| ᠴᠠᠭᠠᠨ ᠢᠳᠡᠭᠡᠨ ᠤ ᠲᠦᠷᠦᠯ ᠵᠦᠢᠯ ᠪᠠ ᠪᠣᠯᠪᠠᠰᠤᠷᠠᠭᠤᠯᠬᠤ ᠠᠷᠭᠠ ︵ᠬᠤᠶᠠᠷ︶ | ᠡᠭᠡᠵᠡᠭᠡᠢ᠄ ᠬᠦᠭᠡᠷᠦᠭᠦᠯᠦᠭᠰᠡᠨ ᠰᠦ ᠲᠡᠭᠡᠷᠡ ᠪᠠᠭᠠ ᠰᠢᠭ᠋ ᠠᠶᠢᠷᠠᠭ ᠬᠢᠭᠡᠳ ᠴᠢᠨᠠᠬᠤ ᠳᠤ ᠰᠦ ᠡᠭᠡᠳᠡᠷᠡᠨ | ᠰᠢᠷᠠ ᠤᠰᠤ ᠲᠤᠨᠵᠤ ᠭᠠᠷᠤᠨᠠ᠂ ᠲᠡᠷᠡ ᠰᠢᠷᠠ ᠤᠰᠤ ᠶᠢ ᠨᠢ ᠦᠭᠡᠷᠡ ᠰᠠᠪᠠᠨ ᠳᠤ ᠠᠪᠤᠭᠠᠳ ᠵᠦᠭᠡᠯᠡᠨ | ᠭᠠᠯ ᠢᠶᠠᠷ ᠰᠢᠷᠭᠢᠭᠡᠬᠦ ᠳᠤ ᠰᠢᠷᠠ ᠦᠩᠭᠡ ᠲᠠᠢ ᠦᠳᠬᠡᠨ ᠢᠳᠡᠭᠡᠨ ᠪᠤᠯᠵᠤ ᠬᠤᠪᠢᠷᠠᠨᠠ᠂ ᠲᠡᠭᠦᠨ ᠢᠶᠠᠨ | ᠬᠠᠳᠠᠭᠠᠬᠤᠯᠠᠷ ᠠᠷᠵᠠᠶᠢᠭᠰᠠᠨ ᠠᠮᠳᠠᠳᠠᠶᠢᠬᠠᠨ ᠡᠭᠡᠵᠡᠭᠡᠢ ᠪᠤᠯᠳᠠᠭ᠃ ᠦᠩᠭᠡᠷᠡᠭᠰᠡᠨ ᠳᠤ ᠵᠠᠷᠢᠮ ᠠᠶᠢᠯ ᠪᠠᠰᠠ ᠨᠢᠯᠬᠠ | ᠬᠤᠷᠠᠭᠠᠨ ᠤ ᠬᠤᠳᠤᠭᠤᠳᠤ ᠴᠢᠨᠠᠵᠤ ᠰᠦ ᠲᠠᠢ ᠬᠠᠮᠳᠤᠷᠠᠭᠤᠯᠤᠨ ᠡᠭᠡᠵᠡᠭᠡᠢ ᠶᠢᠨ ᠬᠦᠷᠦᠩᠭᠡ ᠪᠤᠯᠭᠠᠳᠠᠭ ᠪᠠᠶᠢᠵᠠᠢ᠃ | ᠡᠭᠡᠷᠡᠮᠡᠭ᠄ ᠠᠷᠢᠬᠢ ᠨᠡᠷᠡᠵᠦ ᠪᠠᠷᠠᠭᠰᠠᠨ ᠤ ᠲᠠᠷᠠᠭᠠ ᠬᠠᠶᠢᠰᠤᠨ ᠤ ᠲᠤᠳᠤᠭᠠᠳᠤ ᠢᠷᠮᠡᠭ᠂ ᠪᠦᠷᠭᠡᠷ ᠤᠨ | ᠢᠷᠮᠡᠭ᠂ ᠲᠡᠭᠦᠵᠢᠩ ᠤᠨ ᠢᠷᠤᠭᠠᠷ ᠵᠡᠷᠭᠡ ᠳᠤ ᠦᠳᠬᠡᠪᠳᠦᠷ ᠢᠳᠡᠭᠡᠨ ᠨᠠᠭᠠᠯᠳᠤᠭᠰᠠᠨ ᠪᠠᠶᠢᠳᠠᠭ ᠂ ᠲᠡᠭᠦᠨ ᠢ | ᠡᠭᠡᠷᠡᠮᠡᠭ ᠭᠡᠳᠡᠭ᠂ ᠠᠮᠳᠠᠯᠢᠭ ᠪᠠᠶᠢᠳᠠᠭ ᠤᠴᠢᠷ ᠬᠤᠰᠤᠵᠤ ᠠᠪᠤᠭᠠᠳ ᠤᠯᠠᠩᠬᠢ ᠳᠠᠭᠠᠨ ᠬᠡᠤᠬᠡᠰ ᠲᠤ ᠢᠳᠡᠭᠦᠯᠳᠡᠭ᠂ | ᠰᠢᠭᠤᠳ ᠢᠳᠡᠭᠰᠡᠨ ᠴᠤ ᠪᠤᠯᠳᠠᠭ᠂ ᠰᠦ ᠲᠠᠢ ᠵᠢᠭᠤᠷᠠᠭᠠᠳ ᠤᠤᠭᠤᠭᠰᠠᠨ ᠴᠤ ᠪᠤᠯᠳᠠᠭ᠂ ᠠᠮᠢ ᠰᠠᠶᠢᠳᠠᠢ | ᠠᠶᠢᠷᠠᠭ ᠠᠴᠠ ᠡᠭᠡᠷᠡᠮᠡᠭ ᠶᠡᠭᠡ ᠭᠠᠷᠳᠠᠭ᠃ ᠡᠭᠡᠷᠡᠮᠡᠭ ᠶᠡᠬᠡᠳᠡᠪᠡᠯ ᠬᠠᠳᠠᠭᠠᠵᠤ ᠵᠤᠨ ᠪᠤᠬᠠ ᠬᠦᠶᠦᠯᠭᠡᠬᠦ ᠦᠶᠡ ᠳᠤ | ᠦᠷᠦᠭᠦᠨ ᠠᠰᠬᠠᠨ ᠵᠡᠯᠡ ᠲᠡᠭᠡᠷᠡ ᠤᠩᠭᠤᠳᠬᠠᠪᠠᠯ ᠪᠤᠬᠠ ᠴᠤᠭᠯᠠᠵᠤ ᠢᠷᠡᠳᠡᠭ ᠭᠡᠳᠡᠭ ᠪᠦᠭᠡᠳ ᠮᠦᠨ ᠬᠤᠴᠠ | ᠲᠡᠭᠡ ᠬᠦᠶᠦᠬᠦ ᠦᠭᠡᠢ ᠦᠶᠡ ᠳᠤ ᠮᠠᠯ ᠤᠨ ᠬᠤᠳᠠ ᠬᠠᠰᠢᠶᠠ ᠳᠤ ᠤᠩᠭᠤᠳᠬᠠᠪᠠᠯ ᠰᠠᠶᠢᠨ ᠭᠡᠳᠡᠭ᠃ | ᠰᠢᠷᠠ ᠲᠤᠰᠤ᠄ ᠸᠠᠭᠠᠷ ᠰᠠᠪᠠ ᠪᠤᠶᠤ ᠰᠢᠯ ᠯᠤᠩᠬᠤ ᠳᠤ ᠬᠤᠷᠢᠶᠠᠵᠤ ᠲᠠᠯᠪᠢᠭᠰᠠᠨ ᠴᠠᠭᠠᠨ ᠲᠤᠰᠤ ᠪᠠᠨ | ᠲᠤᠭᠤᠭᠠᠨ ᠳᠤ ᠬᠢᠭᠡᠳ ᠲᠡᠬᠡᠷᠡ ᠠᠴᠠ ᠨᠢ ᠵᠢᠭᠠᠬᠠᠨ ᠪᠤᠳᠠᠭᠠ ᠲᠠᠷᠢᠶᠠ ᠪᠤᠶᠤ ᠭᠤᠯᠢᠷ ᠬᠢᠵᠦ ︵ᠢᠯᠭᠠᠷᠠᠭᠤᠯᠬᠤ | ᠦᠢᠯᠡᠳᠦᠯ ᠲᠠᠢ︶ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠴᠢᠨᠠᠬᠤ ᠳᠤ ᠰᠢᠷᠠ ᠤᠰᠤ ᠨᠢ ᠰᠢᠷᠭᠢᠵᠦ᠂ ᠱᠠᠭ ᠨᠢ ᠲᠤᠭᠤᠭᠠᠨ ᠤ | ᠢᠷᠤᠭᠠᠷ ᠲᠤ ᠦᠯᠡᠳᠡᠨ᠂ ᠰᠢᠷᠠ ᠲᠤᠰᠤ ᠲᠡᠭᠡᠭᠦᠷ ᠨᠢ ᠢᠯᠭᠠᠷᠠᠨ ᠭᠠᠷᠤᠨᠠ᠂ ᠲᠡᠭᠦᠨ ᠢ ᠬᠤᠳᠬᠤᠨ ᠠᠪᠴᠤ | ᠰᠠᠪᠠᠨ ᠳᠤ ᠬᠢᠵᠦ ᠲᠠᠯᠪᠢᠨᠠ᠃ ᠡᠨᠡᠬᠦ ᠲᠤᠰᠤ ᠶᠢ ᠤᠰᠤ ᠦᠭᠡᠢ ᠪᠤᠯᠳᠠᠯᠠ ᠰᠢᠷᠭᠠᠭᠠᠨ ᠰᠢᠷᠠᠯᠠᠭᠤᠯᠵᠤ ᠭᠠᠷᠭᠠᠭᠰᠠᠨ | ᠪᠤᠯᠬᠤᠷ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠬᠠᠳᠠᠭᠠᠯᠠᠵᠤ ᠬᠡᠷᠡᠭᠯᠡᠳᠡᠭ᠃ | ᠪᠤᠽᠠ᠄ ᠠᠶᠢᠷᠠᠭ ᠪᠦᠯᠢᠵᠦ ᠴᠠᠭᠠᠨ ᠲᠤᠰᠤ ᠶᠢ ᠨᠢ ᠬᠠᠮᠤᠵᠤ ᠠᠪᠤᠭᠰᠠᠨ ᠤ ᠲᠠᠷᠠᠭᠠ ᠲᠤᠮᠤ ᠬᠠᠶᠢᠰᠤᠨ ᠳᠤ | ᠠᠶᠢᠷᠠᠭ ᠢᠶᠠᠨ ᠬᠢᠬᠡᠳ ᠵᠦᠭᠡᠯᠡᠨ ᠭᠠᠯ ᠢᠶᠠᠷ ᠤᠳᠠᠭᠠᠨ ᠪᠤᠴᠠᠯᠭᠠᠵᠤ ᠦᠳᠬᠡᠷᠡᠭᠦᠯᠦᠨᠡ᠂ ᠡᠭᠦᠨ ᠢᠶᠠᠨ ᠪᠤᠽᠠ | ᠭᠡᠳᠡᠭ᠃ ᠪᠤᠽᠠ ᠪᠠᠨ ᠰᠢᠷᠠ ᠤᠰᠤ ᠪᠠᠷ ᠰᠢᠩᠭᠡᠯᠡᠭᠡᠳ ᠠᠷᠠᠰᠤ ᠰᠢᠷᠢ ᠢᠳᠡᠭᠡᠯᠡᠵᠦ ᠪᠤᠯᠤᠨᠠ᠃ | ᠠᠭᠠᠷᠴᠠ᠄ ᠪᠤᠽᠠ ᠪᠠᠨ ᠪᠦᠯᠢᠶᠡᠰᠬᠡᠨ ᠲᠠᠪᠤᠤ ᠰᠠᠪᠠᠨ ᠳᠤ ᠬᠢᠬᠡᠳ ᠮᠤᠳᠤᠨ ᠠᠴᠠ ᠡᠯᠭᠦᠨ᠂ ᠱᠦᠭᠦᠷᠡᠵᠦ | ᠭᠤᠭᠤᠵᠢᠭᠰᠠᠨ ᠰᠢᠷᠠ ᠤᠰᠤ ᠶᠢ ᠨᠢ ᠤᠨᠳᠤᠤ ᠰᠠᠪᠠᠨ ᠳᠤ ᠲᠤᠰᠴᠤ ᠠᠪᠤᠨᠠ᠂ ᠡᠨᠡ ᠮᠡᠳᠦ ᠪᠠᠷ ᠨᠡᠯᠢᠶᠡᠳ | ᠤᠳᠠᠭᠠᠨ ᠪᠠᠶᠢᠯᠭᠠᠪᠠᠯ ᠰᠢᠷᠠ ᠤᠰᠤ ᠨᠢ ᠭᠦᠢᠴᠡᠳ ᠱᠦᠭᠦᠷᠡᠨ ᠭᠠᠷᠴᠤ ᠦᠳᠬᠡᠨ ᠢᠳᠡᠭᠡᠨ ᠨᠢ ᠦᠯᠡᠳᠡᠨᠡ᠂ | ᠡᠭᠦᠨ ᠢ ᠠᠭᠠᠷᠴᠠ ᠭᠡᠳᠡᠭ᠃ ᠠᠭᠠᠷᠴᠠ ᠨᠢ ᠰᠢᠭᠤᠳ ᠢᠳᠡᠵᠦ ᠪᠤᠯᠬᠤ ᠪᠦᠭᠡᠳ ᠰᠦ᠂ | ᠨᠤᠶᠢᠳᠠᠨ ᠦᠷᠦᠮᠡ᠂ ᠴᠠᠰᠤᠨ ᠰᠢᠬᠢᠷ᠂ ᠵᠦᠭᠡᠭᠡᠢ᠂ ᠽᠠᠮᠪᠠ᠂ ᠪᠤᠯᠤᠭᠰᠠᠨ ᠪᠤᠳᠠᠭᠠ ᠵᠡᠷᠭᠡ ᠲᠠᠢ ᠬᠤᠯᠢᠵᠤ | ᠨᠤᠬᠤᠵᠤ ᠢᠳᠡᠪᠡᠯ ᠤᠨᠴᠤᠭᠤᠢ ᠠᠮᠳᠠᠳᠠᠢ ᠪᠠᠶᠢᠳᠠᠭ᠃ | ᠱᠥᠬᠦᠷᠡᠮᠡᠭ᠄ ᠱᠦᠭᠦᠷᠡᠭᠦᠯᠵᠦ ᠠᠪᠤᠭᠰᠠᠨ ᠠᠭᠠᠷᠴᠠ ᠶᠢ ᠭᠠᠷ ᠤᠨ ᠰᠠᠯᠠᠭᠠ ᠪᠠᠷ ᠪᠠᠵᠠᠭᠠᠵᠤ ᠭᠠᠷᠭᠠᠭᠠᠳ | ᠲᠡᠯᠭᠡᠴᠡ ᠲᠡᠭᠡᠷᠡ ᠬᠠᠳᠠᠭᠠᠭᠰᠠᠨ ᠢ ᠬᠡᠯᠡᠳᠡᠭ᠃ ᠠᠭᠠᠷᠴᠠ ᠳᠠᠭᠠᠨ ᠴᠠᠭᠠᠨ ᠰᠢᠬᠢᠷ ᠬᠤᠯᠢᠵᠤ ᠬᠢᠪᠡᠯ ᠠᠮᠳᠠᠳᠠᠶᠢᠬᠠᠨ | ᠮᠦᠷᠳᠡᠭᠡᠨ ᠦᠩᠭᠡᠯᠢᠭ ᠱᠥᠬᠦᠷᠡᠮᠡᠭ ᠪᠤᠯᠳᠠᠭ᠃ ᠱᠥᠬᠦᠷᠡᠮᠡᠭ ᠢ ᠲᠡᠷᠡ ᠶᠤᠰᠤᠭᠠᠷ ᠨᠢ ᠢᠳᠡᠬᠦ ᠶᠢᠨ ᠬᠠᠮᠳᠤ ᠽᠠᠮᠪᠠ᠂ | ᠰᠢᠬᠢᠷ᠂ ᠪᠤᠭᠤᠷᠰᠤᠭ᠂ ᠪᠤᠯᠤᠭᠰᠠᠨ ᠠᠮᠤ ᠵᠡᠷᠭᠡ ᠲᠠᠢ ᠬᠤᠯᠢᠭᠠᠳ ᠨᠤᠬᠤᠵᠤ ᠢᠳᠡᠬᠦ ᠪᠠ ᠴᠠᠢ᠂ ᠤᠮᠳᠠ᠂ ᠱᠦᠯᠦ | ᠲᠠᠢ ᠭᠤᠯᠢᠷ ᠬᠤᠭᠤᠯᠠ ᠵᠡᠷᠭᠡ ᠳᠤ ᠴᠤ ᠭᠢᠵᠦ ᠢᠳᠡᠳᠡᠭ᠃ ᠵᠠᠷᠢᠮ ᠠᠶᠢᠯ ᠲᠡᠮᠦᠷ ᠬᠠᠯᠠᠭᠠ ᠰᠠᠪᠠ ᠳᠤ ᠵᠢᠵᠢᠭ | ᠵᠢᠵᠢᠭ ᠨᠦᠬᠡ ᠴᠤᠭᠤᠯᠤᠭᠠᠳ ᠠᠭᠠᠷᠴᠠ ᠪᠠᠨ ᠬᠢᠵᠦ ᠰᠢᠬᠠᠳᠠᠭ᠂ ᠲᠡᠭᠡᠬᠦᠯᠡᠷ ᠤᠷᠢᠶᠠᠯᠳᠤᠭᠰᠠᠨ ᠦᠳᠦ ᠬᠤᠷᠤᠬᠠᠢ | ᠰᠢᠭ᠋ ᠶᠠᠩᠵᠤ ᠲᠠᠢ ᠢᠳᠡᠭᠡᠨ ᠭᠠᠷᠤᠨᠠ᠂ ᠲᠡᠭᠦᠨ ᠢᠶᠠᠨ ᠬᠤᠷᠤᠬᠠᠢ ᠱᠥᠬᠦᠷᠡᠮᠡᠭ ᠭᠡᠳᠡᠭ ᠪᠠᠶᠢᠵᠠᠢ᠃ ᠴᠠᠢ ᠳᠤ ᠬᠢᠪᠡᠯ | ᠲᠡᠪᠳᠦᠬᠦ ᠨᠢ ᠠᠮᠠᠷᠬᠠᠨ ᠪᠠᠶᠢᠬᠤ ᠤᠨᠴᠠᠯᠢᠭ ᠲᠠᠢ᠃ | ᠬᠤᠷᠤᠳ᠄ ᠠᠭᠠᠷᠴᠠ ᠶᠢ ᠲᠤᠮᠤᠬᠠᠨ ᠰᠤᠸᠠᠮᠫᠠᠨ ᠤ ᠥᠷᠢᠯ ᠬᠡᠪᠳᠡᠢ ᠲᠦᠭᠦᠷᠢᠭᠯᠡᠨ ᠵᠠᠰᠠᠬᠤ ᠪᠤᠶᠤ ᠮᠤᠳᠤᠨ | ᠬᠡᠪ ᠲᠤ ᠬᠢᠭᠡᠳ ᠬᠠᠳᠠᠭᠠᠭᠰᠠᠨ ᠢ ᠬᠡᠯᠡᠨᠡ᠂ ᠲᠡᠪᠰᠢ ᠲᠡᠯᠭᠡᠴᠡ ᠲᠡᠭᠡᠷᠡ ᠲᠦᠷᠪᠡᠯᠵᠢᠯᠡᠵᠦ ᠵᠦᠰᠦᠭᠡᠳ | ᠬᠠᠳᠠᠭᠠᠭᠰᠠᠨ ᠢ ᠴᠤ ᠬᠡᠯᠡᠳᠡᠭ᠃ | ᠴᠠᠶᠢᠳᠠᠮ ︵ᠴᠡᠶᠢᠳᠡᠮᠡᠭ︶᠄ ᠠᠶᠢᠷᠠᠭ ᠲᠡᠭᠡᠷᠡ ᠬᠦᠢᠳᠡᠨ ᠤᠰᠤ ᠬᠤᠯᠢᠵᠤ ᠰᠢᠩᠭᠡᠷᠡᠭᠦᠯᠦᠭᠰᠡᠨ ᠤᠮᠳᠠᠭᠠᠨ ᠢ | ᠬᠡᠯᠡᠨᠡ᠃ ᠴᠠᠶᠢᠳᠠᠮ ᠢ ᠵᠤᠨ ᠤ ᠠᠭᠠᠬᠢᠮᠠ ᠬᠠᠯᠠᠭᠤᠨ ᠳᠤ ᠤᠤᠭᠤᠪᠠᠯ ᠴᠠᠩᠭᠠᠭᠠ ᠭᠠᠷᠭᠠᠬᠤ ᠦᠢᠯᠡᠳᠦᠯ ᠢᠶᠠᠷ | ᠲᠤᠩ ᠰᠠᠶᠢᠨ ᠪᠠᠶᠢᠳᠠᠭ ᠪᠦᠭᠡᠳ ᠠᠷᠢᠬᠢᠨ ᠳᠤ ᠰᠢᠷᠠᠳᠠᠭᠰᠠᠨ ᠬᠦᠮᠦᠨ ᠤ ᠰᠢᠷᠠ ᠲᠠᠶᠢᠯᠠᠬᠤ ᠦᠢᠯᠡᠳᠦᠯ ᠲᠠᠢ᠃ | ᠬᠤᠭᠤᠷᠮᠠᠭ ︵ᠬᠤᠯᠢᠮᠠᠭ︶᠄ ᠠᠭᠠᠷᠴᠠ ᠲᠡᠭᠡᠷᠡ ᠪᠦᠯᠢᠶᠡᠨ ᠰᠦ ᠬᠤᠯᠢᠭᠰᠠᠨ ᠦᠳᠬᠡᠪᠳᠦᠷ ᠢᠳᠡᠭᠡᠨ ᠢ | ᠬᠡᠯᠡᠨᠡ᠃ ᠦᠶᠦᠭ ᠰᠠᠶᠢᠳᠠᠢ᠂ ᠬᠤᠭᠤᠯᠠᠨ ᠤ ᠤᠷᠤᠨ ᠳᠤ ᠢᠳᠡᠳᠡᠭ ᠪᠠᠶᠢᠵᠠᠢ᠃ | ᠬᠢᠮᠠᠷ ︵ᠬᠢᠷᠠᠮᠤ︶᠄ ᠪᠤᠴᠠᠯᠤᠭᠰᠠᠨ ᠬᠦᠢᠳᠡᠨ ᠤᠰᠤ ᠲᠡᠭᠡᠷᠡ ᠵᠢᠭᠠᠬᠠᠨ ᠬᠦᠭᠡᠷᠦᠭᠦᠯᠦᠭᠰᠡᠨ ᠰᠦ | ︵ᠬᠦᠢᠳᠡᠨ︶ ᠬᠢᠭᠰᠡᠨ ᠤᠮᠳᠠᠭᠠᠨ ᠢ ᠬᠡᠯᠡᠨᠡ᠃ ᠡᠭᠦᠨ ᠢ ᠬᠦᠮᠦᠰ ᠰᠢᠭᠤᠳ ᠤᠤᠭᠤᠵᠤ ᠴᠠᠩᠭᠠᠭᠠ ᠪᠠᠨ | ᠭᠠᠷᠭᠠᠳᠠᠭ᠃ ᠪᠠᠰᠠ ᠠᠶᠢᠷᠠᠭ ᠪᠦᠯᠢᠭᠡᠳ ᠬᠦᠢᠳᠡᠨ ᠬᠠᠯᠠᠭᠤᠨ ᠢ ᠨᠢ ᠲᠡᠩᠴᠡᠭᠦᠯᠬᠦ ᠶᠢᠨ ᠲᠦᠯᠦᠭᠡ ᠬᠦᠢᠳᠡᠨ ᠤᠰᠤ | ᠪᠤᠶᠤ ᠬᠠᠯᠠᠭᠤᠨ ᠤᠰᠤ ᠬᠢᠬᠦ ᠶᠢ ᠠᠶᠢᠷᠠᠭ ᠬᠢᠮᠠᠷᠯᠠᠨᠠ ᠭᠡᠵᠦ ᠪᠠᠶᠢᠳᠠᠭ᠃ ᠲᠤᠷᠭᠤᠳ ᠬᠦᠮᠦᠨ ᠬᠢᠮᠠᠷ ᠭᠡᠵᠦ᠂ | ᠬᠠᠯᠬᠠ ᠬᠦᠮᠦᠨ ᠬᠢᠷᠠᠮᠤ ᠭᠡᠳᠡᠭ᠃ | ᠬᠦᠭᠡᠷᠴᠡᠭ᠄ ᠪᠠᠭᠠ ᠰᠠᠪᠠᠨ ᠳᠤ ᠵᠢᠭᠠᠬᠠᠨ ᠠᠶᠢᠷᠠᠭ ᠪᠤᠶᠤ ᠠᠭᠠᠷᠴᠠ ᠬᠢᠵᠤ ᠲᠡᠭᠡᠷᠡ ᠠᠴᠠ ᠨᠢ ᠦᠬᠡᠷ ᠤᠨ | ᠰᠦ ᠰᠠᠭᠠᠭᠠᠳ ᠬᠤᠯᠢᠭᠰᠠᠨ ᠤᠮᠳᠠᠭᠠᠨ ᠢ ᠬᠡᠯᠡᠨᠡ᠂ ᠬᠦᠮᠦᠰ ᠬᠡᠢ ᠡᠪᠡᠳᠴᠢᠨ᠂ ᠭᠡᠳᠡᠰᠦ ᠡᠪᠭᠦᠶᠢᠷᠡᠭᠰᠡᠨ ᠳᠤ | ᠰᠠᠶᠢᠨ ᠭᠡᠮᠡᠨ ᠰᠠᠭᠠᠭᠠᠳ ᠪᠡᠯᠡᠨ ᠤᠤᠭᠤᠳᠠᠭ᠃ | ᠬᠤᠰᠤᠮ᠄ ᠰᠦ ᠬᠦᠭᠡᠷᠦᠭᠦᠯᠦᠭᠰᠡᠨ ᠤ ᠲᠠᠷᠠᠭᠠ ᠬᠠᠶᠢᠰᠤᠨ ᠤ ᠢᠷᠤᠭᠠᠷ ᠲᠤ ᠲᠤᠭᠳᠠᠭᠰᠠᠨ ᠪᠤᠭᠤᠷᠤᠯ | ᠢᠳᠡᠭᠡᠨ ᠢ ᠬᠡᠯᠡᠨᠡ᠂ ᠰᠢᠭᠤᠳ ᠢᠳᠡᠵᠦ ᠪᠤᠯᠬᠤ ᠪᠦᠭᠡᠳ ᠵᠠᠷᠢᠮ ᠨᠢ ᠬᠤᠷᠢᠶᠠᠴᠠ ᠳᠠᠭᠠᠨ ᠬᠢᠭᠡᠳ ᠬᠠᠳᠠᠭᠠᠯᠠᠵᠤ | ᠪᠠᠶᠢᠳᠠᠭ᠂ ᠵᠠᠷᠢᠮ ᠨᠢ ᠮᠠᠯ ᠪᠤᠶᠤ ᠨᠤᠬᠠᠢ ᠪᠠᠨ ᠲᠡᠵᠢᠭᠡᠵᠦ ᠴᠤ ᠪᠠᠶᠢᠳᠠᠭ᠃ | ᠬᠤᠷᠢᠶᠠᠴᠠ᠄ ᠨᠠᠮᠤᠷᠰᠢᠵᠤ ᠢᠷᠡᠬᠦ ᠳᠤ ᠪᠠᠭᠠ ᠮᠠᠯ ᠤᠨ ᠭᠦᠵᠡᠭᠡᠨ ᠳᠤ ᠦᠯᠡᠳᠡᠵᠦ ᠬᠤᠴᠤᠷᠤᠭᠰᠠᠨ ᠰᠦ᠂ | ᠠᠶᠢᠷᠠᠭ᠂ ᠬᠤᠰᠤᠮ᠂ ᠵᠦᠭᠡᠭᠡᠢ᠂ ᠦᠷᠦᠮᠡ ᠵᠡᠷᠭᠡ ᠴᠠᠭᠠᠨ ᠢᠳᠡᠭᠡ ᠶᠢ ᠬᠢᠵᠦ ᠬᠤᠷᠢᠶᠠᠨ ᠡᠪᠦᠯ ᠬᠦᠯᠳᠡᠭᠡᠨ᠂ | ᠢᠷᠡᠬᠦ ᠬᠠᠪᠤᠷ ᠤᠨ ᠬᠠᠳᠠᠭᠤ ᠳᠤ ᠢᠳᠡᠳᠡᠭ ᠢᠳᠡᠭᠡᠨ ᠢ ᠬᠡᠯᠡᠳᠡᠭ᠃ ᠰᠦ ᠲᠡᠶᠢᠯᠦᠩᠬᠢ ᠬᠢᠵᠦ ᠬᠦᠯᠳᠡᠭᠡᠪᠡᠯ ᠨᠡᠩ | ᠠᠮᠳᠠᠯᠢᠭ ᠪᠤᠯᠳᠠᠭ᠃ | ᠡᠭᠡᠳᠡᠭᠰᠡᠨ ᠰᠦ᠄ ᠬᠠᠯᠠᠭᠤᠨ ᠴᠠᠭ ᠲᠤ ᠰᠦ ᠡᠰᠤᠵᠦ ᠡᠯᠢᠭᠡᠳᠡᠭᠰᠡᠨ ᠢ ᠬᠡᠯᠡᠳᠡᠭ᠂ ᠡᠭᠡᠳᠡᠭᠰᠡᠨ ᠰᠦ ᠪᠠᠷ | ᠴᠠᠢ ᠰᠦᠯᠡᠵᠦ ᠲᠡᠶᠢᠯᠳᠡᠭ ᠦᠭᠡᠢ᠂ ᠠᠶᠢᠷᠠᠭ ᠲᠤ ᠬᠤᠯᠢᠬᠤ ᠪᠤᠶᠤ ᠡᠭᠡᠵᠡᠭᠡᠢ ᠬᠢᠳᠡᠭ᠃ | ᠰᠢᠷᠠ ᠤᠰᠤ᠄ ᠠᠶᠢᠷᠠᠭ᠂ ᠪᠤᠽᠠ ᠱᠦᠭᠦᠬᠦ ᠪᠤᠶᠤ ᠪᠢᠰᠢᠯᠠᠭ ᠰᠢᠬᠠᠬᠤ ᠳᠤ ᠭᠠᠷᠳᠠᠭ ᠰᠢᠩᠭᠡᠨ ᠪᠡᠶᠡᠳᠦ ᠶᠢ | ᠬᠡᠯᠡᠳᠡᠭ᠂ ᠲᠡᠭᠦᠨ ᠢᠶᠠᠷ ᠠᠷᠠᠰᠤ ᠰᠢᠷᠢ ᠢᠳᠡᠭᠡᠯᠡᠬᠦ ᠪᠤᠶᠤ ᠮᠠᠯ ᠳᠤ ᠦᠭᠳᠡᠭ᠂ ᠮᠠᠯ ᠤᠨ ᠰᠠᠶᠢᠬᠠᠨ ᠤᠮᠳᠠᠭᠠᠨ | ᠪᠤᠯᠳᠠᠭ᠃ | ᠬᠠᠶᠢᠯᠮᠠᠭ᠄ ᠰᠢᠷᠭᠠᠭᠠᠭᠰᠠᠨ ᠲᠤᠰᠤᠨ ᠤ ᠱᠠᠭ ᠲᠡᠭᠡᠷᠡ ᠭᠤᠯᠢᠷ᠂ ᠴᠠᠰᠤᠨ ᠰᠢᠬᠢᠷ ᠬᠤᠯᠢᠵᠤ ᠬᠠᠭᠠᠷᠢᠵᠤ | ᠪᠤᠯᠭᠤᠭᠰᠠᠨ ᠢᠳᠡᠭᠡᠨ ᠢ ᠬᠡᠯᠡᠳᠡᠭ᠃ | ᠡᠭᠡᠳᠡᠮᠡᠭ ︵ᠠᠭᠠᠳᠠᠮᠠᠭ︶᠄ ᠬᠠᠯᠠᠭᠤᠨ ᠰᠦ ᠲᠡᠭᠡᠷᠡ ᠵᠢᠭᠠᠬᠠᠨ ᠠᠶᠢᠷᠠᠭ ᠪᠤᠶᠤ ᠠᠭᠠᠷᠴᠠ ᠬᠤᠯᠢᠪᠠᠯ | ᠡᠭᠡᠳᠡᠭᠡᠳ ᠦᠳᠭᠡᠪᠳᠦᠷ ᠢᠳᠡᠭᠡᠨ ᠪᠤᠯᠳᠠᠭ᠂ ᠲᠡᠭᠦᠨ ᠢᠶᠠᠨ ᠡᠭᠡᠳᠡᠮᠡᠭ ᠭᠡᠳᠡᠭ᠂ ᠠᠭᠠᠳᠠᠮᠠᠭ ᠴᠤ ᠭᠡᠳᠡᠭ᠃ |