ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠡᠰᠡᠭ ᠭᠠᠵᠠᠷ ᠤᠨ ᠨᠡᠷᠡᠰ ᠤᠨ ᠢᠷᠡᠯᠲᠡ ︵ᠬᠤᠶᠠᠷ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/5/11
      ᠯᠠᠮᠠ ᠳ᠋ᠦᠨ      ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠭᠤᠷᠣᠨᠠᠢ ᠰᠤᠮᠤᠨ ᠤ ᠪᠠᠷᠠᠭᠤᠨ ᠡᠮᠦᠨ᠎ᠡ ᠬᠡᠰᠡᠭ ᠲᠤ ᠪᠠᠶᠢᠬᠤ ᠪᠥᠭᠡᠳ ᠠᠯᠠᠱᠠ ᠪᠠᠷᠠᠭᠤᠨ ᠬᠤᠰᠢᠭᠤ᠂ ᠡᠵᠡᠨ᠎ᠡ ᠬᠤᠰᠢᠭᠤ᠂ ᠭᠠᠨᠰᠦ ᠮᠤᠵᠢ ᠶᠢᠨ ᠬᠢᠯᠢ ᠶᠢᠨ ᠠᠭᠤᠯᠵᠠᠷ ᠡ᠊ᠨᠳᠡ ᠪᠤᠢ᠃ ᠬᠠᠨ ᠤᠯᠤᠰ ᠤᠨ ᠦᠶ᠎ᠡ ᠳᠤ ᠴᠢᠶᠠᠩ ᠨᠦ ᠵᠠᠩᠵᠤᠨ ᠯᠢ ᠪᠦᠸᠧ ᠳ᠋ᠧ ᠣᠳᠣ ᠶᠢᠨ ᠭᠤᠣᠲ᠋ᠠᠢ ᠰᠢᠶᠠᠨ ᠤ ᠾᠧ ᠯᠢ ᠱᠠᠨ ᠠᠴᠠ ᠬᠠᠯᠬ᠎ᠠ ᠶᠢᠨ ᠬᠢᠯᠢ ᠬᠦᠷᠲᠡᠯ᠎ᠡ ᠬᠠᠷᠢ ᠶᠢ ᠰᠡᠷᠭᠡᠶᠢᠯᠡᠬᠦ ᠬᠠᠯᠬᠠᠪᠴᠢ ᠵᠠᠰᠠᠭᠰᠠᠨ ᠢ ᠨᠢᠭᠡᠨᠲᠡ ᠳᠤᠷᠠᠳᠪᠠ᠃ ᠯᠠᠮᠠ ᠳ᠋ᠦᠨ ᠪᠣᠯ ᠶᠠᠭ ᠲᠡᠷᠡ ᠵᠠᠮ ᠳᠡᠭᠡᠷᠡᠬᠢ ᠨᠢᠭᠡᠨ ᠲᠣᠮᠣ ᠴᠢᠯᠠᠭᠤᠨ ᠴᠣᠨᠵᠢ ᠪᠣᠯᠣᠨ᠎ᠠ᠃ ᠭᠤᠷᠣᠨᠠᠢ ᠰᠤᠮᠤᠨ ᠤ ᠪᠠᠷᠠᠭᠤᠨ ᠡᠮᠦᠨ᠎ᠡ ᠨᠢᠭᠡ ᠵᠠᠭᠤ ᠨᠠᠶᠠᠨ ᠶᠢᠰᠦᠨ ᠺᠢᠯᠣᠮᠧᠲᠷ ᠭᠠᠵᠠᠷ ᠲᠤ ᠪᠠᠶᠢᠳᠠᠭ᠃ ᠳᠠᠯᠠᠢ ᠶᠢᠨ ᠲᠦᠪᠰᠢᠨ ᠠᠴᠠ ᠲᠠᠪᠤᠨ ᠵᠠᠭᠤ ᠪᠥᠭᠡᠳ ᠲᠠᠪᠤᠨ ᠮᠧᠲᠷ ᠥᠨᠳᠥᠷ ᠠᠭᠤᠯᠠᠨ ᠣᠷᠣᠢ ᠳᠡᠭᠡᠷ᠎ᠡ ᠴᠢᠯᠠᠭᠤ ᠪᠠᠷ ᠪᠠᠷᠢᠭᠰᠠᠨ ᠴᠣᠨᠵᠢ ᠪᠣᠯᠣᠨ᠎ᠠ᠃ ᠥᠷᠭᠡᠨ ᠢᠶᠠᠷ ᠢᠶᠠᠨ ᠨᠠᠢᠮᠠᠨ ᠮᠧᠲᠷ ︵ᠰᠠᠭᠤᠷᠢ ᠨᠢ ᠲᠡᠭᠰᠢ ᠳᠥᠷᠪᠡᠯᠵᠢᠨ︶᠂ ᠥᠨᠳᠥᠷ ᠢᠶᠠᠷ ᠢᠶᠠᠨ ᠳᠣᠯᠣᠭᠠᠨ ᠮᠧᠲᠷ ᠭᠠᠷᠤᠢ ᠪᠠᠶᠢᠳᠠᠭ ᠴᠢᠯᠠᠭᠤᠨ ᠴᠣᠨᠵᠢ ᠶᠢᠨ ᠬᠠᠷᠮᠠᠨ ᠢᠷᠣᠭᠠᠷ ᠲᠤ ᠥᠪᠥᠷ ᠮᠣᠩᠭᠤᠯ᠂ ᠭᠠᠨᠰᠦ ᠶᠢᠨ ᠮᠢᠩᠭ᠎ᠠ ᠶᠢᠰᠦᠨ ᠵᠠᠭᠤ ᠵᠢᠷᠠᠨ ᠲᠠᠪᠤᠳᠤᠭᠠᠷ ᠣᠨ ᠳᠤ ᠪᠣᠰᠬᠠᠭᠰᠠᠨ ᠼᠧᠮᠧᠨ᠋ᠲ ᠬᠢᠴᠡ ᠲᠠᠢ ᠬᠢᠯᠢ ᠶᠢᠨ ᠪᠠᠭᠠᠨ᠎ᠠ ᠪᠠᠶᠢᠨ᠎ᠠ᠃      ᠯᠠᠮᠠ ᠳ᠋ᠦᠨ ᠤ ᠠᠷᠤ ᠳᠣᠣᠷ᠎ᠠ ᠨᠢᠭᠡ ᠺᠢᠯᠣᠮᠧᠲᠷ ᠭᠠᠵᠠᠷ ᠲᠤ ᠬᠤᠳᠳᠤᠭᠲᠤ ᠬᠤᠭᠤᠯᠠᠢ ︵ᠵᠢᠩ ᠽᠢ ᠭᠸᠦ︶ ᠭᠡᠰᠡᠨ ᠭᠠᠵᠠᠷ ᠪᠠᠶᠢᠳᠠᠭ᠃ ᠵᠢᠩ ᠽᠢ ᠭᠸᠦ ᠪᠣᠯ ᠪᠠᠷᠠᠭᠤᠨ ᠬᠤᠶᠢᠨ᠎ᠠ ᠠᠴᠠ ᠤᠷᠤᠭᠰᠢ ᠰᠤᠨᠵᠢᠷᠠᠭᠰᠠᠨ ᠲᠣᠮᠣ ᠬᠤᠭᠤᠯᠠᠢ᠂ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠢᠶᠠᠨ ᠠᠭᠤᠯᠠ ᠲᠠᠢ᠂ ᠪᠠᠷᠠᠭᠤᠨ ᠲᠠᠯ᠎ᠠ ᠶᠢᠨ ᠠᠭᠤᠯᠠ ᠨᠢ ᠵᠧᠩ ᠢ ᠰᠢᠶᠠ ᠴᠢᠯᠠᠭᠤᠨ ᠬᠠᠪᠴᠢᠯ ᠤᠨ ᠠᠭᠤᠯᠠ ᠪᠣᠯᠬᠤ ᠪᠥᠭᠡᠳ ᠱᠧ ᠴᠧᠩ ᠤᠨ ᠠᠷᠤ ᠬᠦᠷᠳᠡᠭ᠃ ᠱᠧ ᠴᠧᠩ ᠤᠨ ᠠᠷᠤ ᠲᠣᠯᠣᠭᠠᠢ ᠳᠡᠭᠡᠷ᠎ᠡ ᠨᠢᠭᠡ ᠬᠤᠣᠱᠠᠩ ᠤᠨ ᠰᠦᠮ᠎ᠡ ᠲᠠᠢ᠂ ᠣᠳᠣ ᠪᠠᠯᠪᠠᠷᠠᠵᠡᠢ᠃ ᠡᠨᠡ ᠬᠤᠭᠤᠯᠠᠢ ᠳᠣᠲᠣᠷ᠎ᠠ ᠬᠠᠭᠤᠴᠢᠨ ᠵᠠᠮ ᠲᠠᠢ᠂ ᠡᠷᠲᠡᠨ ᠤ ᠮᠣᠩᠭᠤᠯ ᠬᠢᠲᠠᠳ ᠣᠷᠣᠨ ᠤ ᠠᠷᠠᠳ ᠲᠦᠮᠡᠨ ᠵᠠᠩ ᠶᠧ᠂ ᠭᠤᠣᠲ᠋ᠠᠢ ᠲᠠᠢ ᠠᠮᠤ ᠬᠦᠨᠡᠰᠦ ᠠᠴᠢᠬᠤ ᠪᠤᠶᠤ ᠭᠦᠮᠪᠦᠮ ᠯᠠᠪᠷᠤᠩ ᠴᠢᠨᠠᠭᠰᠢᠯᠠᠪᠠᠯ ᠵᠤᠤ ᠶᠢᠨ ᠣᠷᠣᠨ ᠳᠤ ᠡᠷᠭᠦᠯ ᠮᠥᠷᠭᠦᠯ ᠬᠢᠬᠦ ᠪᠠᠷ ᠶᠠᠪᠤᠬᠤ ᠳᠠᠭᠠᠨ ᠵᠠᠪᠠᠯ ᠡᠭᠦᠨ ᠢᠶᠠᠷ ᠥᠩᠭᠡᠷᠡᠳᠡᠭ ᠪᠠᠶᠢᠵᠠᠢ᠃ ᠲᠡᠦᠬᠡᠨ ᠠᠴᠠ ᠠᠪᠤᠭᠠᠳ ᠬᠤᠭᠤᠯᠠᠢ ᠳᠣᠲᠣᠷ᠎ᠠ ᠭᠠᠭ᠎ᠠ ᠬᠤᠳᠳᠤᠭ ᠪᠠᠶᠢᠪᠠ᠃ ᠦᠷᠭᠦᠯᠵᠢ ᠦᠶᠡᠷ ᠤᠨ ᠤᠰᠤᠨ ᠳᠤ ᠠᠪᠲᠠᠭᠳᠠᠭᠠᠳ᠂ ᠬᠤᠳᠳᠤᠭ ᠨᠢ ᠪᠤᠯᠠᠭᠳᠠᠵᠤ᠂ ᠵᠠᠮ ᠶᠠᠪᠤᠭᠰᠠᠨ ᠠᠮᠢᠲᠠᠨ ᠤᠰᠤ ᠵᠠᠯᠭᠠᠵᠤ ᠴᠢᠳᠠᠬᠤ ᠦᠭᠡᠢ᠂ ᠴᠠᠩᠭᠠᠵᠤ ᠬᠠᠲᠠᠵᠤ ᠦᠬᠦᠳᠡᠭ ᠠᠶᠤᠯ ᠦᠷᠭᠦᠯᠵᠢ ᠭᠠᠷᠳᠠᠭ ᠪᠠᠶᠢᠭᠰᠠᠨ ᠭᠡᠨ᠎ᠡ᠃ ᠪᠦᠷᠢᠨᠲᠦ ᠵᠠᠰᠠᠭᠴᠢ ᠶᠢᠨ ᠨᠠᠢᠮᠠᠳᠤᠭᠠᠷ ᠣᠨ ᠳᠤ ᠭᠤᠣᠲ᠋ᠠᠢ ᠰᠢᠶᠠᠨ ᠤ ᠮᠡᠳᠡᠭᠴᠢ ᠡᠨᠡ ᠬᠤᠳᠳᠤᠭ ᠢ ᠳᠠᠬᠢᠨ ᠰᠡᠯᠪᠢᠨ ᠮᠠᠯᠲᠠᠵᠤ᠂ ᠴᠢᠯᠠᠭᠤᠨ ᠪᠦᠷᠬᠦᠭᠦᠯ ᠬᠢᠵᠦ᠂ ᠬᠠᠵᠠᠭᠤ ᠳᠤᠨᠢ ᠪᠦᠳᠦᠭᠦᠨ ᠴᠢᠯᠠᠭᠤ ᠪᠠᠷ ᠶᠠᠰᠤᠲᠤ ᠮᠡᠯᠡᠬᠡᠢ ᠴᠠᠪᠴᠢᠨ᠂ ᠶᠠᠰᠤᠲᠤ ᠮᠡᠯᠡᠬᠡᠢ ᠶᠢᠨ ᠢᠶᠠᠨ ᠨᠢᠷᠤᠭᠤᠨ ᠳᠡᠭᠡᠷ᠎ᠡ ᠴᠢᠯᠠᠭᠤᠨ ᠬᠥᠰᠢᠶ᠎ᠡ ᠪᠣᠰᠬᠠᠵᠤ᠂ ︽ᠷᠠᠰᠢᠶᠠᠨ ᠪᠤᠯᠠᠭ ᠢᠶᠠᠷ ᠣᠯᠠᠨ ᠢ ᠲᠡᠳᠬᠦᠮᠦᠢ᠃︾ ᠭᠡᠰᠡᠨ ᠳᠥᠷᠪᠡᠨ ᠦᠰᠦᠭ ᠰᠡᠶᠢᠯᠦᠭᠰᠡᠨ ᠪᠠᠶᠢᠳᠠᠭ᠃ ᠢᠩᠭᠢᠭᠰᠡᠨ ᠠᠴᠠ ᠠᠶᠠᠨᠴᠢᠳ ᠬᠤᠳᠳᠤᠭ ᠣᠯᠬᠤ ᠦᠭᠡᠢ ᠪᠤᠶᠤ ᠤᠰᠤ ᠪᠠᠷ ᠲᠠᠰᠤᠷᠠᠬᠤ ᠠᠶᠤᠯ ᠠᠷᠢᠯᠪᠠ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ᠂ ᠲᠤᠰ ᠭᠠᠵᠠᠷ ᠪᠣᠯ ᠲᠤᠶᠢᠯ ᠤᠨ ᠪᠠᠷᠲᠠᠭ᠎ᠠ ᠲᠠᠢ᠂ ᠬᠤᠶᠢᠨ᠎ᠠ ᠠᠴᠠ ᠤᠷᠤᠭᠰᠢ ᠶᠠᠪᠤᠵᠤ ᠪᠠᠶᠢᠭᠠᠳ ᠵᠧᠩ ᠢ ᠰᠢᠶᠠ ᠶᠢᠨ ᠵᠡᠭᠦᠨ ᠠᠭᠤᠯᠠᠨ ᠤ ︽ᠴᠢᠯᠠᠭᠤᠨ ᠡᠭᠦᠳᠡ︾᠎ ᠪᠠᠷ ᠭᠠᠷᠬᠤ ᠠᠴᠠ ᠪᠢᠰᠢ ᠣᠨᠳᠣᠣ ᠵᠠᠮ ᠪᠠᠶᠢᠳᠠᠭ ᠦᠭᠡᠢ᠃ ᠡᠨᠡ ᠳᠡᠭᠡᠷ᠎ᠡ ᠦᠨᠡᠬᠡᠷ ︽ᠨᠢᠭᠡᠨ ᠡᠷ᠎ᠡ ᠪᠣᠭᠤᠮᠲᠠ ᠶᠢ ᠰᠠᠬᠢᠪᠠᠰᠤ᠂ ᠲᠦᠮᠡᠨ ᠡᠷ᠎ᠡ ᠶᠢ ᠬᠤᠷᠢᠭᠯᠠᠵᠤ ᠴᠢᠳᠠᠮᠤᠢ︾ ᠭᠡᠳᠡᠭᠴᠢᠯᠡᠨ ᠪᠠᠭ᠎ᠠ ᠮᠠᠰᠢᠨ ᠳᠥᠩᠭᠡᠵᠢ ᠳᠠᠩᠭᠠᠵᠤ ᠯᠡ ᠪᠠᠭᠲᠠᠵᠤ ᠭᠠᠷᠳᠠᠭ ᠮᠠᠰᠢ ᠪᠠᠷᠲᠠᠭ᠎ᠠ ᠲᠠᠢ ᠵᠠᠮ ᠪᠣᠯᠣᠨ᠎ᠠ᠃ ᠬᠠᠭᠤᠴᠢᠨ ᠨᠡᠶᠢᠭᠡᠮ ᠤᠨ ᠦᠶ᠎ᠡ ᠳᠤ ᠬᠤᠯᠠᠭᠠᠢ ᠳᠡᠭᠡᠷᠡᠮ ᠲᠠᠰᠤᠷᠠᠬᠤ ᠦᠭᠡᠢ᠂ ᠦᠷᠭᠦᠯᠵᠢ ᠠᠶᠠᠨᠴᠢᠳ ᠲᠤ ᠭᠠᠢ ᠵᠣᠪᠠᠯᠠᠩ ᠤᠴᠠᠷᠠᠭᠤᠯᠵᠤ ᠪᠠᠶᠢᠪᠠ᠃ ᠡᠭᠦᠨ ᠢ ᠮᠥᠷᠭᠦᠯ ᠢᠶᠠᠷ ᠶᠠᠪᠤᠵᠤ ᠪᠠᠶᠢᠭᠰᠠᠨ ᠬᠡᠳᠦᠨ ᠯᠠᠮᠠ ᠮᠡᠳᠡᠵᠦ᠂  ᠴᠤᠨᠵᠢᠲᠤ ᠠᠭᠤᠯᠠᠨ ᠳᠡᠭᠡᠷ᠎ᠡ ᠭᠠᠷᠴᠤ ᠨᠣᠮ ᠤᠩᠰᠢᠨ ᠰᠠᠩ ᠲᠠᠯᠪᠢᠵᠤ ᠪᠠᠰᠠ ᠣᠪᠣᠭ᠎ᠠ ᠪᠣᠰᠬᠠᠪᠠ᠃ ᠣᠳᠣ ᠴᠣᠨᠵᠢ ᠶᠢᠨ ᠬᠠᠵᠠᠭᠤ ᠳᠤ ᠮᠣᠩᠭᠤᠯ ᠣᠷᠣᠨ ᠤ ᠲᠠᠬᠢᠯᠭ᠎ᠠ ᠶᠢᠨ ᠣᠪᠣᠭ᠎ᠠ ᠮᠡᠲᠦ ᠲᠠᠪᠤᠨ ᠣᠪᠣᠭ᠎ᠠ ᠪᠤᠢ᠃ ᠳᠤᠮᠳᠠᠬᠢ ᠶᠢ ᠨᠢ ᠴᠣᠨᠵᠢᠨ ᠣᠪᠣᠭ᠎ᠠ ᠬᠡᠮᠡᠷ ᠨᠡᠯᠢᠶᠡᠳ ᠲᠣᠮᠣ ᠪᠣᠰᠬᠠᠭᠰᠠᠨ ᠨᠢ ᠡᠳᠦᠢ ᠪᠣᠯᠲᠠᠯ᠎ᠠ ᠪᠠᠶᠢᠭᠰᠠᠭᠠᠷ ᠡ᠃ ᠡᠨᠡ ᠬᠡᠳᠦᠨ ᠯᠠᠮᠠ ᠬᠠᠮᠤᠭ ᠠᠮᠢᠲᠠᠨ ᠢ ᠠᠮᠤᠷ ᠠᠮᠤᠭᠤᠯᠠᠩ ᠠᠶᠠᠨ ᠵᠠᠮ ᠳᠠᠭᠠᠨ ᠶᠠᠪᠤᠬᠤ ᠪᠣᠯᠲᠤᠭᠠᠢ ᠬᠡᠮᠡᠨ ᠨᠣᠮ ᠤᠩᠰᠢᠭᠰᠠᠨ ᠢᠶᠠᠷ ᠯᠠᠮᠠ ᠳ᠋ᠦᠨ ︵ᠯᠠᠮᠠ ᠶᠢᠨ ᠴᠣᠨᠵᠢ︶ ᠬᠡᠮᠡᠨ ᠨᠡᠷᠡᠯᠡᠭᠰᠡᠨ ᠭᠡᠵᠦ ᠪᠣᠢ᠃      ᠳᠠᠯᠠᠶᠢᠬᠦ᠋ᠪ      ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠵᠠᠰᠠᠭ ᠤᠨ ᠣᠷᠳᠣᠨ ᠤ ᠪᠠᠶᠢᠭ᠎ᠠ ᠪᠠᠯᠭᠠᠰᠤ᠃ ᠳᠠᠯᠠᠢ ᠨᠢ ᠳᠠᠯᠠᠢ ᠲᠠᠩᠭᠢᠰ ᠤᠨ ᠳᠠᠯᠠᠢ ᠪᠥᠭᠡᠳ ᠬᠥᠮᠦᠨ ᠤ ᠨᠡᠷ᠎ᠡ ᠳᠤ ᠴᠤ ᠪᠠᠶᠢᠩᠭᠤ ᠬᠡᠷᠡᠭᠯᠡᠭᠳᠡᠳᠡᠭ᠃ ᠬᠦᠪ ᠭᠡᠳᠡᠭ ᠨᠢ ᠭᠤᠣᠯ ᠤᠨ ᠡᠷᠭᠢ ᠳᠠᠭᠠᠤ ᠤᠰᠤ ᠲᠣᠭᠲᠠᠭᠰᠠᠨ ᠭᠦᠨ ᠨᠦᠬᠡ ᠶᠢ ᠬᠡᠯᠡᠨ᠎ᠡ᠃ ᠵᠡᠭᠦᠨ ᠣᠷᠣᠨ ᠳᠤ ᠭᠤᠣᠯ ᠤᠨ ᠴᠡᠭᠡᠯ ᠭᠡᠳᠡᠭ᠃      ᠮᠢᠩᠭ᠎ᠠ ᠶᠢᠰᠦᠨ ᠵᠠᠭᠤ ᠪᠥᠭᠡᠳ ᠲᠠᠪᠤᠨ ᠣᠨ ᠳᠤ ᠲᠥᠪᠡᠳ ᠤᠨ ᠠᠷᠪᠠᠨ ᠭᠤᠷᠪᠠᠳᠤᠭᠠᠷ ᠳᠠᠯᠠᠢ ᠯᠠᠮᠠ ᠲᠦᠪᠳᠦᠨᠵᠠᠮᠰᠤ᠂ ᠬᠠᠯᠬ᠎ᠠ ᠮᠣᠩᠭᠤᠯ ᠠᠴᠠ ᠲᠥᠪᠡᠳ ᠲᠡᠭᠡᠨ ᠪᠤᠴᠠᠬᠤ ᠳᠠᠭᠠᠨ ᠡᠵᠡᠨ᠎ᠡ ᠪᠠᠷ ᠳᠠᠭᠠᠷᠢᠵᠤ ᠢᠷᠡᠭᠡᠳ᠂ ᠤᠨᠤᠯᠭ᠎ᠠ ᠠᠴᠢᠯᠭ᠎ᠠ  ᠤᠨᠤᠭᠤᠵᠤ᠂ ᠡᠷᠭᠦᠯ ᠪᠠᠷᠢᠴᠠ ᠠᠪᠤᠨ᠂ ᠠᠯᠪᠠᠲᠤ ᠵᠠᠷᠤᠴᠠ ᠲᠠᠲᠠᠪᠤᠷᠢᠯᠠᠨ᠂ ᠲᠣᠮᠣᠬᠠᠨ ᠭᠡᠰᠡᠨ ᠬᠤᠶᠠᠷ ᠵᠠᠭᠤ ᠭᠠᠷᠤᠢ ᠮᠣᠩᠭᠤᠯ ᠭᠡᠷ ᠢ ᠵᠣᠴᠢᠯᠭᠠᠨ ᠳᠤ ᠲᠠᠲᠠᠪᠤᠷᠢᠯᠠᠨ ᠪᠡᠯᠡᠳᠬᠡᠭᠡᠳ ᠪᠠᠰᠠ ᠭᠦᠢᠴᠡᠭᠰᠡᠨ ᠦᠭᠡᠢ᠂ ᠶᠠᠳᠠᠭᠤ ᠬᠤᠭᠤᠰᠣᠨ ᠪᠠᠶᠢᠭᠰᠠᠨ ᠡᠵᠡᠨ᠎ᠡ ᠨᠤᠲᠤᠭ ᠢ ᠬᠤᠪᠠᠭ᠋ᠠᠶᠢᠷᠠᠲᠠᠯ᠎ᠠ ᠢᠳᠡᠵᠦ ᠥᠩᠭᠡᠷᠡᠪᠡ᠃ ᠡᠭᠦᠨ ᠢ ᠡᠵᠡᠨ᠎ᠡ ᠶᠢᠨ ᠲᠡᠦᠬᠡ ᠶᠢᠨ ᠡᠬᠡ ᠪᠢᠴᠢᠭ ᠲᠤ ᠳᠠᠯᠠᠢ ᠯᠠᠮᠠ ᠶᠢᠨ ᠳᠠᠵᠢᠨ ᠭᠡᠵᠦ ᠲᠡᠮᠳᠡᠭᠯᠡᠭᠰᠡᠨ ᠪᠤᠢ᠃ ᠲᠡᠷᠡ ᠦᠶ᠎ᠡ ᠳᠤ ᠳᠠᠯᠠᠶᠢᠬᠦ᠋ᠪ ᠤᠨ ᠬᠤᠶᠢᠨ᠎ᠠ ᠤᠯᠠᠭᠠᠨ ᠰᠤᠬᠠᠢ ᠶᠢᠨ ᠬᠠᠵᠠᠭᠤ ᠳᠠᠬᠢ ᠲᠠᠭᠰᠢᠭ᠎ᠠ ᠶᠢᠨ ᠭᠠᠭᠴᠠ ᠵᠢᠭᠲᠡᠨ ᠳᠡᠭᠡᠷ᠎ᠡ ᠤᠭᠲᠤᠭᠤᠯ ᠥᠷᠲᠡᠭᠡ ᠲᠣᠬᠢᠷᠠᠭᠤᠯᠤᠨ᠂ ᠳᠠᠯᠠᠢ ᠯᠠᠮᠠ ᠶᠢ ᠪᠠᠭᠤᠯᠭᠠᠵᠤ ᠠᠪᠤᠪᠠ᠃ ᠠᠷᠤ ᠥᠪᠥᠷ ᠤᠨ ᠮᠢᠩᠭ᠎ᠠ ᠭᠠᠷᠤᠢ ᠮᠥᠷᠭᠦᠯᠴᠢᠨ ᠵᠢᠴᠢ ᠤᠨᠤᠯᠭ᠎ᠠ᠂ ᠠᠴᠢᠯᠭ᠎ᠠ᠂ ᠡᠷᠭᠦᠯ ᠪᠠᠷᠢᠯᠭ᠎ᠠ ᠶᠢᠨ ᠬᠡᠳᠦᠨ ᠮᠢᠩᠭᠠᠨ ᠮᠠᠯ ᠠᠳᠤᠭᠤ ᠳ᠋ᠠᠰᠢ ᠣᠪᠣᠭ᠎ᠠ ᠶᠢᠨ ᠭᠤᠣᠯ ᠳᠣᠲᠣᠷᠠᠬᠢ ᠭᠠᠭᠴᠠ ᠬᠥᠪ ᠠᠴᠠ ᠤᠮᠳᠠᠯᠠᠳᠠᠭ ᠪᠠᠶᠢᠵᠠᠢ᠃ ᠢᠩᠭᠢᠭᠡᠳ ᠬᠦᠪ ᠤᠨ ᠤᠰᠤ ᠤᠮᠳᠠᠯᠠᠭᠠᠳ ᠰᠢᠷᠭᠢᠰᠢ ᠦᠭᠡᠢ ᠤᠤᠭᠤᠭᠠᠳ ᠳᠤᠨᠳᠠᠷᠠᠰᠢ ᠦᠭᠡᠢ ᠪᠣᠯᠬᠤᠷ ᠳᠠᠯᠠᠢ ᠰᠢᠭ᠋ ᠪᠠᠷᠠᠭᠳᠠᠳᠠᠭ ᠦᠭᠡᠢ ᠭᠡᠰᠡᠨ ᠤᠳᠬ᠎ᠠ ᠲᠠᠢ ︽ᠳᠠᠯᠠᠶᠢᠬᠦ᠋ᠪ︾ ᠭᠡᠵᠦ ᠪᠡᠯᠭᠡᠳᠡᠨ ᠨᠡᠷᠡᠯᠡᠵᠡᠢ᠃       ᠰᠡᠭᠦᠯ ᠤᠨ ᠬᠥᠮᠦᠰ ᠵᠠᠷᠢᠮ ᠨᠢ ᠳᠠᠯᠠᠢ ᠭᠡᠳᠡᠭ ᠬᠥᠮᠦᠨ ᠬᠦᠪ ᠲᠤ ᠤᠨᠠᠵᠤ ᠦᠬᠦᠭᠰᠡᠨ ᠪᠣᠯᠬᠤᠷ ᠢᠩᠭᠢᠵᠦ ᠨᠡᠷᠡᠯᠡᠪᠡ ᠭᠡᠳᠡᠭ ᠪᠤᠢ᠃ ᠵᠠᠷᠢᠮ ᠨᠢ ᠳᠠᠯᠠᠢ ᠶᠢᠨ ᠬᠥᠪᠡᠭᠡ ᠶᠢᠨ ︽ᠭᠤᠣᠯ ᠤᠨ ᠥᠷᠭᠡᠨ ᠢᠶᠠᠷ ᠨᠢ︾ ᠨᠡᠷᠡᠯᠡᠪᠡ ᠭᠡᠳᠡᠭ ᠴᠤ ᠪᠤᠢ᠃ ᠲᠠᠮᠠᠭ᠎ᠠ ᠲᠡᠮᠳᠡᠭ ᠳᠡᠭᠡᠷ᠎ᠡ ᠪᠠᠷᠤᠭ ︽ᠳᠠᠯᠠᠶᠢᠬᠦ᠋ᠪᠡᠭᠡ︾ ᠭᠡᠵᠦ ᠪᠢᠴᠢᠵᠦ ᠪᠤᠢ᠃ ᠪᠠᠰᠠ ᠰᠣᠨᠢᠨ ᠳᠡᠭᠡᠷ᠎ᠡ ︽  ᠳᠠᠯᠠᠶᠢᠬᠦ᠋ᠪᠡᠭᠡ︾ ᠭᠡᠰᠡᠨ ᠢᠶᠠᠨ ᠳᠠᠯᠠᠶᠢᠬᠦ᠋ᠪ ᠭᠡᠵᠦ ᠪᠢᠴᠢᠳᠡᠭ ᠴᠤ ᠪᠣᠯᠪᠠ᠃ ᠡᠷᠳᠡᠮᠲᠡᠨ ᠣᠯᠠᠨ ᠪᠣᠯᠬᠤᠷ ᠲᠤᠰ ᠪᠦᠷᠢ ᠳᠡᠭᠡᠨ ᠶᠣᠰᠣ ᠤᠴᠢᠷ ᠪᠠᠶᠢᠭ᠎ᠠ ᠯᠡ ᠪᠢᠵᠡ ᠳ᠋ᠠ᠃ ᠮᠢᠨᠦ ᠦᠵᠡᠬᠦ ᠪᠠᠷ ᠰᠡᠭᠦᠯ ᠤᠨ ᠬᠤᠶᠠᠷ ᠪᠢᠴᠢᠯᠭᠡ ᠳᠠᠭᠤᠳᠠᠯᠭ᠎ᠠ ᠪᠣᠯ ᠲᠡᠶᠢᠮᠦ ᠡᠰᠢ ᠪᠠᠷᠢᠮᠲᠠ ᠦᠭᠡᠢ ᠨᠡᠷᠡᠶᠢᠳᠦᠯ ᠪᠣᠯᠬᠤ ᠮᠡᠲᠦ᠃ ᠡᠭᠦᠨ ᠠᠴᠠ ᠭᠠᠳᠠᠨ᠎ᠠ ᠡᠵᠡᠨ᠎ᠡ ᠬᠤᠰᠢᠭᠤᠨ ᠳᠤ ᠪᠠᠰᠠ ᠵᠢᠶᠠ ᠴᠢᠦ ᠾᠧᠦ ᠶᠢᠨ ᠶᠠᠮᠤᠨ᠂ ᠲᠠᠪᠤᠨ ᠰᠤᠪᠤᠷᠭ᠎ᠠ᠂ ᠡᠪᠳᠡᠷᠬᠡᠢ ᠬᠤᠲᠠ᠂ ᠨᠣᠭᠤᠭᠠᠨ ᠰᠦᠮ᠎ᠡ᠂ ᠴᠠᠭᠠᠨ ᠰᠤᠪᠤᠷᠭ᠎ᠠ᠂ ᠰᠢᠨ᠎ᠡ ᠪᠠᠷᠠᠭᠤᠨ ᠰᠦᠮ᠎ᠡ ᠭᠡᠬᠦ ᠮᠡᠲᠦ ᠶᠢᠨ ᠲᠡᠦᠬᠡᠲᠦ ᠨᠤᠲᠤᠭ ᠤᠰᠤ ᠪᠤᠢ᠃       ᠡᠷᠳᠡᠮᠲᠡᠳ ᠤᠨ ᠦᠵᠡᠬᠦ ᠪᠠᠷ ᠡᠵᠡᠨ᠎ᠡ ᠶᠢᠨ ᠬᠢᠯᠢ ᠳᠤ ᠨᠢᠭᠡᠨ ︽ᠬᠠᠷ᠎ᠠ ᠠᠭᠤᠯᠠ︾ ︵ᠾᠧᠢ ᠱᠠᠨ︶ ᠭᠡᠰᠡᠨ ᠭᠠᠵᠠᠷ ᠪᠠᠶᠢᠬᠤ ᠶᠣᠰᠣᠲᠠᠢ᠃ ᠰᠢ ᠰᠢᠶᠠ ᠤᠯᠤᠰ ᠤᠨ ᠦᠶ᠎ᠡ ᠳᠤ ︽ᠾᠧᠢ ᠱᠠᠨ ᠸᠧᠢ ᠹᠦ᠋ ᠵᠢᠶᠦ᠋ᠨ ᠰᠧ︾ ᠪᠠᠶᠢᠭᠤᠯᠤᠭᠰᠠᠨ ᠢᠶᠠᠷ ᠡᠰᠢ ᠪᠠᠷᠢᠮᠲᠠ ᠲᠠᠲᠠᠭᠰᠠᠨ ᠪᠣᠯᠤᠯᠲᠠᠢ᠃ ᠬᠡᠳᠦᠨ ᠵᠢᠯ ᠤᠨ ᠨᠤᠲᠤᠭ ᠤᠰᠤᠨ ᠤ ᠠᠵᠢᠯ ᠤᠨ ᠳᠤᠮᠳᠠ ᠪᠢᠳᠡ ᠡᠨᠡ ᠭᠠᠵᠠᠷ ᠢ ᠮᠠᠰᠢ ᠬᠢᠴᠢᠶᠡᠩᠭᠦᠶᠢᠯᠡᠨ ᠡᠷᠢᠭᠰᠡᠨ ᠴᠤ ᠣᠯᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃ ᠮᠠᠨ ᠤ ᠲᠠᠭᠠᠮᠠᠭ ᠢᠶᠠᠷ ᠡᠨᠡ ᠭᠠᠵᠠᠷ ︽ᠬᠠᠷ᠎ᠠ ᠬᠤᠲᠠ︾᠎ ᠠᠴᠠ ᠶᠡᠭᠡ ᠬᠤᠯᠠ ᠠᠯᠤᠰ ᠪᠠᠶᠢᠵᠤ ᠴᠢᠳᠠᠬᠤ ᠦᠭᠡᠢ ᠣᠶᠢᠷᠠᠬᠠᠨ ᠯᠡ ᠪᠠᠶᠢᠮᠠᠷ ᠶᠤᠮ᠃ ᠡᠵᠡᠨ᠎ᠡ ᠭᠤᠣᠯ ᠳᠠᠭᠠᠤ ᠬᠠᠷ᠎ᠠ ᠬᠤᠲᠠ ᠶᠢᠨ ᠬᠠᠪᠢ ᠳᠠᠭᠠᠤ ᠶᠡᠷᠦ ᠨᠢ ᠠᠭᠤᠯᠠ ᠦᠭᠡᠢ᠃ ᠣᠳᠣ ᠬᠠᠷ᠎ᠠ ᠬᠤᠲᠠ ᠠᠴᠠ ᠪᠠᠷᠠᠭᠤᠨ ᠤᠷᠤᠭᠰᠢ ᠬᠤᠷᠢᠨ ᠲᠠᠪᠤᠨ ᠺᠢᠯᠣᠮᠧᠲᠷ ᠤᠨ ᠦᠵᠦᠭᠦᠷ ᠲᠤ ᠮᠤᠵᠢ ᠶᠢᠨ ᠠᠭᠤᠯᠠ ᠪᠠᠶᠢᠳᠠᠭ᠃ ᠡᠨᠡ ᠪᠣᠯ ᠬᠠᠷ᠎ᠠ ᠬᠤᠲᠠ ᠠᠴᠠ ᠬᠠᠮᠤᠭ ᠤᠨ ᠦᠢᠷ᠎ᠡ ᠪᠠᠶᠢᠭ᠎ᠠ ᠠᠭᠤᠯᠠ ᠪᠣᠯᠣᠨ᠎ᠠ᠃ ᠮᠥᠨᠴᠦ ᠭᠤᠪᠢ ᠬᠥᠯ ᠤᠨ ᠵᠠᠪᠰᠠᠷ ᠳᠠᠬᠢ ᠴᠤᠷ ᠤᠨ ᠭᠠᠭᠴᠠ ᠠᠭᠤᠯᠠ ᠪᠢᠯᠡ᠃ ᠡᠨᠡ ᠠᠭᠤᠯᠠ ᠶᠢᠨ ᠣᠷᠣᠢ ᠳᠡᠭᠡᠷ᠎ᠡ ᠴᠣᠨᠵᠢ ᠪᠤᠢ᠂ ᠪᠠᠷᠠᠭᠤᠨᠰᠢ ᠨᠢᠭᠡᠨ ᠤᠲᠠᠰᠤᠨ ᠳᠡᠭᠡᠷ᠎ᠡ ᠪᠠᠷ᠎ᠠ ᠪᠠᠷ᠎ᠠ ᠳᠠᠭᠠᠨ ᠴᠣᠨᠵᠢ ᠦᠷᠭᠦᠯᠵᠢᠯᠡᠵᠦ ᠪᠠᠶᠢᠭ᠎ᠠ ᠪᠥᠭᠡᠳ ᠮᠤᠵᠢ ᠠᠴᠠ ᠵᠡᠭᠦᠨᠰᠢ ᠬᠥᠬᠡ ᠲᠣᠯᠣᠭᠠᠢ᠂ ᠮᠣᠷᠢᠨ ᠲᠣᠯᠣᠭᠠᠢ ᠬᠠᠪᠢ ᠳᠠᠬᠢ ᠴᠣᠨᠵᠢ ᠨᠢ ᠰᠢᠭᠤᠳ ᠬᠠᠷ᠎ᠠ ᠬᠤᠲᠠ ᠶᠢ ᠴᠢᠭᠯᠡᠨ ᠶᠠᠪᠤᠭᠰᠠᠨ ᠪᠠᠶᠢᠳᠠᠭ᠂ ᠡᠳᠡᠭᠡᠷ ᠴᠣᠨᠵᠢ ᠶᠢᠨ ᠬᠤᠭᠤᠷᠣᠨᠳᠣ ᠵᠢᠵᠢᠭ ᠵᠢᠵᠢᠭ ᠣᠪᠣᠭᠤᠷ ᠰᠢᠷᠣᠢ ᠦᠷᠭᠦᠯᠵᠢᠯᠡᠵᠦ ᠪᠠᠶᠢᠬᠤ ᠮᠥᠷᠲᠡᠭᠡᠨ ᠮᠤᠵᠢ ᠠᠴᠠ ᠠᠪᠤᠭᠠᠳ ᠡᠳᠡᠭᠡᠷ ᠴᠣᠨᠵᠢ ᠶᠢᠨ ᠬᠤᠭᠤᠷᠣᠨᠳᠣ ᠬᠤᠯᠪᠣᠭᠰᠠᠨ ᠰᠤᠪᠠᠭ ᠶᠤᠮ ᠤᠤ︖ ᠡᠰᠡᠬᠦᠯ᠎ᠡ ᠨᠦᠬᠡᠨ ᠵᠠᠮ ᠶᠤᠮ ᠤᠤ ᠬᠡᠮᠡᠷ ᠣᠷᠣᠮ ᠪᠤᠢ᠃ ᠪᠠᠰᠠ ᠮᠤᠵᠢ ᠶᠢᠨ ᠠᠭᠤᠯᠠ ᠶᠢᠨ ᠬᠠᠪᠢ ᠳᠠᠬᠢ ᠪᠠᠭᠤᠳᠠᠯ ᠤᠨ ᠠᠷᠤ ᠲᠠᠯ᠎ᠠ ᠶᠢᠨ ᠴᠢᠯᠠᠭᠤᠨ ᠳᠡᠭᠡᠷ᠎ᠡ ᠮᠠᠨᠢ ᠶᠢᠨ ᠵᠢᠷᠭᠤᠭᠠᠨ ᠦᠰᠦᠭ ᠰᠡᠶᠢᠯᠦᠭᠰᠡᠨ ᠪᠠᠶᠢᠳᠠᠭ᠂ ᠡᠨᠡ ᠨᠢ ᠠᠯᠢ ᠦᠶ᠎ᠡ ᠳᠠᠬᠢ ᠶᠠᠮᠠᠷ ᠬᠥᠮᠦᠨ ᠤ ᠪᠦᠲᠦᠭᠡᠯ ᠪᠣᠯᠬᠤ ᠶᠢ ᠬᠡᠳᠦᠢ ᠰᠤᠷᠪᠤᠯᠵᠢᠯᠠᠵᠤ ᠠᠰᠠᠭᠤᠭᠠᠳ ᠮᠡᠳᠡᠭᠰᠡᠨ ᠬᠥᠮᠦᠨ ᠭᠠᠷᠤᠭᠰᠠᠨ ᠦᠭᠡᠢ᠃ ᠶᠡᠷᠦ ᠨᠢ ᠡᠷᠲᠡᠨ ᠤ ᠯᠡ ᠶᠤᠮ ᠭᠡᠵᠦ ᠬᠡᠯᠡᠯᠴᠡᠳᠡᠭ ᠪᠠᠶᠢᠨ᠎ᠠ᠃ ᠴᠣᠨᠵᠢ ᠶᠢᠨ ᠶᠠᠪᠤᠭᠰᠠᠨ ᠬᠠᠨᠳᠤᠰᠢ᠂ ᠮᠤᠵᠢ ᠶᠢᠨ ᠠᠭᠤᠯᠠᠨ ᠣᠷᠣᠢ ᠳᠡᠭᠡᠷᠡᠬᠢ ᠴᠣᠨᠵᠢ ᠪᠠ ᠲᠡᠭᠦᠨ ᠤ ᠣᠷᠣᠰᠢᠨ ᠲᠣᠭᠲᠠᠨᠢᠭᠰᠠᠨ ᠪᠠᠶᠢᠷᠢ ᠰᠠᠭᠤᠷᠢ ᠠᠴᠠ ᠦᠵᠡᠬᠦ ᠳᠤ ᠬᠠᠷ᠎ᠠ ᠬᠤᠲᠠ ᠶᠢᠨ ᠰᠡᠷᠭᠡᠶᠢᠯᠡᠯᠲᠡ ᠶᠢᠨ ᠱᠤᠭᠤᠮ ᠎ ᠲᠠᠢ ᠬᠤᠯᠪᠣᠭ᠎ᠠ ᠲᠠᠢ ᠪᠠᠶᠢᠮᠠᠷ᠃ ᠡᠶᠢᠮᠦ ᠴᠤ ᠤᠴᠢᠷ ᠠᠴᠠ ᠲᠡᠦᠬᠡᠨ ᠳᠡᠭᠡᠷ᠎ᠡ ᠭᠠᠷᠳᠠᠭ ︽ᠾᠧᠢ ᠱᠠᠨ︾᠎ ᠨᠢ ᠣᠳᠣ ᠶᠢᠨ ᠮᠤᠵᠢ ᠶᠢᠨ ᠠᠭᠤᠯᠠ ᠪᠣᠯᠪᠠᠤ ᠭᠡᠵᠦ ᠬᠤᠪᠢᠨ ᠳᠠᠭᠠᠨ ᠲᠠᠭᠠᠭᠠᠪᠤᠷᠢᠯᠠᠵᠤ ᠪᠠᠶᠢᠨ᠎ᠠ᠃ ᠤᠯᠠᠨ ᠡᠷᠳᠡᠮᠲᠡᠳ ᠤᠨ ᠦᠷᠭᠦᠯᠵᠢᠯᠡᠨ ᠰᠢᠨᠵᠢᠯᠡᠬᠦ ᠳᠤ ᠥᠪᠡᠷ ᠤᠨ ᠡᠶᠢᠮᠦ ᠨᠢᠭᠡᠨ ᠰᠦᠪᠡᠭᠴᠢ ᠶᠢ ᠰᠢᠨᠵᠢᠯᠡᠬᠦ ᠳᠤ ᠯᠠᠪᠯᠠᠯᠲᠠ ᠦᠯᠡᠳᠡᠭᠡᠰᠦᠭᠡᠢ᠃                   —— ︽ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠰᠣᠶᠣᠯ ᠲᠡᠦᠬᠡ ᠶᠢᠨ ᠮᠠᠲ᠋ᠧᠷᠢᠶᠠᠯ ︵1— 2︶︾᠎ ᠠᠴᠠ
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤᠨ ᠲᠥᠪ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠡᠰᠡᠭ ᠭᠠᠵᠠᠷ ᠤᠨ ᠨᠡᠷᠡᠰ ︵ᠨᠢᠭᠡ︶
ᠡᠵᠡᠨ᠎ᠡ ᠭᠡᠬᠦ ᠨᠡᠷ᠎ᠡ ᠲᠠᠢ ᠬᠣᠯᠪᠤᠭᠳᠠᠬᠤ ᠲᠤᠮᠤᠭ ᠶᠠᠷᠢᠶ᠎ᠠ
ᠡᠵᠡᠨ᠎ᠡ ᠨᠤᠲᠤᠭ ᠤᠨ ᠴᠡᠭᠡᠷ ᠶᠤᠰᠤᠨ
ᠡᠷᠲᠡᠨ ᠦ ᠡᠷᠳᠡᠨᠢᠰ ᠦᠨ ᠰᠠᠩ ᠪᠤᠯᠤᠭᠰᠠᠨ ᠬᠠᠷ᠎ᠠ ᠬᠤᠲᠠ ᠶᠢᠨ ᠪᠠᠭᠤᠷᠢ
ᠡᠵᠡᠨ᠎ᠡ ᠲᠣᠷᠭᠤᠳᠴᠤᠳ ᠤᠨ ᠣᠩᠭᠤᠯᠠᠵᠤ ᠳᠠᠷᠬᠠᠯᠠᠭᠰᠠᠨ ᠲᠣᠣᠷᠠᠢ ᠵᠢᠴᠢ ᠲᠡᠭᠦᠨ ᠲᠠᠢ ᠬᠣᠯᠪᠤᠭᠳᠠᠭᠰᠠᠨ ᠳᠤᠮᠤᠭ ᠬᠠᠭᠤᠴᠢ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号