ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠡᠵᠡᠨ᠎ᠡ ᠳᠣᠷᠭᠤᠳ ᠤᠨ ᠵᠠᠰᠠᠭ ᠨᠣᠶᠠᠨ ᠪᠣᠯᠣᠨ ᠵᠠᠯᠰᠠᠷᠡᠢ ᠭᠡᠭᠡᠨ ︵ᠨᠢᠭᠡ︶
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018-11-23
                                                         ᠵᠣᠬᠢᠶᠠᠭᠴᠢ᠄  ᠨ᠊ · ᠭᠠᠯᠰᠠᠩᠫᠣᠩᠰᠤᠭ         — 2010 ᠣᠨ ᠤ 10 ᠳ᠋ᠣᠭᠠᠷ ᠰᠠᠷ᠎ᠠ ᠶᠢᠨ 25᠎ ᠤ ᠡᠳᠣᠷ᠂ ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠣᠯᠣᠰ ᠲᠦᠷᠤ ᠶᠢᠨ ᠵᠦᠪᠯᠡᠯᠭᠡᠨ ᠤ ᠣᠣᠯ ᠤᠨ ᠳᠡᠳ᠋ ᠳᠠᠷᠢᠬᠦᠯᠡᠭᠴᠢ  ᠳᠡᠳᠮ᠎ᠡ ᠠᠴᠠ ᠵᠠᠯᠰᠠᠷᠡᠢ ᠭᠡᠭᠡᠨ ᠵᠦᠩᠳᠦ᠋ᠢᠵᠠᠮᠰᠣ ᠭᠤᠸᠠᠢ ᠶᠢ ᠰᠣᠷᠪᠤᠯᠵᠢᠯᠠᠵᠤ᠂ ᠵᠣᠬᠢᠶᠠᠭᠴᠢ ᠳᠡᠮᠳᠡᠭᠯᠡᠵᠤ ᠨᠠᠶᠢᠷᠠᠭᠤᠯᠤᠨ ᠡᠮᠬᠢᠳᠭᠡᠪᠡ         ᠨᠢᠭᠡᠳᠦᠭᠡᠷ ᠲᠦᠷᠢ ᠶᠢᠨ ᠵᠠᠯᠰᠠᠷᠡᠢ ᠭᠡᠭᠡᠨ         ᠮᠤᠩᠭᠤᠯ ᠣᠭᠰᠠᠭᠠᠳᠠᠨ ᠤ ᠡᠯ᠎ᠡ ᠠᠶᠢᠮᠠᠭ ᠨᠣᠳᠤᠭ ᠲᠤ ᠰᠢᠷ᠎ᠠ ᠶᠢᠨ ᠱᠠᠰᠢᠨ ᠢᠳᠡ ᠴᠡᠴᠡᠭᠯᠡᠨ ᠬᠦᠭᠵᠢᠵᠤ ᠪᠠᠶᠢᠭᠰᠠᠨ ᠴᠠᠭ ᠪᠠᠶᠢᠵᠡᠢ᠃ ᠬᠠᠯᠬ᠎ᠠ ᠶᠢᠨ ᠰᠠᠶᠢᠨ ᠨᠣᠶᠠᠨ ᠬᠠᠨ ᠠᠶᠢᠮᠠᠭ ᠤᠨ ᠡᠮᠤᠨ᠎ᠡ ᠵᠠᠬ᠎ᠠ ᠶᠢᠨ ᠬᠤᠰᠢᠭᠤ ᠨᠣᠳᠤᠭ᠂ ᠲᠡᠷᠡᠴᠢᠯᠡᠨ ᠳ᠋ᠠ ᠬᠦᠷᠢᠶ᠎ᠡ ᠠᠴᠠ ᠯᠾᠠᠰᠠ ᠬᠦᠮᠪᠦᠮ᠂ ᠯᠠᠪᠷᠤᠩ ᠵᠡᠷᠭᠡ ᠪᠤᠷᠬᠠᠨ ᠤ ᠣᠷᠣᠨ ᠳᠤ ᠡᠷᠬᠦᠯ ᠮᠦᠷᠬᠦᠯ ᠬᠢᠬᠦ ᠰᠦᠰᠦᠭᠳᠡᠨ᠂ ᠭᠠᠨᠵᠸᠣ ᠰᠦᠵᠸᠣ ᠠᠴᠠ ᠬᠦᠨᠡᠰᠣ ᠪᠠᠷᠠᠭ᠎ᠠ ᠳᠡᠭᠡᠭᠡᠬᠦ ᠵᠢᠩᠴᠢᠨ ᠨᠠᠷ ᠶᠠᠪᠣᠬᠤ ᠵᠠᠮ ᠤᠨ ᠨᠢᠭᠡ ᠨᠢ ᠡᠵᠡᠨ᠎ᠡ ᠶᠢᠨ ᠭᠤᠤᠯ ᠤᠨ ᠳᠣᠷᠭᠤᠳ ᠬᠤᠰᠢᠭᠤᠨ ᠤ ᠨᠣᠳᠤᠭ ᠪᠠᠶᠢᠪᠠ᠃         ᠬᠠᠯᠬ᠎ᠠ ᠶᠢᠨ ᠵᠢᠨᠤᠩ ᠸᠠᠩ ᠤᠨ ᠬᠤᠰᠢᠭᠤ᠂ ᠪᠠᠯᠳᠠᠨ ᠵᠠᠰᠠᠭ ᠤᠨ ᠬᠤᠰᠢᠭᠤ ᠨᠢ ᠡᠵᠡᠨ᠎ᠡ ᠶᠢᠨ ᠳᠣᠷᠭᠤᠳ ᠬᠤᠰᠢᠭᠤ ᠲᠠᠢ ᠵᠠᠬ᠎ᠠ ᠵᠡᠷᠭᠡᠯᠡᠳᠡᠭᠡ ᠣᠷᠣᠰᠢᠳᠠᠭ ᠪᠦᠭᠡᠳ ᠨᠠᠶᠢᠷᠰᠠᠭ ᠬᠠᠷᠢᠴᠠᠭ᠎ᠠ ᠶᠠᠪᠤᠯᠴᠠᠭ᠎ᠠ ᠲᠠᠢ ᠪᠠᠶᠢᠵᠤ᠂ ᠳᠣᠷᠭᠤᠳ ᠤᠨ ᠵᠠᠷᠢᠮ ᠦᠶ᠎ᠡ ᠶᠢᠨ ᠵᠠᠰᠠᠭ ᠨᠤᠶᠠᠨ ᠬᠠᠯᠬ᠎ᠠ ᠶᠢᠨ ᠬᠤᠰᠢᠭᠤᠨ ᠠᠴᠠ ᠪᠡᠷᠢ ᠭᠤᠶᠤᠵᠤ ᠬᠠᠳᠣᠨ ᠪᠤᠯᠭᠠᠭᠰᠠᠨ ᠲᠡᠤᠭᠡ ᠴᠦ ᠪᠤᠢ᠃         ᠪᠠᠯᠳᠠᠨ ᠵᠠᠰᠠᠭ ᠤᠨ ᠬᠤᠰᠢᠭᠤ ᠨᠢ ᠱᠠᠰᠢᠨ ᠤ ᠭᠡᠭᠡᠨ ᠬᠤᠳᠣᠭᠳᠣ ᠭᠡᠵᠤ ᠪᠠᠶᠢᠳᠠᠭ ᠦᠭᠡᠢ᠂ ᠴᠦᠭᠡᠨ ᠯᠠᠮᠠ ᠲᠠᠢ ᠰᠦᠮ᠎ᠡ ᠭᠡᠶᠢᠳ ᠴᠦ ᠪᠠᠶᠢᠭᠰᠠᠨ ᠦᠭᠡᠢ ᠭᠡᠨ᠎ᠡ᠃ ᠬᠡᠨᠡᠳᠳᠡ ᠠᠯᠠᠱᠠ ᠦᠭᠡᠯᠡᠳ ᠬᠤᠰᠢᠭᠤᠨ ᠠᠴᠠ ᠨᠢᠭᠡᠨ ᠱᠠᠪᠷᠤᠩ ᠯᠠᠮᠠ ᠳᠠᠨᠤᠵᠤ ᠬᠦᠷᠴᠡᠢ᠃ ᠨᠤᠮ ᠡᠷᠳᠡᠮ ᠰᠠᠶᠢᠳᠠᠢ ᠮᠡᠳᠡᠯᠭᠡ ᠦᠷᠭᠡᠨ ᠯᠠᠮᠠ ᠪᠠᠶᠢᠭᠰᠠᠨ ᠠᠵᠢ᠃ ᠡᠨᠡ ᠱᠠᠪᠷᠦᠩ ᠣᠣᠯ ᠨᠢ ᠠᠯᠠᠱᠠ ᠶᠢᠨ ︽ᠴᠠᠭᠠᠨ ᠠᠭᠤᠯᠠ︾ ᠰᠦᠮ᠎ᠡ ᠶᠢᠨ ᠱᠠᠪᠷᠦᠩ ᠯᠠᠮᠠ ᠪᠠᠶᠢᠪᠠ ᠭᠡᠨ᠎ᠡ᠃ ᠨᠢᠭᠡᠨ ᠡᠳᠣᠷ ᠬᠠᠪᠴᠢᠭ ᠡᠬᠦᠷᠭᠡ ᠪᠠᠨ ᠪᠠᠭᠯᠠᠭᠠᠳ ᠳᠠᠯᠪᠢᠴᠢᠬᠠᠭᠰᠠᠨ ᠠᠶᠠᠨ ᠵᠠᠮ ᠳᠤ ᠭᠠᠷᠬᠤ ᠶᠠᠩᠵᠤ ᠲᠠᠢ ᠰᠠᠭᠤᠵᠤ ᠪᠠᠶᠢᠪᠠ ᠭᠡᠨ᠎ᠡ᠃ ᠬᠠᠮᠳᠣ ᠯᠠᠮᠠ ᠨᠢ ᠰᠡᠵᠢᠭ ᠠᠪᠤᠭᠠᠳ ᠰᠦᠮ᠎ᠡ ᠶᠢᠨ ᠳ᠋ᠠ ︵ᠶᠡᠭᠡ︶ ᠯᠠᠮᠠ ᠳᠠᠭᠠᠨ ᠮᠡᠳᠡᠬᠦᠯᠵᠡᠢ᠃ ᠳ᠋ᠠ ᠯᠠᠮᠠ ᠰᠦᠮ᠎ᠡ ᠪᠠᠨ ᠰᠢᠯᠭᠠᠭᠰᠠᠨ ᠴᠢᠨᠢ ᠰᠠᠬᠢᠭᠤᠰᠣ ᠡᠷᠳᠡᠨᠢ ᠨᠢ ᠠᠯᠠᠭ᠎ᠠ ᠪᠤᠯᠵᠡᠢ᠃ ᠢᠩᠭᠢᠬᠦ ᠳᠤ ᠱᠠᠪᠷᠤᠩ ᠯᠠᠮᠠ ᠪᠠᠨ ᠨᠡᠩᠵᠢᠭᠰᠡᠨ ᠳᠤ ᠡᠬᠦᠷᠭᠡᠨ ᠳᠣᠳᠣᠷ᠎ᠠ ᠠᠴᠠ ᠨᠢ ᠰᠠᠬᠢᠭᠤᠰᠤ ᠡᠷᠳᠡᠨᠢ ᠨᠢ ᠭᠠᠷᠴᠣ ᠭᠡᠨ᠎ᠡ᠃         ᠱᠠᠪᠷᠤᠩ ᠨᠢ ᠬᠤᠯᠠᠭᠠᠶᠢᠯᠠᠬᠤ ᠭᠡᠰᠡᠨ ᠰᠠᠨᠠᠭ᠎ᠠ ᠪᠢᠰᠢ᠂ ᠠᠶᠤᠯ ᠳᠦᠢᠮᠡᠷ ᠠᠴᠠ ᠬᠤᠯᠠᠳᠠᠭᠤᠯᠵᠣ ᠬᠠᠮᠠᠭᠠᠯᠠᠵᠤ ᠪᠠᠶᠢᠭᠠᠳ ᠪᠣᠴᠠᠭᠠᠨ ᠠᠪᠴᠢᠷᠠᠵᠤ ᠳᠠᠬᠢᠬᠤ ᠭᠡᠰᠡᠨ ᠶᠤᠮ ᠭᠡᠳ ᠵᠦᠷᠢᠴᠡᠯ ᠪᠤᠯᠵᠡᠢ᠃ ᠵᠦᠪ ᠪᠣᠷᠣᠭᠤ ᠨᠢ ᠢᠯᠭᠠᠷᠠᠭᠰᠠᠨ ᠦᠭᠡᠢ ᠪᠤᠯᠬᠤᠷ ᠵᠠᠰᠠᠭ ᠤᠨ ᠭᠠᠵᠠᠷ ᠵᠠᠷᠭᠤ ᠮᠡᠳᠡᠬᠦᠯᠥᠭᠰᠡᠨ ᠤ ᠡᠴᠣᠰ ᠲᠤ ᠱᠠᠪᠷᠦᠩ ᠱᠣᠷᠤᠩ ᠳᠤ ᠣᠷᠣᠵᠡᠢ᠃ ᠰᠡᠬᠦᠯᠡᠷ ᠨᠢ ︽ᠴᠠᠭᠠᠨ ᠠᠭᠤᠯᠠ︾ ᠰᠦᠮ᠎ᠡ ᠶᠢᠨ ᠳᠣᠭᠠᠩ ᠦᠨᠡᠭᠡᠷ ᠭᠠᠯ ᠠᠯᠳᠠᠵᠣ ᠲᠦᠢᠮᠡᠷ ᠭᠠᠷᠴᠣ ᠭᠡᠨ᠎ᠡ᠃ ᠱᠠᠪᠷᠤᠩ ᠬᠤᠵᠢᠮ ᠨᠢ ᠱᠣᠷᠤᠩ ᠠᠴᠠ ᠰᠣᠯᠠᠯᠠᠭᠳᠠᠮᠠᠭᠴᠠ ᠲᠡᠷᠡ ᠴᠢᠭ ᠲᠡᠭᠡᠨ ᠵᠢᠯᠢᠢᠵᠤ ᠪᠠᠯᠳᠠᠨ ᠵᠠᠰᠠᠭ ᠤᠨ ᠨᠣᠳᠤᠭ ᠲᠤ ᠬᠦᠷᠦᠭᠰᠡᠨ ᠨᠢ ᠡᠨᠡ ᠪᠠᠶᠢᠵᠡᠢ᠃ ᠡᠷᠳᠡᠮ ᠨᠤᠮ ᠰᠠᠶᠢᠳᠡᠢ ᠣᠴᠢᠷ ᠭᠡᠳᠣᠨ ᠵᠢᠯ ᠤᠨ ᠳᠣᠳᠣᠷ᠎ᠠ ᠳᠣᠮᠳᠠ ᠰᠠᠶᠢᠬᠠᠨ ᠤ ︽ᠶᠤᠯᠤ ᠶᠢᠨ ᠠᠮᠠᠨ︾᠎ ᠳᠤ ᠪᠢᠴᠢᠬᠠᠨ ᠭᠡᠶᠢᠳ ᠪᠠᠷᠢᠵᠤ ᠵᠠᠰᠠᠭ ᠤᠨ ᠨᠣᠳᠤᠭ ᠨᠢ ᠢᠩᠭᠢᠭᠡᠳ ᠱᠠᠪᠷᠤᠩ ᠤᠨ ᠭᠡᠶᠢᠳ ᠲᠠᠢ ᠪᠤᠯᠤᠭᠰᠠᠨ ᠶᠤᠮ ᠭᠡᠨ᠎ᠡ᠃ ᠡᠨᠡ ᠶᠠᠪᠤᠳᠠᠯ ᠠᠷᠪᠠᠨ ᠶᠢᠰᠦᠳᠦᠭᠡᠷ ᠵᠠᠭᠤᠨ ᠤ ᠳᠣᠮᠳᠠᠴᠢ ᠦᠶ᠎ᠡ ᠶᠢᠨ ᠣᠴᠢᠷ ᠪᠤᠯᠤᠯᠳᠠᠢ᠃         ᠮᠥᠨ ᠡᠨᠡ ᠦᠶ᠎ᠡ ᠪᠠᠷ ᠵᠠᠰᠠᠭ ᠤᠨ ᠬᠤᠰᠢᠭᠤᠨ ᠤ ᠨᠠᠮᠵᠢᠯ ᠬᠠᠭᠠᠯᠭᠠᠴᠢ ᠭᠡᠳᠡᠭ ᠬᠦᠮᠦᠨ ᠲᠠᠢ ᠨᠢᠭᠡ ᠭᠠᠯ ᠤᠨ ᠬᠢᠨ ᠬᠦᠮᠪᠤᠮ ᠯᠠᠪᠷᠤᠩ ᠳᠤ ᠡᠷᠬᠦᠯ ᠮᠦᠷᠬᠦᠯ ᠬᠢᠭᠡᠳ ᠪᠣᠴᠠᠬᠤ ᠵᠠᠮ ᠳᠠᠭᠠᠨ ᠮᠢᠨ ᠴᠢᠨ ᠤ ᠨᠣᠳᠤᠭ ᠤᠨ ᠵᠠᠬ᠎ᠠ ᠳᠠᠬᠢ ᠳᠠᠷᠢᠶᠠᠯᠠᠬᠤ ᠳᠣᠰᠬᠤᠨ ᠤ ᠦᠢᠷᠠᠯᠴᠠᠭ᠎ᠠ ᠪᠠᠭᠤᠵᠤ ᠮᠠᠶᠢᠬᠠᠨ ᠪᠣᠰᠬᠠᠨ ᠭᠠᠯᠯᠠᠵᠤ ᠪᠠᠶᠢᠳᠠᠯ᠎ᠠ ᠨᠢᠭᠡ ᠵᠢᠭᠠᠯ ᠬᠦᠤ ᠣᠷᠣᠵᠣ ᠢᠷᠡᠭᠡᠳ ᠯᠠ ᠰᠠᠭᠤᠴᠢᠬᠠᠵᠤ ᠭᠡᠨ᠎ᠡ᠃ ᠬᠤᠭᠤᠯᠠ ᠣᠮᠳᠠ ᠢᠳᠡᠬᠦᠯᠦᠭᠡᠳ ᠣᠨᠳᠠᠬᠤ ᠪᠣᠯᠣᠭᠰᠠᠨ ᠳᠤ ᠪᠠᠰᠠ ᠯᠠ ᠶᠠᠪᠤᠭᠰᠠᠨ ᠦᠭᠡᠢ᠂ ᠭᠡᠯᠡ ᠨᠡᠪᠳᠡᠷᠡᠬᠦ ᠦᠭᠡᠢ ᠶᠤᠮ ᠴᠢᠨᠢ ᠤᠷᠤ ᠵᠠᠰᠠᠵᠣ ᠬᠤᠨᠣᠭᠤᠯᠵᠡᠢ ᠃ ᠡᠨᠡ ᠮᠡᠳᠣ ᠭᠡᠳᠣ ᠬᠤᠨᠣᠵᠣ ᠣᠨᠤᠭ᠎ᠠ ᠳᠡᠮᠡᠭᠡ ᠪᠠᠨ ᠠᠮᠠᠷᠠᠭᠤᠯᠵᠤ ᠠᠪᠤᠭᠠᠳ ᠶᠠᠪᠤᠬᠤ ᠪᠤᠯᠤᠭᠰᠠᠨ ᠳᠤ ᠪᠠᠰᠠ ᠯᠠ ᠶᠠᠪᠤᠳᠠᠭ ᠦᠭᠡᠢ ᠭᠡᠨ᠎ᠡ᠃ ᠠᠷᠭ᠎ᠠ ᠶᠠᠳᠠᠬᠤ ᠳᠠᠭᠠᠨ ᠵᠢᠭᠠᠯ ᠬᠦᠤ ᠶᠢ ᠠᠪᠤᠭᠠᠳ ᠳᠣᠰᠬᠤᠨ ᠳᠤ ᠣᠷᠣᠵᠣ ᠭᠡᠷ ᠢ ᠨᠢ ᠡᠷᠢᠵᠤ ᠶᠠᠪᠤᠭᠠᠳ ᠣᠯᠣᠭᠰᠠᠨ ᠴᠢᠨᠢ ᠬᠤᠯᠤᠰᠤᠨ ᠳᠡᠪᠢᠰᠭᠡᠷ ᠲᠠᠢ᠂ ᠬᠤᠴᠢᠯᠭ᠎ᠠ ᠦᠭᠡᠢ ᠰᠢᠬᠠᠭᠤ ᠶᠠᠳᠠᠷᠠᠭᠰᠠᠨ ᠠᠮᠢᠳᠣᠷᠠᠯ ᠲᠠᠢ ᠯᠥᠸᠧ ᠣᠪᠣᠭ ᠲᠠᠢ ᠭᠠᠭᠴᠠ ᠪᠡᠶ᠎ᠡ ᠡᠮᠡᠭᠳᠡᠢ ᠪᠠᠶᠢᠵᠤ ᠭᠡᠨ᠎ᠡ᠃ ᠭᠡᠯᠡ ᠰᠠᠶᠢᠬᠠᠨ ᠨᠡᠪᠳᠡᠷᠡᠯᠴᠡᠬᠦ ᠦᠭᠡᠢ᠂ ᠭᠡᠣᠭᠡᠳ ᠢᠶᠠᠨ ᠦᠭᠬᠦᠶ᠎ᠡ᠂ ᠠᠪᠤᠭᠠᠳ ᠶᠠᠪᠤ᠂ ᠬᠦᠮᠦᠨ ᠪᠤᠯᠭᠠᠵᠤ ᠠᠪ ᠭᠡᠳ ᠪᠠᠶᠢᠬᠤ ᠰᠢᠭ᠋᠂ ᠭᠠᠷ ᠤᠨ ᠳᠣᠬᠢᠶ᠎ᠠ᠂ ᠬᠦᠳᠡᠯᠣᠯ ᠢᠶᠠᠷ ᠠᠷᠡᠢ ᠭᠡᠵᠤ ᠰᠠᠨᠠᠭ᠎ᠠ ᠪᠠᠨ ᠮᠡᠳᠡᠯᠴᠡᠵᠣ ᠭᠡᠳᠣᠨ ᠴᠠᠭᠠᠨ ᠶᠠᠩᠴᠢᠶᠠᠨ ᠠᠯᠠᠭᠠᠨ ᠳᠡᠭᠡᠷ᠎ᠡ ᠨᠢ ᠳᠠᠯᠪᠢᠭᠠᠳ ᠭᠡᠣᠭᠡᠳ ᠢ ᠨᠢ ᠠᠪᠤᠭᠠᠳ ᠶᠠᠪᠤᠭᠰᠠᠨ ᠭᠡᠨ᠎ᠡ᠃ ᠨᠠᠮᠵᠢᠯ ᠬᠠᠭᠠᠯᠭᠠᠴᠢ ᠭᠡᠤᠭᠡᠳ ᠦᠭᠡᠢ ᠬᠦᠮᠦᠨ ᠪᠠᠶᠢᠭᠰᠠᠨ ᠪᠤᠯᠬᠤᠷ ᠨᠣᠳᠤᠭ ᠲᠠᠭᠠᠨ ᠬᠦᠷᠦᠭᠡᠳ ᠭᠠᠯ ᠭᠤᠯᠤᠮᠳᠠ ᠪᠠᠨ ᠳᠣᠰᠢᠶᠠᠪᠠᠯ ᠬᠤᠵᠢᠮ ᠠᠪᠴᠣ ᠶᠠᠪᠤᠵᠤ ᠴᠢᠳᠠᠬᠤ ᠨᠢ ᠤᠤ᠂ ᠦᠭᠡᠢ ᠤᠤ ᠭᠡᠵᠤ ᠸᠴᠢᠷ ᠵᠢᠷᠤᠬᠠᠶᠢᠴᠢ ᠭᠡᠭᠴᠢ ᠳᠤ ᠦᠵᠡᠬᠦᠯᠵᠤ ᠭᠡᠨ᠎ᠡ᠃ ᠸᠴᠢᠷ᠄ ︽ᠪᠠᠯᠳᠠᠨ ᠵᠠᠰᠠᠭ ᠤᠨ ᠶᠡᠭᠡ ᠪᠤᠶᠠᠨᠳᠠᠨ ᠢ ᠤᠯᠵᠤ ᠢᠷᠡᠭᠰᠡᠨ ᠶᠤᠮ ᠪᠠᠶᠢᠨ᠎ᠠ᠂ ᠬᠤᠷᠳᠣᠨ ᠠᠷᠤ ᠪᠣᠭᠳᠠ ᠳᠤ ᠠᠶᠢᠯᠠᠳᠬᠠᠵᠤ ᠠᠰᠠᠭᠤ︾ ᠭᠡᠵᠤ ᠵᠢᠷᠤᠬᠠᠶᠢᠯᠡᠵᠡᠢ᠃ ᠰᠡᠬᠦᠯᠡᠷ ᠨᠢ ᠳ᠋ᠠ ᠬᠦᠷᠢᠶ᠎ᠡ ︵ᠨᠡᠶᠢᠰᠯᠡᠯ︶ ᠣᠷᠣᠵᠣ᠂ ᠪᠣᠭᠳᠠ ᠠᠴᠠ ᠳᠣᠳᠣᠯᠠᠵᠣ ︽ᠵᠠᠯᠰᠠᠷᠡᠢ ᠭᠡᠭᠡᠨ︾᠎ ᠢᠶᠠᠷ ᠴᠣᠯᠠᠯᠠᠵᠡᠢ᠃ ︵ᠵᠠᠯ᠊ — ᠪᠤᠷᠬᠠᠨ ᠤ ᠱᠠᠪᠢ ᠭᠡᠰᠡᠨ ᠦᠭᠡ ᠪᠤᠶᠤ ᠼᠠᠩᠶᠠᠩᠵᠠᠮᠰᠣ ᠯᠠᠮᠠ ᠶᠢᠨ ᠱᠠᠪᠢ ᠭᠡᠰᠡᠨ ᠣᠳᠬ᠎ᠠ ᠲᠠᠢ ᠦᠭᠡ ᠶᠤᠮ︶ ᠪᠠᠯᠳᠠᠨ ᠵᠠᠰᠠᠭ ᠤᠨ ᠨᠣᠳᠤᠭ ᠶᠡᠭᠡ ᠯᠠ ᠳᠡᠪᠵᠢᠶᠡᠨ ᠪᠤᠯᠵᠤ ᠦᠨᠦᠬᠢ ᠳᠡᠨᠣᠵᠣ ᠢᠷᠡᠭᠰᠡᠨ ᠠᠯᠠᠱᠠ ᠱᠠᠪᠷᠤᠩ ᠢ ᠪᠠᠭᠰᠢ ᠵᠠᠯᠠᠨ᠂ ᠰᠣᠭᠤᠣ ᠵᠢᠭᠠᠯ ᠬᠦᠣ ᠶᠢ ᠱᠠᠪᠢᠯᠠᠨ ᠰᠣᠷᠣᠯᠴᠠᠭᠤᠯᠵᠤ᠂ ᠪᠠᠶᠢᠰᠢᠩᠳᠣ ᠶᠢᠨ ᠬᠤᠷᠠᠯ ᠤᠨ ᠭᠡᠶᠢᠳ ᠢ ᠱᠠᠯᠠᠪᠳᠠᠨ ᠪᠠᠶᠢᠭᠤᠯᠵᠤ᠂ ᠰᠢᠷᠡᠬᠡᠨ ᠳᠤ ᠵᠠᠯᠠᠭᠠᠳ ᠵᠠᠯᠰᠠᠷᠡᠢ ᠭᠡᠭᠡᠨ ᠲᠠᠢ ᠨᠣᠳᠤᠭ ᠪᠣᠯᠣᠭᠰᠠᠨ ᠶᠤᠮ ᠭᠡᠳᠡᠭ᠃ ᠰᠣᠭᠤᠣ ᠵᠢᠭᠠᠯ ᠰᠢᠷᠡᠭᠡᠨ ᠳᠤ ᠰᠠᠭᠠᠳᠠᠭᠰᠠᠨ ᠤ ᠳᠠᠷᠠᠭ᠎ᠠ ᠰᠢᠮᠳᠠᠨ ᠰᠣᠷᠣᠯᠴᠠᠵᠣ ᠡᠷᠳᠡᠮ ᠦᠨᠳᠦᠷ ᠮᠡᠳᠡᠯᠭᠡ ᠦᠷᠭᠡᠨ᠂ ᠳᠠᠯᠳᠠ ᠶᠢ ᠮᠡᠳᠡᠭᠴᠢ ᠠᠮᠢᠳᠣ ᠪᠣᠷᠬᠠᠨ ᠪᠣᠯᠬᠤ ᠪᠠᠨ ᠬᠤᠯᠠ ᠦᠢᠷ᠎ᠠ ᠳᠤ ᠳᠠᠨᠢᠭᠤᠯᠵᠡᠢ᠃ ᠨᠢᠭᠡ ᠶᠡᠭᠡ ᠣᠷᠳᠣ ᠭᠠᠩᠰᠠ ᠲᠠᠢ᠂ ᠦᠪᠡᠷ ᠢᠶᠠᠨ ᠰᠦᠯᠵᠢᠭᠰᠡᠨ ᠣᠯᠠᠪᠴᠢᠨ ᠱᠠᠬᠠᠢ ᠲᠠᠢ᠂ ᠰᠣᠨᠢᠨ ᠪᠣᠷᠣᠭᠵᠢᠭᠤᠨ ᠪᠦᠭᠡᠳ ᠣᠯᠠᠨ ᠳᠡᠮᠡᠭᠡ ᠲᠠᠢ ᠰᠠᠩ ᠵᠢᠰᠠ ᠪᠠᠨ ᠦᠪᠡᠷ ᠢᠶᠠᠨ ᠪᠦᠷᠢᠳᠭᠡᠵᠤ ᠮᠡᠳᠡᠳᠡᠭ ᠭᠡᠴᠡᠬᠦᠣ ᠬᠦᠮᠦᠨ ᠪᠠᠶᠢᠭᠰᠠᠨ ᠭᠡᠨ᠎ᠡ᠃       ᠵᠢᠨᠤᠩ ᠸᠠᠩ ᠤᠨ ᠬᠢᠨ ᠪᠠᠯᠳᠠᠨ ᠵᠠᠰᠠᠭ ᠤᠨ ᠬᠤᠰᠢᠭᠤ ᠶᠢ ᠰᠣᠭᠤᠣ ᠭᠡᠭᠡᠨ ᠲᠠᠢ ᠨᠣᠳᠤᠭ ᠭᠡᠳ ᠳᠣᠭᠤᠯ ᠦᠭᠡᠢ ᠶᠡᠭᠡᠷᠭᠡᠵᠤ ᠪᠠᠶᠢᠭᠠᠳ ᠴᠢᠳᠠᠭᠳᠠᠳᠠᠭ ᠶᠠᠪᠤᠳᠠᠯ ᠤᠴᠢᠷ ᠳᠣᠬᠢᠶᠠᠯᠳᠣᠨ ᠦᠯᠢᠭᠡᠷ ᠳᠣᠮᠤᠭ ᠭᠠᠷᠳᠠᠭ ᠪᠠᠶᠢᠵᠡᠢ᠃       ᠯᠾᠡᠸᠠᠩᠵᠠᠪ ᠨᠤᠶᠠᠨ ᠢ ᠭᠡᠣᠭᠡᠳ ᠠᠬᠤᠢ ᠴᠠᠭ ᠳ᠋ᠠᠰᠢᠴᠦ᠋ᠢᠯᠢᠩ ᠭᠡᠶᠢᠳ ᠲᠤ ᠱᠠᠪᠢᠯᠠᠨ ᠰᠣᠷᠣᠯᠴᠠᠵᠣ ᠪᠠᠶᠢᠭᠰᠠᠨ ᠨᠣᠶᠠᠨ ᠳᠦᠰᠢᠮᠡᠯ ᠤᠨ ᠭᠤᠷᠪᠠᠨ ᠭᠡᠣᠭᠡᠳ ᠴᠠᠭᠠᠨ ᠪᠤᠷᠬᠠᠨ ᠲᠤᠭᠤᠯᠵᠤ ᠮᠠᠨᠠᠷᠠᠵᠤ ᠬᠠᠯᠠᠭᠤᠷᠠᠵᠤ ᠰᠦᠢᠳ ᠪᠤᠯᠵᠡᠢ᠃ ᠳ᠋ᠠᠰᠢ ᠨᠣᠶᠠᠨ ᠠᠷᠭ᠎ᠠ ᠪᠠᠷᠠᠭᠳᠠᠨ ᠰᠠᠨᠳᠣᠷᠬᠤ ᠳᠠᠭᠠᠨ ᠵᠠᠰᠠᠭ ᠤᠨ ᠨᠣᠳᠤᠭ ᠤᠨ ᠰᠣᠭᠤᠣ ᠵᠠᠯᠰᠠᠷᠡᠢ ᠳᠤ ᠭᠡᠯᠡ ᠶᠠᠪᠤᠭᠤᠯᠤᠨ ᠡᠮ ᠵᠠᠯᠠᠵᠤ ᠭᠡᠨ᠎ᠡ᠃ ᠣᠮ ᠬᠤᠮ ᠦᠭᠡᠢ ᠳᠣᠪᠳᠣᠯᠭᠠᠭᠰᠠᠨ ᠡᠯᠴᠢ ᠪᠠᠴᠢᠮ ᠣᠴᠢᠷ ᠢᠶᠠᠨ ᠮᠡᠳᠡᠭᠳᠡᠭᠰᠡᠨ ᠳᠤ ᠬᠠᠷᠢᠭᠤ ᠳᠤᠨᠢ ᠬᠤᠶᠠᠷ ᠳᠣᠩ ᠡᠮ ᠪᠤᠭᠤᠵᠤ ᠦᠭᠬᠦᠭᠡᠳ ᠴᠠᠢ ᠬᠤᠭᠤᠯᠠ ᠦᠭᠬᠦᠩᠬᠦᠳᠡ ᠪᠣᠰᠢᠭᠤᠬᠠᠨ ᠪᠣᠴᠠᠨ ᠬᠠᠷᠢᠬᠤ ᠶᠢ ᠱᠠᠭᠠᠷᠳᠠᠨ ᠵᠠᠩᠨᠠᠵᠡᠢ᠃ ᠣᠴᠢᠷ ᠢ ᠣᠯᠣᠭᠰᠠᠨ ᠦᠭᠡᠢ ᠡᠯᠴᠢ ᠭᠤᠷᠪᠡᠨ ᠭᠡᠣᠭᠡᠳ ᠡᠪᠡᠳᠴᠢᠯᠡᠭᠰᠡᠨ ᠪᠠᠶᠢᠭ᠎ᠠ ᠰᠢᠤ ᠭᠡᠵᠤ ᠴᠢᠷᠡᠶᠢᠴᠢᠯᠠᠬᠤ ᠳᠤᠨᠢ ᠶᠠᠭᠤᠨ ᠣᠯᠠᠨ ᠦᠭᠡ ᠲᠠᠢ ᠶᠤᠮ᠂ ᠬᠤᠷᠳᠣᠨ ᠶᠠᠪᠤᠨ᠎ᠠ ᠤᠤ ᠦᠭᠡᠢ ᠤᠤ ᠴᠢ︖ ᠵᠠᠮ ᠳᠠᠭᠠᠨ ᠰᠠᠭᠠᠳᠠᠪᠠᠯ ᠳᠣᠯᠣᠭᠠᠢ ᠶᠢ ᠴᠢᠨᠢ ᠮᠡᠳᠡᠨ᠎ᠡ ᠰᠢᠤ ᠭᠡᠳ ᠵᠠᠩᠳᠣᠷᠬᠤ ᠳᠤᠨᠢ ᠡᠯᠴᠢ ᠪᠤᠴᠠᠭᠠᠳ ᠯᠠ ᠣᠮ ᠬᠤᠮ ᠦᠭᠡᠢ ᠳᠣᠪᠳᠣᠯᠭᠠᠨ ᠣᠨᠤᠭ᠎ᠠ ᠬᠦᠮᠦᠨ ᠬᠤᠶᠠᠷ ᠣᠰᠣᠨ ᠬᠤᠯᠣᠭᠠᠨ᠎ᠠ ᠪᠤᠯᠤᠭᠰᠠᠨ ᠶᠠᠭᠤᠮ᠎ᠠ ᠢᠷᠡᠬᠦ ᠳᠤ᠂ ᠨᠢᠭᠡ ᠭᠡᠣᠭᠡᠳ ᠨᠢ ᠠᠮᠢᠰᠬᠤᠭ᠎ᠠ ᠬᠤᠷᠢᠶᠠᠴᠢᠬᠠᠭᠰᠠᠨ ᠪᠠᠶᠢᠵᠤ ᠭᠡᠨ᠎ᠡ᠃ ᠭᠡᠣᠭᠡᠳ ᠵᠢᠭᠠᠬᠠᠨ ᠳᠦᠢᠨ ᠯᠾᠡᠸᠠᠩᠵᠠᠪ ᠡᠶᠢᠨ ᠬᠦ ᠡᠷᠯᠢᠭ ᠤᠨ ᠡᠯᠴᠢᠨ ᠤ ᠭᠠᠷ ᠠᠴᠠ ᠮᠣᠯᠳᠣᠷᠠᠭᠰᠠᠨ ᠳᠤ ᠪᠡᠯᠭᠡᠰᠢᠶᠡᠵᠤ ᠳ᠋ᠠᠰᠢ ᠨᠣᠶᠠᠨ ᠪᠢᠴᠢᠬᠠᠨ ᠳᠦᠢᠨ ᠢ ᠡᠬᠢᠨ ᠲᠦᠷᠢ ᠶᠢᠨ ᠵᠠᠯᠰᠠᠷᠡᠢ ᠪᠠᠭᠰᠢ ᠳᠤ ᠠᠴᠢᠯᠠᠯ ᠮᠡᠳᠡᠬᠦᠯᠦᠨ ᠳᠠᠩᠭᠠᠷᠢᠭ ᠪᠠᠷᠢᠯᠳᠣᠵᠣ ᠱᠠᠪᠢ ᠣᠷᠣᠭᠤᠯᠵᠡᠢ᠃ ᠡᠨᠡ ᠨᠢ ᠳᠣᠷᠭᠤᠳ ᠨᠣᠶᠠᠨ ᠵᠠᠯᠰᠠᠷᠡᠢ ᠬᠤᠶᠠᠷ ᠤᠨ ᠠᠩᠬᠠᠨ ᠤ ᠪᠠᠷᠢᠯᠳᠣᠯᠭ᠎ᠠ ᠶᠤᠮ ᠭᠡᠳᠡᠭ᠃ ᠠᠩᠬᠠᠨ ᠤ ᠵᠠᠯᠰᠠᠷᠡᠢ ᠭᠡᠭᠡᠨ ᠶᠡᠭᠡ ᠦᠨᠳᠦᠷ ᠨᠠᠰᠣᠯᠠᠵᠤ᠂ ᠦᠪᠡᠷ ᠤᠨ ᠵᠦᠩ ᠢᠶᠠᠷ ᠢᠶᠠᠨ ᠲᠠᠭᠠᠯᠠᠯ ᠪᠤᠯᠤᠬᠰᠠᠨ ᠶᠤᠮ ᠭᠡᠳᠡᠭ᠃                                  ︽ᠵᠠᠭ ᠤᠨ ᠴᠡᠩᠭᠡᠷ ᠭᠤᠪᠢ︾ ᠨᠤᠮ ᠠᠴᠠ ᠠᠪᠤᠪᠠ
 
ᠢᠷᠡᠯᠲᠡ᠄ ᠠᠯᠠᠱᠠ ᠶᠢᠨ ᠮᠤᠩᠭᠤᠯ ᠰᠦᠯᠵᠢᠶ᠎ᠠ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠡᠷᠳᠡᠨ ᠤ ᠡᠷᠳᠡᠨᠢᠰ ᠤᠨ ᠰᠠᠩ ᠪᠤᠯᠤᠭᠰᠠᠨ ᠬᠠᠷ᠎ᠠ ᠬᠤᠳᠠ ᠶᠢᠨ ᠪᠠᠭᠤᠷᠢ
ᠳᠤᠷᠭᠤᠤᠠ ᠠᠶᠢᠮᠠᠭ ᠤᠨ ᠢᠵᠠᠭᠤᠷ ᠡᠭᠦᠰᠤᠯ
ᠢᠷᠭᠡᠨ ᠣᠯᠣᠰ ᠤᠨ ᠡᠵᠡᠨ᠎ᠡ ᠶᠢᠨ ᠳᠣᠷᠭᠤᠳ ᠣᠨᠴᠠᠭᠠᠢ ᠬᠤᠰᠢᠭᠤᠨ ᠳᠠᠬᠢ ᠬᠠᠯᠬ᠎ᠠ ᠶᠢᠨ ᠴᠠᠭᠠᠴᠢᠳ
ᠡᠵᠡᠨ᠎ᠡ ᠳᠣᠷᠭᠤᠳ ᠤᠨ ᠵᠠᠰᠠᠭ ᠨᠣᠶᠠᠨ ᠪᠣᠯᠣᠨ ᠵᠠᠯᠰᠠᠷᠡᠢ ᠭᠡᠭᠡᠨ ︵ᠬᠤᠶᠠᠷ︶
ᠡᠵᠡᠨ᠎ᠡ ᠬᠤᠰᠢᠭᠤᠨ ᠤ ᠨᠠᠢᠮᠠᠨ ᠥᠶ᠎ᠠ ᠶᠢᠨ ᠠᠷᠪᠠᠨ ᠬᠤᠶᠠᠷ ᠨᠤᠶᠠᠨᠳ ᠤᠨ ᠳᠦᠭᠦᠮ ᠨᠠᠮᠳᠠᠷ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号