᠶᠠᠨ ᠰᠢᠶᠠᠨ ᠤ ᠵᠡᠭᠦᠨ ᠬᠤᠶᠢᠨ᠎ᠠ ︵ᠡᠳᠦᠭᠡ ᠶᠢᠨ ᠳ᠋ᠢᠩ ᠰᠢᠨ ᠤ ᠮᠣᠣ ᠮᠦ ᠬᠤᠲᠠ︶ ᠪᠠᠶᠢᠨ᠎ᠠ ᠭᠡᠵᠡᠢ᠃ ᠪᠠᠰᠠ ᠲᠠᠶᠢᠯᠪᠤᠷᠢ ᠳᠠᠭᠠᠨ ᠵᠢᠦᠢ ᠶᠠᠨ ᠽᠧ ᠪᠣᠯ ᠵᠢᠦᠢ ᠶᠠᠨ ᠰᠢᠶᠠᠨ ᠬᠤᠲᠠ ᠶᠢᠨ ᠵᠡᠭᠦᠨ ᠬᠤᠶᠢᠨ᠎ᠠ ᠪᠠᠶᠢᠨ᠎ᠠ᠂ ᠪᠢᠴᠢᠭ ᠰᠤᠳᠤᠷ ᠲᠤ ᠯᠢᠦ ᠱᠠ ᠭᠡᠵᠦ ᠪᠠᠶᠢᠬᠤ ᠨᠢ ᠪᠦᠷ ᠵᠢᠦᠢ ᠶᠠᠨ ᠽᠧ ᠶᠢ ᠬᠡᠯᠡᠵᠦ ᠪᠤᠢ᠃ ᠬᠠᠪᠢᠷᠭᠠᠨ ᠰᠠᠷᠠᠨ ᠤ ᠬᠡᠯᠪᠡᠷᠢᠲᠡᠢ ᠶᠤᠮ ᠭᠡᠵᠡᠢ᠃ ᠡᠶᠢᠮᠦ ᠠᠴᠠ ᠡᠷᠲᠡᠨ ᠳᠡᠭᠡᠨ ᠡᠨᠡ ᠬᠤᠶᠠᠷ ᠨᠠᠭᠤᠷ ᠨᠢᠭᠡᠯᠡ ᠪᠠᠶᠢᠭᠰᠠᠨ ᠪᠥᠭᠡᠳ ᠠᠳᠠᠭ ᠲᠠᠭᠠᠨ ᠬᠤᠶᠠᠷ ᠮᠢᠩᠭᠠᠨ ᠵᠢᠯ ᠤᠨ ᠡᠮᠦᠨ᠎ᠡ ᠲᠤᠬᠠᠶᠢᠯᠠᠪᠠᠯ ᠬᠠᠨ ᠤᠯᠤᠰ ᠠᠴᠠ ᠤᠷᠢᠳ ᠵᠢᠦᠢ ᠶᠠᠨ ᠽᠧ ᠭᠡᠵᠦ ᠨᠡᠷᠡᠶᠢᠳᠴᠦ ᠪᠠᠶᠢᠵᠠᠢ᠃ ᠸᠧᠢ᠂ ᠶᠢᠨ ᠤ ᠦᠶ᠎ᠡ ᠳᠤ ᠰᠢ ᠬᠠᠢ ᠭᠡᠵᠦ ᠪᠠᠶᠢᠭᠠᠳ᠂ ᠵᠢᠦᠢ ᠶᠠᠨ ᠣᠷᠣᠨ ᠳᠤ ᠰᠢ ᠬᠠᠢ ᠵᠢᠶᠦ᠋ᠨ ᠪᠠᠶᠢᠭᠤᠯᠤᠭᠰᠠᠨ ᠢᠶᠠᠷ ᠦᠵᠡᠬᠦᠯ᠎ᠡ᠂ ᠪᠠᠷᠤᠭ ᠲᠡᠷᠡ ᠦᠶ᠎ᠡ ᠠᠴᠠ ᠡᠬᠢᠯᠡᠨ ᠤᠰᠤ ᠨᠢ ᠬᠤᠮᠰᠠᠳᠠᠭᠠᠳ ᠬᠤᠶᠠᠷ ᠲᠠᠰᠤᠷᠠᠭᠰᠠᠨ ᠪᠠᠶᠢᠵᠤ ᠮᠡᠳᠡᠨ᠎ᠡ᠃ ᠭᠠᠰᠢᠭᠤᠨ ᠨᠠᠭᠤᠷ ᠭᠡᠰᠡᠨ ᠨᠢ ᠴᠢᠩ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠲᠣᠷᠭᠤᠳ ᠬᠥᠮᠦᠨ ᠢᠷᠡᠭᠰᠡᠨ ᠤ ᠰᠡᠭᠦᠯᠡᠷ ᠤᠰᠤᠨ ᠤ ᠴᠢᠨᠠᠷ ᠢᠶᠠᠷ ᠨᠢ ᠥᠭᠭᠦᠭᠰᠡᠨ ᠨᠡᠷ᠎ᠡ ᠮᠥᠨ᠃ ᠭᠠᠭᠴᠠ ᠨᠠᠭᠤᠷ ᠪᠠᠶᠢᠬᠤ ᠳᠠᠭᠠᠨ ᠴᠡᠩᠭᠡᠭ ᠤᠰᠤ ᠲᠠᠢ ᠪᠠᠶᠢᠭᠠᠳ ᠰᠡᠭᠦᠯᠡᠷ ᠬᠤᠶᠠᠷ ᠲᠠᠰᠤᠷᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠪᠠᠷᠠᠭᠤᠨ ᠨᠠᠭᠤᠷ ᠨᠢ ᠬᠤᠵᠢᠷ ᠱᠤᠤ ᠶᠡᠬᠡᠲᠡᠢ ᠠᠴᠠ ᠭᠠᠰᠢᠭᠤᠷᠠᠭᠰᠠᠨ ᠪᠠᠶᠢᠬ᠎ᠠ ᠭᠡᠵᠦ ᠬᠤᠸᠠᠩ ᠸᠧᠨ ᠪᠢ ᠶᠢᠨ ᠵᠢᠦᠢ ᠶᠠᠨ ᠬᠠᠢ ᠶᠢᠨ ᠰᠢᠨᠵᠢᠯᠡᠯ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠠᠶᠢᠪᠠ᠃ ᠭᠠᠰᠢᠭᠤᠨ ᠨᠠᠭᠤᠷ ᠲᠤ ᠭᠠᠯᠠᠭᠤ ᠰᠢᠪᠠᠭᠤ ᠰᠠᠭᠤᠳᠠᠭ ᠦᠭᠡᠢ᠂ ᠵᠢᠭᠠᠰᠤ ᠵᠢᠷᠠᠭᠠᠬᠠᠢ ᠠᠮᠢᠳᠤᠷᠠᠳᠠᠭ ᠦᠭᠡᠢ᠂ ᠠᠮᠢᠲᠠᠨ ᠠᠷᠢᠶᠠᠲᠠᠨ ᠤᠮᠳᠠᠯᠠᠳᠠᠭ ᠦᠭᠡᠢ᠂ ᠭᠢᠰᠬᠢᠪᠡᠯ ᠲᠤᠭᠤᠷᠠᠢ ᠨᠢ ᠲᠠᠰᠤᠷᠠᠵᠤ ᠤᠨᠠᠭᠠᠳ᠂ ᠤᠤᠭᠤᠪᠠᠯ ᠳᠣᠣᠷ᠎ᠠ ᠪᠠᠨ ᠬᠤᠣᠷᠳᠠᠵᠤ ᠦᠬᠦᠳᠡᠭ ᠭᠡᠵᠦ ᠬᠡᠯᠡᠯᠴᠡᠳᠡᠭ᠃ ᠮᠢᠩᠭ᠎ᠠ ᠶᠢᠰᠦᠨ ᠵᠠᠭᠤ ᠲᠠᠪᠢᠨ ᠳᠣᠯᠣᠳᠤᠭᠠᠷ ᠣᠨ ᠳᠤ ᠲᠥᠪ ᠤᠨ ᠭᠠᠵᠠᠷ ᠰᠢᠨᠵᠢᠯᠡᠭᠡᠨ ᠤ ᠬᠢᠨ ᠲᠡᠭᠦᠨ ᠤ ᠤᠰᠤ ᠶᠢ ᠪᠡᠭᠡᠵᠢᠩ ᠳᠤ ᠠᠪᠠᠴᠢᠨ ᠰᠢᠯᠭᠠᠭᠰᠠᠨ ᠳ᠋ᠦᠩ ᠳᠤ ᠠᠷᠪᠠᠨ ᠭᠤᠷᠪᠠᠨ ᠵᠦᠢᠯ ᠤᠨ ᠠᠭᠤᠷᠬᠠᠢ ᠶᠢᠨ ᠪᠣᠳᠠᠰ ᠬᠤᠯᠢᠯᠳᠤᠵᠤ ᠪᠠᠶᠢᠭ᠎ᠠ ᠪᠣᠯᠬᠤᠷ ᠬᠤᠣᠷ ᠲᠠᠢ ᠪᠠᠶᠢᠨ᠎ᠠ ᠭᠡᠵᠦ ᠲᠣᠳᠣᠯᠠᠭᠰᠠᠨ ᠪᠢᠯᠡ᠃ ᠬᠡᠳᠦᠢ ᠬᠤᠣᠷᠲᠠᠢ ᠭᠡᠪᠡᠴᠦ ᠠᠮᠰᠠᠭᠰᠠᠭᠠᠷ ᠦᠬᠦᠴᠢᠬᠡᠳᠡᠭ ᠶᠠᠪᠤᠳᠠᠯ ᠴᠤ ᠦᠭᠡᠢ ᠪᠠᠶᠢᠯᠭᠦᠢ ᠳ᠋ᠠ᠃      ᠡᠵᠡᠨ᠎ᠡ ᠳᠤ ᠭᠠᠰᠢᠭᠤᠨ ᠨᠠᠭᠤᠷ ᠤᠨ ᠲᠤᠬᠠᠢ ᠪᠠᠰᠠ ᠨᠢᠭᠡᠨ ᠳᠣᠮᠤᠭ ᠪᠠᠶᠢᠳᠠᠭ ᠶᠤᠮ᠃ ᠡᠷᠲᠡ ᠤᠷᠢᠳᠤ ᠶᠢᠨ ᠴᠠᠭ ᠲᠤ ᠡᠨᠡ ᠣᠷᠣᠨ ᠳᠤ ᠱᠤᠯᠤᠮ ᠬᠥᠮᠦᠨ ᠠᠮᠢᠲᠠᠨ ᠳᠤ ᠶᠡᠭᠡ ᠯᠡ ᠬᠥᠨᠥᠭᠡᠯ ᠪᠣᠯᠵᠤ ᠪᠠᠶᠢᠵᠠᠢ᠃ ᠪᠤᠷᠬᠠᠨ ᠪᠠᠭᠰᠢ ᠮᠡᠳᠡᠵᠦ᠂ ᠱᠤᠯᠤᠮ ᠲᠠᠢ ᠪᠠᠶᠢᠯᠳᠤᠭᠰᠠᠨ᠎ᠠ ᠱᠤᠯᠤᠮ ᠳᠡᠶᠢᠯᠦᠭᠳᠡᠵᠦ ᠳᠤᠲᠠᠭᠠᠵᠠᠢ᠃ ᠲᠡᠭᠡᠭᠡᠳ ᠵᠠᠮ ᠳᠠᠭᠠᠨ ᠭᠠᠰᠢᠭᠤᠨ ᠨᠠᠭᠤᠷ ᠲᠤ ᠰᠢᠭᠡᠴᠢᠬᠡᠭᠡᠳ ᠳᠠᠬᠢᠨ ᠵᠡᠭᠦᠨ ᠨᠠᠭᠤᠷ ᠤᠷᠤᠭᠤ ᠳᠤᠲᠠᠭᠠᠭᠰᠠᠨ ᠭᠡᠨ᠎ᠡ᠃ ᠪᠤᠷᠬᠠᠨ ᠪᠠᠭᠰᠢ ᠲᠡᠭᠷᠢ ᠶᠢᠨ ᠦᠬᠡᠷ ᠬᠠᠷ᠎ᠠ ᠴᠢᠯᠠᠭᠤ᠂ ᠦᠬᠡᠷ ᠴᠠᠭᠠᠨ ᠴᠢᠯᠠᠭᠤ ᠪᠠᠷ ᠴᠣᠬᠢᠨ ᠤᠨᠠᠭᠠᠭᠠᠳ ᠲᠡᠨᠳᠡ ᠨᠢ ᠳᠠᠷᠤᠵᠤ ᠬᠠᠶᠠᠭᠰᠠᠨ ᠭᠡᠨ᠎ᠡ᠃ ᠢᠩᠭᠢᠭᠰᠡᠨ ᠠᠴᠠ ᠬᠤᠶᠢᠰᠢ ᠱᠤᠯᠤᠮ ᠤᠨ ᠰᠢᠭᠡᠭᠰᠡᠨ ᠪᠠᠷᠠᠭᠤᠨ ᠨᠠᠭᠤᠷ ᠨᠢ ᠭᠠᠰᠢᠭᠤᠨ ᠪᠣᠯᠵᠤ᠂ ᠵᠡᠭᠦᠨ ᠨᠠᠭᠤᠷ ᠤᠨ ᠤᠰᠤ ᠨᠢ ᠴᠡᠩᠭᠡᠭ ᠶᠣᠰᠣᠭᠠᠷ ᠢᠶᠠᠨ ᠪᠠᠶᠢᠨ᠎ᠠ ᠭᠡᠵᠦ ᠣᠳᠣ ᠬᠦᠷᠲᠡᠯ᠎ᠡ ᠬᠡᠯᠡᠯᠴᠡᠳᠡᠭ ᠪᠢᠯᠡ᠃ ᠣᠳᠣ ᠰᠤᠪᠨᠠᠭᠤᠷ ᠤᠨ ᠪᠠᠷᠠᠭᠤᠨ ᠬᠤᠶᠢᠲᠤ ᠬᠥᠪᠡᠭᠡᠨ ᠳᠤ ᠦᠬᠡᠷ ᠤᠨ ᠴᠢᠨᠡᠭᠡ ᠬᠠᠷ᠎ᠠ ᠴᠢᠯᠠᠭᠤ ᠪᠤᠢ᠃ ᠭᠠᠰᠢᠭᠤᠨ ᠨᠠᠭᠤᠷ ᠲᠠᠪᠤᠨ ᠵᠠᠭᠤᠨ ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲᠷ ︵ᠬᠠᠮᠤᠭ ᠪᠠᠭ᠎ᠠ ᠬᠡᠪᠴᠢᠶ᠎ᠡ︶ ᠪᠤᠢ᠃ ᠲᠡᠭᠰᠢᠳᠬᠡᠭᠡᠳ1.5 ᠮᠧᠲᠷ ᠭᠦᠨ᠂ ᠮᠥᠷᠡᠨ ᠭᠤᠣᠯ ᠤᠨ ᠤᠰᠤ ᠲᠤᠰ ᠨᠠᠭᠤᠷ ᠲᠤ ᠴᠢᠳᠬᠤᠯᠠᠳᠠᠭ ᠪᠠᠶᠢᠨ᠎ᠠ᠃ ᠲᠦᠷᠦᠭᠦᠴᠢ ᠶᠢᠨ ᠬᠡᠳᠦᠨ ᠵᠢᠯ ᠳᠤ ᠨᠠᠭᠤᠷ ᠤᠨ ᠤᠰᠤ ᠬᠠᠲᠠᠪᠠ᠃ ᠡᠨᠡ ᠬᠡᠳᠦᠨ ᠵᠢᠯ ᠳᠤ ᠳᠠᠬᠢᠨ ᠤᠰᠤ ᠣᠷᠣᠭᠤᠯᠵᠤ᠂ ᠣᠳᠣ ᠨᠡᠯᠢᠶᠡᠳ ᠶᠡᠭᠡ ᠤᠰᠤ ᠲᠠᠢ ᠪᠠᠶᠢᠨ᠎ᠠ᠃ ᠭᠠᠰᠢᠭᠤᠨ ᠨᠠᠭᠤᠷ ᠤᠨ ᠤᠰᠤ ᠬᠡᠳᠦᠶᠢᠪᠡᠷ ᠠᠮᠲᠠᠯᠠᠵᠤ ᠪᠣᠯᠤᠰᠢ ᠦᠭᠡᠢ ᠬᠤᠣᠷ ᠲᠠᠢ ᠪᠣᠯᠪᠠᠴᠤ ᠲᠡᠭᠦᠨ ᠤ ᠤᠰᠤ ᠳᠦᠭᠦᠷᠡᠩ ᠪᠠᠶᠢᠭᠰᠠᠨ ᠴᠠᠭ ᠲᠤ ᠡᠵᠡᠨ᠎ᠡ ᠶᠢᠨ ᠠᠭᠤᠷ ᠠᠮᠢᠰᠬᠤᠯ ᠰᠣᠷᠭᠤᠭ ᠴᠢᠭᠢᠭᠲᠡᠢ ᠪᠣᠯᠵᠤ ᠡᠪᠡᠰᠦᠲᠦ ᠪᠡᠯᠴᠢᠭᠡᠷ ᠰᠠᠶᠢᠵᠢᠷᠠᠨ᠂ ᠮᠠᠯ ᠠᠵᠤ ᠠᠬᠤᠢ ᠳᠤ ᠶᠡᠬᠡᠯ᠎ᠡ ᠠᠰᠢᠭᠲᠠᠢ ᠪᠣᠯᠳᠠᠭ᠃ ᠨᠡᠩ ᠢᠯᠠᠩᠭᠤᠶ᠎ᠠ ᠡᠵᠡᠨ᠎ᠡ ᠶᠢᠨ ᠭᠤᠷᠪᠠᠨ ᠲᠣᠮᠣ ᠨᠠᠭᠤᠷ ᠲᠤ ᠳᠦᠭᠦᠷᠡᠩ ᠤᠰᠤ ᠲᠠᠢ ᠯᠡ ᠪᠠᠶᠢᠭᠰᠠᠨ ᠦᠶ᠎ᠡ ᠳᠤ ᠭᠠᠩ ᠬᠠᠭᠰᠠᠷᠠᠭᠠᠨ ᠢ ᠪᠠᠷᠤᠭ ᠮᠡᠳᠡᠳᠡᠭ ᠦᠭᠡᠢ ᠪᠠᠶᠢᠭᠰᠠᠨ ᠲᠡᠦᠬᠡ ᠲᠠᠢ᠃      ᠰᠤᠪᠨᠠᠭᠤᠷ—— ᠳ᠋ᠦᠩ ᠬᠠᠢ ᠽᠢ      ᠢᠵᠠᠭᠤᠷ ᠤᠨ ᠲᠡᠦᠬᠡ ᠨᠢ ᠭᠠᠰᠢᠭᠤᠨ ᠨᠠᠭᠤᠷ ᠲᠠᠢ ᠠᠳᠠᠯᠢᠬᠠᠨ ᠲᠤᠯᠠ ᠳᠠᠬᠢᠨ ᠨᠤᠷᠱᠤᠬᠤ ᠦᠭᠡᠢ᠃ ᠡᠳᠦᠭᠡ ᠶᠢᠨ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠰᠤᠪᠨᠠᠭᠤᠷ ᠰᠤᠮᠤᠨ ᠤ ᠬᠡᠪᠴᠢᠶᠡᠨ ᠳᠤ ᠪᠤᠢ᠃ ᠬᠢᠵᠠᠭᠠᠷ ᠤᠨ ᠳᠣᠲᠣᠷᠠᠬᠢ ᠨᠠᠭᠤᠷ ᠤᠨ ᠢᠶᠠᠨ ᠨᠡᠷ᠎ᠡ ᠶᠢ ᠠᠪᠴᠠᠢ᠃ ᠰᠤᠪ ᠭᠡᠵᠦ ᠬᠠᠯᠢᠭᠤ ᠮᠥᠨ᠃1704 ᠣᠨ ᠳᠤ ᠨᠢᠭᠡᠨ ᠰᠠᠯᠠᠭ᠎ᠠ ᠲᠣᠷᠭᠤᠳ ᠤᠯᠤᠰ ᠳᠠᠭᠠᠨ ᠪᠤᠴᠠᠵᠤ ᠢᠷᠡᠭᠡᠳ ᠵᠢᠶᠠ ᠢᠦᠢ ᠭᠤᠸᠠᠨ ᠤ ᠭᠠᠳᠠᠨ᠎ᠠ ᠨᠤᠲᠤᠭᠯᠠᠵᠤ ᠪᠠᠶᠢᠬᠤ ᠳᠠᠭᠠᠨ ᠡᠵᠡᠨ᠎ᠡ ᠭᠤᠣᠯ ᠳᠠᠭᠠᠤ ᠭᠠᠵᠠᠷ ᠢ ᠬᠠᠶᠢᠨ ᠪᠠᠶᠢᠴᠠᠭᠠᠭᠰᠠᠨ ᠲᠡᠦᠬᠡ ᠲᠠᠢ᠃ ᠡᠨᠡ ᠪᠣᠯ ᠠᠷᠠᠪᠵᠤᠤᠷ ᠨᠠᠰᠤ ᠪᠠᠷᠠᠬᠤ ᠠᠴᠠ ᠡᠮᠦᠨᠡᠬᠢ ︵1716 ᠣᠨ ᠠᠴᠠ ᠤᠷᠢᠳᠤᠬᠢ︶ ᠬᠡᠷᠡᠭ ᠪᠣᠯᠣᠨ᠎ᠠ᠃ ᠠᠷᠠᠪᠵᠤᠤᠷ ᠳᠠᠭᠠᠯᠲᠠ ᠪᠠᠨ ᠳᠠᠶᠢᠴᠢᠯᠠᠵᠤ᠂ ᠣᠳᠣ ᠶᠢᠨ ᠰᠤᠪᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠤ ᠪᠣᠷᠣ ᠣᠪᠣᠭ᠎ᠠ ᠳᠤ ᠪᠠᠭᠤᠵᠠᠢ᠃ ᠪᠠᠭᠤᠵᠠᠭᠠᠭᠠᠳ ᠨᠠᠭᠤᠷ ᠤᠨ ᠬᠥᠪᠡᠭᠡ ᠪᠠᠷ ᠲᠣᠭᠤᠷᠢᠨ ᠵᠤᠭᠠᠴᠠᠬᠤ ᠦᠶ᠎ᠡ ᠳᠤ ᠰᠤᠪ ︵ᠬᠠᠯᠢᠭᠤ︶ ᠭᠡᠭᠴᠢ ᠤᠰᠤ ᠬᠠᠭᠤᠷᠠᠢ ᠶᠢᠨ ᠠᠮᠢᠲᠠᠨ ᠬᠠᠷᠠᠭᠳᠠᠪᠠ᠃ ᠡᠭᠦᠨ ᠠᠴᠠ ᠡᠨᠡ ᠨᠠᠭᠤᠷ ᠴᠢᠨᠢ ᠰᠤᠪ ᠲᠠᠢ ᠶᠤᠮ ᠪᠠᠶᠢᠨ᠎ᠠ᠂ ᠰᠤᠪᠨᠠᠭᠤᠷ ᠭᠡᠪᠡᠯ ᠵᠣᠬᠢᠨ᠎ᠠ ᠭᠡᠰᠡᠨ ᠢᠶᠠᠷ ᠬᠤᠶᠢᠴᠢ ᠦᠶ᠎ᠡ ᠶᠢᠨ ᠬᠢᠨ ᠡᠶᠢᠨ ᠬᠦ ᠨᠡᠷ᠎ᠡ ᠲᠣᠭᠲᠠᠭᠠᠭᠰᠠᠨ ᠭᠡᠨ᠎ᠡ᠃ ᠭᠠᠰᠢᠭᠤᠨ ᠨᠠᠭᠤᠷ ᠢ ᠴᠤ ᠮᠥᠨ ᠠᠷᠠᠪᠵᠤᠤᠷ ᠤᠨ ᠦᠶ᠎ᠡ ᠠᠴᠠ ᠨᠡᠷᠡᠯᠡᠭᠰᠡᠨ ᠪᠣᠯᠤᠯᠲᠠᠢ ᠭᠡᠵᠦ ᠨᠠᠰᠤᠲᠠᠶᠢᠴᠤᠳ ᠬᠠᠭᠤᠴᠢᠯᠠᠵᠤ ᠪᠤᠢ᠃ ᠥᠩᠭᠡᠷᠡᠭᠰᠡᠨ ᠳᠤ ᠰᠤᠪᠨᠠᠭᠤᠷ ᠢ ᠣᠯᠠᠩᠬᠢ ᠬᠥᠮᠦᠨ ᠰᠤᠭᠤᠨᠠᠭᠤᠷ ᠭᠡᠵᠦ ᠪᠠᠶᠢᠪᠠ᠃ ᠪᠤᠭᠤ ᠰᠤᠭᠤ ᠪᠠᠶᠢᠭᠰᠠᠨ ᠠᠴᠠ ᠲᠡᠭᠡᠵᠦ ᠨᠡᠷᠡᠰᠢᠭᠰᠡᠨ ᠭᠡᠵᠡᠭᠡᠳᠡᠭ᠃ ᠪᠢᠳᠡ ᠳᠠᠬᠢᠨ ᠳᠠᠪᠲᠠᠨ ᠨᠠᠷᠢᠨ ᠪᠠᠶᠢᠴᠠᠭᠠᠭᠰᠠᠨ ᠠᠴᠠ ᠡᠨᠡ ᠮᠠᠭᠠᠳᠯᠠᠯ ᠢ ᠦᠭᠡᠶᠢᠰᠬᠡᠪᠡ᠃ ᠲᠡᠦᠬᠡᠨ ᠲᠡᠭᠡᠷ᠎ᠡ ᠡᠨᠡ ᠨᠠᠭᠤᠷ ᠤᠨ ᠬᠥᠪᠡᠭᠡᠨ ᠳᠤ ᠪᠤᠭᠤ ᠰᠤᠭᠤ ᠪᠠᠶᠢᠭᠰᠠᠨ ᠤᠴᠢᠷ ᠦᠭᠡᠢ᠃ ᠡᠵᠡᠨ᠎ᠡ ᠳᠤ ᠴᠤ ᠪᠤᠭᠤ ᠰᠤᠭᠤ ᠪᠠᠶᠢᠭᠰᠠᠨ ᠦᠭᠡᠢ᠂ ᠡᠶᠢᠮᠦ ᠠᠴᠠ ᠪᠢᠳᠡ ᠲᠡᠦᠬᠡ ᠶᠢ ᠬᠦᠨᠳᠦᠳᠬᠡᠬᠦ᠂ ᠦᠨᠡᠨ ᠠᠴᠠ ᠵᠥᠪ ᠢ ᠡᠷᠢᠬᠦ ᠣᠪᠣᠷ ᠢᠶᠠᠷ ᠰᠤᠪᠨᠠᠭᠤᠷ ᠭᠡᠵᠦ ᠵᠠᠰᠠᠨ ᠨᠡᠷᠡᠶᠢᠳᠪᠡ᠃      ᠰᠤᠪᠨᠠᠭᠤᠷ ᠪᠣᠯ ᠴᠡᠩᠭᠡᠭ ᠤᠰᠤ ᠲᠠᠢ ᠨᠠᠭᠤᠷ ᠪᠣᠯᠣᠨ᠎ᠠ᠃ ᠵᠢᠷᠠᠨ ᠬᠠᠪᠲᠠᠭᠠᠢ ᠳᠥᠷᠪᠡᠯᠵᠢᠨ ᠺᠢᠯᠣᠮᠧᠲᠷ᠂ ᠲᠡᠭᠰᠢᠳᠬᠡᠭᠡᠳ ᠬᠤᠶᠠᠷ ᠮᠧᠲᠷ ᠭᠦᠨ ᠪᠠᠶᠢᠬᠤ ᠪᠠ ᠡᠮᠦᠨ᠎ᠡ ᠭᠤᠣᠯ ᠡᠨᠡ ᠨᠠᠭᠤᠷ ᠲᠤ ᠴᠢᠳᠬᠤᠯᠠᠳᠠᠭ ᠶᠤᠮ᠃ ᠨᠠᠭᠤᠷ ᠲᠤ ᠨᠢ ᠲᠣᠮᠣ ᠲᠣᠯᠣᠭᠠᠶᠢᠲᠤ ᠵᠢᠭᠠᠰᠤ ᠪᠠ ᠪᠤᠰᠤᠳ ᠬᠠᠪᠲᠠᠭᠠᠢ ᠵᠢᠭᠠᠰᠤ ᠮᠡᠲᠦ ᠶᠢᠨ ᠬᠠᠶᠢᠷᠰᠤᠲᠤ ᠠᠮᠢᠲᠠᠨ ᠦᠯᠡᠮᠵᠢᠬᠡᠨ ᠪᠠᠶᠢᠳᠠᠭ᠃ ᠨᠠᠩᠳᠠ ᠲᠣᠮᠣ ᠲᠣᠯᠣᠭᠠᠶᠢᠲᠤ ᠵᠢᠭᠠᠰᠤ ᠬᠡᠮᠡᠭᠴᠢ ᠮᠢᠬ᠎ᠠ ᠨᠢ ᠵᠥᠭᠡᠯᠡᠨ ᠪᠥᠭᠡᠳ ᠨᠠᠷᠢᠯᠢᠭ᠂ ᠠᠮᠲᠠᠲᠠᠢ ᠪᠥᠭᠡᠳ ᠱᠥᠯᠥᠷᠬᠡᠭ᠂ ᠮᠢᠬ᠎ᠠ ᠶᠡᠭᠡ ᠶᠠᠰᠤ ᠪᠠᠭ᠎ᠠ ᠲᠠᠢ ᠣᠬᠢ ᠰᠠᠶᠢᠨ ᠰᠢᠮ᠎ᠡ ᠲᠡᠵᠢᠭᠡᠯ ᠲᠠᠢ ᠵᠠᠭᠤᠰᠢ ᠪᠢᠯᠡ᠃ ᠰᠤᠪᠨᠠᠭᠤᠷ ᠨᠢ ᠪᠠᠰᠠᠴᠤ ᠤᠰᠤᠨ ᠤ ᠰᠢᠪᠠᠭᠤᠳ ᠥᠰᠥᠨ ᠦᠷᠡᠵᠢᠳᠡᠭ ᠲᠠᠪᠢᠯᠠᠩᠲᠤ ᠣᠷᠣᠨ ᠮᠥᠨ᠂ ᠬᠠᠪᠤᠷ ᠤᠨ ᠤᠯᠠᠷᠢᠯ ᠪᠣᠯᠣᠭᠠᠳ ᠬᠤᠷᠠᠭᠰᠠᠨ ᠴᠠᠰᠤ ᠬᠠᠶᠢᠯᠤᠨ᠂ ᠬᠥᠯᠳᠡᠭᠰᠡᠨ ᠭᠤᠣᠯ ᠵᠠᠳᠠᠷᠠᠬᠤ ᠦᠶᠡᠰ ᠲᠤ ᠬᠠᠯᠢᠭᠤᠨ ᠭᠠᠯᠠᠭᠤ᠂ ᠬᠤᠩᠭᠤᠷ ᠭᠠᠯᠠᠭᠤ᠂ ᠠᠩᠭᠢᠷ ᠭᠠᠯᠠᠭᠤ᠂ ᠰᠢᠷ᠎ᠠ ᠨᠤᠭᠤᠰᠤ᠂ ᠨᠡᠩ ᠢᠯᠠᠩᠭᠤᠶ᠎ᠠ ᠬᠥᠮᠦᠰ ᠤᠨ ᠳᠤᠷ᠎ᠠ ᠪᠠᠭ᠋ᠠᠷᠠᠯ ᠢ ᠲᠠᠲᠠᠭᠰᠠᠨ ᠬᠤᠨ ᠭᠠᠯᠠᠭᠤ᠂ ᠲᠦᠮᠡᠨ ᠠᠭᠤᠯᠠ ᠮᠢᠩᠭᠠᠨ ᠤᠰᠤᠨ ᠤ ᠲᠡᠷᠳᠡᠭᠡᠬᠢ ᠡᠮᠦᠨᠡᠲᠦ ᠭᠠᠵᠠᠷ ᠠᠴᠠ ᠠᠶᠢᠯᠴᠢᠯᠠᠨ ᠢᠷᠡᠵᠦ᠂ ᠡᠨᠡ ᠬᠦ ᠲᠣᠬᠢᠲᠠᠢ ᠣᠷᠣᠨ ᠥᠩ ᠲᠠᠢ ᠨᠤᠲᠤᠭ ᠲᠤ ᠥᠨᠳᠡᠭᠡ ᠵᠤᠯᠵᠠᠭ᠎ᠠ ᠪᠠᠨ ᠭᠠᠷᠭᠠᠵᠤ᠂ ᠦᠷ᠎ᠡ ᠲᠥᠯ ᠢᠶᠠᠨ ᠪᠣᠶᠢᠵᠢᠭᠤᠯᠤᠭᠠᠳ᠂ ᠥᠷᠯᠥᠭᠡ ᠠᠴᠠ ᠠᠪᠤᠭᠠᠳ ᠦᠳᠡᠰᠢ ᠬᠦᠷᠲᠡᠯ᠎ᠡ ᠳᠠᠭᠤᠨ ᠲᠠᠰᠤᠷᠠᠰᠢ ᠦᠭᠡᠢ ᠭᠠᠩᠭᠠᠷ ᠭᠤᠩᠭᠤᠷ ᠳᠠᠭᠤᠯᠠᠯᠳᠤᠨ᠂ ᠡᠵᠡᠨ᠎ᠡ ᠶᠢᠨ ᠠᠭᠤᠳᠠᠮ ᠥᠷᠭᠡᠨ ᠭᠤᠪᠢ ᠨᠤᠲᠤᠭ ᠢ ᠴᠠᠭᠯᠠᠰᠢ ᠦᠭᠡᠢ ᠬᠦᠷ ᠬᠥᠭᠵᠢᠶᠡᠨ ᠪᠠ ᠠᠮᠢᠳᠤ ᠬᠦᠴᠦᠨ ᠲᠠᠢ ᠪᠣᠯᠭᠠᠳᠠᠭ ᠶᠤᠮ᠃                     —— ︽ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠰᠣᠶᠣᠯ ᠲᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ︾ ︵1— 2︶ 
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤᠨ ᠲᠥᠪ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠡᠰᠡᠭ ᠭᠠᠵᠠᠷ ᠤᠨ ᠨᠡᠷᠡᠰ ᠤᠨ ᠢᠷᠡᠯᠲᠡ ︵ᠬᠤᠶᠠᠷ︶
ᠡᠵᠡᠨ᠎ᠡ ᠭᠡᠬᠦ ᠨᠡᠷ᠎ᠡ ᠲᠠᠢ ᠬᠣᠯᠪᠤᠭᠳᠠᠬᠤ ᠲᠤᠮᠤᠭ ᠶᠠᠷᠢᠶ᠎ᠠ
ᠡᠵᠡᠨ᠎ᠡ ᠨᠤᠲᠤᠭ ᠤᠨ ᠴᠡᠭᠡᠷ ᠶᠤᠰᠤᠨ
ᠡᠷᠲᠡᠨ ᠦ ᠡᠷᠳᠡᠨᠢᠰ ᠦᠨ ᠰᠠᠩ ᠪᠤᠯᠤᠭᠰᠠᠨ ᠬᠠᠷ᠎ᠠ ᠬᠤᠲᠠ ᠶᠢᠨ ᠪᠠᠭᠤᠷᠢ
ᠡᠵᠡᠨ᠎ᠡ ᠲᠣᠷᠭᠤᠳᠴᠤᠳ ᠤᠨ ᠣᠩᠭᠤᠯᠠᠵᠤ ᠳᠠᠷᠬᠠᠯᠠᠭᠰᠠᠨ ᠲᠣᠣᠷᠠᠢ ᠵᠢᠴᠢ ᠲᠡᠭᠦᠨ ᠲᠠᠢ ᠬᠣᠯᠪᠤᠭᠳᠠᠭᠰᠠᠨ ᠳᠤᠮᠤᠭ ᠬᠠᠭᠤᠴᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号