ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠢᠷᠭᠠᠯ ᠭᠤᠪᠢ
ᠡᠵᠡᠨ᠎ᠡ ᠲᠣᠷᠭᠤᠳᠴᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠶᠣᠰᠣᠨ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/6/5
      ᠨᠡᠶᠢᠲᠡ ᠮᠣᠩᠭᠤᠯ ᠤᠨ ᠳᠠᠭᠤᠳᠠᠯᠭ᠎ᠠ ᠶᠢᠨ ᠶᠣᠰᠣᠨ ᠳᠤ ᠲᠥᠷᠥᠯ ᠪᠤᠰᠤ ᠨᠠᠰᠤᠲᠠᠨ ᠲᠣᠮᠣᠭᠠᠲᠠᠨ᠂ ᠠᠬᠠᠰ ᠵᠠᠬᠠᠰ ᠪᠠ ᠠᠯᠪᠠᠨ ᠤ ᠬᠥᠮᠥᠰ ᠵᠢᠴᠢ ᠯᠠᠮᠠ ᠬᠤᠸᠠᠷᠠᠭ ᠢ ᠰᠢᠭᠤᠳ ᠨᠡᠷ᠎ᠡ ᠪᠠᠷ ᠨᠢ ᠳᠠᠭᠤᠳᠠᠬᠤ ᠪᠢᠰᠢ ᠬᠠᠷᠢᠨ ᠠᠪᠤᠭᠠᠶᠢᠯᠠᠨ ᠳᠠᠭᠤᠳᠠᠵᠤ ᠬᠦᠨᠳᠦᠳᠬᠡᠯ ᠢᠶᠠᠨ ᠢᠯᠡᠳᠬᠡᠬᠦ ᠶᠣᠰᠣ ᠵᠠᠩᠰᠢᠯ ᠪᠠᠶᠢᠳᠠᠭ᠃      ᠡᠵᠡᠨ᠎ᠡ ᠲᠣᠷᠭᠤᠳᠴᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠶᠣᠰᠣᠨ ᠳᠤ ᠪᠤᠰᠤᠳ ᠨᠤᠲᠤᠭ ᠤᠨ ᠮᠣᠩᠭᠤᠯᠴᠤᠳ ᠰᠢᠭ᠋ ᠡᠪᠦᠭᠡ ᠡᠮᠡᠭᠡ ᠶᠢᠨ ᠦᠶ᠎ᠡ ᠶᠢᠨ ᠪᠤᠭᠤᠷᠤᠯᠴᠤᠳ ᠢ ᠮᠥᠨ ︽ᠡᠪᠦᠭᠡ︾᠂ ︽ᠡᠮᠡᠭᠡ︾ ᠭᠡᠳ᠂ ᠡᠴᠢᠭᠡ ᠡᠬᠡ ᠎ ᠲᠠᠢ ᠨᠢ ᠨᠢᠭᠡ ᠦᠶ᠎ᠡ ᠶᠢᠨ ᠬᠥᠮᠥᠨ ᠢ ︽ᠭᠤᠸᠠᠢ︾᠂ ︽ᠠᠪᠤᠭᠠᠢ︾ ᠭᠡᠵᠦ ᠳᠠᠭᠤᠳᠠᠳᠠᠭ ᠦᠭᠡᠢ᠃ ᠮᠥᠨ ᠠᠯᠠᠱᠠ ᠬᠤᠱᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠠᠳᠠᠯᠢ ᠪᠠᠷ ᠵᠢᠩᠬᠢᠨᠢ ᠨᠡᠷ᠎ᠡ ᠶᠢᠨ ᠳᠠᠷᠠᠭ᠎ᠠ ᠠᠪᠤᠭᠠᠶᠢᠯᠠᠭ᠎ᠠ ᠳᠠᠭᠠᠭᠤᠯᠤᠨ ᠳᠠᠭᠤᠳᠠᠳᠠᠭ ᠦᠭᠡᠢ ᠠᠵᠢ᠃ ᠨᠡᠩ ᠴᠤ ᠵᠣᠷᠢᠭ ᠢᠶᠠᠷ ᠵᠣᠬᠢᠶᠠᠵᠤ ᠳᠠᠭᠤᠳᠠᠬᠤ ᠶᠢ ᠲᠠᠰᠤ ᠲᠡᠪᠴᠢᠳᠡᠭ ᠪᠢᠯᠡ᠃ ᠡᠶᠢᠮᠦ ᠠᠴᠠ ᠡᠵᠡᠨ᠎ᠡ ᠲᠣᠷᠭᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠨᠢ ᠨᠡᠶᠢᠭᠡᠮ ᠤᠨ ᠲᠡᠦᠬᠡᠨ ᠬᠥᠭᠵᠢᠯ ᠤᠨ ᠶᠠᠪᠤᠴᠠ ᠳᠤ ᠠᠵᠢᠯ ᠮᠡᠷᠭᠡᠵᠢᠯ᠂ ᠬᠦᠢᠰᠦ᠂ ᠵᠡᠷᠭᠡ ᠲᠤᠰᠢᠶᠠᠯ᠂ ᠵᠠᠩ ᠠᠭᠠᠯᠢ ᠵᠡᠷᠭᠡ ᠪᠠᠷ ᠢᠯᠭᠠᠨ ᠳᠠᠭᠤᠳᠠᠬᠤ ᠪᠣᠯᠣᠭᠰᠠᠨ ᠤ ᠬᠤᠪᠢ ᠳᠤ ᠣᠷᠣᠨ ᠨᠤᠲᠤᠭ ᠤᠨ ᠣᠨᠴᠠᠯᠢᠭ ᠰᠢᠨᠵᠢ ᠪᠠᠷ ᠮᠠᠰᠢ ᠲᠣᠪᠣᠶᠢᠮ᠎ᠠ ᠪᠠᠶᠢᠳᠠᠭ ᠠᠵᠢ᠃      ︽ᠮᠣᠩᠭᠤᠯᠴᠤᠳ ᠥᠪᠡᠷ ᠤᠨ ᠦᠷ᠎ᠡ ᠬᠡᠦᠬᠡᠳ ᠲᠤ ᠪᠠᠨ ᠥᠰᠬᠦ ᠪᠣᠰᠬᠤ ᠠᠴᠠ ᠨᠢ ᠡᠬᠢᠯᠡᠨ ᠳᠡᠭᠦᠦ ᠨᠡᠷ ᠪᠠᠭᠠᠴᠤᠤᠯ ᠢᠶᠠᠨ ᠬᠥᠭᠡᠷᠦᠬᠦᠶᠢᠯᠡᠨ ᠬᠠᠶᠢᠷᠠᠯᠠᠬᠤ᠂ ᠠᠪᠤ ᠡᠵᠢ ᠠᠬ᠎ᠠ ᠪᠠᠨ ᠡᠷᠬᠢᠮᠯᠡᠨ ᠬᠦᠨᠳᠦᠳᠬᠡᠬᠦ᠂ ᠨᠢᠭᠡ ᠨᠢᠭᠡ ᠪᠠᠨ ᠬᠠᠯᠠᠮᠵᠢᠯᠠᠨ ᠡᠨᠡᠷᠢᠬᠦ ᠵᠡᠷᠭᠡ ᠠᠬᠠᠴᠢᠯᠠᠬᠤ ᠳᠡᠭᠦᠦᠴᠢᠯᠡᠬᠦ ᠪᠣᠯᠪᠠᠰᠤᠨ ᠶᠣᠰᠣ ᠪᠠᠷ ᠬᠠᠷᠢᠴᠠᠬᠤ ᠬᠠᠷᠢᠴᠠᠭᠠᠨ ᠤ ᠬᠡᠷᠡᠭᠴᠡᠭᠡᠨ ᠠᠴᠠ ᠪᠣᠯᠵᠤ ᠬᠤᠭᠤᠷᠣᠨᠳᠣ ᠪᠠᠨ ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠶᠢ ᠬᠡᠷᠡᠭᠯᠡᠬᠦ ᠪᠣᠯᠵᠠᠢ᠃ ᠲᠡᠭᠦᠨᠴᠢᠯᠡᠨ ᠲᠡᠳᠡ᠄ ︿ᠬᠥᠮᠥᠨ ᠠᠬ᠎ᠠ ᠲᠠᠢ᠂ ᠳᠡᠪᠡᠯ ᠵᠠᠬ᠎ᠠ ᠲᠠᠢ﹀ ᠬᠡᠮᠡᠨ ᠦᠷ᠎ᠡ ᠬᠡᠦᠬᠡᠳ ᠢᠶᠠᠨ ᠬᠡᠯᠡᠨ ᠳᠤ ᠣᠷᠣᠵᠤ ᠮᠡᠳᠡᠭᠡᠵᠢᠬᠦ ᠠᠴᠠ ᠨᠢ ᠡᠬᠢᠯᠡᠨ ᠥᠪᠡᠷ ᠤᠨ ᠲᠥᠷᠥᠭᠰᠡᠨ ᠠᠬ᠎ᠠ ᠳᠡᠭᠦᠦ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭ᠎ᠠ ᠨᠡᠷᠡᠶᠢᠳᠦᠯ ᠢ ᠵᠢᠭᠠᠵᠤ ᠰᠤᠷᠭᠠᠳᠠᠭ ᠪᠢᠯᠡ︾᠃      ᠡᠵᠡᠨ᠎ᠡ ᠲᠣᠷᠭᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠶᠣᠰᠣᠨ ᠳᠤ ᠠᠪᠤ᠂ ᠠᠬ᠎ᠠ ᠮᠡᠲᠦ ᠶᠢᠨ ᠲᠥᠷᠥᠯ ᠲᠥᠷᠥᠭᠰᠡᠳ ᠤᠨ ᠳᠣᠲᠣᠨᠣ ᠨᠠᠶᠢᠵᠠ᠂ ᠰᠠᠶᠢᠨ ᠨᠥᠬᠦᠷ ᠵᠡᠷᠭᠡ ᠲᠥᠷᠥᠯ ᠪᠤᠰᠤ ᠬᠥᠮᠥᠰ ᠢ ᠣᠨᠴᠠᠭᠠᠢ ᠪᠠᠷ ᠠᠪᠤᠭᠠᠶᠢᠯᠠᠳᠠᠭ ᠶᠣᠰᠣ ᠪᠤᠢ᠃ ᠲᠤᠬᠠᠶᠢᠯᠠᠪᠠᠯ ᠲᠥᠷᠥᠯ ᠤᠨ ᠨᠡᠷ᠎ᠡ ᠶᠢᠨ ᠳᠠᠷᠠᠭ᠎ᠠ ᠶᠠᠮᠠᠷ ᠨᠢᠭᠡᠨ ᠠᠪᠢᠶ᠎ᠠ ᠵᠠᠯᠭᠠᠭᠠᠳ ᠡᠴᠢᠭᠡ ᠶᠢᠨ ᠦᠶ᠎ᠡ ᠶᠢᠨ ᠬᠥᠮᠥᠨ ᠢ ︽ᠠᠪᠤᠵᠢᠶ᠎ᠠ︾᠂ ︽ᠠᠪᠵᠠ︾ ᠭᠡᠬᠦ᠂ ᠠᠬ᠎ᠠ ᠶᠢᠨ ᠦᠶ᠎ᠡ ᠶᠢᠨ ᠬᠥᠮᠥᠨ ᠢ       ︽ᠠᠬᠠᠵᠢᠶᠠ︾᠂ ︽ᠠᠬᠠᠲᠠᠢ︾ ᠭᠡᠵᠦ ᠥᠪᠡᠷ ᠲᠥᠷᠥᠯ ᠠᠴᠠ ᠪᠠᠨ ᠢᠯᠭᠠᠵᠤ ᠬᠦᠨᠳᠦᠳᠬᠡᠨ ᠳᠠᠭᠤᠳᠠᠳᠠᠭ ᠵᠠᠩᠰᠢᠯ ᠪᠠᠶᠢᠳᠠᠭ᠃      ᠡᠵᠡᠨ᠎ᠡ ᠲᠣᠷᠭᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠶᠢᠨ ᠲᠤᠬᠠᠢ ᠡᠷᠳᠡᠮᠲᠡᠨ ᠫᠷᠣᠹᠧᠰᠰᠣᠷ ᠴᠣᠶᠢᠳᠠᠨᠳᠠᠷ ᠭᠤᠸᠠᠢ ︽ᠡᠵᠡᠨ᠎ᠡ ᠮᠣᠩᠭᠤᠯᠴᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠶᠢᠨ ᠤᠴᠢᠷ︾ ᠭᠡᠬᠦ ᠥᠭᠦᠯᠡᠯ ᠳᠡᠭᠡᠨ ᠨᠠᠷᠢᠨ ᠰᠢᠨᠵᠢᠯᠡᠯᠲᠡ ᠬᠢᠵᠠᠢ᠃ ᠲᠡᠷᠡ᠄      ᠮᠣᠩᠭᠤᠯ ᠬᠥᠮᠥᠨ ᠤ ᠵᠢᠩᠬᠢᠨᠢ ᠨᠡᠷ᠎ᠡ ᠶᠢᠨ ᠪᠣᠳᠠᠲᠤ ᠦᠭᠡ ᠨᠢ ᠶᠠᠮᠠᠷ ᠭᠠᠷᠤᠯ ᠲᠠᠢ ᠦᠭᠡ ᠪᠠᠶᠢᠯ᠎ᠠ ᠴᠤ ᠭᠡᠰᠡᠨ ᠬᠠᠷᠢᠨ ᠠᠭᠤᠯᠭ᠎ᠠ ᠶᠢᠨ ᠬᠤᠪᠢ ᠳᠤ ᠪᠣᠯ ᠭᠤᠣᠯᠳᠠᠭᠤ ᠰᠠᠶᠢᠨ ᠰᠠᠶᠢᠬᠠᠨ ᠵᠦᠢᠯ ᠢ ᠬᠦᠰᠡᠨ ᠮᠥᠷᠥᠭᠡᠳᠦᠭᠰᠡᠨ ᠪᠠ ᠬᠠᠶᠢᠷᠠᠯᠠᠵᠤ ᠬᠠᠮᠠᠭᠠᠯᠠᠭᠰᠠᠨ ᠭᠡᠬᠦ ᠵᠡᠷᠭᠡ ᠦᠨᠳᠦᠰᠦᠨ ᠠᠭᠤᠯᠭ᠎ᠠ ᠴᠢᠭᠯᠡᠯ ᠲᠠᠢ ᠪᠠᠶᠢᠳᠠᠭ᠃ ᠁ ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠶᠢᠨ ᠪᠣᠳᠠᠲᠤ ᠦᠭᠡ ᠶᠢᠨ ᠲᠤᠰ ᠪᠡᠶ᠎ᠡ ᠳᠤ ᠨᠢ ᠶᠠᠮᠠᠷ ᠴᠤ ᠤᠳᠬ᠎ᠠ ᠦᠭᠡᠢ᠃ ᠲᠡᠭᠡᠪᠡᠯ ᠶᠠᠭᠠᠬᠢᠭᠠᠳ ᠡᠶᠢᠮᠦ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠨᠡᠷ᠎ᠡ ᠦᠭᠡ ᠪᠤᠢ ᠪᠣᠯᠪᠠ ᠭᠡᠪᠡᠯ᠂ ᠡᠨᠡ ᠨᠢ ᠠᠪᠤᠭᠠᠶᠢᠯᠠᠭᠳᠠᠵᠤ ᠪᠠᠶᠢᠭ᠎ᠠ ᠬᠥᠮᠥᠨ ᠤ ᠵᠢᠩᠬᠢᠨᠢ ᠨᠡᠷ᠎ᠡ ᠶᠢ ᠳᠥᠭᠦᠮᠴᠢᠯᠡᠨ ᠳᠠᠭᠤᠷᠢᠶᠠᠭᠰᠠᠨ ᠬᠡᠦᠬᠡᠳ ᠤᠨ ᠦᠭᠡᠨ ᠤ ᠳᠠᠭᠤᠳᠠᠯᠭ᠎ᠠ ᠭᠡᠰᠡᠨ ᠢ ᠪᠠᠶᠢᠴᠠᠭᠠᠭᠰᠠᠨ ᠮᠠᠲ᠋ᠧᠷᠢᠶᠠᠯ ᠢᠶᠠᠷ ᠨᠤᠲᠠᠯᠠᠵᠤ ᠪᠣᠯᠤᠮᠠᠷ ᠪᠠᠶᠢᠨ᠎ᠠ᠃ ᠵᠢᠱᠢᠶ᠎ᠡ ᠦᠵᠡᠭᠦᠯᠪᠡᠯ᠄      ᠠᠮᠤᠷᠵᠢᠷᠭᠠᠯ— ᠠᠮᠵᠢᠭᠠᠢ              ᠳ᠋ᠠᠨᠵᠢᠨᠢᠮ᠎ᠠ— ᠳ᠋ᠠᠨᠢᠭ᠎ᠠ      ᠠᠪᠢᠷᠮᠢᠳ— ᠠᠪᠵᠠ                 ᠮᠠᠨᠳᠦᠭᠡᠷᠡᠯ— ᠮᠠᠨᠢᠭ᠎ᠠ      ᠪᠠᠲᠤᠴᠡᠴᠡᠭ— ᠪᠠᠭᠠᠵᠢ                ᠲᠦᠨᠳᠦᠭᠡᠷ— ᠲᠦᠨᠳᠦ      ᠪᠠᠲᠤᠭᠤᠳᠤᠪ— ᠪᠡᠭᠡᠢ                 ᠲᠡᠮᠪᠡᠷᠢᠯ— ᠳ᠋ᠡᠮᠪᠡ      ᠭᠤᠮᠪᠤᠵᠠᠪ— ᠭᠤᠭᠤᠤ                ᠲᠤᠯᠮᠠᠳᠤᠷᠵᠢ— ᠳ᠋ᠤᠨᠳᠠ      ᠰᠠᠨᠳᠠᠭ— ᠰᠠᠭᠠᠶ᠎ᠠ                  ᠳᠣᠷᠵᠢᠰᠦ᠋ᠷᠦᠩ— ᠳ᠋ᠦᠳᠦᠦ      ᠪᠠᠳᠮᠠᠴᠡᠴᠡᠭ— ᠪᠠᠵᠢᠭᠡᠢ              ᠳ᠋ᠠᠰᠢ— ᠳ᠋ᠠᠩᠬᠢ      ᠲᠤᠯᠮᠠᠰᠦ᠋ᠷᠦᠩ— ᠲᠤᠮᠵᠠ            ᠮᠤᠬᠤᠷᠴᠠᠭᠠᠨ— ᠮᠣᠵᠢ      ᠲᠠᠷᠢᠮ᠎ᠠ— ᠲᠠᠮ᠎ᠠ                  ᠰᠦᠷᠦᠩᠭᠡᠷ— ᠰᠥᠩᠭᠡ      ᠬᠠᠳᠠᠨᠰᠦ᠋ᠷᠦᠩ— ᠬᠠᠭᠡᠢ              ᠮᠢᠴᠢᠨ— ᠮᠢᠨᠵᠡᠢ      ᠭᠡᠷᠡᠯᠴᠢᠮᠡᠭ— ᠭᠡᠨᠵᠢᠭᠡᠢ ᠭᠡᠬᠦ ᠮᠡᠲᠦ᠃      ︽ᠬᠡᠦᠬᠡᠳ ᠡᠬᠢᠯᠡᠵᠦ ᠬᠡᠯᠡᠨ ᠳᠤ ᠣᠷᠣᠬᠤ ᠳᠠᠭᠠᠨ ᠶᠡᠷᠦ ᠠᠴᠠ ᠡᠵᠢ ᠠᠪᠤ ᠶᠡᠬᠡᠴᠦᠦᠯ ᠤᠨ ᠢᠶᠠᠨ ᠦᠭᠡ ᠶᠠᠷᠢᠶ᠎ᠠ ᠶᠢ ᠰᠣᠨᠣᠰᠤᠭᠰᠠᠭᠠᠷ ᠳᠠᠭᠤᠷᠢᠶᠠᠭᠰᠠᠭᠠᠷ ᠦᠭᠡ ᠬᠡᠯᠡᠵᠦ ᠰᠤᠷᠳᠠᠭ᠂ ᠲᠡᠭᠦᠨᠴᠢᠯᠡᠨ ᠶᠡᠭᠡ ᠬᠥᠮᠥᠨ ᠢ ᠳᠠᠭᠤᠷᠢᠶᠠᠵᠤ ᠬᠥᠮᠥᠨ ᠤ ᠨᠡᠷ᠎ᠡ ᠶᠢ ᠬᠡᠯᠡᠬᠦ ᠭᠡᠳ ᠭᠦᠢᠴᠡᠳ ᠬᠡᠯᠡᠵᠦ ᠴᠢᠳᠠᠬᠤ ᠦᠭᠡᠢ ᠳᠡᠭᠡᠨ ᠶᠡᠭᠡ ᠬᠥᠮᠥᠨ ᠤ ᠵᠢᠩᠬᠢᠨᠢ ᠨᠡᠷ᠎ᠡ ᠲᠠᠢ ᠠᠪᠢᠶ᠎ᠠ ᠲᠥᠰᠦᠭᠡᠲᠡᠢ ᠳᠤᠲᠠᠭᠤ ᠬᠠᠭᠠᠰ ᠨᠡᠷ᠎ᠡ ᠶᠢ ᠬᠡᠯᠡᠳᠡᠭ ᠪᠠᠶᠢᠨ᠎ᠠ᠃ ᠬᠡᠦᠬᠡᠳ ᠡᠬᠢᠯᠡᠵᠦ ᠬᠡᠯᠡᠨ ᠳᠤ ᠣᠷᠣᠬᠤ ᠶᠠᠪᠤᠳᠠᠯ ᠪᠣᠯ ᠡᠬᠡ ᠡᠴᠢᠭᠡ ᠠᠬᠠᠮᠠᠳ ᠶᠡᠬᠡᠰ ᠤᠨ ᠬᠢᠨᠢ ᠨᠢᠭᠡᠨ ᠪᠠᠶᠠᠷᠲᠤ ᠬᠡᠷᠡᠭ ᠪᠣᠯᠳᠠᠭ ᠤᠴᠢᠷ ᠠᠴᠠ ᠬᠡᠦᠬᠡᠳ ᠢᠶᠠᠨ ᠥᠬᠦᠭᠡᠷᠳᠡᠨ ᠬᠠᠶᠢᠷᠠᠯᠠᠬᠤ ᠳᠠᠭᠠᠨ ᠠᠩᠬᠠᠨ ᠤ ᠬᠢᠨᠢ ᠬᠡᠯᠡᠭᠰᠡᠨ ᠲᠡᠳᠡᠭᠡᠷ ᠬᠥᠭᠡᠷᠦᠬᠦᠨ ᠨᠡᠷ᠎ᠡ ᠦᠭᠡ ᠶᠢ ᠬᠡᠦᠬᠡᠳ ᠤᠨ ᠠᠪᠤ ᠡᠵᠢ ᠠᠬ᠎ᠠ ᠡᠭᠡᠴᠢ ᠨᠠᠷ ᠨᠢ ᠮᠥᠨ ᠲᠡᠷᠡ ᠶᠠᠩᠵᠤ ᠪᠠᠷ ᠨᠢ ᠳᠠᠭᠤᠷᠢᠶᠠᠨ ᠬᠡᠯᠡᠵᠦ ᠪᠠᠶᠢᠭᠰᠠᠭᠠᠷ ᠰᠡᠭᠦᠯ ᠳᠡᠭᠡᠨ ᠲᠡᠷᠡ ᠬᠥᠮᠥᠨ ᠤ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠨᠡᠷ᠎ᠡ ᠪᠣᠯᠵᠤ ᠨᠡᠷᠡᠰᠢᠭᠡᠳ ᠤᠯᠠᠮ ᠢᠶᠠᠷ ᠣᠶᠢᠷ᠎ᠠ ᠬᠠᠪᠢ ᠶᠢᠨ ᠬᠥᠮᠥᠰ ᠤᠨ ᠳᠤᠮᠳᠠ ᠠᠯᠳᠠᠷᠰᠢᠨ ᠳᠡᠯᠭᠡᠷᠡᠭᠰᠡᠭᠡᠷ ᠲᠡᠷᠡ ᠶᠠᠪᠤᠭᠠᠨ ᠳᠠᠭᠠᠨ ᠪᠤᠰᠤᠳ ᠢ ᠬᠦᠨᠳᠦᠳᠬᠡᠨ ᠳᠠᠭᠤᠳᠠᠬᠤ ᠤᠳᠬ᠎ᠠ ᠪᠦᠬᠦᠢ ᠲᠤᠰᠬᠠᠢ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠨᠡᠷ᠎ᠡ ᠪᠣᠯᠵᠠᠢ︾ ᠭᠡᠪᠡ᠃      ᠡᠵᠡᠨ᠎ᠡ ᠲᠣᠷᠭᠤᠳ ᠤᠨ ︽ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠶᠢᠨ ᠳᠣᠲᠣᠷ᠎ᠠ ᠳᠡᠭᠡᠷ᠎ᠡ ᠳᠤᠷᠠᠳᠤᠭᠰᠠᠨ ᠪᠠᠶᠢᠳᠠᠯ ᠠᠴᠠ  ᠭᠠᠳᠠᠨ᠎ᠠ ᠪᠠᠰᠠ ᠠᠨᠳᠠᠢ᠂ ᠠᠳᠠᠢ᠂ ᠠᠨᠢᠶ᠎ᠠ᠂ ᠠᠵᠠᠢ᠂ ᠵᠤᠵᠤᠤ ᠭᠡᠬᠦ ᠮᠡᠲᠦ ᠶᠢᠨ ᠵᠠᠷᠢᠮ ᠴᠥᠭᠡᠨ ᠲᠣᠭᠠᠨ ᠤ ᠨᠡᠷ᠎ᠡ ᠎ ᠨᠢ ᠤᠤᠯ ᠬᠥᠮᠥᠨ ᠤ ᠵᠢᠩᠬᠢᠨᠢ ᠨᠡᠷ᠎ᠡ ᠲᠠᠢ ᠪᠠᠨ ᠠᠪᠢᠶ᠎ᠠ ᠳᠠᠭᠤᠳᠠᠯᠭ᠎ᠠ ᠶᠢᠨ ᠲᠠᠯ᠎ᠠ ᠪᠠᠷ ᠣᠭᠲᠣ ᠬᠤᠯᠪᠣᠭᠳᠠᠯ ᠦᠭᠡᠢ ᠪᠥᠭᠡᠳ ᠲᠡᠷᠡ ᠨᠢ ᠲᠤᠰᠬᠠᠶᠢᠯᠠᠨ ᠠᠬᠠᠮᠠᠳ ᠨᠠᠰᠤᠲᠠᠢ ᠬᠥᠮᠥᠰ ᠤᠨ ᠬᠡᠨ ᠳᠤ ᠴᠤ ᠭᠡᠳ ᠬᠡᠷᠡᠭᠯᠡᠬᠦ ᠦᠵᠡᠭᠳᠡᠯ ᠭᠠᠷᠤᠨ᠎ᠠ᠃ ᠡᠳᠡᠭᠡᠷ ᠦᠵᠡᠭᠳᠡᠯ ᠨᠢ ᠨᠢᠭᠡ ᠳᠤ᠂ ᠡᠳᠡᠭᠡᠷ ᠨᠡᠷ᠎ᠡ ᠨᠢ ᠤᠤᠯ ᠳᠠᠭᠠᠨ ᠮᠥᠨ ᠬᠡᠦᠬᠡᠳ ᠤᠨ ᠦᠭᠡ ᠠᠴᠠ ᠡᠭᠦᠰᠦᠭᠡᠳ ᠤᠯᠠᠮᠵᠢᠯᠠᠨ ᠳᠠᠮᠵᠢᠭᠰᠠᠭᠠᠷ ᠡᠴᠦᠰ ᠲᠡᠭᠡᠨ ᠣᠯᠠᠨ ᠨᠡᠶᠢᠲᠡ ᠳᠤ ᠵᠥᠪᠰᠢᠶᠡᠷᠡᠭᠳᠡᠬᠦ ᠣᠨᠴᠠᠭᠠᠢ ᠠᠪᠤᠭᠠᠶᠢᠯᠠᠭ᠎ᠠ ᠶᠢᠨ ᠨᠡᠷ᠎ᠡ ᠪᠣᠯᠵᠤ᠂ ᠲᠡᠭᠦᠪᠡᠷ ᠠᠬᠠᠮᠠᠳ ᠨᠠᠰᠤᠲᠠᠢ ᠬᠥᠮᠥᠰ ᠢ ᠬᠡᠨ ᠴᠤ ᠬᠠᠮᠢᠶ᠎ᠠ ᠦᠭᠡᠢ ᠠᠪᠤᠭᠠᠶᠢᠯᠠᠨ ᠳᠠᠭᠤᠳᠠᠵᠤ ᠡᠷᠬᠢᠮᠯᠡᠨ ᠬᠦᠨᠳᠦᠳᠬᠡᠭᠰᠡᠨ ᠰᠠᠨᠠᠭ᠎ᠠ ᠶᠢ ᠭᠠᠷᠭᠠᠳᠠᠭ︾᠃      ᠡᠵᠡᠨ᠎ᠡ ᠳᠤ ᠶᠡᠷᠦ ᠨᠢ ᠬᠡᠦᠬᠡᠳ ᠪᠠᠭᠠᠴᠤᠳ ᠲᠠᠭᠠᠨ ᠠᠬᠠᠴᠢᠯᠠᠬᠤ᠂ ᠳᠡᠭᠦᠦᠴᠢᠯᠡᠬᠦ ᠶᠣᠰᠣ ᠵᠠᠩᠰᠢᠯ ᠢ ᠰᠤᠷᠭᠠᠬᠤ ᠳᠠᠭᠠᠨ ᠦᠢᠷ᠎ᠡ ᠬᠤᠯᠠ ᠶᠢᠨ ᠲᠠᠨᠢᠬᠤ ᠥᠯᠥ ᠲᠠᠨᠢᠬᠤ ᠢᠯᠭᠠᠯ ᠦᠭᠡᠢ᠂ ᠥᠪᠡᠷ ᠤᠨ ᠲᠥᠷᠥᠯ ᠠᠴᠠ ᠪᠤᠰᠤ ᠨᠠᠰᠤ ᠪᠠᠷ ᠶᠡᠭᠡ ᠬᠥᠮᠥᠰ ᠢ ᠠᠪᠤᠭᠠᠶᠢᠯᠠᠭ᠎ᠠ ᠪᠠᠷ ᠬᠦᠨᠳᠦᠳᠬᠡᠨ ᠳᠠᠭᠤᠳᠠᠬᠤ ᠶᠢ ᠱᠠᠭᠠᠷᠳᠠᠳᠠᠭ᠃ ᠢᠯᠠᠩᠭᠤᠶ᠎ᠠ ᠠᠩᠬ᠎ᠠ ᠠᠭᠤᠯᠵᠠᠵᠤ ᠪᠠᠶᠢᠭ᠎ᠠ ᠥᠯᠥ ᠲᠠᠨᠢᠭᠴᠢ ᠬᠥᠮᠥᠨ ᠪᠶᠤ ᠬᠤᠯᠠ ᠭᠠᠵᠠᠷ ᠠᠴᠠ ᠢᠷᠡᠭᠰᠡᠨ ᠬᠥᠮᠥᠨ ᠳᠡᠭᠡᠷ᠎ᠡ ᠬᠡᠯᠡᠭᠰᠡᠨ ᠮᠡᠲᠦ ᠲᠤᠰᠬᠠᠢ ᠠᠪᠤᠭᠠᠶᠢᠯᠠᠭ᠎ᠠ ᠦᠭᠡᠢ ᠪᠠᠶᠢᠪᠠᠯ ᠪᠦᠰᠡᠲᠡᠢ ᠶᠢ ᠨᠢ ︽ᠠᠬ᠎ᠠ︾ ᠭᠡᠳ ᠪᠦᠰᠡᠭᠦᠢ ᠬᠥᠮᠥᠨ ᠢ ︽ᠡᠭᠡᠴᠢ︾ ᠭᠡᠵᠦ ᠲᠥᠷᠥᠯ ᠰᠠᠳᠤᠨ ᠤ ᠳᠠᠭᠤᠳᠠᠯᠭ᠎ᠠ ᠨᠡᠷ᠎ᠡ ᠶᠢ ᠰᠢᠯᠵᠢᠭᠦᠯᠦᠨ ᠠᠪᠤᠭᠠᠶᠢᠯᠠᠳᠠᠭ᠃ ᠭᠡᠬᠦ ᠳᠤ ︽ᠬᠥᠮᠥᠰ ᠢ ᠬᠤᠭᠤᠷᠣᠨᠳᠣ ᠨᠢ ᠢᠯᠭᠠᠪᠤᠷᠢ ᠲᠠᠢ ᠵᠢᠭᠠᠵᠤ ᠨᠡᠷᠡᠯᠡᠬᠦ ᠶᠢᠨ ᠲᠤᠰᠠᠳᠠ᠂ ᠲᠡᠷᠡ ᠬᠥᠮᠥᠨ ᠤ ᠨᠢᠭᠤᠷ ᠴᠢᠷᠠᠢ᠂ ᠪᠡᠶ᠎ᠡ ᠶᠢᠨ ᠶᠠᠩᠵᠤ ᠪᠠᠶᠢᠳᠠᠯ ᠬᠢᠭᠡᠳ ᠠᠪᠤᠷᠢ ᠵᠠᠩ ᠵᠡᠷᠭᠡ ᠪᠠᠷ ᠨᠢ ᠡᠰᠢ ᠪᠣᠯᠭᠠᠨ ᠲᠣᠳᠣᠳᠬᠠᠨ ᠠᠪᠤᠭᠠᠶᠢᠯᠠᠳᠠᠭ᠃ ᠲᠤᠬᠠᠶᠢᠯᠠᠪᠠᠯ᠂ ᠪᠤᠭᠤᠷᠤᠯ ᠠᠬ᠎ᠠ᠂ ᠪᠢᠴᠢᠬᠠᠨ ᠠᠬ᠎ᠠ᠂ ᠳᠣᠭᠰᠢᠨ ᠠᠬ᠎ᠠ᠂ ᠰᠠᠶᠢᠬᠠᠨ ᠡᠭᠡᠴᠢ᠂ ᠵᠢᠭᠠᠬᠠᠨ ᠡᠵᠢ᠂ ᠥᠨᠳᠥᠷ ᠠᠬ᠎ᠠ᠂ ᠯᠠᠮᠠ ᠠᠬ᠎ᠠ᠂ ᠰᠠᠶᠢᠨ ᠠᠬ᠎ᠠ᠂ ᠨᠣᠮᠣᠬᠠᠨ ᠡᠵᠢ᠂ ᠥᠨᠳᠥᠷ ᠡᠵᠢ᠂ ᠤᠯᠠᠭᠠᠨ ᠠᠬ᠎ᠠ᠂ ᠪᠣᠷᠣ ᠠᠬ᠎ᠠ᠂ ᠰᠢᠷ᠎ᠠ ᠡᠭᠡᠴᠢ᠂ ᠪᠣᠷᠣ ᠡᠭᠡᠴᠢ᠂ ᠪᠦᠳᠦᠭᠦᠨ ᠠᠬ᠎ᠠ᠂ ᠭᠡᠬᠦ ᠮᠡᠲᠦ ᠪᠠᠷ ᠠᠪᠤᠭᠠᠶᠢᠯᠠᠨ᠎ᠠ᠃ ᠢᠩᠭᠢᠵᠦ ᠠᠪᠤᠭᠠᠶᠢᠯᠠᠬᠤ ᠨᠢ ᠪᠦᠷ ᠪᠤᠰᠤᠳ ᠢ ᠬᠦᠨᠳᠦᠳᠬᠡᠨ ᠡᠷᠬᠢᠮᠯᠡᠬᠦ ᠪᠣᠯᠪᠠᠰᠤᠨ ᠶᠣᠰᠣ ᠪᠠᠷ ᠬᠠᠷᠢᠯᠴᠠᠬᠤ ᠤᠳᠬ᠎ᠠ ᠶᠢ ᠭᠠᠷᠭᠠᠳᠠᠭ ᠶᠤᠮ᠃ ᠡᠵᠡᠨ᠎ᠡ ᠶᠢᠨ ᠮᠣᠩᠭᠤᠯᠴᠤᠳ᠂ ᠬᠡᠦᠬᠡᠳ ᠪᠠᠭᠠᠴᠤᠳ ᠨᠢ ᠪᠤᠰᠤᠳ ︵ᠲᠥᠷᠥᠯ ᠰᠠᠳᠤᠨ ᠪᠤᠶᠤ︶ ᠨᠠᠰᠤ ᠶᠡᠭᠡ ᠬᠥᠮᠥᠰ ᠢ ︵ᠠᠬ᠎ᠠ᠂ ᠡᠭᠡᠴᠢ︶ ᠭᠡᠵᠦ ᠠᠪᠤᠭᠠᠶᠢᠯᠠᠬᠤ ᠶᠠᠪᠤᠳᠠᠯ ᠢ ᠬᠠᠮᠤᠭ ᠤᠨ ᠶᠡᠭᠡ ᠬᠦᠨᠳᠦᠳᠬᠡᠯ ᠳᠠᠭᠤᠳᠠᠯᠭ᠎ᠠ ᠭᠡᠵᠦ ᠦᠵᠡᠳᠡᠭ ᠪᠠᠶᠢᠨ᠎ᠠ︾᠃      ᠠᠯᠲᠠᠨ᠋ᠣ᠋ᠳᠣ ᠭᠤᠸᠠᠢ ︽ᠡᠵᠡᠨ᠎ᠡ ᠲᠣᠷᠭᠤᠳ ᠤᠨ ᠶᠣᠰᠣ ᠵᠠᠩᠰᠢᠯ ᠤᠨ ᠦᠢᠯᠡᠪᠦᠷᠢ︾ ᠭᠡᠬᠦ ᠨᠣᠮ ᠳᠠᠭᠠᠨ ᠡᠵᠡᠨ᠎ᠡ ᠬᠠᠭᠤᠴᠢᠨ ᠲᠣᠷᠭᠤᠳ ᠬᠤᠰᠢᠭᠤᠨ ᠤ ᠬᠡᠳᠦᠨ ᠦᠶ᠎ᠡ ᠶᠢᠨ ᠵᠠᠰᠠᠭ ᠨᠣᠶᠠᠨ᠂ ᠲᠥᠷᠥ ᠶᠢᠨ ᠪᠠᠶᠢᠯᠠ ᠸᠠᠩᠵᠢᠯᠴᠡᠷᠡᠨ ᠢ ︽ᠥᠨᠳᠥᠷ ᠳᠡᠭᠡᠳᠦ︾ ᠭᠡᠳ ᠳᠣᠯᠣᠳᠤᠭᠠᠷ ᠦᠶ᠎ᠡ ᠶᠢᠨ ᠨᠠᠢᠮᠠᠳᠤᠭᠠᠷ ᠵᠠᠰᠠᠭ ᠨᠣᠶᠠᠨ ᠵᠢᠶᠦ᠋ᠨ ᠸᠠᠩ ᠲᠦᠪᠰᠢᠨᠪᠠᠶᠠᠷ ᠢ ᠥᠨᠳᠥᠷ ᠠᠬ᠎ᠠ ᠭᠡᠳᠡᠭ ᠪᠠᠶᠢᠪᠠ᠃ ᠲᠤᠰ ᠬᠤᠰᠢᠭᠤᠨ ᠤ ᠡᠴᠦᠰ ᠤᠨ ᠨᠣᠶᠠᠨ᠂ ᠵᠠᠰᠠᠭ ᠵᠢᠶᠦ᠋ᠨ ᠸᠠᠩ ᠯᠾᠠᠸᠠᠩᠵᠠᠪ ᠢ ᠰᠠᠶᠢᠨ ᠠᠬ᠎ᠠ ᠭᠡᠬᠦ ᠮᠡᠲᠦ ᠪᠠᠷ ᠠᠪᠤᠭᠠᠶᠢᠯᠠᠵᠤ ᠪᠠᠶᠢᠵᠠᠢ ᠭᠡᠪᠡ᠃      ᠡᠵᠡᠨ᠎ᠡ ᠲᠣᠷᠭᠤᠳ ᠲᠤ ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠶᠢ ᠬᠡᠨ ᠪᠣᠯᠭᠠᠨ ᠳᠤ ᠬᠠᠮᠢᠶ᠎ᠠ ᠦᠭᠡᠢ ᠥᠭᠬᠦ ᠪᠤᠶᠤ ᠳᠤᠷ᠎ᠠ ᠪᠠᠷ ᠰᠣᠯᠢᠵᠤ ᠳᠠᠭᠤᠳᠠᠬᠤ ᠵᠠᠩᠰᠢᠯ ᠪᠠᠶᠢᠳᠠᠭ ᠦᠭᠡᠢ᠃ ᠬᠠᠷᠢᠨ ᠲᠤᠰ ᠲᠤᠰ ᠤᠨ ᠲᠣᠭᠲᠠᠭᠰᠠᠨ ᠠᠪᠤᠭᠠᠶᠢᠯᠠᠭ᠎ᠠ ᠪᠠᠷ ᠬᠦᠨᠳᠦᠳᠬᠡᠨ ᠳᠠᠭᠤᠳᠠᠳᠠᠭ ᠶᠣᠰᠣ ᠲᠠᠢ ᠪᠠᠶᠢᠯ᠎ᠠ᠃ ᠬᠡᠷᠪᠡ ᠣᠲᠣᠷ ᠨᠡᠭᠦᠳᠡᠯ ᠢᠶᠠᠷ ᠡᠰᠡᠪᠡᠯ ᠶᠠᠮᠠᠷ ᠨᠢᠭᠡᠨ ᠤᠴᠢᠷ ᠢᠶᠠᠷ ᠥᠯᠥ ᠮᠡᠳᠡᠬᠦ ᠭᠠᠵᠠᠷ ᠣᠴᠢᠵᠤ ᠲᠡᠨᠳᠡᠬᠢ ᠬᠥᠮᠥᠰ ᠲᠠᠢ ᠬᠠᠷᠢᠯᠴᠠᠬᠤ ᠦᠶ᠎ᠡ ᠳᠤ ᠨᠢᠭᠡ ᠨᠢᠭᠡᠨ ᠤ ᠪᠠᠨ ᠣᠪᠣᠭ ᠨᠡᠷ᠎ᠡ ᠠᠪᠤᠭᠠᠶᠢᠯᠠᠭ᠎ᠠ ᠶᠢ ᠣᠭᠲᠣ ᠮᠡᠳᠡᠬᠦ ᠦᠭᠡᠢ ᠲᠣᠬᠢᠶᠠᠯᠳᠤᠯ ᠭᠠᠷᠪᠠᠯ ᠤᠷᠢᠳ ᠢᠶᠠᠷ ᠠᠮᠤᠷ ᠮᠡᠨᠳᠦ ᠪᠠᠨ ᠠᠰᠠᠭᠤᠯᠴᠠᠭᠰᠠᠨ ᠤ ᠳᠠᠷᠠᠭ᠎ᠠ ︽ᠲᠠᠨ ᠤ ᠠᠯᠳᠠᠷ ᠶᠠᠭᠤ ᠪᠢᠯᠡ︖ ᠶᠠᠭᠠᠬᠢᠵᠤ ᠠᠪᠤᠭᠠᠶᠢᠯᠠᠬᠤ           ᠪᠢᠯᠡ︖︾ ᠭᠡᠵᠦ ᠠᠰᠠᠭᠤᠬᠤ ᠳᠤ ᠬᠠᠷᠢᠭᠤ ᠳᠤᠨᠢ ᠨᠡᠷ᠎ᠡ ᠪᠠᠨ ᠬᠡᠯᠡᠬᠦ ᠶᠢᠨ ᠬᠠᠮᠲᠤ ᠠᠪᠤᠭᠠᠶᠢᠯᠠᠭ᠎ᠠ ᠪᠠᠨ ᠴᠤ ᠬᠡᠯᠡᠵᠦ ᠥᠭᠳᠡᠭ ᠶᠤᠮ᠃ ᠶᠡᠷᠦ ᠶᠢᠨ ᠪᠠᠶᠢᠳᠠᠯ ᠳᠤ ᠪᠤᠰᠤᠳ ᠠᠴᠠ ᠠᠰᠠᠭᠤᠵᠤ ᠳᠠᠮ ᠢᠶᠠᠷ ᠮᠡᠳᠡᠬᠦ ᠵᠤᠷᠰᠢᠯ ᠲᠠᠢ ᠪᠠᠶᠢᠳᠠᠭ ᠠᠵᠢ᠃ ᠡᠨᠡ ᠨᠢ ᠬᠥᠮᠥᠨ ᠤ ᠨᠡᠷ᠎ᠡ ᠶᠢ  ᠪᠡᠶ᠎ᠡ ᠠᠴᠠ ᠨᠢ ᠠᠰᠠᠭᠤᠬᠤ ᠳᠤ ᠡᠪ ᠦᠭᠡᠢ ᠪᠣᠯᠬᠤ ᠠᠴᠠ ᠳᠠᠯᠳᠠᠷᠢᠵᠤ ᠪᠠᠶᠢᠬᠤ ᠶᠠᠪᠤᠳᠠᠯ ᠶᠤᠮ᠃      ᠮᠣᠩᠭᠤᠯᠴᠤᠳ ᠤᠨ ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠪᠣᠯ ᠶᠠᠭ ᠯᠡ ᠫᠷᠣᠹᠧᠰᠰᠣᠷ ᠴᠣᠶᠢᠳᠠᠨᠳᠠᠷ ᠤᠨ ᠥᠭᠦᠯᠡᠭᠰᠡᠨ ᠮᠡᠲᠦ ︽ᠠᠪᠤᠭᠠᠶᠢᠯᠠᠭ᠎ᠠ ᠨᠡᠷ᠎ᠡ ᠪᠣᠯ ᠪᠤᠰᠤᠳ ᠬᠥᠮᠥᠨ ᠤ ᠨᠡᠷ᠎ᠡ ᠶᠢ ᠰᠢᠭᠤᠳ ᠬᠡᠯᠡᠬᠦ ᠦᠭᠡᠢ ᠪᠠᠷ ᠥᠭᠡᠷ᠎ᠡ ᠦᠭᠡ ᠪᠠᠷ ᠤᠶᠠᠷᠠᠭᠤᠯᠤᠨ ᠳᠠᠭᠤᠳᠠᠵᠤ ᠪᠤᠰᠤᠳ ᠬᠥᠮᠥᠨ ᠢ ᠡᠷᠬᠢᠮᠯᠡᠨ ᠬᠦᠨᠳᠦᠳᠬᠡᠬᠦ ᠳᠤ ᠴᠢᠭᠯᠡᠭᠰᠡᠨ ᠤᠳᠬ᠎ᠠ ᠲᠠᠢ ᠪᠣᠯᠬᠤᠷ ᠲᠡᠷᠡ ᠨᠢ ᠰᠣᠨᠣᠰᠤᠭᠴᠢ ᠪᠠᠨ ᠤᠷᠮᠠᠰᠢᠭᠤᠯᠤᠨ ᠪᠠᠶᠠᠷᠯᠠᠭᠤᠯᠵᠤ ᠵᠥᠭᠡᠯᠡᠨ ᠲᠠᠭᠠᠲᠠᠢ ᠰᠡᠳᠬᠢᠯ ᠲᠥᠷᠥᠬᠦᠯᠦᠨ ᠬᠥᠮᠥᠰ ᠬᠤᠭᠤᠷᠣᠨᠳᠣ ᠪᠠᠨ ᠠᠶᠠᠲᠠᠢ ᠡᠶᠡᠯᠳᠡᠭ ᠢᠶᠠᠷ ᠬᠠᠷᠢᠯᠴᠠᠬᠤ ᠦᠢᠯᠡᠳᠦᠯ ᠬᠡᠷᠡᠭᠴᠡᠭᠡ ᠲᠠᠢ ᠪᠥᠭᠡᠳ ᠮᠥᠨ ᠪᠠᠭᠠᠴᠤᠳ ᠬᠡᠦᠬᠡᠳ ᠢᠶᠠᠨ ᠪᠠᠭ᠎ᠠ ᠠᠴᠠ ᠨᠢ ᠪᠣᠯᠪᠠᠰᠤᠨ ᠦᠭᠡ ᠶᠠᠷᠢᠶᠠᠨ ᠳᠤ ᠬᠥᠮᠥᠵᠢᠭᠦᠯᠬᠦ ᠨᠢᠭᠡᠨ ᠠᠷᠭ᠎ᠠ ᠬᠡᠯᠪᠡᠷᠢ ᠪᠣᠯᠳᠠᠭ ᠪᠠᠶᠢᠨ᠎ᠠ︾᠃       
  
ᠢᠷᠡᠯᠲᠡ᠄ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠠᠮ ᠵᠠᠭᠤᠴᠢᠯᠠᠭᠤᠷ ᠤᠨ ᠲᠥᠪ
 
 
ᠬᠠᠮᠢᠶ᠎ᠠ ᠪᠥᠬᠦᠢ ᠰᠤᠨᠢᠨ
  
︽ᠲᠣᠷᠭᠤᠳ︾ ᠬᠡᠮᠡᠬᠦ ᠨᠡᠷᠡᠶᠢᠳᠦᠯ ᠤᠨ ᠲᠤᠬᠠᠢ
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠡᠰᠡᠭ ᠭᠠᠵᠠᠷ ᠤᠨ ᠨᠡᠷᠡᠰ ᠤᠨ ᠢᠷᠡᠯᠲᠡ ︵ᠬᠤᠶᠠᠷ︶
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠬᠡᠰᠡᠭ ᠭᠠᠵᠠᠷ ᠤᠨ ᠨᠡᠷᠡᠰ ︵ᠨᠢᠭᠡ︶
ᠡᠵᠡᠨ᠎ᠡ ᠭᠡᠬᠦ ᠨᠡᠷ᠎ᠡ ᠲᠠᠢ ᠬᠣᠯᠪᠤᠭᠳᠠᠬᠤ ᠲᠤᠮᠤᠭ ᠶᠠᠷᠢᠶ᠎ᠠ
ᠡᠵᠡᠨ᠎ᠡ ᠨᠤᠲᠤᠭ ᠤᠨ ᠴᠡᠭᠡᠷ ᠶᠤᠰᠤᠨ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号