ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠨᠠᠮ ᠤᠨ ᠲᠡᠥᠬᠡ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠲᠣᠷᠭᠤᠳ ᠬᠤᠷᠢᠮ ᠤᠨ ᠬᠡᠦᠬᠡᠨ ᠭᠤᠶᠤᠬᠤ ᠶᠤᠰᠤᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2022/12/8
      ᠬᠦᠪᠡᠭᠦᠨ ᠬᠡᠦᠬᠡᠨ ᠢ ᠪᠠᠷᠤᠭ ᠲᠠᠭᠠᠨ ᠠᠷᠪᠠᠨ ᠲᠦᠷᠪᠡ ᠲᠠᠪᠤ ᠬᠦᠷᠦᠭᠰᠡᠭᠡᠷ ᠬᠦᠪᠡᠭᠦᠨ ᠳᠡᠭᠡᠨ ᠪᠡᠷᠢ ᠭᠤᠶᠤᠬᠤ ᠠᠵᠢᠯ ᠡᠬᠢᠯᠡᠳᠡᠭ ᠪᠠᠶᠢᠵᠠᠢ᠃ ᠢᠩᠬᠢᠬᠦ ᠳᠡᠭᠡᠨ ᠤᠯᠠᠩᠬᠢ ᠨᠢ ᠤᠶᠢᠷ᠎ᠠ ᠰᠠᠭᠠᠬᠠᠯᠳᠠ ᠪᠦᠭᠡᠳ ᠤᠳᠤᠮ ᠰᠠᠶᠢᠳᠠᠢ ᠠᠶᠢᠯ ᠤᠨ ᠬᠡᠦᠬᠡᠨ ᠢ ᠬᠠᠶᠢᠨ᠎ᠠ᠂ ᠨᠠᠰᠤ ᠵᠢᠯ ᠢ ᠨᠢ ᠰᠤᠷᠠᠭᠯᠠᠵᠤ ᠮᠡᠳᠡᠭᠡᠳ ᠬᠦᠪᠡᠭᠦᠨ ᠤ ᠠᠪᠤ ᠡᠵᠢ ᠪᠤᠶᠤ ᠠᠬ᠎ᠠ᠂ ᠡᠰᠡᠭᠦᠯ᠎ᠡ ᠤᠶᠢᠷ᠎ᠠ ᠲᠦᠷᠦᠯ ᠨᠢ ᠵᠢᠷᠤᠬᠠᠶᠢᠴᠢ ᠳᠤ ᠬᠦᠷᠴᠦ ᠬᠦᠪᠡᠭᠦᠨ ᠬᠡᠦᠬᠡᠨ ᠤ ᠨᠠᠰᠤ ᠵᠢᠯ ᠢ ᠬᠡᠯᠡᠵᠦ ᠲᠠᠯᠠᠳᠠᠭᠤᠯᠬᠤ ︵ᠦᠵᠡᠭᠦᠯᠬᠦ︶᠎ ᠪᠠᠷ ᠭᠤᠶᠤᠴᠢᠯᠠᠨ᠎ᠠ᠃ ᠵᠢᠷᠤᠬᠠᠶᠢᠴᠢ ᠠᠴᠠ ᠬᠤᠶᠠᠷ ᠬᠡᠦᠬᠡᠰ ᠤᠨ ᠮᠡᠩᠭᠡ ᠤᠳᠤ ᠲᠠᠭᠠᠷᠠᠬᠤ ᠡᠰᠡᠬᠦ᠂ ᠨᠠᠰᠤ ᠵᠢᠯ ᠢᠪᠡᠭᠡᠯ ᠡᠰᠡᠬᠦ᠂ ᠭᠠᠢ ᠪᠡᠷᠴᠢᠳ ᠲᠠᠢ ᠡᠰᠡᠬᠦ᠂ ᠲᠦᠷᠦᠯᠬᠢ ᠬᠤᠪᠢ ᠵᠠᠶᠠᠭ᠎ᠠ ᠶᠠᠮᠠᠷ ᠵᠡᠷᠭᠡ ᠶᠢ ᠲᠠᠯᠠᠳᠠᠵᠤ ᠦᠭᠭᠦᠨ᠎ᠡ᠃ ᠲᠠᠯ᠎ᠠ ᠦᠩᠭᠡ ᠨᠢ ᠡᠰᠡ ᠲᠠᠭᠠᠷᠠᠪᠠᠯ ᠲᠠᠯ᠎ᠠ ᠢᠷᠦᠭᠡᠯ ᠦᠭᠡᠢ ᠭᠡᠰᠡᠨ ᠢ ᠨᠢ ᠰᠢᠭᠤᠳ ᠬᠡᠯᠡᠵᠦ᠂ ᠭᠠᠢ ᠪᠡᠷᠴᠢᠳ ᠲᠠᠢ ᠪᠠᠶᠢᠪᠠᠯ ᠠᠷᠭ᠎ᠠ ᠲᠤᠮ ᠬᠢᠵᠦ ᠦᠭᠭᠦᠨ᠎ᠡ᠂ ᠠᠷᠭ᠎ᠠ ᠲᠤᠮ ᠬᠢᠯᠭᠡᠭᠡᠳ ᠴᠤ ᠪᠤᠯᠬᠤ ᠦᠭᠡᠢ ᠭᠡᠪᠡᠯ ᠤᠭ ᠤᠨ ᠰᠠᠨᠠᠭ᠎ᠠ ᠪᠠᠨ ᠬᠤᠷᠢᠶᠠᠵᠤ ᠦᠭᠡᠷ᠎ᠡ ᠠᠶᠢᠯ ᠤᠨ ᠬᠡᠦᠬᠡᠨ ᠢ ᠬᠠᠶᠢᠬᠤ ᠪᠤᠯᠤᠨ᠎ᠠ᠃ ᠤᠯᠠᠩᠬᠢ ᠠᠶᠢᠯ ᠨᠢᠭᠡ ᠲᠤᠭᠤᠭᠰᠠᠨ ᠬᠡᠦᠬᠡᠨ ᠢ ᠵᠢᠷᠤᠬᠠᠶᠢᠴᠢ ᠪᠠᠷ ᠲᠠᠯᠠᠳᠠᠭᠤᠯᠬᠤ ᠨᠢ ᠠᠷᠪᠢᠨ᠂ ᠬᠤᠶᠠᠷ ᠬᠡᠦᠬᠡᠨ ᠢ ᠵᠡᠷᠭᠡ ᠪᠠᠷ ᠲᠠᠯᠠᠳᠠᠭᠤᠯᠤᠨ ᠰᠤᠩᠭᠤᠯᠳᠠ ᠬᠢᠬᠦ ᠨᠢ ᠴᠦᠬᠡᠨ ᠪᠠᠶᠢᠵᠠᠢ᠃ ᠤᠶᠢᠷ᠎ᠠ ᠰᠠᠭᠠᠬᠠᠯᠳᠠ ᠠᠶᠢᠯ ᠤᠨ ᠬᠡᠦᠬᠡᠨ ᠢ ᠲᠠᠯᠠᠳᠠᠭᠤᠯᠤᠭᠠᠳ ᠡᠰᠡ ᠪᠦᠳᠦᠪᠡᠯ ᠬᠤᠯᠠ ᠪᠠᠶᠢᠬᠤ ᠲᠦᠷᠦᠯ ᠪᠤᠶᠤ ᠰᠠᠶᠢᠨ ᠨᠠᠶᠢᠵᠠ ᠪᠠᠷ ᠢᠶᠠᠨ ᠬᠡᠦᠬᠡᠨ ᠰᠤᠷᠠᠭᠯᠠᠭᠤᠯᠵᠤ ᠲᠡᠳᠡᠨ ᠢᠶᠠᠷ ᠲᠠᠮᠵᠢᠭᠤᠯᠤᠨ ᠠᠶᠢᠯ ᠤᠨ ᠬᠡᠦᠬᠡᠨ ᠤ ᠨᠠᠰᠤ ᠵᠢᠯ ᠢ ᠮᠡᠳᠡᠭᠡᠳ ᠵᠢᠷᠤᠬᠠᠶᠢᠴᠢ ᠪᠠᠷ ᠮᠡᠷᠭᠡᠯᠡᠭᠦᠯᠬᠦ ᠨᠢ ᠪᠠᠰᠠ ᠪᠠᠶᠢᠵᠠᠢ᠃ ᠵᠢᠷᠤᠬᠠᠶᠢᠴᠢ ᠳᠤ ᠤᠯᠠᠩᠬᠢ ᠨᠢ ᠬᠠᠳᠠᠭ ᠪᠠᠷᠢᠵᠤ᠂ ᠨᠦᠬᠦᠴᠡᠯ ᠰᠠᠶᠢᠳᠠᠢ       ᠠᠶᠢᠯ ᠪᠤᠯ ᠡᠷᠳᠡᠨᠢ ᠶᠢᠨ ᠵᠦᠢᠯ᠂ ᠲᠤᠷᠭ᠎ᠠ ᠲᠤᠷᠳᠤᠮ ᠪᠠᠷᠢᠵᠤ ᠪᠤᠶᠠᠨ ᠦᠢᠯᠡᠳᠴᠦ ᠪᠤᠷᠬᠠᠨ ᠰᠠᠬᠢᠭᠤᠯᠰᠤ ᠳᠤ ᠲᠠᠭᠠᠳᠬᠠᠬᠤ ᠶᠢ ᠬᠦᠰᠡᠳᠡᠭ ᠪᠠᠶᠢᠵᠠᠢ᠂ ᠢᠩᠬᠢᠭᠦ ᠳᠡᠭᠡᠨ ᠠᠶᠢᠯ ᠤᠳ ᠦᠪᠡᠷ ᠤᠨ ᠲᠦᠷᠦᠯ ᠪᠤᠶᠤ ᠤᠯᠠᠨ ᠳᠤ ᠪᠢᠰᠢᠷᠡᠭᠳᠡᠭᠰᠡᠨ ᠵᠢᠷᠤᠬᠠᠶᠢᠴᠢ ᠪᠠᠷ ᠲᠠᠯᠠᠳᠠᠭᠤᠯᠤᠨ᠎ᠠ᠂ ᠤᠨᠴᠠ ᠵᠠᠷᠢᠮ ᠨᠢ ᠭᠦᠮᠪᠦᠮ᠂ ᠯᠠᠪᠷᠤᠩ ᠵᠡᠷᠭᠡ ᠭᠠᠵᠠᠷ ᠤᠨ ᠨᠡᠷᠡᠳᠡᠢ ᠵᠢᠷᠤᠬᠠᠶᠢᠴᠢ ᠪᠠᠷ ᠲᠠᠯᠠᠳᠠᠭᠤᠯᠤᠨ᠎ᠠ᠃ ᠵᠢᠷᠤᠬᠠᠶᠢᠴᠢ ᠠᠴᠠ ᠬᠦᠪᠡᠭᠦᠨ ᠬᠡᠦᠬᠡᠨ ᠤ ᠨᠠᠰᠤ ᠵᠢᠯ ᠢᠪᠡᠭᠡᠯ ᠭᠡᠮᠡᠨ ᠥᠵᠡᠭᠰᠡᠬᠡᠷ ᠴᠢᠨᠠᠭᠰᠢᠳᠠ ᠬᠡᠦᠬᠡᠨ ᠭᠤᠶᠤᠬᠤ ᠰᠠᠶᠢᠨ ᠡᠳᠦᠷ ᠦᠵᠡᠭᠦᠯᠦᠨ ᠬᠡᠦᠬᠡᠨ ᠤ ᠠᠪᠤ ᠡᠵᠢ ᠳᠤ ᠴᠢᠮᠡᠭᠡ ᠦᠭᠭᠦᠨ᠎ᠡ᠃ ᠬᠦᠪᠡᠭᠦᠨ ᠤ ᠠᠪᠤ ᠡᠵᠢ ᠬᠡᠯᠡ ᠠᠮᠠᠨ ᠳᠠᠭᠠᠨ ᠬᠤᠷᠴᠠ᠂ ᠠᠷᠭ᠎ᠠ ᠰᠠᠮᠪᠠᠭ᠎ᠠ ᠰᠠᠶᠢᠳᠠᠢ᠂ ᠰᠡᠴᠡᠨ ᠰᠡᠷᠭᠦᠯᠡᠩ᠂ ᠶᠤᠰᠤ ᠤᠴᠢᠷ ᠮᠡᠳᠡᠳᠡᠭ ᠪᠦᠰᠡᠳᠡᠢ ᠬᠦᠮᠦᠨ ᠤᠯᠵᠤ ᠬᠡᠦᠬᠡᠨ ᠤ ᠲᠠᠯ᠎ᠠ ᠳᠤ ᠬᠡᠦᠬᠡᠨ ᠭᠤᠶᠤᠯᠭᠠᠬᠤ ᠪᠠᠷ ᠶᠠᠪᠤᠭᠤᠯᠤᠨ᠎ᠠ᠂ ᠬᠦᠦ ᠶᠢᠨ ᠠᠪᠤ᠂ ᠠᠬ᠎ᠠ ᠪᠤᠶᠤ ᠤᠶᠢᠷ᠎ᠠ ᠲᠦᠷᠦᠯ ᠨᠢ ᠶᠠᠪᠤᠬᠤ ᠨᠢ ᠪᠠᠰᠠ ᠪᠠᠶᠢᠨ᠎ᠠ᠂ ᠭᠡᠪᠡᠴᠦ ᠲᠦᠷᠦᠯ ᠪᠤᠰᠤ ᠬᠦᠮᠦᠨ ᠶᠠᠪᠤᠭᠤᠯᠬᠤ ᠨᠢ ᠤᠯᠠᠨ ᠪᠠᠶᠢᠵᠠᠢ᠃ ᠬᠡᠦᠬᠡᠨ ᠭᠤᠶᠤᠯᠭᠠᠬᠤ ᠪᠠᠷ ᠤᠯᠠᠩᠬᠢ ᠠᠶᠢᠯ ᠭᠠᠭᠴᠠ ᠬᠤᠶᠠᠷ ᠬᠦᠮᠦᠨ ᠶᠠᠪᠤᠭᠤᠯᠤᠨ᠎ᠠ᠂ ᠶᠠᠪᠤᠬᠤ ᠬᠦᠮᠦᠨ ᠳ᠋ᠠᠮᠪᠢ ᠲᠠᠢ ᠠᠷᠢᠬᠢ ︵ᠬᠦᠵᠦᠭᠦᠨ ᠳᠤᠨᠢ ᠬᠠᠳᠠᠭ ᠤᠶᠠᠭᠰᠠᠨ ᠪᠠᠶᠢᠳᠠᠭ︶᠂ ᠬᠠᠳᠠᠭ ᠠᠪᠴᠤ ᠭᠦᠷᠦᠨ᠎ᠡ᠃ ᠠᠮᠤᠷ ᠮᠡᠨᠳᠦ ᠰᠤᠷᠠᠭᠯᠠᠨ ᠲᠠᠮᠠᠬᠢᠯᠠᠵᠤ᠂ ᠬᠡᠦᠬᠡᠨ ᠤ ᠲᠠᠯ᠎ᠠ ᠶᠢᠨ ᠬᠢᠨ ᠴᠠᠢ ᠬᠢᠵᠦ ᠢᠳᠡᠭᠡ ᠵᠠᠰᠠᠭᠰᠠᠨ ᠲᠠᠷᠠᠭ᠎ᠠ ᠪᠠᠷ ᠬᠡᠦᠬᠡᠨ ᠭᠤᠶᠤᠬᠤ ᠤᠯᠤᠰ ᠬᠡᠦᠬᠡᠨ ᠤ ᠠᠪᠤ ᠡᠵᠢ᠂ ᠠᠪᠠᠭ᠎ᠠ       ᠨᠠᠭᠠᠴᠤ ᠳᠤ ᠢᠷᠡᠭᠰᠡᠨ ᠤᠴᠢᠷ ᠢᠶᠠᠨ ᠲᠤᠳᠤᠷᠬᠠᠶᠢᠯᠠᠬᠤ ᠪᠠᠷ ᠠᠬᠠᠯᠠᠭᠴᠢ ᠬᠦᠮᠦᠨ ᠨᠢ ᠪᠤᠰᠴᠤ ᠵᠤᠭᠰᠤᠭᠠᠳ᠄ ᠰᠤᠷᠠᠵᠤ ᠤᠯᠳᠠᠳᠠᠭ ᠦᠭᠡᠢ ᠰᠤᠪᠤᠳ ᠡᠷᠳᠡᠨᠢ᠂ ᠬᠠᠶᠢᠵᠤ ᠤᠯᠳᠠᠳᠠᠭ ᠦᠭᠡᠢ ᠬᠠᠰ ᠡᠷᠳᠡᠨᠢ ᠲᠠᠨ ᠤ ᠳᠤ ᠪᠠᠶᠢᠨ᠎ᠠ ᠭᠡᠨ᠎ᠡ᠂ ᠵᠤᠤ ᠶᠢᠨ ᠰᠢᠷ᠎ᠠ ᠵᠢᠷᠤᠬᠠᠶᠢᠴᠢ ᠪᠠᠷ ᠲᠠᠯᠠᠳᠠᠭᠤᠯᠤᠭᠰᠠᠨ ᠳᠤ ᠠᠶᠢᠯ ᠤᠨ ᠬᠦᠪᠡᠭᠦᠨ ᠲᠠᠨ ᠤ ᠬᠡᠦᠬᠡᠨ ᠦᠷ᠎ᠡ ᠎ ᠲᠠᠢ ᠲᠠᠯ᠎ᠠ ᠲᠠᠢ ᠢᠪᠡᠭᠡᠯ ᠲᠠᠢ ᠭᠡᠨ᠎ᠡ᠂ ᠲᠠᠨ ᠯᠤᠭ᠎ᠠ ᠤᠷᠤᠭ ᠰᠠᠳᠤᠨ ᠪᠠᠷᠢᠯᠳᠤᠬᠤ ᠪᠠᠷ ᠢᠷᠡᠯ᠎ᠡ᠂ ᠲᠠᠨ ᠤ ᠠᠯᠳᠠᠨ ᠰᠤᠭᠤ ᠠᠭᠤᠵᠢᠮ ᠬᠤᠷᠮᠤᠢ ᠳᠤ ᠪᠠᠭᠳᠠᠬᠤ ᠪᠠᠷ ᠢᠷᠡᠯ᠎ᠡ᠂ ᠠᠰ ᠭᠤᠸ᠎ᠠ ᠪᠡᠶ᠎ᠡ ᠲᠠᠢ᠂ ᠠᠮᠢᠳᠤ ᠡᠷᠳᠡᠨᠢ ᠪᠤᠯᠤᠭᠰᠠᠨ ᠬᠡᠦᠬᠡᠨ ᠢ ᠲᠠᠨᠢ ᠭᠤᠶᠤᠬᠤ ᠪᠠᠷ ᠢᠷᠡᠯ᠎ᠡ ᠭᠡᠳ ᠬᠡᠦᠬᠡᠨ ᠤ ᠠᠪᠤ ᠡᠵᠢ ᠳᠤ ᠬᠠᠳᠠᠭ ᠢᠶᠠᠨ ᠪᠠᠷᠢᠨ᠎ᠠ ︵ᠠᠩᠬᠠᠨ ᠎ ᠳᠠᠭᠠᠨ ᠬᠦᠬᠦᠤᠷ ᠪᠠᠷᠢᠵᠤ ᠭᠤᠶᠤᠳᠠᠭ ᠪᠠᠶᠢᠵᠠᠢ︶᠃ ᠬᠡᠦᠬᠡᠨ ᠤ ᠠᠪᠤ ᠡᠵᠢ ᠵᠦᠪᠰᠢᠶᠡᠷᠡᠪᠡᠯ ᠬᠠᠳᠠᠭ ᠢ ᠨᠢ       ᠲᠤᠤᠷ᠎ᠠ ᠨᠢ ᠬᠦᠯᠢᠶᠠᠨ ᠠᠪᠤᠨ᠎ᠠ᠂ ᠲᠡᠭᠡᠬᠦ ᠳᠤ ᠪᠤᠷᠬᠠᠨ ᠪᠠ ᠭᠠᠯ ᠳᠤᠨᠢ ᠪᠠᠰᠠ ᠬᠠᠳᠠᠭ ᠡᠷᠭᠦᠨ᠎ᠡ᠃ ᠡᠰᠡ ᠵᠦᠪᠰᠢᠶᠡᠷᠡᠪᠡᠯ ᠬᠠᠳᠠᠭ ᠢ ᠨᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ ᠮᠦᠷᠳᠡᠭᠡᠨ ᠵᠠᠷᠢᠮ ᠨᠢ ᠲᠤᠷ᠎ᠠ ᠦᠭᠡᠢ ᠭᠡᠳᠡᠭ ᠢᠶᠠᠨ ᠰᠢᠭᠤᠳ ᠬᠡᠯᠡᠵᠦ᠂ ᠵᠠᠷᠢᠮ ᠨᠢ ᠶᠠᠭᠤ ᠴᠤ ᠲᠤᠤᠭᠠᠷᠬᠤ ᠦᠭᠡᠢ᠂ ᠲᠠᠷᠤᠢ ᠠᠮᠠ ᠦᠭᠬᠦ ᠦᠭᠡᠢ ᠦᠩᠭᠡᠷᠡᠭᠡᠨ᠎ᠡ᠃ ᠲᠡᠶᠢᠮᠦ ᠪᠠᠶᠢᠳᠠᠯ ᠲᠤᠤᠷ᠎ᠠ ᠬᠤᠶᠠᠷ ᠭᠤᠷᠪᠠᠳᠠᠬᠢ ᠤᠳᠠᠭ᠎ᠠ ᠬᠦᠷᠴᠦ ᠪᠠᠰᠠ ᠭᠤᠶᠤᠨ᠎ᠠ᠃ ᠤᠨᠴᠠ ᠵᠠᠷᠢᠮ ᠨᠢ ᠬᠡᠳᠦᠨ ᠵᠢᠯ ᠢᠶᠠᠷ ᠬᠤᠶᠢᠰᠢᠯᠠᠭᠤᠯᠵᠤ ᠵᠦᠪᠰᠢᠶᠡᠷᠡᠬᠦ ᠨᠢ ᠪᠠᠶᠢᠵᠠᠢ᠃ ᠬᠡᠦᠬᠡᠨ ᠲᠠᠯ᠎ᠠ ᠵᠦᠪᠰᠢᠶᠡᠷᠡᠪᠡᠯ ᠬᠦᠪᠡᠭᠦᠨ ᠤ ᠠᠪᠤ ᠡᠵᠢ ᠰᠦᠢ ᠰᠦᠩ ᠬᠡᠵᠢᠶ᠎ᠡ ᠲᠠᠯᠪᠢᠪᠠᠯ ᠪᠤᠯᠬᠤ᠂ ᠬᠡᠴᠢᠨᠡᠨ ᠬᠦᠮᠦᠨ ᠤ ᠪᠡᠯᠡᠭ ᠰᠡᠯᠳᠡ ᠪᠡᠯᠡᠳᠦᠬᠦ ᠲᠤᠬᠠᠢ ᠵᠦᠪ ᠠᠪᠬᠤ ᠎ ᠪᠠᠷ ᠬᠡᠦᠬᠡᠨ ᠲᠠᠯ᠎ᠠ ᠳᠤ ᠲᠠᠬᠢᠵᠤ ᠤᠴᠢᠨ᠎ᠠ᠃      ᠦᠩᠭᠡᠷᠡᠭᠰᠡᠨ ᠳᠤ ᠵᠠᠷᠢᠮ ᠠᠶᠢᠯ ᠪᠠᠰᠠ ᠦᠨᠳᠡᠭᠡᠨ ᠰᠦᠢ ᠭᠡᠭᠴᠢ ᠶᠢ ᠲᠤᠭᠳᠠᠳᠠᠭ ᠪᠠᠶᠢᠵᠠᠢ᠃ ᠲᠠᠷᠤᠢ ᠬᠡᠦᠬᠡᠳ ᠨᠢ ᠬᠡᠪᠡᠯᠢ ᠳᠤᠨᠢ ᠪᠠᠶᠢᠬᠤ ᠳᠤ ᠪᠤᠶᠤ ᠨᠢᠯᠬ᠎ᠠ ᠪᠠᠯᠴᠢᠷ ᠲᠤᠨᠢ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠠᠬᠠᠮᠠᠳ ᠤᠷᠤᠭ ᠪᠠᠷᠢᠯᠳᠤᠭᠤᠯᠬᠤ ᠪᠠᠷ ᠲᠤᠭᠳᠠᠭᠰᠠᠨ ᠢ ᠬᠡᠯᠡᠨ᠎ᠡ᠂ ᠦᠨᠳᠡᠭᠡᠨ ᠰᠦᠢ ᠲᠤᠭᠳᠠᠪᠠᠯ ᠦᠭᠡᠷ᠎ᠡ ᠪᠤᠰᠤᠳ ᠲᠤ ᠦᠷ᠎ᠡ ᠪᠠᠨ ᠦᠭᠭᠦᠨ᠎ᠡ ᠭᠡᠮᠡᠨ ᠠᠮᠠᠯᠠᠵᠤ ᠪᠤᠯᠬᠤ ᠦᠭᠡᠢ ᠶᠤᠰᠤ ᠲᠠᠢ ᠪᠠᠶᠢᠵᠠᠢ᠃      ᠠᠪᠴᠤ ᠬᠦᠷᠦᠭᠰᠡᠨ ᠠᠷᠢᠬᠢ ᠪᠠᠨ ᠬᠡᠦᠬᠡᠨ ᠢᠶᠠᠨ ᠦᠭᠬᠦ ᠡᠰᠡᠬᠦ ᠶᠢ ᠦᠯᠦ ᠬᠠᠮᠢᠶᠠᠷᠤᠨ ᠶᠠᠭᠠᠬᠢᠭᠰᠠᠨ ᠴᠤ ᠨᠡᠭᠡᠭᠡᠵᠦ ᠬᠡᠦᠬᠡᠨ ᠲᠠᠯ᠎ᠠ ᠶᠢᠨ ᠬᠢᠨ ᠳᠤ ᠰᠠᠴᠤᠵᠤ ᠬᠦᠨᠳᠦᠯᠡᠵᠦ ᠪᠠᠶᠢᠬᠤ ᠪᠠᠨ ᠢᠯᠡᠳᠭᠡᠨ᠎ᠡ᠃      ᠬᠡᠦᠬᠡᠨ ᠲᠠᠯ᠎ᠠ ᠶᠢᠨ ᠬᠢᠨ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠢᠶᠠᠨ ᠬᠤᠳᠠ ᠬᠤᠳᠠᠭᠠᠢ ᠪᠤᠯᠤᠯᠴᠠᠬᠤ ᠶᠢ ᠵᠦᠪᠰᠢᠶᠡᠷᠡᠭᠰᠡᠨ ᠤ ᠲᠠᠷᠠᠭ᠎ᠠ ᠬᠦᠦ ᠶᠢᠨ ᠲᠠᠯ᠎ᠠ ᠲᠡᠮᠡᠢ ᠤᠳᠠᠯ ᠦᠭᠡᠢ ᠪᠠᠳᠤᠯᠠᠭ᠎ᠠ ᠲᠠᠯᠪᠢᠬᠤ ᠶᠤᠰᠤ ᠬᠢᠳᠡᠭ ᠪᠠᠶᠢᠭᠰᠠᠨ ᠪᠠᠶᠢᠨ᠎ᠠ᠃       ᠡᠨᠡ ᠨᠢ ᠤᠷᠤᠭ ᠰᠠᠳᠤᠨ ᠪᠤᠯᠤᠯᠴᠠᠬᠤ ᠪᠠᠨ ᠤᠯᠠᠮ ᠨᠢᠭᠡ ᠠᠯᠬᠤᠮ ᠪᠠᠳᠤᠯᠠᠵᠤ ᠪᠠᠶᠢᠭ᠎ᠠ ᠶᠠᠪᠤᠳᠠᠯ ᠪᠤᠯᠬᠤ ᠶᠤᠮ᠂ ᠬᠦᠪᠡᠭᠦᠨ ᠲᠠᠯ᠎ᠠ ᠠᠷᠢᠬᠢ ᠬᠠᠳᠠᠭ᠂ ᠬᠤᠨᠢᠨ ᠤ ᠬᠠ᠂ ᠢᠳᠡᠭᠡ ᠪᠤᠤᠪᠤ ᠪᠡᠯᠡᠳᠬᠡᠨ ᠬᠤᠶᠠᠷ ᠭᠤᠷᠪᠠᠨ ᠬᠦᠮᠦᠨ ᠢ ᠬᠡᠦᠬᠡᠨ ᠲᠠᠯ᠎ᠠ ᠳᠤ ᠶᠠᠪᠤᠭᠤᠯᠤᠨ᠎ᠠ᠂ ᠤᠴᠢᠭᠰᠠᠨ ᠬᠦᠮᠦᠨ ᠪᠤᠷᠬᠠᠨ ᠳᠤᠨᠢ ᠬᠠᠳᠠᠭ᠂ ᠭᠠᠯ ᠳᠤᠨᠢ ᠠᠷᠢᠬᠢ ᠡᠷᠭᠦᠨ᠂ ᠠᠪᠤ ᠡᠵᠢ᠂ ᠠᠪᠠᠭ᠎ᠠ ᠨᠠᠭᠠᠴᠤ ᠳᠤᠨᠢ ᠬᠠᠳᠠᠭ ᠪᠠᠷᠢᠵᠤ ᠠᠷᠢᠬᠢ ᠪᠠᠨ ᠵᠠᠳᠠᠯᠵᠤ ᠵᠠᠰᠠᠭᠠᠳ ᠪᠤᠴᠠᠵᠤ ᠢᠷᠡᠨ᠎ᠡ᠃
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤᠨ ᠲᠥᠪ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠢᠳᠡᠭᠡᠨ ᠤᠮᠳᠠᠭᠠᠨ ( ᠬᠤᠶᠠᠷ )
ᠡᠵᠡᠨ᠎ᠡ ᠪᠦᠭᠡᠴᠦᠳ ᠤᠨ ᠦᠷᠭᠦᠯᠵᠢ ᠭᠡᠷᠡᠭᠯᠡᠳᠡᠭ ᠪᠦᠭᠡ ᠶᠢᠨ ᠤᠪᠰᠤ ᠮᠡᠷᠭᠡᠵᠢᠯ
ᠡᠵᠡᠨ᠎ᠡ ᠪᠦᠭᠡᠴᠦᠳ ᠤᠨ ᠦᠷᠭᠦᠯᠵᠢ ᠭᠡᠷᠡᠭᠯᠡᠳᠡᠭ ᠪᠦᠭᠡ ᠶᠢᠨ ᠤᠪᠰᠤ ᠮᠡᠷᠭᠡᠵᠢᠯ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
ᠡᠵᠡᠨ᠎ᠡ ᠲᠤᠷᠭᠤᠳ ᠤᠨ ᠠᠷᠠᠳ ᠤᠨ ᠤᠷᠠᠯᠢᠭ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号