ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠲᠣᠷᠭᠤᠳᠴᠤᠳ ᠤᠨ ᠲᠣᠯᠣᠭᠠᠢ ᠶᠢᠨ ᠵᠠᠰᠠᠯ ︵ᠬᠤᠶᠠᠷ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/8/29
      ᠰᠢᠷᠭᠤᠭᠤᠯ ᠬᠢᠬᠦ ᠶᠠᠪᠤᠴᠠ᠄ ᠰᠢᠷᠭᠤᠭᠤᠯ ᠬᠢᠬᠦ ᠤᠷᠳᠤ ᠦᠰᠦ ᠪᠡᠯᠡᠳᠦᠨ᠎ᠡ᠂ ᠡᠨᠡᠬᠦ ᠦᠰᠦ ᠶᠢ ᠣᠯᠠᠩᠬᠢ ᠳᠠᠭᠠᠨ ᠥᠪᠡᠷᠰᠡᠳ ᠤᠨ ᠳᠠᠭᠠᠬᠢᠷᠠᠭᠰᠠᠨ ᠦᠰᠦᠨ ᠤ ᠰᠠᠪ ᠢᠶᠠᠷ ᠬᠢᠳᠡᠭ᠃ ᠰᠢᠷᠭᠤᠭᠤᠯ ᠦᠰᠦ ᠶᠢ ᠬᠤᠭᠤᠷᠣᠨᠳᠤ ᠨᠢ ᠨᠠᠭᠠᠬᠤ ᠨᠠᠭᠠᠯᠳᠤᠭᠤᠷ ᠪᠡᠯᠡᠳᠦᠨ᠎ᠡ᠂ ᠲᠡᠭᠦᠨ ᠢᠶᠠᠨ ᠦᠰᠦᠨ ᠤ ᠲᠦᠷᠬᠢᠴᠡ ᠭᠡᠳᠡᠭ᠂ ᠲᠤᠰ ᠨᠠᠭᠠᠯᠳᠤᠭᠤᠷ ᠢ ᠬᠤᠮᠠ ᠶᠢ ᠳᠡᠪᠲᠦᠭᠡᠵᠦ ᠪᠦᠳᠦᠭᠦᠯᠢᠭ ᠰᠢᠷᠬᠡᠭ ᠲᠠᠢ ᠪᠥᠰ ᠰᠠᠪᠠ ᠳᠤ ᠬᠢᠭᠡᠳ ᠳᠡᠭᠡᠷ᠎ᠡ ᠠᠴᠠ ᠨᠢ ᠪᠠᠭ᠎ᠠ ᠤᠰᠤ ᠬᠢᠵᠦ ᠤᠯᠠᠨ ᠲᠠᠬᠢᠨ ᠨᠤᠬᠤᠵᠤ ᠰᠢᠬᠠᠨ᠎ᠠ ︵ᠤᠯᠠᠨ ᠤᠳᠠᠭ᠎ᠠ ᠤᠰᠤ ᠬᠢᠵᠦ ᠰᠢᠬᠠᠳᠠᠭ︶᠂ ᠲᠡᠭᠡᠭᠰᠡᠭᠡᠷ ᠨᠢᠭᠡ ᠵᠦᠢᠯ ᠤᠨ ᠬᠥᠭᠡᠰᠦᠷᠡᠭᠰᠡᠨ ᠴᠠᠪᠠᠤ ᠰᠢᠭ᠋ ᠶᠠᠭᠤᠮ᠎ᠠ ᠭᠠᠷᠤᠨ᠎ᠠ᠂ ᠲᠡᠭᠦᠨ ᠢᠶᠠᠨ ᠰᠢᠷᠭᠤᠭᠤᠯ‌ᠦᠰᠦᠨ ᠳᠤ ᠲᠦᠷᠬᠢᠵᠦ ᠰᠡᠪᠡᠷᠡᠭᠡᠵᠦ ᠬᠠᠳᠠᠭᠠᠨ᠎ᠠ᠂ ᠲᠡᠭᠡᠬᠦ ᠳᠡᠭᠡᠨ ᠬᠡᠲᠦᠷᠡᠲᠡᠯ᠎ᠡ ᠶᠡᠭᠡ ᠬᠠᠳᠠᠭᠠᠵᠤ ᠪᠤᠯᠬᠤ ᠦᠭᠡᠢ᠂ ᠲᠡᠭᠡᠪᠡᠯ ᠬᠠᠲᠠᠭᠤᠷᠠᠭᠠᠳ ᠦᠰᠦᠨ ᠤ ᠦᠵᠦᠭᠦᠷ ᠤᠨ ᠬᠡᠰᠡᠭ ᠢ ᠠᠮᠢᠨ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠵᠦ ᠰᠦᠯᠵᠢᠵᠦ ᠲᠡᠶᠢᠯᠬᠦ ᠦᠭᠡᠢ ᠪᠣᠯᠣᠨ᠎ᠠ᠃ ᠠᠳᠡ ᠲᠣᠳᠣᠷᠬᠠᠶᠢᠯᠠᠬᠤ ᠴᠢᠬᠤᠯᠠ ᠲᠠᠢ ᠵᠦᠢᠯ ᠭᠡᠪᠡᠯ ᠦᠰᠦᠨ ᠤ ᠰᠡᠪ ᠢ ᠨᠡᠶᠢᠯᠡᠭᠦᠯᠦᠨ ᠰᠠᠮᠨᠠᠭᠠᠳ ᠬᠦᠷᠦᠵᠦ ᠦᠭᠭᠦ ᠪᠢᠰᠢ᠂ ᠬᠠᠷᠢᠨ ᠵᠠᠳᠠᠭᠠᠢ ᠦᠰᠦᠨ ᠳᠤ ᠨᠠᠭᠠᠯᠳᠤᠭᠤᠷ ᠲᠦᠷᠬᠢᠭᠡᠳ ᠬᠤᠭᠤᠷᠣᠨᠳᠤ ᠨᠢ ᠨᠠᠭᠠᠯᠳᠤᠭᠤᠯᠵᠤ ᠥᠭᠭᠦᠨ᠎ᠡ᠃ ᠨᠠᠭᠠᠯᠳᠤᠭᠤᠷ ᠢᠶᠠᠨ ᠪᠠᠷᠤᠭ ᠰᠢᠷᠬᠡᠭ ᠦᠰᠦ ᠪᠣᠯᠭᠠᠨ ᠳᠤ ᠲᠦᠷᠬᠢᠵᠦ ᠦᠭᠬᠦ ᠬᠡᠷᠡᠭᠲᠡᠢ᠂ ᠦᠭᠡᠢ ᠪᠣᠯ ᠬᠠᠲᠠᠭᠰᠠᠨ ᠤ ᠲᠠᠷᠠᠭ᠎ᠠ ᠬᠥᠪᠰᠥᠶᠢᠵᠦ ᠪᠣᠰᠣᠭᠠᠳ ᠦᠰᠦᠨ ᠤ ᠰᠡᠪ ᠳᠠᠷᠤᠭᠳᠠᠬᠤ ᠦᠭᠡᠢ ᠪᠤᠯᠳᠠᠭ᠃ ᠱᠤᠷᠭᠤᠣᠯ ᠢ ᠨᠢᠭᠡ ᠲᠠᠯ᠎ᠠ ᠳᠤᠨᠢ ᠭᠤᠷᠪᠠ᠂ ᠨᠡᠶᠢᠳᠡ ᠵᠢᠷᠭᠤᠭ᠎ᠠ ᠪᠡᠯᠡᠳᠦᠨ᠎ᠡ᠂ ᠨᠢᠭᠡ ᠲᠠᠯ᠎ᠠ ᠶᠢᠨ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠨᠢ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ᠂ ᠳᠤᠮᠳᠠ ᠰᠢᠷᠭᠤᠭᠤᠯ᠂ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠭᠡᠬᠦ ᠨᠡᠷ᠎ᠡ ᠲᠠᠢ᠂ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠤᠨ ᠶᠠᠩᠵᠤ ᠬᠡᠯᠪᠡᠷᠢ ᠨᠢ ᠤᠭ ᠲᠠᠭᠠᠨ ᠭᠤᠯᠳᠤᠶᠢᠭᠰᠠᠨ᠂ ᠵᠤᠵᠠᠭᠠᠯᠢᠭ᠂ ᠳᠡᠮᠡᠢ ᠳᠤᠭᠤᠢ ᠪᠤᠰᠤ ᠲᠡᠶᠢᠮᠦ ᠶᠠᠩᠵᠤ ᠲᠠᠢ ᠪᠠᠶᠢᠭᠠᠳ ᠳᠡᠭᠡᠳᠦ ᠵᠠᠭᠤᠨ ᠤ ᠭᠤᠴᠢ᠂ ᠳᠥᠴᠢᠭᠡᠳ ᠣᠨ ᠪᠣᠯᠵᠤ ᠢᠷᠡᠭᠡᠳ ᠳᠤᠮᠳᠠ ᠰᠢᠷᠭᠤᠭᠤᠯ ᠢ ᠥᠷᠭᠡᠨ ᠬᠠᠪᠲᠠᠭᠠᠢ ᠬᠢᠬᠦ ᠪᠣᠯᠤᠭᠰᠠᠨ ᠪᠥᠭᠡᠳ ᠥᠪᠡᠷᠰᠡᠳ ᠤᠨ ᠳᠤᠷᠠᠰᠢᠯ ᠪᠠ ᠪᠡᠶ᠎ᠡ ᠶᠢᠨ ᠲᠥᠯᠥᠪ ᠲᠡᠭᠡᠨ ᠵᠣᠬᠢᠴᠠᠭᠤᠯᠤᠨ ᠪᠦᠳᠦᠭᠦᠨ ᠪᠠᠭ᠎ᠠ ᠰᠢᠭ᠋ ᠠᠳᠠᠯᠢ ᠪᠤᠰᠤ ᠬᠢᠳᠡᠭ ᠪᠣᠯᠵᠠᠢ᠃ ᠳᠤᠮᠳᠠ ᠰᠢᠷᠭᠤᠭᠤᠯ ᠢ ᠵᠠᠰᠠᠬᠤ ᠳᠤ ᠵᠣᠬᠢᠬᠤ ᠬᠡᠮᠵᠢᠶᠡᠨ ᠤ ᠮᠡᠷᠭᠡᠵᠢᠯ ᠬᠡᠷᠡᠭᠰᠡᠨ᠎ᠡ᠂ ᠰᠢᠷᠭᠤᠭᠤᠯ ᠪᠣᠯᠭᠠᠨ ᠤ ᠳᠡᠭᠡᠳᠦ ᠦᠵᠦᠭᠦᠷ ᠲᠤ ᠮᠥᠨ ᠦᠰᠦᠨ ᠤ ᠰᠡᠪ ᠢᠶᠠᠷ ᠪᠠᠷᠤᠭ ᠰᠦᠭᠡᠮ ᠬᠢᠷᠢᠲᠡᠢ ᠨᠠᠷᠢᠨ ᠰᠢᠯᠪᠢ ᠰᠦᠯᠵᠢᠵᠦ ᠬᠢᠨ᠎ᠡ᠂ ᠲᠤᠰ ᠰᠢᠯᠪᠢ ᠶᠢ ᠬᠠᠮᠤᠭ ᠲᠡᠷᠢᠭᠦᠨ ᠬᠢᠭᠡᠳ ᠴᠢᠨᠠᠭᠰᠢ ᠨᠢ ᠬᠡᠰᠡᠭ ᠬᠡᠰᠡᠭ ᠢᠶᠠᠷ ᠦᠰᠦ ᠨᠡᠮᠡᠵᠦ ᠤᠲᠠᠰᠤ ᠪᠠᠷ ᠴᠢᠩᠭ᠎ᠠ ᠣᠷᠢᠶᠠᠨ ᠣᠶᠣᠵᠤ ᠰᠢᠷᠭᠤᠭᠤᠯ ᠦᠰᠦ ᠬᠢᠳᠡᠭ᠃          ᠰᠢᠷᠭᠤᠭᠤᠯ ᠦᠰᠦ ᠬᠦᠷᠦᠬᠦ ᠶᠠᠪᠤᠴᠠ᠄ ᠬᠠᠮᠤᠭ ᠲᠡᠷᠢᠭᠦᠨ ᠳᠤ ᠲᠣᠯᠣᠭᠠᠢ ᠶᠢᠨ ᠦᠰᠦ ᠶᠢ ᠵᠠᠭᠠᠳᠠᠰᠤᠯᠠᠨ ᠬᠤᠶᠠᠷ ᠲᠡᠶᠢᠰᠢ ᠲᠡᠭᠰᠢ ᠬᠤᠪᠢᠶᠠᠵᠤ᠂ ᠵᠠᠭᠠᠳᠠᠰᠤᠨ ᠤ ᠬᠤᠶᠠᠷ ᠲᠠᠯ᠎ᠠ ᠪᠠᠷ ᠬᠡᠰᠡᠭ ᠦᠰᠦ ᠦᠯᠡᠳᠡᠭᠡᠨ ᠲᠡᠭᠦᠨ ᠢᠶᠠᠨ ᠭᠤᠷᠪᠠ ᠠᠩᠭᠢᠯᠠᠨ᠂ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠦᠰᠦ ᠪᠦᠷᠬᠦᠵᠦ ᠦᠭᠭᠦ ᠬᠠᠯᠢᠪ ᠦᠰᠦ ᠪᠣᠯᠭᠠᠨ᠎ᠠ᠂ ᠲᠠᠷᠠᠭ᠎ᠠ ᠨᠢ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠦᠰᠦ ᠵᠡᠭᠦᠬᠦ ᠲᠤᠰ ᠲᠤᠰ ᠤᠨ ᠴᠡᠭ ᠲᠣᠭᠲᠠᠭᠠᠨ ᠲᠤᠰ ᠲᠤᠰ ᠲᠤᠨᠢ ᠬᠡᠰᠡᠭ ᠠᠮᠢᠨ ᠦᠰᠦ ᠦᠯᠡᠳᠡᠭᠡᠨ᠎ᠡ᠃ ᠲᠡᠭᠡᠭᠡᠳ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠤᠨ ᠰᠢᠯᠪᠢ ᠶᠢ ᠥᠨᠥ ᠦᠯᠡᠳᠡᠭᠡᠭᠰᠡᠨ ᠬᠡᠰᠡᠭ ᠠᠮᠢᠨ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠦᠨ ᠰᠦᠯᠵᠢᠵᠦ ᠲᠤᠰ ᠰᠢᠷᠭᠤᠭᠤᠯ ᠢ ᠵᠡᠭᠦᠵᠦ ᠲᠣᠭᠲᠠᠭᠠᠨ᠎ᠠ᠃ ᠡᠨᠡ ᠮᠡᠲᠦ ᠪᠠᠷ ᠵᠤᠯᠠᠢ ᠵᠢᠨ‌‍ᠰᠢᠷᠭᠤᠭᠤᠯ ᠪᠠ ᠳᠤᠮᠳᠠ ᠰᠢᠷᠭᠤᠭᠤᠯ ᠢ ᠲᠣᠭᠲᠠᠭᠠᠨ᠎ᠠ᠂ ᠡᠭᠦᠨ ᠳᠤ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠤᠨ ᠲᠤᠰ ᠲᠤᠰ ᠤᠨ ᠴᠡᠭ ᠲᠣᠭᠲᠠᠭᠠᠬᠤ ᠪᠣᠯ ᠬᠠᠮᠤᠭ ᠴᠢᠬᠤᠯᠠ᠃ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ ᠪᠠ ᠳᠤᠮᠳᠠ‌‍ᠰᠢᠷᠭᠤᠭᠤᠯ ᠢ ᠤᠶᠢᠷᠠᠯᠴᠠᠭ᠎ᠠ ᠪᠠᠶᠢᠷᠢᠯᠠᠭᠤᠯᠤᠨ᠎ᠠ᠃ ᠵᠤᠯᠠᠢ ᠶᠢᠨ ᠬᠡᠰᠡᠭ ᠠᠮᠢᠨ ᠦᠰᠦ ᠶᠢ ᠳᠤᠭᠤᠶᠢᠯᠠᠨ ᠵᠠᠰᠠᠵᠤ ᠨᠠᠭᠠᠯᠳᠤᠭᠤᠷ ᠲᠦᠷᠬᠢᠭᠡᠳ ᠴᠢᠬᠢᠨ ᠤ ᠬᠤᠶᠢᠭᠤᠷ ᠣᠷᠣᠭᠤᠯᠤᠨ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠲᠠᠢ ᠨᠡᠶᠢᠯᠡᠭᠦᠯᠵᠦ ᠭᠦᠷᠦᠨ᠎ᠡ᠃ ᠭᠤᠷᠪᠠᠨ ᠰᠢᠷᠭᠤᠭᠤᠯ ᠦᠰᠦ ᠶᠢ ᠠᠮᠢᠨ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠦᠨ ᠰᠦᠯᠵᠢᠬᠦ ᠠᠷᠭ᠎ᠠ᠄ ᠬᠠᠮᠤᠭ ᠲᠡᠷᠢᠭᠦᠨ ᠳᠤ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠢ ᠲᠡᠷᠡ ᠬᠠᠪᠢ ᠳᠤᠨᠢ ᠦᠯᠡᠳᠡᠭᠡᠭᠰᠡᠨ ᠬᠠᠯᠢᠪ ᠦᠰᠦ ᠪᠠᠷ ᠪᠦᠷᠬᠦᠵᠦ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ       ︵ᠬᠠᠯᠢᠪ ᠦᠰᠦ ᠲᠠᠢ ᠨᠢ ᠬᠠᠮᠲᠤ︶᠎ ᠲᠠᠢ ᠰᠣᠯᠢᠪᠴᠠᠭᠤᠯᠤᠨ ᠳᠠᠷᠤᠨ᠎ᠠ᠂ ᠳᠠᠷᠤᠢ ᠵᠤᠯᠠᠢ ᠶᠢᠨ ᠰᠢᠷᠭᠤᠭᠤᠯ ᠢᠶᠠᠷ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠢ ᠳᠠᠷᠤᠵᠤ᠂ᠵᠠᠪᠰᠠᠷ ᠲᠤᠨᠢ ᠳᠤᠮᠳᠠ ᠰᠢᠷᠭᠤᠭᠤᠯ ᠢ ᠲᠠᠯᠪᠢᠵᠤ ᠬᠠᠯᠢᠪ ᠦᠰᠦ ᠪᠠᠷ ᠪᠦᠷᠬᠦᠵᠦ᠂ ᠳᠤᠮᠳᠠ ᠰᠢᠷᠭᠤᠭᠤᠯ ᠢ ᠠᠷᠤᠭᠰᠢ ᠤᠨᠠᠬᠤ ᠪᠠᠷ ᠦᠭᠡᠢ ᠲᠣᠭᠲᠠᠪᠤᠷᠢᠲᠠᠢ ᠪᠤᠯᠭᠠᠵᠤ ᠥᠭᠭᠦᠨ᠎ᠡ᠃ ᠲᠡᠭᠡᠭᠡᠳ‌‍ᠴᠢᠨᠠᠭᠰᠢ ᠪᠠᠨ ᠬᠡᠳᠦ ᠰᠦᠯᠵᠢᠭᠡᠳ ᠦᠰᠦᠨ ᠤ ᠦᠵᠦᠭᠦᠷ ᠢ ᠲᠣᠷᠭᠠᠨ ᠬᠠᠷ᠎ᠠ ᠤᠲᠠᠰᠤ ᠪᠠᠷ ᠪᠣᠭᠤᠵᠤ᠂ ᠦᠰᠦᠨ ᠤ ᠭᠡᠷ ᠲᠤ ᠲᠦᠷᠢᠬᠦ ᠳᠤ ᠪᠡᠯᠡᠬᠡᠨ ᠪᠣᠯᠭᠠᠨ᠎ᠠ᠃ ᠰᠢᠯᠢ ᠶᠢᠨ ᠳᠠᠭᠵᠠᠨ  ᠳᠤ᠂ ᠳᠠᠷᠤᠢ ᠵᠠᠭᠠᠳᠠᠰᠤᠨ ᠤ ᠬᠤᠶᠠᠷ ᠲᠠᠯ᠎ᠠ ᠳᠤ ᠲᠤᠰ ᠪᠦᠷᠢ ᠵᠢᠭᠠᠬᠠᠨ ᠦᠰᠦ ᠠᠪᠴᠤ᠂ ᠠᠰ ᠠᠰ ᠲᠤᠨᠢ ᠰᠦᠯᠵᠢᠭᠡᠳ ᠬᠠᠮᠤᠭ ᠰᠡᠭᠦᠯ ᠳᠤ ᠰᠢᠯᠢ ᠶᠢᠨ ᠰᠢᠷᠭᠤᠭᠤᠯ ᠪᠠ ᠲᠡᠭᠦᠨ ᠤ ᠬᠠᠯᠢᠪ ᠦᠰᠦ ᠲᠠᠢ ᠨᠡᠶᠢᠯᠡᠭᠦᠯᠦᠨ ᠬᠠᠮᠲᠤᠷᠠᠭᠤᠯᠤᠨ ᠰᠦᠯᠵᠢᠨ᠎ᠡ᠂ ᠡᠨᠡᠬᠦ ᠦᠰᠦ ᠶᠢ ᠬᠤᠯᠠᠭᠠᠢ ᠬᠦᠷᠦᠭᠡ ᠭᠡᠳᠡᠭ ᠪᠠᠶᠢᠵᠠᠢ᠃            ᠦᠰᠦ ᠪᠠᠨ ᠭᠦᠷᠦᠵᠦ ᠪᠠᠷᠠᠭᠠᠳ ᠭᠠᠳᠠᠭᠤᠷ ᠨᠢ ᠦᠰᠦᠨ ᠤ ᠪᠤᠳᠤᠭ ᠲᠦᠷᠬᠢᠵᠦ ᠦᠭᠳᠡᠭ᠂ ᠡᠨᠡᠬᠦ ᠪᠤᠳᠤᠭ ᠢ ᠨᠠᠷᠢᠨ ᠪᠤᠳᠠᠭ᠎ᠠ ︵ᠲᠣᠷᠭᠤᠳ ᠤᠯᠤᠰ ᠬᠤᠨᠤᠭ ᠪᠤᠳᠠᠭ᠎ᠠ ᠭᠡᠳᠡᠭ︶᠎ ᠶᠢ ᠬᠠᠶᠢᠰᠤᠨ ᠳᠤ ᠬᠢᠵᠦ ᠵᠥᠭᠡᠯᠡᠨ ᠭᠠᠯ ᠢᠶᠠᠷ ᠬᠡᠰᠡᠭ ᠬᠠᠭᠤᠷᠤᠭᠠᠳ᠂ ᠳᠡᠭᠡᠷ᠎ᠡ ᠠᠴᠠ ᠨᠢ ᠵᠢᠭᠠᠬᠠᠨ ᠴᠠᠢ ᠪᠤᠶᠤ ᠤᠰᠤ ᠬᠢᠵᠦ ᠪᠤᠴᠠᠯᠭᠠᠨ᠎ᠠ᠂ ᠬᠡᠰᠡᠭ ᠪᠤᠴᠠᠯᠭᠠᠭᠠᠳ ᠪᠤᠳᠠᠭ᠎ᠠ ᠪᠠᠨ ᠱᠦᠭᠦᠵᠦ ᠠᠪᠤᠭᠠᠳ ᠦᠯᠡᠳᠡᠭᠰᠡᠨ ᠰᠢᠩᠭᠡᠨ ᠢ ᠪᠤᠴᠠᠯᠭᠠᠭᠠᠳ ᠪᠠᠶᠢᠨ᠎ᠠ᠂ ᠰᠢᠷ᠎ᠠ ᠬᠦᠭᠡᠰᠦ ᠶᠢ ᠨᠢ ᠠᠪᠴᠤ ᠬᠠᠶᠠᠭᠠᠳ ᠪᠠᠶᠢᠨ᠎ᠠ᠂ ᠲᠡᠭᠡᠵᠦ ᠪᠠᠶᠢᠲᠠᠯ᠎ᠠ ᠬᠠᠪ ᠬᠠᠷ᠎ᠠ ᠭᠢᠯᠠᠯᠵᠠᠭᠰᠠᠨ ᠶᠠᠭᠤᠮ᠎ᠠ ᠥᠳᠬᠡᠷᠡᠭᠡᠳ ᠢᠷᠡᠨ᠎ᠡ᠂ᠡᠭᠦᠨ ᠢᠶᠠᠨ ᠴᠡᠪᠡᠷᠬᠡᠨ ᠰᠠᠪᠠᠨ ᠳᠤ ᠠᠭᠤᠳᠠᠯᠤᠭᠠᠳ ᠬᠡᠰᠡᠭ ᠬᠥᠷᠥᠭᠡᠵᠦ ᠦᠰᠦᠨ ᠳᠡᠭᠡᠨ ᠲᠦᠷᠬᠢᠨ᠎ᠡ᠂ ᠦᠰᠦᠨ ᠳᠤ ᠥᠩᠭᠡ ᠤᠷᠤᠭᠤᠯᠬᠤ ᠪᠠ ᠦᠰᠦ ᠬᠠᠷᠠᠯᠠᠭᠤᠯᠬᠤ ᠦᠢᠯᠡᠳᠦᠯ ᠲᠠᠢ᠃ ᠪᠤᠳᠠᠭ᠎ᠠ ᠪᠠᠨ ᠢᠯᠡᠭᠦᠦ ᠬᠠᠭᠤᠷᠠᠪᠠᠯ ᠦᠰᠦᠨ ᠤ ᠪᠤᠳᠤᠭ ᠬᠦᠷᠡᠩ ᠪᠣᠯᠵᠤ᠂ ᠳᠤᠲᠠᠭᠤ ᠬᠠᠭᠤᠷᠠᠪᠠᠯ ᠰᠢᠷ᠎ᠠ ᠪᠣᠯᠵᠤ᠂ ᠶᠠᠪ ᠴᠠᠪ ᠲᠠᠭᠠᠷᠠᠭᠤᠯᠪᠠᠯ ᠬᠠᠪ ᠬᠠᠷ᠎ᠠ ᠥᠩᠭᠡ ᠲᠠᠢ ᠪᠤᠯᠳᠠᠭ ᠪᠠᠶᠢᠵᠠᠢ᠃ ᠲᠣᠯᠣᠭᠠᠢ ᠪᠠᠨ ᠤᠬᠢᠶᠠᠬᠤ ᠦᠶ᠎ᠡ ᠳᠤ ᠰᠢᠷᠭᠤᠭᠤᠯ ᠦᠰᠦ ᠪᠠᠨ ᠠᠪᠴᠤ ᠦᠩᠭᠢᠵᠦ ᠤᠰᠤᠨ ᠳᠤ ᠤᠬᠢᠶᠠᠭᠠᠳ ᠲᠠᠬᠢᠵᠤ ᠨᠠᠭᠠᠵᠤ ᠵᠡᠭᠦᠨ᠎ᠡ᠃ ᠰᠥᠨᠢ ᠤᠨᠲᠠᠬᠤ ᠳᠠᠭᠠᠨ ᠴᠤ ᠠᠪᠴᠤ ᠪᠤᠯᠬᠤ ᠦᠭᠡᠢ᠂ ᠶᠡᠷᠦ ᠨᠢ ᠪᠦᠰᠡᠭᠦᠢ ᠬᠥᠮᠥᠨ ᠶᠠᠮᠠᠷ ᠴᠤ ᠴᠠᠭ ᠲᠤ ᠭᠡᠳ ᠮᠠᠯᠠᠭᠠᠢ᠂ ᠰᠢᠷᠭᠤᠭᠤᠯ ᠢᠶᠠᠨ ᠠᠪᠴᠤ ᠪᠤᠯᠬᠤ ᠦᠭᠡᠢ᠂ ᠠᠪᠤᠪᠠᠯ ᠬᠥᠮᠥᠨ ᠳᠤ ᠮᠠᠭᠤ ᠬᠡᠯᠡᠭᠳᠡᠨ᠎ᠡ᠃ ᠰᠢᠷᠭᠤᠭᠤᠯ ᠦᠰᠦ ᠪᠠᠨ ᠣᠯᠠᠩᠬᠢ ᠪᠦᠰᠡᠭᠦᠶᠢᠴᠦᠳ ᠥᠪᠡᠷᠰᠡᠳ ᠢᠶᠠᠨ ᠭᠦᠷᠦᠭᠡᠳ ᠵᠡᠭᠦᠵᠦ᠂ ᠲᠤᠩ ᠡᠰᠡ ᠴᠢᠳᠠᠬᠤ ᠨᠢ ᠬᠥᠮᠥᠨ ᠢᠶᠠᠷ ᠬᠦᠷᠦᠭᠦᠯᠳᠡᠭ᠃ ᠴᠢᠯᠦᠭᠡᠯᠡᠭᠰᠡᠨ ᠤ ᠲᠠᠷᠠᠭ᠎ᠠ ᠪᠦᠰᠡᠭᠦᠶᠢᠴᠦᠳ ᠠᠯᠬᠤᠮ ᠠᠯᠬᠤᠮ ᠢᠶᠠᠷ ᠰᠢᠷᠭᠤᠭᠤᠯ ᠦᠰᠦ ᠵᠡᠭᠦᠬᠦ ᠪᠠᠨ ᠪᠣᠯᠢᠭᠠᠳ ᠠᠮᠢᠨ ᠦᠰᠦ ᠪᠠᠨ ᠬᠤᠶᠠᠷ ᠬᠤᠪᠢᠶᠠᠨ ᠰᠦᠯᠵᠢᠵᠦ ᠦᠰᠦᠨ ᠤ ᠭᠡᠷ ᠲᠡᠭᠡᠨ ᠬᠢᠬᠦ ᠪᠣᠯᠤᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠢᠶᠠᠨ ᠰᠢᠢᠮᠡᠭ ᠦᠰᠦ ᠭᠡᠳᠡᠭ᠃            ᠦᠰᠦᠨ ᠤ ᠭᠡᠷ᠄ ᠬᠠᠷ᠎ᠠ ᠲᠣᠷᠭ᠎ᠠ᠂ ᠬᠠᠷ᠎ᠠ ᠬᠢᠯᠢᠩ ᠪᠤᠶᠤ ᠬᠠᠷ᠎ᠠ ᠪᠥᠰ ᠢᠶᠠᠷ ᠬᠢᠭᠰᠡᠨ ᠨᠠᠷᠢᠬᠠᠨ ᠤᠷᠳᠤ ᠳᠤᠭᠲᠤᠢ᠃ ᠳᠤᠭᠲᠤᠢ ᠶᠢᠨ ᠠᠮᠠᠰᠠᠷ ᠨᠢ ᠭᠤᠷᠪᠠᠯᠵᠢᠨ ᠬᠡᠯᠪᠡᠷᠢ ᠲᠠᠢ᠂ ᠠᠮᠠᠰᠠᠷ ᠤᠨ ᠬᠤᠶᠠᠷ ᠲᠠᠯ᠎ᠠ ᠶᠢᠨ ᠬᠦᠪᠡᠭᠡ ᠪᠠᠷ ᠨᠢ ᠨᠣᠭᠤᠭᠠᠨ ᠤᠲᠠᠰᠤ ᠪᠠᠷ ᠴᠠᠯᠮ᠎ᠠ ᠪᠤᠶᠤ ᠵᠡᠭᠡᠭ ᠪᠠᠷᠢᠵᠤ᠂ ᠬᠠᠵᠠᠭᠤ ᠪᠠᠷ ᠨᠢ ᠮᠥᠨ ᠨᠣᠭᠤᠭᠠᠨ ᠤᠲᠠᠰᠤ ᠪᠠᠷ ᠦᠷᠭᠦᠯᠵᠢ ᠰᠢᠭᠯᠠᠵᠤ ᠦᠭᠳᠡᠭ᠃ ᠵᠠᠷᠢᠮ ᠨᠢ ᠴᠠᠯᠮ᠎ᠠ ᠪᠤᠶᠤ ᠵᠡᠭᠡᠭ ᠤᠨ ᠣᠷᠣᠨ ᠳᠤ ᠰᠤᠮᠤᠨ ᠨᠢᠷᠤᠭᠤ ᠬᠠᠳᠬᠤᠵᠤ᠂ ᠦᠷᠭᠦᠯᠵᠢ ᠰᠢᠭᠯᠠᠭᠠᠰᠤ ᠶᠢᠨ ᠳᠣᠲᠣᠭᠤᠷ ᠵᠠᠭᠤᠷᠠᠪᠴᠢᠯᠠᠵᠤ᠂ ᠵᠠᠷᠢᠮ ᠨᠢ ᠵᠠᠭᠤᠷᠠᠪᠴᠢ ᠶᠢᠨ ᠣᠷᠣᠨ ᠳᠤ ᠬᠤᠨᠢᠨ ᠬᠤᠯᠪᠤᠭ᠎ᠠ ᠬᠠᠳᠬᠤᠵᠤ ᠦᠭᠳᠡᠭ᠃ ᠦᠰᠦᠨ ᠤ ᠭᠡᠷ ᠲᠤ ᠨᠢᠭᠤᠷ ᠲᠠᠯ᠎ᠠ ᠪᠠ ᠳᠣᠲᠣᠷ ᠲᠠᠯ᠎ᠠ ᠭᠡᠵᠦ ᠪᠠᠶᠢᠳᠠᠭ᠃ ᠳᠣᠲᠣᠷ ᠲᠠᠯ᠎ᠠ ᠶᠢᠨ ᠠᠮᠠᠰᠠᠷ ᠲᠤᠨᠢ ᠤᠲᠠᠰᠤ ᠪᠠᠷ ᠣᠭᠤᠰᠣᠷ ᠬᠢᠨ᠎ᠡ᠂ ᠦᠰᠦ ᠪᠠᠨ ᠦᠰᠦᠨ ᠤ ᠭᠡᠷ ᠲᠤ ᠬᠢᠭᠰᠡᠨ ᠤ ᠲᠠᠷᠠᠭ᠎ᠠ ᠨᠢᠭᠤᠷ ᠲᠠᠯ᠎ᠠ ᠶᠢᠨ ᠠᠮᠠᠰᠠᠷ ᠲᠠᠬᠢ ᠣᠭᠤᠰᠣᠷ ᠢ ᠦᠰᠦᠨ ᠤ ᠵᠠᠪᠰᠠᠷ ᠢᠶᠠᠷ ᠳᠣᠲᠣᠷ ᠲᠠᠯ᠎ᠠ ᠳᠤᠨᠢ ︵ᠴᠠᠭᠠᠲᠤ ᠲᠠᠯ᠎ᠠ︶ ᠭᠠᠷᠭᠠᠵᠤ᠂ ᠳᠣᠲᠣᠷ ᠲᠠᠯ᠎ᠠ ᠳᠤ ᠪᠠᠶᠢᠭ᠎ᠠ ᠲᠣᠪᠴᠢ ᠳᠤ ᠣᠷᠣᠭᠤᠯᠵᠤ ᠲᠣᠭᠲᠠᠭᠠᠨ᠎ᠠ᠃ ᠦᠰᠦᠨ ᠤ ᠭᠡᠷ ᠤᠨ ᠳᠣᠣᠷᠠᠳᠤ ᠲᠠᠯ᠎ᠠ ᠲᠡᠭᠰᠢ ᠬᠡᠯᠪᠡᠷᠢ ᠲᠠᠢ ᠪᠠᠶᠢᠳᠠᠭ᠂ ᠲᠡᠭᠦᠨ ᠢ ᠨᠣᠭᠤᠭᠠᠨ ᠤᠲᠠᠰᠤ ᠪᠠᠷ ᠵᠠᠷᠢᠮ ᠨᠢ ᠭᠤᠷᠪᠠ᠂ ᠲᠠᠪᠤ ᠪᠤᠶᠤ ᠲᠤᠯᠤᠭ᠎ᠠ ᠪᠠᠷ ᠰᠣᠶᠤᠭ᠎ᠠ ᠭᠠᠷᠭᠠᠵᠤ ᠬᠠᠳᠬᠤᠵᠤ ᠭᠤᠶᠣᠯᠠᠨ᠎ᠠ᠂ ᠮᠥᠨ ᠦᠰᠦᠨ ᠤ ᠭᠡᠷ ᠤᠨ ᠳᠣᠣᠷᠠᠳᠤ ᠬᠦᠪᠡᠭᠡ ᠶᠢ ᠪᠢᠲᠡᠭᠦᠯᠡᠵᠦ ᠣᠶᠣᠬᠤ ᠦᠭᠡᠢ ᠵᠠᠳᠠᠭᠠᠢ ᠪᠠᠷ ᠢᠶᠠᠨ ᠪᠠᠶᠢᠬᠤ ᠪᠥᠭᠡᠳ ᠣᠯᠠᠩᠬᠢ ᠨᠢ ᠡᠪᠦᠳᠦᠭ ᠲᠤ ᠲᠤᠯᠤᠭᠰᠠᠨ ᠤᠷᠳᠤ ᠦᠰᠦᠨ ᠤ ᠭᠡᠷ ᠵᠡᠭᠦᠳᠡᠭ ᠪᠠᠶᠢᠵᠠᠢ᠃ ᠪᠦᠰᠡ ᠪᠦᠰᠡᠯᠡᠵᠦ ᠪᠠᠶᠢᠭ᠎ᠠ ᠦᠶ᠎ᠡ ᠳᠤ ᠦᠰᠦᠨ ᠤ ᠭᠡᠷ ᠢᠶᠠᠨ ᠪᠦᠰᠡᠨ ᠤ ᠳᠣᠣᠭᠤᠷ ᠳᠠᠷᠤᠭᠤᠯᠤᠨ ᠵᠡᠭᠦᠳᠡᠭ          ᠶᠣᠰᠣ ᠲᠠᠢ᠃            ᠦᠰᠦᠨ ᠤ ᠭᠡᠷ ᠤᠨ ᠬᠠᠳᠠᠯᠭ᠎ᠠ᠄ ᠦᠰᠦᠨ ᠤ ᠭᠡᠷ ᠤᠨ ᠠᠮᠠᠨ ᠤ ᠭᠤᠷᠪᠠᠯᠵᠢᠨ ᠬᠡᠰᠡᠭ ᠲᠤ ᠬᠠᠳᠠᠬᠤ ᠲᠡᠮᠦᠷᠯᠢᠭ ᠤᠨ ᠵᠦᠢᠯ᠃ ᠪᠠᠶᠠᠨ ᠴᠢᠨᠡᠭᠡᠯᠢᠭ ᠨᠢ ᠠᠯᠳᠠ᠂ ᠮᠥᠩᠭᠦ ᠪᠠᠷ ᠬᠢᠭᠰᠡᠨ ᠵᠢᠪᠠᠳᠤ ᠶᠢᠨ ᠲᠣᠯᠣᠭᠠᠢ ᠬᠠᠳᠠᠵᠤ᠂ ᠴᠢᠯᠦᠭᠡᠯᠡᠬᠦ ᠠᠴᠠ ᠡᠮᠦᠨᠡᠬᠡᠨ ᠪᠣᠯᠵᠤ ᠢᠷᠡᠭᠡᠳ ᠳᠡᠭᠡᠷ᠎ᠡ ᠪᠠᠨ ᠱᠢᠷᠦ᠂ ᠰᠤᠪᠤᠳ᠂ ᠲᠣᠪᠴᠢᠨ ᠰᠢᠭᠢᠳᠬᠡᠷᠢ ᠲᠠᠢ ᠪᠤᠶᠤ ᠥᠯᠵᠡᠢ ᠤᠲᠠᠰᠤᠨ ᠬᠡ ᠲᠠᠢ ᠭᠤᠷᠪᠠᠯᠵᠢᠨ ᠮᠥᠩᠭᠦᠨ ᠬᠠᠳᠠᠯᠭ᠎ᠠ ᠶᠢ ᠨᠡᠶᠢᠳᠡᠮ ᠬᠠᠳᠠᠬᠤ ᠪᠣᠯᠵᠠᠢ᠃ ᠠᠶᠢᠯ ᠳᠤ ᠮᠣᠷᠳᠠᠬᠤ ᠨᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠪᠤᠯᠪᠠᠴᠤ ᠮᠣᠷᠳᠠᠭ᠎ᠠ ᠦᠭᠡᠢ ᠡᠮᠡᠭᠲᠡᠢ ᠶᠢᠨ ᠦᠰᠦ ᠶᠢ ᠨᠢ ᠬᠤᠶᠠᠷ ᠬᠤᠪᠢᠶᠠᠵᠤ ᠭᠦᠷᠦᠵᠦ ᠦᠭᠳᠡᠭ ᠪᠠᠶᠢᠭᠰᠠᠨ ᠪᠥᠭᠡᠳ ᠤᠯᠤᠰ ᠤᠳ ᠶᠠᠮᠠᠷ ᠶᠠᠮᠠᠷ ᠠᠶᠢᠯ ᠤᠨ ᠬᠤᠶᠠᠷ ᠦᠰᠦᠲᠦ ᠬᠡᠮᠡᠨ       ᠬᠤᠴᠢᠯᠠᠵᠤ᠂ ᠪᠠᠰᠠ ᠶᠠᠩᠪᠠ ᠪᠠᠨ ᠣᠯᠤᠭ᠎ᠠ ᠦᠭᠡᠢ ᠡᠮᠡᠭᠲᠡᠢ ᠭᠡᠳᠡᠭ ᠪᠠᠶᠢᠵᠠᠢ᠂ ᠡᠶᠢᠮᠦ ᠡᠮᠡᠭᠲᠡᠢ ᠳᠤ ᠰᠢᠷᠭᠤᠭᠤᠯ ᠦᠰᠦ ᠪᠠ ᠦᠰᠦᠨ ᠤ ᠭᠡᠷ ᠵᠡᠭᠦᠯᠭᠡᠳᠡᠭ ᠦᠭᠡᠢ ᠶᠣᠰᠣ ᠲᠠᠢ ᠪᠠᠶᠢᠭᠠᠳ ᠬᠤᠷᠢᠳᠤᠭᠠᠷ ᠵᠠᠭᠤᠨ ᠤ ᠡᠬᠢ ᠪᠣᠯᠵᠤ ᠢᠷᠡᠭᠡᠳ ᠪᠦᠷ ᠵᠡᠭᠦᠳᠡᠭ ᠪᠣᠯᠤᠭᠰᠠᠨ ᠬᠡᠮᠡᠨ ᠨᠠᠰᠤᠲᠠᠳ ᠮᠡᠳᠡᠭᠡᠯᠡᠵᠦ ᠪᠠᠶᠢᠭᠰᠠᠨ᠃
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤᠨ ᠲᠥᠪ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
ᠲᠣᠷᠭᠤᠳᠴᠤᠳ ᠤᠨ ᠲᠣᠯᠣᠭᠠᠢ ᠶᠢᠨ ᠵᠠᠰᠠᠯ ︵ᠨᠢᠭᠡ︶
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠠᠷᠪᠠᠨ ᠬᠤᠶᠠᠷ ᠨᠤᠶᠠᠨ ᠤ ᠦᠶ᠎ᠡ ᠤᠯᠠᠷᠢᠨ ᠵᠡᠷᠭᠡ ᠵᠠᠯᠭᠠᠮᠵᠢᠯᠠᠭᠰᠠᠨ ᠲᠡᠦᠬᠡ ᠶᠢᠨ ᠲᠣᠶᠢᠮᠤ
ᠡᠷᠬᠢᠭᠦᠦ ᠬᠠᠷ᠎ᠠ ᠶᠢᠨ ᠲᠡᠦᠬᠡᠨ ᠪᠠᠭᠤᠷᠢ
ᠡᠵᠡᠨ᠎ᠡ ᠮᠣᠩᠭᠤᠯᠴᠤᠳ ᠤᠨ ᠲᠥᠯ ᠬᠥᠩᠭᠡᠯᠡᠬᠦ ᠶᠣᠰᠣᠨ
ᠡᠵᠡᠨ᠎ᠡ ᠳᠣᠷᠭᠤᠳ ᠨᠤᠲᠤᠭ ᠤᠨ ᠲᠣᠮᠣᠭᠲᠤ ᠬᠥᠮᠥᠰ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号